ސޯމާލިއާގެ ކަނޑުފޭރޭ މީހުން ހިފެހެއްޓި ލަންކާ އާއި އީރާނުގެ ބޯޓު ދޫކޮށްލައިފި

ސޯމާލިއާގެ ކަނޑުފޭރޭ މީހުން ހައިޖެކް ކުރި ސްރީ ލަންކާގެ މަސް ބޯޓަކާއި އީރާނުގެ ބޯޓް މިނިވަންކޮށްފައިވާ ކަމަށް ރިޕޯޓްތައް ބުނެފި އެވެ.

ސީޝެލްސްގެ ރައީސް ވަވެލް ރަމްކަލަވަންގެ އޮފީހުން ބުނީ ލަންކާގެ މަސްބޯޓް ސީޝެލްސް ސިފައިން ސަލާމަތްކުރީ މިދިޔަ ހޯމަ ދުވަހު ކަމަށެވެ. އިންޑިއާގެ ކަނޑުގެ އަސްކަރިއްޔާއިން ބުނީ އީރާނުގެ ދިދަ ޖަހާފައިވާ މަސް ބޯޓެއް މިނިވަންކޮށްފައިވާ ކަމަށެވެ.

ސީޝެލްސްގެ ބަޔާނުގައި ބުނެފައި ވަނީ "ހަތިޔާރު އެޅި ސޯމާލިއާގެ ކަނޑުފޭރޭ މީހުން" އެ އުޅަނދުތަކަށް ދިން ހަމަލާތަކުގެ ސަބަބުން އެ ސަރަހައްދުގެ ކަނޑުގެ ސަރަހައްދުގެ ސަލާމަތާ މެދު އިތުރު ކަންބޮޑުވުންތަކެއް އުފެދޭ ކަމަށެވެ. ގާޒާގައި ހިނގަމުންދާ ހަނގުރާމައިގެ ތެރޭގައި ޔަމަނުގެ އީރާނަށް ތާއީދުކުރާ ހޫތީ ހަނގުރާމަވެރިން ވަނީ ރަތް ކަނޑުގެ އުޅަނދުފަހަރަށް އަމާޒުކޮށް ކެމްޕޭނެއް ފަށައިފަ އެވެ.

"ސީޝެލްސްގެ ސްޕެޝަލް މިލިޓަރީ ފޯސް ބޯޓަށް އެރީ ވަރަށް ހިތްވަރާ އެކު ދޯނީގެ ފުރިހަމަ ކޮންޓްރޯލް ނަގަން، އަދި އަޅުގަނޑުމެންގެ ސްރީ ލަންކާގެ އަހުން ސަލާމަތް ކުރަން،" ރައީސްގެ ބަޔާނުގައިވެ އެވެ.

ލަންކާ އިން ކުރިން ބުނީ ސޯމާލިއާގެ ރަސްމީ ފަރާތްތަކާ ވާހަކަ ދައްކައިގެން ލަންކާގެ މަސް ބޯޓާއި އެ ބޯޓުގެ ފަޅުވެރިން ހިމާޔަތް ކުރުމުގެ މަސައްކަތް ކުރި ކަމަށެވެ.

ހޫތީންގެ ހަމަލާތަކުން ރަތް ކަނޑުގައި ދަތުރުކުރާ ވިޔަފާރީގެ އުޅަނދުތައް ހިމާޔަތް ކުރުމަށް އެމެރިކާ އިން އިސްނަގައިގެން ކުރިއަށް ގެންދާ އޮޕަރޭޝަނުގައި ބައިވެރިވާނެ ކަމަށް ލަންކާއިން ބުނިތާ ދެ ހަފުތާ ފަހުން ލަންކާގެ މަސް ބޯޓު ވަނީ ވަގަށް ނަގައިފަ އެވެ.

ސޯމާލިއާގެ އައްސޭރިފަށުން ހައިޖެކްކުރި އީރާނުގެ މަސްބޯޓެއް މިނިވަންކުރިކަން އިންޑިއާގެ ކަނޑުގެ އަސްކަރިއްޔާއިން ވަނީ ހާމަކޮށްފަ އެވެ.

"މަސްދޯންޏަށް ކަނޑުފޭރޭ މީހުން އަރައި ފަޅުވެރިން ހިސޯރު ކުރި،" އެއީ އީރާނުގެ ދިދަ ޖަހާފައިވާ އީމާން ނަމަކަށް ކިޔާ އުޅަނދެއްކަން ފާހަގަކުރައްވައި އިންޑިއާގެ ނޭވީގެ ތަރުޖަމާނު، ކޮމާންޑަރު ވިވެކް މަދްވާލް ވިދާޅުވި އެވެ.

އިންޑިއާގެ ކަނޑުގެ އަސްކަރީ އުޅަނދަކުން ވަނީ ބޯޓާ އެކު 17 ފަޅުވެރިން ކާމިޔާބުކަމާ އެކު މިނިވަން ކޮށްދީފަ އެވެ.