ކެންޑިޑޭޓެއްގެ ތަފާތު އާދައެއް: ބޮލުގައި އަބަދުމެ މަލެއް

ގަލޮޅު އުތުރު ދާއިރާއަށް ސަރުކާރުގެ ތާއީދު މިހާރު އޮތީ އާމިނަތު މިޔާދާ (އާނަ) އަށެވެ. އޭނާގެ ފޮޓޯތަކަށް ބަލާއިރު އެންމެންގެ ލޮލުގައި ވެސް އަޅައިގަންނާނީ ކަނާތް ފަރާތުގައި ޖަހާފައި ހުންނަ މަލެވެ.

ކުރިން ޓީޗަރެއްގެ ގޮތުން މަސައްކަތްކުރެއްވި އަދި ޓީވީއެމްގައި ކުޑަކުދިންނަށް ހާއްސަ ޝޯއެއް 2000ގެ އަހަރުތަކުގެ ކުރީކޮޅު ހުށައެޅުއްވި މިޔާދާގެ މި އާދަ ފެށުނީ މީގެ 23 އަހަރު ކުރިންނެވެ. އެކަމަކު މަލަކީ އޭނާ ކުޑައިރުއްސުރެ އެންމެ ބޮޑު ހިތްހަމަޖެހުމެވެ.

"އެންމެ ކުޑަކުޑަ އިރުއްސުރެ ގޭގައި ހުންނާނެ ބަގީޗާއެއް، ދެން ކޮންމެ ދުވަހަކު ހޭލައިގެން އަބަދުވެސް ބަގީޗާ ތެރޭގައި އުޅޭނީ. މާތައް ބިނދެލާ، މާތައް ބަލާލައި، ސާފުކޮށްލައި، އެއީ ހުރިހާ ވެސް ހިތްހަމަޖެހުމަކީ،" މިޔާދާ ވިދާޅުވި އެވެ.

"އެންމެ ދެރަވާ އިރު ވެސް ބައިވަރު މާތަކެއްގެ ތެރެއަށް ދެވިއްޖެއްޔާ ވަރަށް އުފާވޭ."

އެކަމަކު ބޮލަށް މާ ޖަހައިގެން ބޭރަށް ނުކުންނަވަން ފެއްޓެވީ މީގެ 23 އަހަރު ކުރިންނެވެ. ފުރަތަމަ ސްކޫލަށް ވަޑައިގަންނަވާ އިރު އެވެ. އެކަމަކު ފަހުން އައިސް ބަދަލުވީ ގެއިން ނުކުންނަވާ ކޮންމެ ފަހަރަކު ވެސް ބޮލުގައި މަލެއް ޖެއްސެވުމުގެ އާދައަކަށެވެ.

ފިހާރައިން މާ ގަނެގެން ގޭގައި އަބަދުވެސް ބަހައްޓަވަ އެވެ.

"މަލެއް ނެތިގެން ނުޖަހާ ހަނދާނެއް ނެތް. މިސާލަކަށް ބަންދު ދުވަހެއް [ނަމަ] އެދުވަހު ހުންނާނީ ގެއިން ނުނިކުމެ،" މިޔާދާ ވިދާޅުވި އެވެ.

"ކޮންމެވެސް މަލެއް ޖަހައިގެން ނުކުންނާނީ."

ގަލޮޅު އުތުރު ދާއިރާގެ ގޮނޑި ކާމިޔާބުކުރެވިއްޖެ ނަމަ ރައްޔިތުންގެ މަޖިލިހުގެ ޖަލްސާތަކުގައި ވެސް އޭނާ އިންނަވާނީ ބޭނުންކުރައްވާ ހެދުމަކާ ގުޅޭ މަލެއް ޖައްސަވައިގެންނެވެ.