އެންމެ ކުލަގަދަ، އެންމެ އަޑުގަދަ: ޖާބިރު މި ކައްކަނީ ކޮން އެއްޗެއް؟

'ސިޔާސަކަ' އެވެ. – ނޫނެކެވެ. ސަމާސާއެކެވެ. ނޫނެކެވެ. ސިޔާސީ ހަލަބޮލިކަމާއި ހޫނުކަމުން ފިނި ހިޔަލަކަށް ގެންގޮސްދޭނޭ އިންޓަވިއުއެކެވެ. – 'ސިޔާސަކަ' މިއީ އެ ޝޯ އެވެ. 

ކާށިދޫ ދާއިރާގެ މެމްބަރު، އަބްދުﷲ ޖާބިރުގެ ވެރިކަމެއްގައި ދިވެހި ރާއްޖެ އޮންނާނެ ގޮތް، ނުވަތަ އޮވެދާނެ ގޮތަކީ ހަގީގަތުގައި ވަރަށް ޝައުގުވެރިކުރުވަނިވި ތަސައްވުރެކެވެ. ވަރަށް ގިނަ މީހުންގެ ނަޒަރުގައި މިއީ ބިލާހެކެވެ. އެކަމަކު އަބްދުﷲ ޖާބިރަށް ހަމަ 100 ޕަސެންޓް ޔަގީނެވެ. އެހެންވީމަ، ރައީސަކަށް 'ޗެއާމަން' ހުންނަވައިގެން އަމްރުމައުރޫފު ހިންގަވަމުން ގެންދަވާތަން ހިޔާލަށް ނިކަން ގެނެސް ބައްލަވާށެވެ؟

'ސިޔާސަކަ'އިގެ ފުރަތަމަ އެޕިސޯޑަށް ދެއްވި އިންޓަވިއުގައި ޖާބިރަށް އެންމެ ކަމުދިޔަ ސުވާލަކަށް ވެސް ވީ މި ސުވާލެވެ: "ރާއްޖޭގެ ރައީސްކަން ދެ ތިން ދުވަހަށް ލިބިއްޖެ ނަމަ އުޅުއްވާނެ ގޮތާއި ކުރައްވާނެ ކަންތައްތަކަކީ ކޮބައިތޯ އެވެ؟" ސުވާލު ކަމުދިޔަވަރުން، ޖަވާބު ދެއްވީ އަދި މިއަށް ވުރެ ވެސް އެ ސުވާލު 'ސަޅިކޮށްލައްވައިގެން'ނެވެ.

"ދެ ތިން ދުވަހުން ކުރާނެ ކަންތައްތަކެއް ނޫން މި ދަންނަވާލަނީ. އެއް ގަޑިއިރު ތެރޭގައި ކުރާނެ ކަންކަން،" މިހެން ވިދާޅުވެ، ވެރިކަމުގެ ފުރަތަމަ ގަޑިއިރު ތެރޭގައި ކުރެއްވުމަށް ގަސްދުކުރައްވާ އާދަޔާހިލާފު ކަންކަން ވަރަށް ނަލަކޮށް ސާފުކޮށް ދެއްވި އެވެ.

އެކަމަކު 'ސިޔާސަކަ'އިގައި ޖާބިރު ގެނެސްދެއްވަނީ އޭނާގެ ވެރިކަމެއްގައި ޖައްސާނެ ކުލަތަކެއް އެކަންޏެއް ނޫނެވެ. އޭނާގެ މި ރަތްކުލަ ގަދަ ސޫޓާއި އަގުބޮޑު ބޫޓާއި ވަންޕީސް އަތުކުރިގަޑި އާއި 'ވަން އެންޑް އޮންލީ ޖާބިރު'ގެ އަސްލަށް ވުރެ އާދަޔާހިލާފު ކެރެކްޓަރުގައިވީހާ ކުލައެކެވެ.

ޖާބިރަކަށް ތައާރަފެއް ބޭނުމެއް ނުވެ އެވެ. އެހެންވީމަ މި ވާހަކަ މިއަށް ވުރެ ދިގުކުރާނެ ކަމެއް ވެސް ނެތެވެ. – (ޖާބިރު ވިދާޅުވާހެން) ޝުކުރުދަންނަވަމެވެ. ނިންމާލާނަމެވެ.