ދުވުމުގައި ފަޒީލް ގޮތް ދޫކުރުމެއް ނެތް، އިއްޔެ ވެސް ފެނުނީ އެކަން

ދުވުންތެރިޔާ ހުސެއިން ފަޒީލް ހާރޫނަކީ އޭނާ ބޭނުންވާ މަގާމަށް ދާން ހިތްވަރު ދޫކުރުމެއް ނެތި މަސައްކަތްކުރާ އެތުލީޓެއްކަން އިއްޔެ ވެސް ސާބިތުކޮށްދީފި އެވެ. އަހަރުގެ އެންމެ ފަހު އެތުލެޓިކްސް މުބާރާތް، ގައުމީ ގްރޯން ޕްރީގެ ފިރިހެން އެންމެ މޮޅު އެތުލީޓުގެ ޝަރަފާ އެކު އޭނާ މާލޭ ޓްރެކުން ނުކުތީ އަނެއްކާވެސް ގައުމީ ރެކޯޑެއް އާކޮށްފަ އެވެ.

މިދިއަ ހުކުރުދުވަހު އޮތް 1500 މީޓަރުގެ ރޭސް ވެސް ކާމިޔާބުކުރި ދުވުންތެރިޔާ އިއްޔެގެ 3000 މީޓަރު ދުވުމުން އެއް ވަނަ ހޯދީ އޭގެ ކުރިން އެ ދުވުމުގައި އޭނާ ހެދި ގައުމީ ރެކޯޑް ވެސް މުގުރާލައިފަ އެވެ. ކުރިން ފަޒީލް ރެކޯޑް ހެދީ 9:02.57 މިނިޓުން ނިންމައިގެންނެވެ. އެ ރެކޯޑް އިއްޔެ އޭނާ މުގުރާލީ ހަތް ސިކުންތު އަވަހަށް ދުވެ، 8:55.87 މިނިޓުން ނިންމުމަށް ފަހު އެވެ.

މި ކާމިޔާބީއާ އެކު މުބާރާތުގެ އެންމެ މޮޅު ފިރިހެން ދުވުންތެރިޔާގެ މަގާމު ފަޒީލްއަށް ކަށަވަރުވި އެވެ. މިއީ ގްރޯން ޕްރީގެ އެންމެ މޮޅު އެތުލީޓްގެ މަގާމު ފަޒީލް ހޯދި ހަތަރު ވަނަ ފަހަރެވެ. މީގެ ކުރިން އޭނާ އެ ޝަރަފާ އެކު މުބާރާތް ނިންމާލީ، 2018 ،2019 އަދި 2021ގަ އެވެ.

މި އަހަރުގެ ގައުމީ މުބާރާތުގެ އެއްވަނަ އެތުލީޓްގެ މަގާމު ހޯދަން ފަޒީލް ކުރި އުއްމީދު ހާސިލްނުވީ 800 މީޓަރުގެ ރޭހުން ދެ ވަނައަށް ގޮސްގެންނެވެ. އެހެންކަމުން އޭނާގެ އެންމެ ބޮޑު އަމާޒަކަށް ހެދީ ގްރޯން ޕްރީ އެވެ.

މި އަހަރުގެ ގްރޯން ޕްރީގެ އެންމެ މޮޅު އަންހެން އެތުލީޓަކީ ފަސޫހާ އަހުމަދެވެ. އޭނާ ވަނީ 1500 މީޓަރުން ގައުމީ ރެކޯޑް ހަދައިފަ އެވެ. ކުރިން އައިމިނަތު ޖާއިޝާ ޖުނީޒް 5:05.36 މިނިޓުން ހެދި ރެކޯޑް މިދިއަ ހުކުރުދުވަހު ފަސޫހާ މުގުރާލީ 5:04.02 މިނިޓުން ދުވެގެންނެވެ.

ފަސޫހާ ދެން އެއްވަނަ ހޯދީ 800 މީޓަރުގަ އެވެ. އޭނާ އެ ރޭސް ކާމިޔާބުކުރީ 2:19.73 މިނިޓުން ދުވެގެންނެވެ.