ޓޮޓެންހަމް ވެސް ބަލިވެއްޖެ، ދެ ރަތް ކާޑާއި ހިތްހަމަނުޖެހުން

ޓޮޓެންހަމްގެ ކުރީގެ ކޯޗު މައުރިސިއޯ ޕޮޗެޓީނޯ އަލުން ޓޮޓެންހަމްގެ އަމިއްލަ ދަނޑަށް، އެހެން ޓީމެއް ގޮވައިގެން ކުރި ފުރަތަމަ ދަތުރުގައި މި ދިމާވީ މުޅިން ތަފާތު މެޗެކެވެ. އޭނާގެ ބެލުމުގެ ދަށުން ޗެލްސީ 4-1 އިން ހަމައެކަނި ޓޮޓެންހަމް ބަލިކުރީކީ ނޫނެވެ. ދެ ރަތް ކާޑު ފެނުމުގެ އިތުރުން ފަސް ގޯލެއް ގޯލަކަށް ވެސް ނުވެ ދިޔަ އެވެ.

މިއީ އިނގިރޭސި ޕްރިމިއަ ލީގުގައި މައްސަލަ ބޮޑު، ފޫހިފިލި، ވާދަވެރިކަން ވެސް އެހާމެ މަތީ މެޗެކެވެ. ދެ ހާފުގައި ޓޮޓެންހަމްގެ ދެ ކުޅުންތެރިޔަކަށް ރެފްރީ މައިކަލް އޮލިވާ ރަތް ކާޑު ދެއްކި އެވެ. ފުރަތަމަ ހާފުގައި ކްރިސްޓިއަން ރޮމެރޯއަށް ސީދާ ރަތް ކާޑެކެވެ. މިއީ މީގެ އަހަރެއް ކުރިން ޓޮޓެންހަމްއާ އޭނާ ގުޅުނު ފަހުން ރަތް ކާޑު ދެއްކި ހަތަރު ވަނަ ފަހަރެވެ.

ދެވަނަ ރަތް ކާޑު އައީ 55 ވަނަ މިނިޓްގައި ޑެސްޓިނީ އުޑޮޖީއަށެވެ.

މެޗުގެ ހަ ވަނަ މިނިޓްގައި ޓޮޓެންހަމް ލަނޑެއް ޖަހައި ލީޑް ނެގި ލީޑް 1-1 އަށް އެއްވަރުކުރީ މި ހާފު ނިމުމުގެ ކުރިން ކޯލް ޕަލްމާގެ ފަރާތުންނެވެ. ޗެލްސީގެ އަނެއް ތިން ލަނޑު ކާމިޔާބުކޮށް ހެޓްރިކް ހެދީ ނިކްލޮސް ޖެކްސަން އެވެ. އޭނާގެ ފަހު ދެ ލަނޑު އައީ އިތުރު ވަގުތުގަ އެވެ.

ޓޮޓެންހަމްގެ އާ ކޯޗު އެންޖީ ޕޮސްޓެކޮގްލޫގެ އިރުޝާދުގެ ދަށުން ލީގުގައި އެ ޓީމު އޮތީ ވަރަށް ރަނގަޅު ފެށުމެއްގަ އެވެ. މި ހަފުތާގައި މެންޗެސްޓަ ސިޓީން ތާވަލްގެ އެއްވަނަ އަތުލުމުގެ ކުރިން އެ މަގާމުގައި އޮތެވެ. ރޭގެ މެޗުން ބަލިވިޔަސް ޓޮޓެންހަމް ދެވަނައަކުން ނުވެއްޓެ އެވެ.

އެކަމަކު މުހިންމު މެޗުތަކުގައި ކުޅުންތެރިންގެ ދަނޑުމަތީގެ އަހުލާގު ރަނގަޅު ނުކޮށް އެ ފެންވަރުގައި ހިފެހެއްޓިދާނެކަމާ މެދު ތަޖުރިބާކާރުންގެ ހިތުގައި އޮތީ ޝައްކެވެ.