މިދިއަ އަހަރު އޮތް އެތުލެޓިކްސް ޗެމްޕިއަންޝިޕްގައި 1500 މީޓަރުގެ ރޭސް ކާމިޔާބުކުރުމަށް ފަހު ފަޒީލް އުފާ ފާޅުކުރަނީ
ފަޒީލް 1500 މީޓަރުގެ 30 އަހަރުގެ ގައުމީ ރެކޯޑް މުގުރާލައިފި
ރާއްޖޭގެ އެތުލެޓިކްސްގައި މިހާތަނަށް މުގުރާނުލެވި އެންމެ ގިނަ ދުވަސް ވީ އެއް ރެކޯޑް، މިއަދު އިންޑިއާގެ ސްޓޭޓްތަކުގެ އެތުލެޓިކްސް މުބާރާތުގައި ހުސެއިން ފަޒީލް ހާރޫނު މުގުރާލައިފި އެވެ.
ފިރިހެނުންގެ 1500 މީޓަރުގެ ދުވުމުގައި ފަޒީލް، އޭނާގެ ކެރިއަރުގައި ވެސް މުހިންމު ކާމިޔާބީއަކަށް ވާނެ މި ރެކޯޑް ހެދީ 3:57.44 މިނިޓުން ނިންމައިގެންނެވެ. އޭނާ ހިމެނުނު ހީޓުގައި އެންމެ ފަހުން ނިންމި ދުވުންތެރިޔާއަށް ވިޔަސް، މިއީ ރާއްޖެއަށް މުހިންމު ދުވުމެކެވެ.
ރާއްޖޭގައި އުފެދުނު މޮޅު ދުވުންތެރިންގެ ތެރޭގައި ހިމެނުނު ހުސެއިން ރިޔާޒް (ބޭބެ)، ބަންގްލަދޭޝްގެ ޑާކާގައި 1993ގައި އޮތް ސާފް ގޭމްސްގެ 1500 މީޓަރު 4:00.06 މިނިޓުން ނިންމައިގެން ހެދި ގައުމީ ރެކޯޑްގައި އަތްލެވޭނެ އެހެން ދުވުންތެރިޔަކު މި މުއްދަތުގައި ފެނިފައެއް ނުވެ އެވެ.
ފަޒީލް އަންނަނީ މި އަހަރު އޮންނަ އިންޑިއަން އޯޝަން އައިލެންޑް ގޭމްސް (އައިއޯއައިޖީ)އަށް އިންޑިއާގައި ތަމްރީން ހަދަމުންނެވެ. އޭނާ މިއަދު ރެކޯޑް އެ ހެދީ އައިއޯއައިޖީގައި އެންމެ ފަހުން 1500 މީޓަރުގެ ރޭހުން ލޯ މެޑެލް ހޯދި ދުވުންތެރިޔާގެ ވަގުތަށް ވުރެ އަވަހަށެވެ.
ރާއްޖޭގެ ފިރިހެނުންގެ 5000 އާއި 10000 މީޓަރުގެ ރެކޯޑް ވެސް އޮތީ ފަޒީލް އަތުގަ އެވެ.