ޗެމްޕިއަންސް ލީގުގެ ތައްޓާ އެކު ސިޓީން ތާރީހު ލިއެލައިފި

ދެ ވަނަ ހާފުގައި އިންޓަ މިލާންގެ ގޯލުގެ ކުރިމަތިން ލިބުނު ބޯޅަ ކަނަށް ވައްދާލައިގެން ރޮޑްރީ ކާމިޔާބުކޮށްދިން ލަނޑާ އެކު މެންޗެސްޓަ ސިޓީން ޗެމްޕިއަންސް ލީގުގެ ތަށި ފުރަތަމަ ފަހަރަށް ހޯދައި، ތާރީހުގެ ތެރެއަށް ވެސް ރޭ ވަދެއްޖެ އެވެ.

މިހާތަނަށް ނުލިބި އޮތް ފުޓްބޯޅައިގެ ހަމައެކަނި ބޮޑު މުބާރާތުގެ ތަށި، ސިޓީގެ ހަރުގަނޑަށް އިތުރުކޮށްލުމުގެ އިތުރުން މި ކާމިޔާބީއާ އެކު ސިޓީ ވީ 1999ގެ ފަހުން އެއް ސީޒަނެއްގައި ތިން ތަށި ހޯދި އިނގިރޭސި ދެވަނަ ޓީމަށެވެ. ވާދަވެރި މެންޗެސްޓަ ޔުނައިޓެޑުން އެ އަހަރު އިނގިރޭސި ލީގާއި އެފްއޭ ކަޕް އަދި ޗެމްޕިއަންސް ލީގު ކާމިޔާބުކުރިކުރުމާ އެއް ހަމައަށް ރޭގެ ކުރިން އިނގިރޭސި އެހެން ޓީމަކަށް ދެވިފައެއް ނުވެ އެވެ.

ބާސެލޯނާގެ ކޯޗަކަށް ހުރި އިރު ދެ އަހަރު ޗެމްޕިއަންސް ލީގު ކާމިޔާބުކުރުމުގެ ޝަރަފު ލިބުނު ކޯޗު ޕެޕް ގާޑިއޯލާއަށް އެ ތަށީގައި މި އަތް ލެވުނީ 12 އަހަރު ފަހުންނެވެ. އެކަމަކު ރޭގެ މި މޮޅުން އޭނާގެ ހިތް އުފަލުން ފުރިއްޖެ އެވެ. ސިޓީއަށް 2016ގައި ބަދަލުވި ފަހުން އުއްމީދު ކުރަމުން އައި ދުވަސް އެންމެ ފަހުން އަތުވުމަކީ، ސީޒަންގެ ފަހު މެޗަށް ފަހު ހަމަޖެހިލައިގެން ޗުއްޓީއެއް ވެސް ނަގާލަން ރަނގަޅު ފުރުސަތެކެވެ.

ހީކުރި ގޮތަށް ސިޓީއަށް ރޭ އެ ޓީމުގެ އަސްލު ކުޅުމާ ގާތަށް ވެސް ނުދެވެ އެވެ. އެއަށް ވުރެ އިންޓަ މިލާންގެ ރޭވުންގަނޑާއި އިންތިޒާމްތައް މޮޅެވެ. މެޗުގެ ފަހު ވަގުތުކޮޅު ސިޓީއަށް ސަލާމަތްވެވުނީ ވެސް ކިރިޔާ އެވެ.

އެކަމަކު މޮޅު ކުޅުމާއި ދެރަ ކުޅުމަކީ ފުޓްބޯޅައިގެ ތަށި ހޯދާއިރު ބެލުން މުހިންމު ކަމެއް ވެސް ނޫނެވެ. ކޮންމެ ގޮތެއް ވިޔަސް ސިޓީ މި ވަނީ ތާރީހުގެ ތެރެއަށް ވަދެ، ކްލަބަށް ވެސް އެންމެ ކާމިޔާބު ސީޒަނަށް މި ސީޒަން ވެފަ އެވެ.