ސްޕެއިން ޔޫރޯ ކޮލިފިކޭޝަންގެ ފެށުން ރަނގަޅުކޮށްފި

އުމުރުން 32 އަހަރުގައި ސްޕެއިންގެ ގައުމީ ޓީމަށް ކުޅުނު ފުރަތަމަ މެޗުގައި ފޯވަޑް ހޯސެލޯ ދެ ގޯލް ޖަހައި، ނޯވޭގެ މައްޗަށް ހޯދި 3-0ގެ ކާމިޔާބީއާ އެކު ޔޫރޯ 2024ގެ ކޮލިފިކޭޝަންގެ ފެށުން ރަނގަޅުކޮށްދީފި އެވެ.

ވޯލްޑް ކަޕަށް ފަހު ކޯޗުކަމުން ބޭރުކުރި ލުއިސް އެންރީކޭގެ ބަދަލުގައި އެ މަގާމާ ހަވާލުވި ޑެ ލަ ފުއެންތޭއަށް މި ކާމިޔާބު ވަރަށް މުހިންމެވެ. ފުރަތަމަ 11އަށް އޭނާ ނެގީ އާންމުކޮށް ގިނަ މީހުންނަށް އެނގޭ ކުޅުންތެރިންތަކެއް ވެސް ނޫނެވެ. ނަމަވެސް މި ނަތީޖާއަކީ އެ ޓީމަށް ލިބުނު ބޮޑު އުއްމީދެކެވެ. 

މިވަގުތު އެންމެ ފޯމުގައި ހުރި މެންޗެސްޓާ ސިޓީގެ ފޯވަޑް އާލިން ހާލެންޑްއާ ނުލައި ނޯވޭއިން ކުޅުނު މެޗުގައި ލިބުނު ފުރުސަތުތައް ދިޔައީ ބޭނުންނުކުރެވި އެވެ. 

ސްޕެއިންގެ ފުރަތަމަ ލަނޑު ފުރަތަމަ ހާފުގައި ޖެހީ އޮލްމޯ ކަވާޖާ އެވެ. ހޯސެލޯގެ ދެ ލަނޑު އައީ 83 އާއި 85 ވަނަ މިނިޓްގަ އެވެ.

އުމުރުން 32 އަހަރުގައި ގައުމީ ޓީމަށް ފުރަތަމަ ފަހަރަށް އެރުމަކީ އާންމު ކަމެއް ނޫނެވެ. ހާއްސަކޮށް ސްޕެއިން ކަހަލަ މޮޅު ކުޅުންތެރިން ގިނަ ގައުމެއްގަ އެވެ.

މިހާރު ސްޕެއިންގެ އެސްޕަންޔޯލްއަށް ކުޅެމުން އަންނަ ފޯވަޑަށް އިނގިރޭސި ޕްރިމިއަ ލީގުގައި ނިއުކާސަލް އާއި ސްޓޯކްގައި މާ މޮޅު ކުޅުމެއް ދެއްކިފައެއް ނުވެ އެވެ.