18 ޖެނުއަރީ 2023 - އޮސްޓްރޭލިޔަން އޯޕަންގެ ދެވަނަ ބުރުން ބަލިވުމަށް ފަހު އެންމެ ފަހުގެ ޗެމްޕިއަން ރަފޭލް ނަޑާލް ކުޅިބެލުންތެރިންނަށް ޝުކުރުއަދާކުރަނީ
އަނިޔާގައި ހުރި ނަޑާލްއަށް އޮސްޓްރޭލިއަން އޯޕަންގައި ކަރުނަ
އަނިޔާއިން މުޅިން ރަނގަޅު ނުވެ، އޭނާގެ އަސްލު ކުޅުމަށް ވާސިލްވެވޭނެ ގޮތެއް ނެތި، އަދި މެޗުގެ ވަކި ހިސާބަކުން ތަދާ އެކު ކުޅެ، އެންމެ ފަހުގެ ޗެމްޕިއަން ރަފޭލް ނަޑާލް، އޮސްޓްރޭލިޔަން އޯޕަންގެ ދެ ވަނަ ބުރުން މިއަދު ކަޓައިފި އެވެ.
އެމެރިކާގެ މެކެންޒީ މެކްޑޮނަލްޑް އަތުން ނަޑާލް، 36، ބަލިވީ 6-4 ،6-3 ،7-5 އިންނެވެ. މިއީ 2016ގެ ފަހުން އޮސްޓްރޭލިޔަން އޯޕަން އިން ނަޑާލް އެހާ ކުރިން ކެޓި ފުރަތަމަ ފަހަރެވެ.
ދެ ވަނަ ސެޓް ނިމެން ކައިރިވެފައި ހުއްޓާ ނަޑާލްއަށް ފަރުވާކުރަން ކުޅުން މެދު ވެސް ކަނޑާލި އެވެ. އެކަމަކު މެޗު ކުރިއަށް ގެންދިޔަ އެވެ.
މިއީ މިދިއަ އަހަރުގެ ހައިރާންކުރުވަނިވި ނަތީޖާއެއް ފެނުނު ފައިނަލް މެޗުން މޮޅުވެ އޮސްޓްރޭލިޔަން އޯޕަން ކާމިޔާބުކުރި ކުޅުންތެރިޔާ، އެ ތަށި ދިފާއުކުރަން ނުކުމެ ކުރިމަތިލާން ޖެހުނު ވަރަށް ހިތްދަތި ވަގުތުކޮޅެކެވެ. އެ މެޗުގައި ޑެނިލް މެދުވަދޭވް ދެ ސެޓުން ހޯދާފައި ވަނިކޮށް ނަޑާލް މޮޅުވީ ފަހަތުން އަރައި ތިން ސެޓް ކާމިޔާބުކޮށްގެންނެވެ.
އެކަމަކު އެ އަހަރުގެ ވިމްބަލްޑަންގެ ކްއާޓާ ފައިނަލްގައި ބަނޑަށް އެރި ތަދަށް ފަހު މުޅި ސީޒަން ދިޔައީ ރަނގަޅަށް ނުކުޅެވި އެވެ. އޮސްޓްރޭލިޔަން އޯޕަންއަށް އޭނާ އައީ އޭގެ ކުރިން ކުޅުނު ހަމައެކަނި ދެ މެޗުން ވެސް ބަލިވެގެންނެވެ.
މިއަދުގެ މެޗުގައި ދިމާވި ގޮތުން ނަޑާލްގެ އަންހެނުން ކޯޓުން ނުކުތީ ކަރުނައާ އެކު އެވެ. އޭނާގެ ޓީމު ވެސް ފެނުނީ ވަރަށް ބޮޑަށް ދެރަވެފައި ތިއްބަ އެވެ.
މެޗު ނިމުމާ އެކު މުޅި ކޯޓުގެ ސަޕޯޓަރުން ކޮޅަށް ތެދުވެ ނަޑާލްއަށް ތަރުހީބު ދިނެވެ. ކޯޓުން ނުކުތުމުގެ ކުރިން ކޯޓުގެ ހުރިހާ ފަރާތަކަށް އެނބުރި އޭގެ އަގު އޭނާ ވަޒަންކުރި އެވެ.
އަނިޔާތަކާ ހެދި ނަޑާލްގެ ކުރިމަގު މިހާރު އޮތީ ސުވާލެއްގެ ތެރޭގަ އެވެ.