ރޭ އޮތީ ޔާމީންއާ ދެކޮޅަށް ރޭވިރޭވުންތަކުގެ ވާހަކަ

މީގެ ދެ އަހަރު ކުރިން 'ދައުރު'ގައި އަޅުގަނޑު ލިއުނު ރިޕޯޓެއްގެ ސުރުހީއަކީ 'ޕީޕީއެމްގެ ހާލަތު: ޓާމިނަލް ކެފޭ ފެކްޝަން، ޖަނބުރޯލް ގަސް ފެކްޝަން' އެވެ. އޭރު ޕީޕީއެމްގެ ތެރޭގައި ރިޔާސީ ޓިކެޓް ހޯދުމުގެ ވާދަވެރިކަމެއް، ދެ ފެކްޝަނެއްގެ ދެމެދު ސިއްރުން ހިނގަމުން ދިޔަ އެވެ. އެކަމަކު އެއީ ކުރީގެ ރައީސް އަބްދުﷲ ޔާމީނަށް ރިޔާސީ އިންތިހާބުގައި ވާދަނުކުރެއްވޭ ހާލަތެއް ދިމާވެއްޖެ ނަމަ އެވެ.

ޖަނބުރޯލު ގަސް ފެކްޝަންގެ ބައްދަލުވުންތައް ބާއްވަމުން ދިޔައީ ހުޅުމާލޭގެ ޖަނބުރޯލު ގަހެއްގެ ދަށުގަ އެވެ. މި ފެކްޝަންގެ ތެރޭގައި އޮތީ ޔާމީންގެ ކޮއްކޯފުޅު ގައްސާން މައުމޫން އާއި އޭރުގެ މާލޭ ސިޓީ މޭޔަރު މުހައްމަދު މުއިއްޒުއަށް ޓިކެޓް ހޯދައިދިނުމުގެ ވިސްނުމެވެ.

މާލޭގައި ހިންގަމުން އައި ޓާމިނަލް ކެފޭގައި ކުރިއަށް ދިޔައީ، އެ ރިޕޯޓަށް އޭރު ވާހަކަ ދެއްކި ބައެއް މީހުން ބުނިގޮތުގައި، މިހާރުގެ އެކޮނޮކިމް މިނިސްޓަރު މުހައްމަދު ސައީދަށް ޓިކެޓް ހޯދައިދިނުމުގެ ވާހަކަ އެވެ. ފުރަތަމަ ހުކުމާ އެކު ޖަލުގައި ޔާމީން ހުންނެވި އިރު ސައީދަކީ ޔާމީންގެ އަނބިކަނބަލުން ފާތުމަތު އިބްރާހިމްގެ އެންމެ އަރިސް އެއް ބޭފުޅެވެ.

އެ ފެކްޝަންތަކާ މެދު ޕީޕީއެމްގެ ރަސްމީ ބަހަކީ ކޮބައިތޯ އޭރުގެ ތަރުޖަމާން ހީނާ ވަލީދާ ސުވާލުކުރުމުން ވިދާޅުވި އެވެ:

"ޕާޓީ ކުރިއަރައިގެން އެކަތިގަނޑަކަށް ވެގެން ދާތީވެ، އެކަން ނައްތާލަން، ޕާޓީ ބައިކުރަން ނުވަތަ ފުނޑުފުނޑުކޮށްލަން ދައްކާ ވާހަކަތައް ވެސް ތީގެ ތެރޭގައި ހިމެނޭނެ ދޯ." 

ދެ ފެކްޝަންގެ ބައްދަލުވުންތައް އެންމެ ބޮޑަށް ކުރިއަށް ދިޔައީ ގއ. ވޮޑަމުލާ ކުއްޔަށް ދިނުމުގައި 1 މިލިއަން ޑޮލަރުގެ ރިޝްވަތެއް ނަންގަވައި، މަނީ ލޯންޑަކުރެއްވިކަން ކްރިމިނަލް ކޯޓުން ސާބިތުވެ ޖަލުގައި ޔާމީން ހުންނެވި އިރު އެވެ. އެކަމަކު 30 ނޮވެމްބަރު 2021ގައި ސުޕްރީމް ކޯޓުން އެ ހުކުމް ބާތިލްކުރުމުން ޔާމީން މިނިވަންވެވަޑައިގަތުމާ އެކު، ފެކްޝަންތަކުގެ ސިއްރު މަސައްކަތް ވަރަށް ބޮޑަށް ހުއްޓުނެވެ.

ޔާމީނަށް އެ ހުރިހާ ކަމެއް ވެސް އެނގިވަޑައިގަނެ އެވެ. އެހެންވެ ޕާޓީގެ ބައެއް ބޭފުޅުންނާ ދެކޮޅަށް ފިޔަވަޅު ވެސް އެޅުއްވި އެވެ. ބައެއް ބޭފުޅުން ޕާޓީގެ ކަންކަމުން އެކަހެރި ވެސް ކުރި އެވެ.

'ދައުރު'ގައި ޖެހި ރިޕޯޓް ރަނގަޅުކަން ރޭ އެމަނިކުފާނު ދެއްކެވި ބައެއް ވާހަކަތަކާއި ކުރީގެ ޕޮލިސް ކޮމިޝަނަރު ހުސެއިން ވަހީދުގެ ވާހަކަތަކުން އެނގެ އެވެ. ޔާމީންގެ މިހާރުގެ ޕާޓީ ޕީއެންއެފްގެ 'ހަރުގެ ޖަލްސާ'ގައި ރައީސް މުއިއްޒުއަށް ފާޑުވިދާޅުވާން ސްޓޭޖް މަތީގައި ހުންނެވީ ހުސެއިން ވަހީދެވެ. 

ޕީޕީއެމްގެ އޭރުގެ ހާލަތުގެ ވާހަކަ އަނެއްކާވެސް ޔާމީން ފެއްޓެވީ ހުސެއިންއާ ކުރެއްވި ސުވާލުތަކާ އެކުގަ އެވެ. ރިޔާސީ އިންތިހާބުގައި އެމަނިކުފާނަށް ވާދަނުކުރެއްވޭ ގޮތް ވުމަކީ އޭރުގެ ރައީސް އިބްރާހިމް މުހައްމަދު ސޯލިހުގެ ވިސްނުންފުޅު ކަމާއި އެ ވިސްނުން މިހާރުގެ ރައީސް މުއިއްޒަށް އެނގިވަޑައިނުގަންނަވާނެތޯ ޔާމީން ސުވާލުކުރެއްވި އެވެ.

"ޝައްކެއް ވެސް ނެތް އެނގޭނެ" ކަމަށް ވިދާޅުވެ ހުސެއިން ވަހީދު ދެން ފެއްޓެވީ އޭނާގެ ތަޖުރިބާގެ ވާހަކަތަކެވެ. ހުލާސާއަކީ މި އެވެ:

ޔާމީން ފުރަތަމަ ޖަލަށްލިތާ މާ ގިނަ ދުވަހެއް ނުވެ ބާރަށު ދާއިރާގެ މިހާރުގެ މެމްބަރު އިބްރާހިމް ޝުޖާއު ވިދާޅުވެގެން ހުޅުމާލެއަށް ވަޑައިގަތެވެ. ޝުޖާއު ވިދާޅުވީ 2023ގެ ރިޔާސީ ޓިކެޓް ގައްސާން މައުމޫނަށް ދެއްވަން ޔާމީން އޮތީ ނިންމަވާފައި ކަމަށެވެ. އެހާ ހިސާބުން ކުރީގެ ރައީސް އަދި ގައްސާންގެ ބައްޕާފުޅު މައުމޫން އަބްދުލްގައްޔޫމް ވެސް ޕީޕީއެމްއާ އެއްބައިވާނެ އެވެ. ގައްސާންގެ ބޮޑުބޭބޭފުޅު އިލްޔާސް އިބްރާހިމްގެ އެދިވަޑައިގަތުމަށް ޖޭޕީގެ ލީޑަރު ގާސިމް އިބްރާހިމް، ރިޔާސީ އިންތިހާބުގައި ވާދައެއްނުކުރައްވާނެ އެވެ. ކުރީގެ ނައިބު ރައީސް އަހުމަދު އަދީބުގެ ތާއީދު ވެސް އޮތީ ގައްސާނަށެވެ.

"ހަމަގައިމުވެސް ބައިވަރު މީހުން ތިއްބާ ބުނި ލާހިކެއް ނޫނޭ ރައީސް ޔާމީން މިނިވަންވާކަށް، 400 ޕަސެންޓް ޔަގީންކަމޭ މިދެނީ ރައީސް ޔާމީން އިންނާނީ ޖަލުގައޭ،" އެހެން ބައްދަލުވުމެއްގައި ޝުޖާއު ވިދާޅުވި ކަމަށް، ހުސެއިން ވަހީދު ކިޔައިދެއްވި އެވެ.

ޔާމީން ގެންދެވީ ހުސެއިން ވަހީދުގެ އެ ވާހަކަތަކަށް ބައިތައް އިތުރުކުރައްވަމުން، ތިލަކުރައްވަމުން އަދި ރައީސް މުއިއްޒަށް ފާޑުވިދާޅުވަމުންނެވެ.

މި ހުރިހާ ވާހަކައެއް ފެށުމުގެ ކުރިން ޖަލްސާގައި ދެއްކީ ޕީއެންސީން ރިޔާސީ ޓިކެޓް ދޭނެ ކެންޑިޑޭޓަކު ކަނޑައަޅަން ބޭއްވި ސެނެޓް ބައްދަލުވުމުގެ ކުރިން ރައީސް މުއިއްޒު ދެއްވި އިންޓަވިއުއެކެވެ. އޭގައި އެމަނިކުފާނު ވިދާޅުވަނީ ޓިކެޓް ލިބިވަޑައިގަތަސް އުއްމީދަކީ ކުރިއަށް އޮތް ދެ ދުވަހުގެ ތެރޭގައި ވެސް ޔާމީނަށް ކުރިމަތިލެއްވޭނެ ގޮތް ވުން ކަމަށެވެ.

އޭރު އަދި ޔާމީންގެ ކެންޑިޑެސީ ސުޕްރީމް ކޯޓުން ބާތިލެއްނުކުރެ އެވެ.

ރައީސް މުއިއްޒު އެގޮތަށް ވާހަކަފުޅު ދެއްކެވިޔަސް ޕީޕީއެމް/ޕީއެންސީގެ ތެރޭގައި އޮތީ އެމަނިކުފާނު ޖަލުގައި ބެހެއްޓުމުގެ ނިޔަތް ކަމަށް ޔާމީން ވިދާޅުވި އެވެ.

"ބަރާބަރަށް މަސައްކަތްކުރަމުން އެދިޔައީ ރައީސް ޔާމީން ޖަލުގައި ބައިންދައިގެން،  ނުނެރޭނެކަން އެނގޭތީ،" ޔާމީން ވިދާޅުވި އެވެ.

"މި މީހުންގެ ފަރާތުން ބޭނުމެއް ނުވޭ ރައީސް ޔާމީން މިނިވަންކުރާކަށް. ޒައްރެއްގެ މިންވަރަށް ވެސް ބޭނުމެއްނުވޭ. މި މީހުންގެ ތެރޭގައި އޮތީ ނިންމާފައި."

އެގޮތުން ވިދާޅުވީ ގައްސާން ފަހަތަށް ޖެހިވަޑައިގަތަސް ދެން ތިއްބެވި ބޭފުޅުން ވެރިކަން ހޯއްދެވުމުގެ މަސައްކަތުގައި ވަޑައިގަތީ ކުރިއަށް ކަމަށެވެ.

"ދެން ނުކުމެ ތިބި މީހުންނަކީ ރައީސް ޔާމީން ޖަލުގައި ބައިންދައިގެން ތިމަންނަމެން ބޭނުމޭ ވެރިކަން،" ޔާމީން ވިދާޅުވި އެވެ.

ސިޔާސީ ގޮތުން ބަލާ ނަމަ ރައީސް މުއިއްޒު އެ ފުރުސަތު ހޯއްދެވުމަކީ، އޭރު ވެސް ޕީޕީއެމް/ޕީއެންސީގެ ބައެއް ބޭފުޅުންގެ ނަޒަރުގައި 'މޮޅު ކުޅިއެކެ'ވެ. ޔާމީން އާއި އެމަނިކުފާނުގެ ފަހަތްޕުޅުގައި ތިއްބެވި ބޭފުޅުން ގަބޫލުނުކުރެއްވި ނަމަވެސް ބާރުގަދަ ވެރިއެއްގެ އަތުން އެގޮތަށް ޕާޓީ ހޯއްދެވޭނީ ކުރިއަށް ސިޔާސީ ކުޅި ކުޅުއްވައިގެންނެވެ.

ޔާމީން އަދިވެސް ހުންނެވީ އެ ޝަކުވާގަ އެވެ.