ހުރިހާ ވަގުތަކާއި ލޯބި، އެނދުމަތިވެފައިވާ ފިރިމީހާއަށްޓަކައި

ސަހާ (ފުރިހަމަ ނަމެއް ނޫން)ގެ ދިރިއުޅުމުގައި އޭގެ ކުރިން އުފާވެރިކަން ބޮޑެވެ. މައެއް ފަދައިން ލޯބިން ބަލާބޮޑުކުރި މާމަ އެވެ. ދިރިއުޅުމުގެ ހުރިހާ ކަމެއްގައި ވެސް އުފަލާ އެކު ހިއްސާކުރަމުން އައި އޯގާތެރި ފިރިއެކެވެ. ލޯބިލޯބި ދަރިންތަކެކެވެ. ފުދުންތެރި، އުފާވެރި ދިރިއުޅުމެކެވެ. އެކަމަކު އެ އުފާތަކަކީ އޭނާއަށް އިމްތިހާނެކެވެ. 

ސަހާގެ ހަޔާތް އެފުށް މިފުށަށް ޖެހުނީ، ބަލަބަލާ ހުއްޓާ ހަމަ ކުއްލިއަކަށެވެ. އެންމެ ފުރަތަމަ މާމަގެ ގައިގައި ކާރަކުން ޖެހި ހިނގި އެކްސިޑެންޓެއްގައި ޖިސްމާނީ ގޮތުންނާއި ނަފްސާނީ ގޮތުން ބަލިމީހަކަށް ބަދަލުކޮށްލީ އެވެ. ހަށިގަނޑަށް ލިބުނު އަނިޔާތައް ފަސޭހަވެ، ކޮޅަށް ހުރެވުނު ނަމަވެސް ދެން ހިނގަން ބިރުގަނެ ޖެހުނީ ބަލިއެނދުގައި އޮށޯންނާށެވެ.

އެގޮތަށް މާމަ އެނދުން ނުތެދުވެވި އޮންނަތާ މިހާރު އަށް އަހަރު ވެއްޖެ އެވެ. އެކަމަކު މާމަގެ ހުރިހާ ކަމެއް ވެސް ސަހާ ކޮށްދެމުން އައީ ކުލުނާއި އޯގާތެރިކަމާ އެކު އެވެ. އޭނާގެ އެންމެ ބޮޑު އެހީތެރިއަކީ ފިރިމީހާ ނިހާދެވެ. މާމަގެ އިތުރުން ދެ ކުދިން ހިމެނޭ އެ އާއިލާގެ ހުރިހާ ކަމެއް ބަލަހައްޓަމުން އައީ ނިހާދަށް ލިބޭ އާމްދަނީންނެވެ.

އެކަމަކު ހަމަ ކުއްލިއަކަށް ފިރިމީހާ ވެސް ބަލިވެއްޖެ އެވެ.

ސަހާ ކިޔައިދިން ގޮތުގައި ބުނެދޭން ނޭނގޭ ގޮތްތަކެއްވެ، ފިރިމީހާގެ އުޅުން ބަދަލުވާން ފެށީ ދޮށީ ދަރިފުޅުގެ އުމުރުން 13 އަހަރުގަ އެވެ. އެންމެ ފުރަތަމަ ވަރުބަލިވެ، އެނދުން ތެދުވާނެވަރު ނެތި އޮންނަނީ އެވެ. އެހެން އޮންނަން ވުމުން އޭނާ އަދާކުރަމުން ދިޔަ ވަޒީފާ ވެސް ގެއްލުނެވެ. ދެން ދިރިއުޅުމުގެ ހަރަދުތައް ހަމަޖައްސަން ޖެހުނީ ރައްކާކޮށްފައި ހުރި ފައިސާކޮޅުންނެވެ. އެކަމަކު މާ ގިނަ ދުވަހެއް ނުވެ އެ ވެސް ހުސްވެއްޖެ އެވެ.

"ދަރިންގެ ހަރަދުތައް ވެސް ކުރެވޭނެ ގޮތެއް ނެތުމުން، މާމަ ދެން އެހީތެރިކަން ފޯރުކޮށްދޭން ފެށީ. މާމައަށް ލިބޭ އެލަވަންސުން ދެމަފިރިންނާއި ގޭގެ ކަންތައް ވެސް ކުރަން ފެށީ،" ސަހާ ބުންޏެވެ.

އޭރު ނިހާދުގެ ވެސް ބަލިބޮޑުވާން ފަށައިފި އެވެ. އިތުރަށް ފަރުވާ ކުރުމަށް އިންޑިއާއަށް ދާން ނިންމި އިރު، އޭނާގެ ކަނާއަތުގެ ވާގި ގޮސް، މަސްތައް އެއްކޮށް ވިރި، އަތުގެ ހަންތައް ވަނީ ކަށީގައި ތަތްލާވަރުވެފަ އެވެ. އިންޑިއާއަށް ގޮސް މާ ގިނަ ދުވަހެއް ނުވަނީސް، އުނަގަނޑުގެ ތިރިން ވާގި ގޮސް، ނޭވާލާން އުނދަގޫވާން ފެށި އެވެ. އެއާ އެކު، އިންޑިއާގެ ހޮސްޕިޓަލުގައި ދޮޅު މަސް ވާންދެން އައިސީޔޫގައި ބާއްވަން ޖެހުނެވެ. 

"މީހުން ވަކިކުރަން ވެސް ނޭނގޭ ހާލަތުގައި އޭރު އޭނާ އޮތީ. ލޯބިވާ ފިރިމީހާގެ ހާލު އެހާ ބޮޑަށް ގޯސްވެ އުއްމީދު ކަނޑާލާ ހިސާބަށް ދިޔުމުން ލޮލުން ކަރުނަ ނުހިކޭ،" ސަހާ ކިޔައިދިނެވެ.

ނިހާދަށް ޖެހުނީ އެމައޮޓްރޮޕިކް ލެޓަރަލް ސްކްލެރޯސިސް (އޭއެލްއެސް) ކިޔާ ބައްޔެކެވެ. އެ ބަލީގައި ނިހާދު މިހާރު ރަށުގެ ހޮސްޕިޓަލުގައި އެނދުމަތިވެފައި އޮންނަތާ މަސްތަކެއް ވެއްޖެ އެވެ. ހަށިގަނޑުގެ ހުރިހާ މަސްތަކެއް ހީނަރުވެ، އަމިއްލައަށް އެއްވެސް ކަމެއް ނުކުރެވެ އެވެ. ނޭވާލައްވަނީ ވެންޓިލޭޓަރެއްގެ އެހީގަ އެވެ. ކާންދޭން ޖެހެނީ ބަނޑަށް ހޮޅިއެއް ލައްވައިގެންނެވެ. ކިތަންމެ ބައްޔަސް، ސިކުނޑި މަސައްކަތް ކުރާތީ، މީހުން ދައްކާ ވާހަކަ އަޑުއިވި، ފަހުމްވެ އެވެ. އޭނާ ޖަވާބުދާރީ ވަނީ ލޮލުގެ އިޝާރާތުންނެވެ.

މިއީ ބައެއް ފަހަރު އަވަހަށް ދެނެގަނެވި ފަރުވާ ކުރެވޭ ބައްޔެއް ނަމަވެސް، ނިހާދުގެ ބަލި ދެނެގަނެވުނީ، ސަހާ ބުނިގޮތުގައި، މާ ލަހުންނެވެ. ޖެނެޓިކް މި ބަލީގައި ފިރިމީހާގެ ބޮޑުބޭބެ އާއި އޭނާގެ ދެ ދަރިން ވެސް ވަނީ މަރުވެފަ އެވެ.

މިހާރު ސަހާގެ މުޅި ދިރިއުޅުން އެނބުރެނީ ބަލި ފިރިމީހާ އާއި މާމަގެ ވަށައިގެންނެވެ. ގޭގައި، ކުދިންނާއި މާމަގެ ކަންކަން ނިންމާލުމަށް ފަހު، ދުވަހުގެ ބާކީ ބައި ހޭދަކުރަނީ ފިރިމީހާގެ ހިދުމަތުގައި ހޮސްޕިޓަލްގަ އެވެ. މިހާރު އޭނާގެ ހުރިހާ ވަގުތަކާއި ހަކަތައެއް ހުސްކޮށްފައިވަނީ ފިރިމީހާއަށްޓަކަ އެވެ. ނިހާދުގެ އަތުގައި ހިފައި، ލޯތްބާއި އޯގާތެރިކަމާ އެކު ވާހަކަ ދައްކައި ހިތްވަރު ދެ އެވެ. އަބަދުވެސް އޭނާއާ އެކު ހުރިކަން ޔަގީންކޮށްދެ އެވެ.

"އެ ވަގުތުތަކުގައި ފިރިމީހާގެ ލޮލުން ފެންނަ އުފާވެރިކަމާއި ޝުކުރުވެރިކަމަކީ، ހިތްވަރު އެލުވާނުލާ ކުރިއަށް ދިޔުމަށް ލިބޭ އެންމެ ބޮޑު ހިތްވަރު،" ސަހާ ބުންޏެވެ.

ސަހާ އޭނާގެ ހަޔާތުގެ މި ހިތްދަތިކަން ހިއްސާކުރީ، މައިންނަށް އެހީތެރިކަން ފޯރުކޮށްދޭ ޖަމިއްޔާ 'މަމްސް އެއިޑް'އާ އެވެ. އޭނާ ބޭނުންވަނީ، ދިރިއުޅުން ކޮންމެވެސް ކޮޅެއްގައި ޖެއްސޭނެވަރުގެ އެހީތެރިކަމެކެވެ.

ޒުވާން މަންމަ ބުނިގޮތުގައި އިންތިހާއަށް ބަލިވެ، އެނދުމަތިވެފައިވާ ފިރިމީހާ އާއި މާމަ ދޫކޮށްފައި އޭނާއަށް ވަޒީފާއަށް ދެވޭކަށް ނެތެވެ. ނުކުޅެދުންތެރިކަން ހުންނަ މީހުންނަށް ދޭ އެލަވަންސްގެ ގޮތުގައި 6،000 ރުފިޔާ ފިރިމީހާއަށް ލިބޭއިރު އެ ހޭދަކުރަނީ އޭނާއަށް ބޭނުންވާ ނެޕީ އާއި ޕްރޮޓީންސް އާއި ކާއެއްޗެހި ހޯދުމަށެވެ.

"ކުދިންނަށް ކާއެތިކޮޅެއް ވެސް ދެވޭނެ ގޮތެއް ނެތި، އެ ކުދިންނަށް ބައެއް ދުވަސްދުވަހު ހުސް ބަތްކޮޅެއް ދީގެން ވެސް އެބަ ހުންނަން،" ސަހާ އޭނާގެ ހާލަތު ކިޔައިދިނެވެ.

މާމަ އާއި ފިރިމީހާއަށް ހިދުމަތް ކުރުމަށް ހުސްވެ ހުރި ސަހާއަކީ ވެސް ބަލި މީހެކެވެ. އެންމެ ކުޑައިރުއްސުރެ އަތުގެ ނާރުތަކުގެ މައްސަލަ ހުރުމުން، އަތް ތުރުތުރުލާ ގިނަ ވަގުތު މަސައްކަތް ކުރުމަށް ދަތިވެ އެވެ. އޭނާގެ ދޮށީ ދަރިފުޅަކީ ވެސް ހަމަ އެ މައްސަލަ ހުންނަ ކުއްޖެކެވެ. ހާލަތުގެ ގޮތުން ދަރިފުޅަށް ވެސް ފަރުވާ ނުލިބި ދަނީ އެ ބަލިބޮޑުވަމުންނެވެ.

ސަހާ ބުނިގޮތުގައި އިތުރު ފައިސާއެއް ލިބޭތޯ ބެލުމަށް، އެކަނިވެރި މައިންގެ އެލަވަންސް ހޯދުމަށް ވެސް އެތައް ފަހަރަކު އޭނާ ފޯމު ލައިފި އެވެ. އެކަމަކު 'އަމިއްލައަށް ނޭވާ ނުލެވޭ ހާލަތުގައި' ވެސް އޭނާގެ ފިރިމީހާ ދުނިޔޭގައި އޮތީމައި ފޯމު ރިޖެކްޓްކޮށްލަނީ އެވެ. އެ ފައިސާ ހޯދަން އޭނާއަށް އޮތް ގޮތަކީ ފިރިމީހާގެ ގާތުން ވަރިވުން ކަމަށް، އެކަމާ ގުޅޭ އިދާރާއިން ބުނި ކަމަށް ވެ އެވެ.

"އެކަމަކު ބޮޑެތި ކުށްތަކުގައި ދިގު މުއްދަތަކަށް ޖަލަށް ލާފައި ތިބޭ މީހުންގެ އަނބިންނަށް ވެސް އެލަވަންސް ލިބޭ. ވާހަކަ ނުދެއްކި، އަމިއްލައަށް ނޭވާ ނުލެވި ނުކެވި، އެހެން އެނދުމަތިވެފައި އޮތުން އެއީ ދިރިހުރުންތޯ؟،" ސަހާ ޝަކުވާތައް ބަންޑުންކޮށްލި އެވެ.

އޭނާ ހުރީ ނާއުއްމީދުވެފަ އެވެ. ދިރިއުޅުމުގައި ދެން ހަދާނެ ގޮތެއް ނޭނގިފަ އެވެ. މިއީ އެންމެ ބޭނުންވި ގޮތް ނޫން ނަމަވެސް، އާއްމުންގެ އެހީތެރިކަމަށް އޭނާ އެދުނީ އެ ނޫން މަގެއް ނެތިގެންނެވެ.

ނޯޓު- މީގެ ކުރިން ވެސް އެކަނިވެރި ގިނަ މައިންތަކެއްގެ ދިރިއުޅުން ބަދަލުކޮށްލަން އެހީވެދީފައިވާ މަމްސް ޖަމިއްޔާއިން މިހާރު ވަނީ، ސަހާއަށް އެހީތެރިވުމަށް ފަންޑްރެއިޒް ކުރަން ފަށައިފަ އެވެ. އެ ޖަމިއްޔާގެ އަމާޒަކީ، ފަންޑްރައިޒިން މެދުވެރިކޮށް ސަހާ އާއި އޭނާގެ ދެ ކުދިންނަށް ބޭނުންވާ ނަފްސާނީ އެހީތެރިކަން ފޯރުކޮށްދީ، އަމިއްލަ މަސައްކަތެއް ފެށޭނެ ގޮތެއް އިންތިޒާމްކުރުމެވެ. އެއް އަހަރު ދުވަހަށް ބޭނުންވާ ކާބޯތަކެތި ހޯދައިދިނުމެވެ.

އެހީއަށް ބޭނުންވާ ކަންކަމުގެ ތަފްސީލު:

މި ކަންކަމަށް ދާނެ ހަރަދުގެ ގޮތުގައި އެތަނުން އަންދާޒާކޮށްފައިވަނީ، 109،984 ރުފިޔާ އެވެ.

އެހީތެރިކަން ފޯރުކޮށްދިނުމަށް: