އިމާރާތްތައް މައްޗަށް އަރަމުން، ނިމެމުން ދަނީ: ލިސްޓް 'ބިންމަތީގައި'

ލިސްޓް ނެރެ އެވެ. އެކަމަކު ދެން އަންނަ ސަރުކާރަކުން އެ ލިސްޓްތައް ބާތިލްކޮށް 'އިންސާފުވެރިކަމު'ގެ އާ ލިސްޓްތަކެއް އާންމުކުރެ އެވެ.

އެތައް ހާސް ބަޔަކު އޮއްސާލަނީ ޝަކުވާ އެވެ. އެތައް ސަތޭކަ ބަޔަކު ދުއްވައިގަންނަނީ އޭރަކު ހުންނަ ހައުސިން މިނިސްޓްރީ ދޮށަށެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި ބޯހިޔާވަހިކަމުގެ ބޮޑު މަޝްރޫއު 'ހިޔާ'ގެ ފްލެޓްތަކަށް ވެސް ދިމާވީ އެގޮތެވެ. އޭގެ ފަހުން އައި ރައީސް އިބްރާހިމް މުހައްމަދު ސޯލިހުގެ ސަރުކާރުން ހިންގި 'ގެދޮރުވެރިޔާ' ސްކީމްގެ ފްލެޓްތަކުގެ ލިސްޓަށް ވެސް ވީ އެ ވަރެވެ.

އާ ސަރުކާރުތަކަށް އެއިން ކޮންމެ ލިސްޓަކުން ވެސް ފެންނަނީ ބޭއިންސާފުގެ ހިޔަނިތަކެވެ. ލިބެން ނުޖެހޭނެ އެތައް ބަޔަކަށް ވެސް، ސިޔާސީ ނުފޫޒުގެ ތެރެއިން ފްލެޓް ލިބިފައި ހުރުމެވެ.

މިހާރު މައްޗަށް އަރަމުން، ނިމެމުން އެދަނީ 'ގެދޮރުވެރިޔާ'ގެ 4،000 ފްލެޓް އިމާރާތްތަކެވެ. ހުޅުމާލޭ ދެވަނަ ފޭސްގެ އެކި ހިސާބުތައް 18 ބުރީގެ އިމާރާތްތަކުން ފުރިއްޖެ އެވެ. ބައެއް ތަންތަނުގެ ބޭރުގައި ކުލަ ލައި، ދޮރުތައް ވެސް ހަރުކޮށްފި އެވެ.

އެކަމަކު ފްލެޓް ލިބޭ މީހުންގެ ލިސްޓް އޮތީ 'ބިންމަތީގަ' އެވެ. އެހެންކަމުން ފްލެޓް ލިބޭނެކަމަށް އެމްޑީޕީ ސަރުކާރުގެ ފަހު ދުވަސްކޮޅު ނެރުނު ލިސްޓްގައި ތިބި 4،000 މީހުން އެތިބީ އިންތިޒާރުގަ އެވެ. ތިން ކޮޓަރި އާއި ދެ ކޮޓަރި ހިމެނޭ މި ފްލެޓްތަކަށް ފޯމު ހުށައަޅައި، ފުރަތަމަ ނެރުނު ލިސްޓްގައި ނުހިމެނި ބާކީވި 15،000އަށް ވުރެ ގިނަ މީހުންގެ ވެސް ހުއްޓުމެއް ނެތް ދުއާއަކަށް ވާނީ މި ސަރުކާރުން ނެރޭ ލިސްޓްގައި ނަން އޮތުމެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ތެރެއިން މި ފަހުގެ އަހަރުތަކުގައި ހިންގަން ފެށި ކޮންމެ މަޝްރޫއުއެއްގައި ވެސް މި ފެންނަނީ ސިޔާސީ ގޮތުން އެއްބަޔަކު އަނެއް ބައެއްގެ ބޮލަށް ކަނޑާލާފައި އަނެއް ބަޔަކު ސަލާމަތްވާން އުޅޭ ތަނެވެ. އެކަމަކު މީގެ ހުރިހާ އުނދަގޫ އިހުސާސްތަކާއި މާޔޫސްކަން މި ކުރިމަތިވަނީ އާންމު ރައްޔިތުންނަށެވެ. އެ މީހުންގެ ދިރިއުޅުން ސިޔާސީ ވެރިންގެ ނިންމުންތަކުގައި ތާށިވަނީ އެވެ. އުފާވެރިކަން ލިބި ގެއްލިދަނީ އަނެއް ބަޔަކު ބުނާ އިންސާފުވެރިކަމާ ހެދި އެވެ.

މި ތެޅުވުން ފުރަތަމަ ކުރިމަތިވީ ޔާމީންގެ ވެރިކަމުގައި ހުޅުމާލެއިން ދިން 700 ފްލެޓާ ގުޅިގެންނެވެ. އެ މާޒީއަށް ހަނދާންތައް ދޫކޮށްލާ އިރު، ކުރިމަތިލި ވަރަށް ގިނަ ބައެއްގެ ޝަކުވާއަކީ، މިސާލަކަށް 30 ޕޮއިންޓަށް ވުރެ ވެސް މަދުން ނުވަތަ އެއްވެސް ޕޮއިންޓެއް ނުލިބޭ މީހުންނަށް ވެސް ފްލެޓް ލިބުމެވެ. 

އެކަމަކު އެ ޝަކުވާތަކާ އެކު އާންމުން ތިބީ އެވެ. އޭގެ ފަހުން 7،000 ފްލެޓް ހިމެނޭ 'ހިޔާ' މަޝްރޫއުގެ ލިސްޓްތަކަށް ވެސް އެތައް ބައެއްގެ ޝަކުވާ އެވެ. އެ ޝަކުވާތައް އާ ސަރުކާރުން ބަލައި، އާ ލިސްޓް ނެރެން ދެ އަހަރެއްހާ ދުވަސް ނެގި އެވެ.

ބައެއް މީހުންގެ ނަޒަރުގައި ފްލެޓް ލިސްޓްތަކާ އެކު ކޮންމެ ސަރުކާރަކުން ވެސް އާންމުންގެ ތެރޭގައި އުފައްދަނީ ފިތުނަ އެވެ. 

"މުޅި ގައުމުގައި ފިތުނަ ފަސާދަ އުފައްދަން ވެގެން ޝަރުތު ހަމަނުވާ އެތައް ބަޔަކަށް ފުލެޓް ދީފައި ހީވަނީދޯ ކޯޓާ ދުރުގައި ހުރެވިދާނެ ކަމަށް،" މިއީ 'ހިޔާ' ފްލެޓް ލިސްޓް ނެރުމާ އެކު، 5 ނޮވެމްބަރު 2018ގައި، އާންމު މީހަކު ފާޅުކުރި ޝުއޫރެވެ.

އޭރު ހައުސިން މިނިސްޓަރަކަށް ހުންނެވީ މިހާރުގެ ރައީސް މުހައްމަދު މުއިއްޒެވެ. އެކަމަކު ލިސްޓްގައި ބޭއިންސާފެއް ނޯންނާނެ ކަމަށް ވިދާޅުވެ، އެ ލިސްޓް ދިފާއުކުރައްވަމުން ގެންދެވި އެވެ.

ރައީސް މުއިއްޒުގެ ސަރުކާރަށް ޖެހިފައި މިހާރު މިއޮތީ އެ ލިސްޓްތައް ބާތިލްކޮށް އަލުން އެކުލަވާލި ލިސްޓްތަކަށް 'ހިޔާ' ފްލެޓް ދޫކުރި އެމްޑީޕީ ސަރުކާރުން ފެށި މަޝްރޫއުއެއްގައި ފްލެޓް ލިބޭ ކަމަށް އިއުލާންކުރި ލިސްޓަށް 'އިންސާފު' ހޯދައިދޭށެވެ. ރައީސް މުއިއްޒުގެ ނަޒަރުގައި އެމްޑީޕީ ސަރުކާރުން ފްލެޓްތައް ދީފައި ހުރީ ބޭއިންސާފުންނެވެ. އެހެންކަމުން އެމަނިކުފާނުގެ ސަރުކާރުން ނެރޭނީ ހައްގުވެރިޔާއަށް ފްލެޓް ލިބޭ ލިސްޓެވެ.

އެކަމަކު އެ ލިސްޓް ނެރެން އެތައް ތާރީހެއް ދިނުމަށް ފަހު އެކަން ނުވާތީ އެތައް ހާސް ބަޔަކު އެތިބީ ޝަކުވާގަ އެވެ. ސަރުކާރުން ބުނަނީ ލިސްޓް ޗެކްކޮށް، މީހުންގެ ހާލަތު ވެސް ބަލަމުން އަންނަ ކަމަށެވެ.

ރައީސް މުއިއްޒުގެ ވެރިކަމަށް އެއް އަހަރު ފުރުން ފާހަގަކުރަން ބޭއްވި ރަސްމިއްޔާތުގައި، އެމްޑީޕީ ސަރުކާރުން ނެރުނު ލިސްޓާ މެދު އެމަނިކުފާނު ވަރަށް ސީދަލަށް ވާހަކަފުޅު ދެއްކެވި އެވެ. ވިދާޅުވި އެއް ވާހަކައަކީ ކުރީ ސަރުކާރަށް ނިސްބަތްވާ މީހުންގެ އާއިލީ މީހުންނަށް ފްލެޓު ދީފައި ހުރި ކަމެވެ. އޭގެ ތެރޭގައި ފޯމު ނުލާ އެތައް ބަޔަކު ވެސް ލިސްޓްގައި ހިމެނުނު ކަމެވެ.

"ދެން އެބޭފުޅުން [ކުރީ ސަރުކާރުގެ ވެރިން] ކޮން ވާހަކައެއްތޯ މި ދައްކަނީ؟ އުސޫލާ ހިލާފަށް ފްލެޓު ދިނުމަށްޓަކައި ޕޯޓަލުގެ ބެކްއެންޑުން މާކްސް ޝީޓު ބަދަލުކޮށްފައި އެބަހުރި. ދެން އެބޭފުޅުން ކިހާ ވަރަކަށް މިކަމާ އުޅޭނެ ނޫންތޯ. އެހެންވީމާ ލަސްވަނީ. އެހެންވީމާ ލަސްވާނެ ދެއްތޯ،" ރައީސް ވިދާޅުވި އެވެ.

ހުުޅުމާލޭ ދެވަނަ ފިޔަވަހީގެ ދެކުނު ކޮޅު ފުރިގެން އެ އަންނަނީ 'ގެދޮރުވެރިޔާ' މަޝްރޫއުގެ ފްލެޓްތަކުންނެވެ. އިންތިޒާރުގައި ތިބި މީހުންނަށް އެ ފްލެޓްތައް ފެންނަ ކޮންމެ ފަހަރަކު ހިތަށްއަރާފާނެ އެވެ؛ ސިޔާސީ ތަޅާފޮޅުން އަހަރެމެންގެ ދިރިއުޅުން މާޔޫސްކޮށްލައިފި އެވެ. އަހަރެމެންގެ އުއްމީދުތަކާ ސިޔާސީ ވެރިން ކުޅެލަނީ އެވެ. އަހަރެމެންނަށް އޮތީ ބަލަން ތިބުމެވެ. ހިތް ބަލި ނަމަ ރޮއިފައި ނަމަވެސް އަލުން ހިތްވަރު ހޯދުމެވެ.

އެތައް ހާސް ބަޔަކު ބޭނުންވެގެން ތިބި އެއްޗެއް ނުލިބޭ ނަމަ އެތައް ހާސް ޝަކުވާއެއް ވެސް ހުންނާނެ އެވެ. އެކަމަކު ފްލެޓްތައް ލިބެނީ އިންސާފުވެރިކޮށް ނަމަ އެ ޝަކުވާ ކުޑަވާނެކަމާ މެދު ޝައްކެއް ނެތެވެ.

ހިތާމަ ހުއްޓެވެ. އާންމުންނަށް ނެތީ އެ ޔަގީންކަމެވެ.

ތިން ދަރިން ގޮވައިގެން އުޅޭ އެކަނިވެރި މަޔަކު، އެމްޑީޕީ ސަރުކާރުން ލިސްޓް ނެރުނު ދުވަހު އޮތީ ރޯށެވެ. އޭނާ ވިހެއީ މާލެއަށެވެ. މާލޭގައި އުޅޭތާ 40 އަހަރު ވީ އެވެ. އެކަމަކު އޭނާއަށް ވުރެ މާ ޒުވާން، މާ ފަހުން މާލޭގައި އުޅެން ފެށި ދަންނަ އެތައް ބަޔަކު ވެސް ލިސްޓްގައި ހިމެނުނެވެ.

ބޯހިޔާވަހިކަމަކީ ވަރަށް އަސަަރު ހުރި ހައްގެއް ކަމަށް ބަލަމާ ހިނގާށެވެ. އެހެންކަމުން ސިޔާސީ ވެރިން ހަނދާންކުރަންވީ އެއީ ސިޔާސީ ކުޅިވަރެއް ނޫން ކަމެވެ. އެއީ އެތައް ބައެއްގެ ސީދާ ހިތާ ގުޅިފައި ހުރި ވަރަށް ނާޒުކު މައްސަލައެކެވެ. ތިމާ ބާކީވީ ބޭއިންސާފުން ނަމަ ހިތަށްކުރާ އަސަރު، ސިޔާސީ މީހުންނަށް ވިސްނާލަން ވެސް ނޭނގޭނެ އެވެ.

'ބިންމަތިން' ލިސްޓް ނަގާ އަލުން އެކުލަވާލާ އިރު، ދިވެހި ރައްޔިތުންގެ އެ ބޮޑު ހައްގު ހިމާޔަތްކުރުމުގެ ޒިންމާއަށް ވުރެ މުހިންމު ކަމެއް ނެތެވެ.