ކެންސަރުގެ ހަނގުރާމައިގައި އަސްމާގެ ވާހަކަ ތަފާތު

ފަތިސް ނަމާދަށް ފަހު އަސްމާ ހަސަން ކޮންމެ ދުވަހަކު ވެސް، ދުވަސް ފަށައިގަންނަނީ ކަސްރަތުންނެވެ. ހެނދުނު އޮފީހަށް ދިޔުމުގެ ކުރިން ބައިސްކަލުގައި މާލެ ވަށައި އޭނާ ދުއްވަ އެވެ. ކިތަންމެ ވިއްސާރަޔަސް، ވައި ގަދަޔަސް އިރުއަރައިގެން އެ އަންނަ ވަގުތު ބައިސްކަލު މަތިން އޭނާ ފެންނާނެ އެވެ. ކަސްރަތުކޮށްގެން، ދުޅަހެޔޮކަން މަތީގައި ހުރުމަކީ އޭނާ އެންމެ އިސްކަންދޭ އެއް ކަމެވެ.

ނަމަވެސް ހަމަ އެއް ދުވަހަކު އޭނާއަށް ކެންސަރު ޖެހިފައިވާކަން އެނގުނެވެ. އެއާއެކު ދަންނަ މީހުންނާއި ނުދަންނަ މީހުން ވެސް އޭނާއާ ދިމާއަށް ބުންޏެވެ؛ އެހާ ދުޅަހެޔޮ މީހުންނަށް ވެސް ކެންސަރު ޖެހޭ ހެއްޔެވެ؟ އެހާ ވަރަށް ކަސްރަތުކޮށް ހެދުމުން ވެސް ކެންސަރުން އޭނާ ވެސް ސަލާމަތެއް ނުވި އެވެ.

އެ ބަހުސްގައި އަސްމާ ބުނަން އޮތް ވާހަކަ ބޮޑެވެ.

"ކިތަންމެ އެކްޓިވްކޮށް އުޅުނަސް، ސިއްހަތަށް ބަލައިގެން އުޅުނަސް ބައްޔެއް ވެދާނެ. އެކަމަކު މީހާ ދުޅަހެޔޮކޮށް ހުރުމަކީ އެ ބަލިން ފަސޭހަވުން އަވަސްވާ ކަމެއް،" ބްރޯޑްކާސްޓިން ކޮމިޝަނުގެ އެޗްއާރު އަދި އެޑްމިންގެ އެސިސްޓެންޑް ޑިރެކްޓަރު މަގާމު އަދާކުރަމުން އަންނަ އަސްމާ ބުންޏެވެ.

ކެންސަރާ ދެކޮޅަށް އޭނާކުރާ ހަނގުރާމައަކީ އޭގެ ހެއްކެކެވެ.

ދުޅަހެޔޮ ދިރިއުޅުމަކަށް މީހުން ހޭލުންތެރިކޮށް، ބައިސްކަލް ދުއްވުމަށް މީހުން އަހުލުވެރިކުރަން މަސައްކަތްކުރާ 'ބައިކް މޯލްޑިވްސް'، މީގެ ދިހަ އަހަރު ކުރިން އުފެދުނީއްސުރެ އަސްމާއަކީ އެ ޖަމިއްޔާގެ މުހިއްމު މެމްބަރެކެވެ. ކޮންމެ ދުވަހަކު ވެސް އޭނާ މަސައްކަތްކުރަނީ، ކުދިންނާއި މީހުންނަށް ބައިސްކަލް ދުއްވަން ދަސްކޮށްދީ، ދުޅަހެޔޮ ދިރިއުޅުމަކަށް މަގުކޮށައިދިނުމަށެވެ. އެކަމުގައި އޭނާ ރާއްޖޭގެ ރަށްރަށަށާއި ރާއްޖޭން ބޭރަށް ދަތުރުކުރެ އެވެ. އެހެންވެ، ކޮންމެ މީހަކު ވެސް އަސްމާ ދަންނަނީ، ސިއްހަތަށް ވަރަށް ބަލައިގެން އުޅޭ، ގިނައިން ހެލިފެލިވެ އުޅޭ މީހެއްގެ ގޮތުގަ އެވެ.

އުމުރުން 52 އަހަރު ވީއިރު ވެސް އޭނާއަކީ ބަލިތަކާ ދުރު، ދުޅަހެޔޮ މީހެކެވެ. އެހެންވެ، ކެންސަރު ޖެހިފައިވާކަން ކުއްލިއަކަށް އެނގުމަކީ، އެހެން މީހުންނެކޭ އެއްގޮތަށް އޭނާއަށް ވެސް ލިބުނު ޝޮކެކެވެ.

އަސްމާ ބުނިގޮތުގައި އެންމެ ފުރަތަމަ އޭނާގެ އެއް ކަންފަތުގައި ރިއްސަން ފެށީ އެވެ. ތަދު ދިގުލައިގެން ގޮސް، އެކި ޑޮކްޓަރަށް ދައްކައި ބޭސް ބޭނުންކުރުމުން ވެސް ލުޔެއް ނުލިބުނެވެ. ކަރާއި ކަންފަތުގެ 'އަލްޓްރާ ސައުންޑް' ނޫން އެހެން ހުރިހާ ޓެސްޓުތަކެއް އޭނާ ހެދި އެވެ. މަސް ދުވަސް ފަހުން، އެއް ދުވަހަކު ދެއްކި ޑޮކްޓަރެއްގެ އެދުމަށް، އަލްޓްރާ ސައުންޑް ހެދުމުން އެނގުނީ އޭނާގެ ތައިރޮއިޑްގައި ޓިއުމަރެއް އުފެދިފައިވާ ކަމެވެ. އެއީ މިދިޔަ އޭޕްރީލް މަހުގެ ތެރެ އެވެ.

ނުރައްކާތެރި ހާލަތެއްގައި ޓިއުމަރު އިނުމުން އޭނާއަށް ޖެހުނީ އޮޕަރޭޝަންކޮށްގެން ތައިރޮއިޑް ގްލޭންޑް އެއްކޮށް ނަގާށެވެ. އޭގެ ޓެސްޓުތަކުން އެނގުނީ ތައިރޮއިޑް ކެންސަރު ޖެހިފައިވާ ކަމެވެ. އަސްމާ ބުނިގޮތުގައި އެއީ މާޔޫސްކަން ގެނުވި، ފިކުރު ބޮޑުވި ދުވަސްކޮޅެކެވެ. އެހާ ބޮޑު ބައްޔެއް ޖެހިފައިވާކަން އެނގި، ނަފްސާނީ ގޮތުން ވެސް މީހާ ދަށްވެފައި ހުއްޓާ ދެން އަހަން ޖެހުނީ، ހަށިގަނޑަށް އައި ބަދަލާ ގުޅިގެން މީހުން ކީ ފާޑުކިޔުންތަކެވެ. 'ހާދަ ފަލަވެއްޖެއޭ، ބަނޑު ހާދަ ބޮޑޭ، މޫނު ފޮއްސިވެފައިދޯއޭ' ބުނެ މީހުން އެއްލި ބަސްތައް އޭރު ގިނައިން އަޑުއަހަން ޖެހުނެވެ.

އަސްމާއަށް ޖެހުނު ކެންސަރު އޭގެ ކުރީކޮޅު ދެނެގަނެވުނެވެ. އެހެންވެ، ރާއްޖޭން ބޭރުން ރޭޑިއޭޝަން ނަގައިގެން އޭނާއަށް ފަރުޖެއްސުނެވެ. އޮޕަރޭޝަނާއި ރޭޑިއޭޝަނުން، ހަތަރު މަހުގެ ތެރޭގައި ކެންސަރާ ހަނގުރާމަކޮށް، ކާމިޔާބު ހޯދި އެވެ. އެކަމަކު މިހާ އަވަހަށް ބަލިން ފަސޭހަވުމުގައި ބޮޑު އެހެން ސަބަބެއް ވެ އެވެ.

"ޑޮކްޓަރުން ވިދާޅުވަނީ ބަލިން ފަސޭހަވިލެއް ވަރަށް އަވަހޭ. އޭގެ ސަބަބަކީ، ހެލްތީ ލައިފްސްޓައިލް ކަމަށް،" އޭނާ ބުންޏެވެ.

ހޮސްޕިޓަލުން ދޫކޮށްލިތާ ދެ ހަފުތާ ފަހުން އަސްމާ މަސައްކަތަށް ވެސް ނުކުމެއްޖެ އެވެ. އާދައިގެ މަތިން މިހާރު ބައިސްކަލް ދުއްވަން ވެސް ދެ އެވެ. 

ކެންސަރު ޖެހުނު ސަބަބެއް އަސްމާއަކަށް ނޭނގެ އެވެ. އެކަމަކު އޭނާއަކީ ދުވަހަކު ވެސް ދާއިމީ ބައްޔަކަށް ބޭސްކޮށް، ލޭމައްޗަށް ދިޔުން ފަދަ މައްސަލައެއް ދިމާވި މީހެއް ނޫނެވެ. އަސްމާގެ ނަޒަރުގައި ބަލި ޖައްސަވައި ފަސޭހަ ކުރައްވަނީ އެހެން ފަރާތަކުން ކަމަށް ވާއިރު، އިންސާނުންގެ އަތްމަތީގައި އޮތީ ބަލިން ރައްކާތެރިވުމަށް މަސައްކަތް ކުރުމެވެ.

"އަޅުގަނޑަށް ކެންސަރު ޖެހުނީމާ މީހުން ވަރަށް ނެގެޓިވް ކޮމެންޓް ކުރި. އެހާ ވަރަށް ކަސްރަތުކޮށް ހަދާއިރު ވެސް ބަލިވީ ކަމަށް ބުނެ. އެކަމަކު އަޅުގަނޑު ބުނަން ބޭނުންވަނީ، އެގޮތަށް ކަސްރަތުކޮށް، ދުޅަހެޔޮކޮށް ހުރުމުންނޭ ބަލިވިތާ ކުޑަ ދުވަސްކޮޅެއްގެ ތެރޭގައި އެކަމުން ސަލާމަތްވެ އެ މީހުންގެ ކުރިމަތީގައި މި ހުރެވުނީ،" އަސްމާ ބުންޏެވެ.

ކެންސަރު އެއްކޮށް ފިލައި ދިޔަކަން އަސްމާއަށް ޔަގީންކުރެވޭނީ ހަ މަސް ފަހުން ހަދާ ރިވިއު ޓެސްޓަކަށް ފަހު އެވެ. އެކަމަކު މިވަގުތަށް އޭނާގެ ހަމަ އެއްވެސް މައްސަލައެއް ނެތެވެ. މިއަދު އަސްމާގެ ނަސޭހަތަކީ ކޮންމެ ހާލަތެއްގައި ވެސް، އުމުރު ކިތަންމެ މައްޗަށް ދިޔަ ނަމަވެސް، އެ މީހަކަށް ވާވަރުން ހެލިފެލިވެ އުޅުމެވެ. ހިނގުމާއި ދުވުމާއި ބައިސްކަލް ދުއްވުމާއި ކަސްރަތު ކުރުމެވެ. ފައިދާ ހުރި ކާނާ ކެއުން ގިނަ ކުރުމެވެ. އަންހެނުން ހާއްސަކޮށް، އުމުރުން 40 އަށް ވުރެ މަތިވުމުން ރޫޓިން ޓެސްޓުތައް ހަދައި މައްސަލައެއް އުޅޭތޯ ބެލުމެވެ.

ކެންސަރު ފަދަ ބައްޔެއް ކޮންމެ އުމުރެއްގައި، ކޮންމެ މީހަކަށް ވެސް ޖެހިދާނެ އެވެ. އެކަމަކު އެއީ އާއްމުކޮށް ކަސްރަތުކޮށް ހަދާ، ދުޅަހެޔޮ މީހެއް ނަމަ ބަލިން ސަލާމަތްވުމުގެ ފުރުސަތު ބޮޑެވެ.

އަސްމާއަކީ އޭގެ މިސާލެކެވެ.