ބައެއް މުވައްޒަފުން ބުނަނީ އޭސީޕީ އާސިފްއަށް ތުހުމަތުކުރެވޭ ހިޔާނާތުގެ މައްސަލަ 'އޮއްބާލަން އުޅޭ' ކަމަށް

މިދިޔަ ޖުލައި މަހު މޯލްޑިވްސް ކަރެކްޝަނަލް ސާވިސްގެ ތެރެއިން ފެންމަތިވީ މީގެ ކުރިން އެ ތަނުން އެތެރޭގައި ހިނގާފައިނުވާ ފަދަ ހިޔާނާތުގެ މައްސަލައެކެވެ؛ ޕްރިޒަންސް ކުލަބުގެ އެކައުންޓުން 200،000ރ.އަށް ވުރެ ގިނަ ފައިސާ އެކިއެކި އެކައުންޓުތަކަށް ޖަމާކުރި މައްސަލަ އެވެ. މި ހިޔާނާތުގެ މުގުލުގައި ހުންނެވި ކަމަށް ތުހުމަތު ވަނީ، ކުލަބުގެ ރައީސް އަދި އެސިސްޓެންޓް ކޮމިޝަނަރު މުހައްމަދު އާސިފް އަށެވެ.

މި ހިޔާނާތާ ގުޅޭ ބައެއް މައުލޫމާތާއި ގުޅުން ހުރި ލިޔެކިޔުންތަކެއް އިތުބާރު ހުރި މަސްދަރުތަކުން 'ދައުރު'އަށް ވަނީ ލިބިފަ އެވެ.

ހިޔާނާތުގެ އެ މައްސަލައާ ގުޅިގެން މިދިޔަ އޮގަސްޓު މަހު އެތަނުގެ 35 އޮފިސަރުން ސޮއިކޮށް ކޮމިޝަނާ އޮފް ޕްރިޒަންސް ހަސަން ޒަރީރަށް ޕެޓިޝަނެއް ވެސް ހުށަހެޅި އެވެ. އެ ޕެޓިޝަނަށް ދެއްވި ޖަވާބުގައި ވިދާޅުވެފައި ވަނީ އެ މައްސަލަ މިހާރު ބަލަން ފަށާފައިވާ ކމަށެވެ.

މުވައްޒަފުންގެ ކަންބޮޑުވުމަކީ، މިހާ ދުވަސް ވީއިރު ވެސް މައްސަލަ ކޮޅެއްގައި ނުޖެހި ދިގުލައިގެން ދިއުމެވެ.

އާސިފަށް ތުހުމަތުމަތު ވަނީ ޕްރިޒަންސް ކްލަބްގެ ރައީސަކަށް ހުންނަވައިގެން މިދިޔަ އަހަރުގެ ނޮވެމްބަރުން ފެށިގެން މިދިޔަ ޖުލައި މަހާ ހަމައަށް އެ ކްލަބުގެ އެކައުންޓުން 200،823ރ. އޭނާގެ މަސްލަހަތު އޮންނަ ބައެއް އެކައުންޓްތަކަށާއި އެހެން ބައެއް އެކައުންޓްތަކަށް ޖަމާކޮށް، އެ ފައިސާ އަމިއްލަ ކަންކަމަށް ބޭނުންކުރެއްވިކަމަށް ތުހުމަތުކުރެވެ އެވެ.

އޮކްޓޯބަރު 2022ގައި ކްލަބުގެ ރައީސްކަމާ އާސިފް ހަވާލުވިއިރު، އެ އެކައުންޓްގައި 500،000އެއްހާ ރުފިޔާ ހުރި ކަމަށް ކަމުގެ މައުލޫމާތު އެނގޭ މީހަކު 'ދައުރު'އަށް ކިޔައިދިނެވެ. ނަމަވެސް މި ހިޔާނާތަށް ފަހު، އެކައުންޓުގައި ހުރީ 8،700 ރުފިޔާ އެވެ.

"މައްސަލަ ފެންމަަތިވުމުން އޭނާ ވަނީ ދެ ޓްރާންސެކްޝަނަކުން 70،000އެއްހާ ރުފިޔާ އަލުން އެކައުންޓަށް ވައްދާފައި. އެއީ ކިހިނެއް އެކައުންޓަށް ޖަމާވި ފައިސާއެއް ކަމެއް ވެސް ނޭނގޭ،" ނަން ނުޖަހަން ޝަރުތުކޮށް ވާހަކަދެއްކެވި އެ އިދާރާގެ އިސް ބޭފުޅަކު ވިދާޅުވި އެވެ.

ޕްރިޒަންސް ކްލަބަށް ފައިސާ ވަންނަ އެއް ގޮތަކީ، ކޮންމެ މުވައްޒަފެއްގެ އަތުން މަހަކު ނަގާ 50ރ.ގެ ޗަންދާ އެވެ. އެހެންކަމުން ގާތްގަނޑަކަށް މަހެއްހެ މައްޗަށް 30،000ރ. އާއި 40،000ރ.އާ ދެމެދުގެ އަދަދެއް އެ އެކައުންޓަށް ވަދެ އެވެ.

'ދައުރު'އަށް ލިބިފައިވާ ލިޔެކިޔުންތަކުން އެނގޭ ގޮތުގައި:

"މިކަން ސީޕީ [ކޮމިޝަނާ އޮފް ޕްރިޒަންސް ހަސަން ޒަރީރު]ގެ ސަމާލުކަމަށް ގެނައުމުން އެންމެ ފުރަތަމަ ވަރަށް ލޮނު މަޑުކޮށް ނެނގީ. ކުލަބުގެ ބޯޑު އެއްކޮށްފައި [ސީޕީ] ބުނީ ކުލަބް ތެރެއިން ހައްލުކުރާށޭ،" ކުރިން ވާހަކަ ދެއްކެވި ބޭފުޅާ ވިދާޅުވި އެވެ.

އޭގެ ފަހުން ކުލަބުގެ ބޯޑުން މި މައްސަލަ ބަލައިދިނުމަށް ޕްރިޒަންސްގެ ޕްރޮފެޝަނަލް ސްޓޭންޑާޑްސްއަށް ފޮނުވި އެވެ.

"އޭރުވެސް އެއްވެސް ފިޔަވަޅެއް ނާޅާ. އޭސީޕީ އާސިފް ހުރީ ހަމަ އޭނާގެ ބާރާއި ނުފޫޒުގައި. އޭރުވެސް އޭނާއަކީ ގިނަ ޑިޕާޓްމަންޓްތަކެއްގެ އިސް ވެރިޔާ. އޭގެ ތެރޭގައި މާފުށީ ޖަލުގެ ޑިރެކްޓަރު ކަމާއި އިމަޖެންސީ ސަޕޯޓު ގްރޫޕުގެ ކޮމާންޑިން އޮފިސަރު ކަމާއި ޑިސިޕްލިނަރީ ބޯޑުގެ ޗެއާޕާސަން އަދި މޮނިޓަރިން ކޮމިޓީގެ ޗެއާ،" ނަން ނުޖަހާ ގޮތަށް ވާހަކަ ދެއްކެވި އިސް މުވައްޒަފު ވިދާޅުވި އެވެ.

އެ ހުރިހާ މަސްއޫލިއްޔަތެއްގައި ހުންނަވައިގެން މައްސަލަ އިންސާފުވެރިކަމާ އެކު ބެލޭނެ ކަމުގެ އުންމީދެއް މި ރިޕޯޓަށް ވާހަކަދެއްކި މުވައްޒަފުންނަކަށް ނެތެވެ. އެންމެ ފަހުން މުވައްޒަފުންގެ ތެރޭގައި މި ނުތަނަވަސްކަން ބޮޑުވެ، ކަރެކްޝަންސްގެ އޮފީސް ތެރެއަށް އެކަމާ ބެހޭ ގޮތުން ލިޔެފައިވާ ލިޔުންތަކެއް މިދިޔަ މަހު އެޅި ކަމަށް، އެ މުވައްޒަފުން ބުންޏެވެ.

މި މައްސަލަ ހިނގަމުން ދަނިކޮށް މިދިޔަ މަހު ފަހުކޮޅު ސިންގަޕޫރުގައި އޮތް ކޮންފަރެންސަކަށް ކަރެކްޝަންސްގެ ފަރާތުން ދިޔަ ވަފުދުގައި ވެސް އާސިފް ހިމެނެ އެވެ. އެހެންވެ މި މައްސަލަ ބެލުމުގެ ހެޔޮ ނިޔަތެއް ކަރެކްޝަންސްގެ އިސް ވެރިންގެ ނެތް ކަމަށް 'ދައުރު'އާ ވާހަކަ ދެއްކި ބައެއް މުވައްޒަފުން ބުންޏެވެ.

"މުވައްޒަފުން ބިރު ވެސް ގަނެފައި ތިބެނީ މިކަމާ ދެކޮޅަށް ވާހަކަ ދައްކައިގެން ފިޔަވަޅެއް އައިސްދާނެތީ،" އެހެން މުވައްޒަފަކު ބުންޏެވެ.

ޒަރީރަށް ހުށައެޅި 35 އޮޮފިސަރުންގެ ޕެޓިޝަންގައި ތިން ކަމެއް ކަށަވަރުކޮށްދިނުމަށް އެދުނެވެ. އެއީ:

އެ ޕެޓިޝަނާ ގުޅިގެން މިދިޔަ ހޮނިހިރު ދުވަހު ޒަރީރު ފޮނުއްވި ސިޓީގައި ވިދާޅުވެފައި ވަނީ އާސިފް ހިންގެވި ކަމަށް ބުނާ ޓްރާންސެކްޝަންތަކުގެ މައުލޫމާތު އޭނާއަށް ނުރަސްމީކޮށް  މީގެ ކުރިން ވެސް ލިބިވަޑައިގެންފައިވާ ކަމަށެވެ. އެ ޕެޓިޝަން ފޮނުވުމުގެ ކުރިން ވެސް "އެކަންކަން އިޖުރާއަތުގެ ތެރެއިން ބަލަން ޖެހޭ ކަންކަން ބެލުމަށް ފަހު، އެކަމުގެ އިންކުއަރީއެއް ހިންގުމަށް އޮގަސްޓު 15 ވަނަ ދުވަހު ކޮމިޓީއެއް ވަނީ އެކުލަވާފައި" ކަމަށް ވެސް އެ ސިޓީގައި އޭނާ ވިދާޅުވި އެވެ.

"އަދި އެ ކޮމިޓީގެ މަސައްކަތް އުސޫލުތަކުގެ ތެރެއިން ފެށިފައިވާ ވާހަކަ ދަންނަވަމެވެ،"  ސިޓީގައި ޒަރީރު ވިދާޅުވި އެވެ.

މި ހިޔާނާތާ ގުޅިގެން އާސިފްއާ 'ދައުރު'ން ސުވާލުކުރުމުން ޖަވާބެއް ދެއްވަން އިއުތިޒާރު ކުރެއްވި އެވެ. ސަބަބެއްގެ ގޮތުގައި ވިދާޅުވީ ބަލަމުން އަންނަ މައްސަލައަކަށް ވުމާއި އޮފިސަރަކަށް ވުމުން އަމަލުކުރަން ޖެހޭ ވަކި އުސޫލުތަކެއް އޮތުމެވެ. މީޑިއާއާ ވާހަކަ ދެއްކެވުމަކީ މަނާ ކަމެއް ކަމަށް ވެސް އޭނާ ވިދާޅުވި އެވެ.

މައްސަލަ އޮއްބާލަން އުޅުއްވާ ކަމަށް މުވައްޒަފުން ކުރާ ތުހުމަތު ޒަރީރު ދޮގުކުރެއްވި އެވެ. މި މައްސަލައާ ބެހޭ ގޮތުން ސުވާލު ކުރުމުން އޭނާ ދެއްވި ކަށަވަރު ކަމަކީ މައްސަލަ ބަލަމުން އަންނަ ކަމަށާއި ކުށްވެރިވާ ނަމަ ފިޔަވަޅު އަޅަން ފަހަތަށް ނުޖެހޭނެ ކަމެވެ.

"ފުރަތަމަ ދުވަހުން ފެށިގެން އޮންނަ އިޖުރާއަތުގެ ދަށުން އަޅުގަނޑުމެންގެ ޕްރޮފެޝަނަލް ސްޓޭންޑާޑުން މައްސަލަ ދަނީ ބަލަމުން. އޭތި އެބަ ހިނގާ ބަރާބަރަށް،" ޒަރީރު ވިދާޅުވި އެވެ.

ބޮޑު ތުހުމަތެއް އޮއްވައި، މައްސަލަ ތަހުގީގު ކުރަމުންދަނިކޮށް ކަރެކްޝަންސްގެ ސިންގަޕޫރު ދަތުރުގައި އާސިފް ބައިވެރިކުރި ސަބަބާ ގުޅޭ ގޮތުން ސުވާލުކުރުމުން އޭނާ ވިދާޅުވ، އެއީ އެ ތުހުމަތުތައް އަމާޒުވުމުގެ "މާ ކުރިން އެމެރިކާގެ އެއިޑެއްގެ ދަށުން ހަމަޖެހިފައި އޮތް ދަތުރެއް" ކަމަށެވެ. 

ޒިންމާތަކުން އާސިފް އެކަހެރި ނުކުރާ ވާހަކަ ވެސް ޒަރީރު ދޮގުކުރެއްވި އެވެ.

"ޒިންމާތަކުން އޭނާ ވަނީ އެކަހެރި ކޮށްފައި. އެއީ އެސިސްޓެންޓް ކޮމިޝަނަރުގެ މަގާމު ފިޔަވައި އެހެން ހުރިހާ މަސްއޫލިއްޔަތުތަކުން ވަނީ އެކަހެރިކޮށްފައި. ޕްރޮފެޝަނަލް ސްޓޭންޑާޑުން އެދުނު ހުރިހާ ފިޔަވަޅެއް މިހާރު ވާނީ އަޅާފައި،" އޭނާ ވިދާޅުވި އެވެ.

ނަމަވެސް 'ދައުރު'އާ ވާހަކަ ދެއްކި މުވައްޒަފުން ބުނި ގޮތުގައި ބައެއް މަސްއޫލިއްޔަތުތަކުން އާސިފް އެކަހެރިއެއް ނުކުރެ އެވެ. އޭނާއަކީ އަދިވެސް އިމަޖެންސީ ސަޕޯޓު ގްރޫޕުގެ ކޮމާންޑިން އޮފިސަރު ކަމަށް، އެ މުވައްޒަފުން ބުންޏެވެ.

"އެސިސްޓެންޓް ކޮމިޝަނަރު މަގާމުގައި އޭނާ ބަހައްޓައިގެން ކިހިނެއް އިންސާފުވެރި  ތަހުގީގެއް ކުރާނީ؟ މީގެ ކުރިން ވެސް އޮފިސަރެއްގެ މައްސަލައެއް ޖެހުމުން ސަސްޕެންޑް ކުރޭ މައްސަލަ ބަލަމުންދަންޏާ. މައްސަލަ ބަލައި ނިންމުމަށް ފަހު، ސަސްޕެންޝަން އުވާލާ. މި ކަމުގައި ކީއްވެ ތަފާތުވާންވީ؟" މުވައްޒަފަކު ސުވާލުކުރި އެވެ.

މަގާމުން ސަސްޕެންޑް ނުކުރާ ސަބަބާ ގުޅޭ ގޮތުން ޒަރީރު ވިދާޅުވީ އެފަދަ ހާލަތްތައް ކަރެކްޝަންސްގެ ގާނޫނުގައި ބަޔާންކޮށްފައިވާ ކަމަށެވެ. އެ ހިސާބަށް ދިޔުމުން އެކަން ވެސް ކުރައްވާނެ ކަމަށް އޭނާ ވިދާޅުވި އެވެ.

"އެހާ ހިސާބަށް [ސަސްޕެންޑް ކުރަން ޖެހޭ ހާލަތަށް] އައިމާ އަޅަން ޖެހޭ ފިޔަަވަޅުތައް އަޅުގަނޑުމެން އަޅާނެ. އޭގައި ވަކި މީހަކު ނުހުންނާނެ. ފިޔަވަޅު އަޅަން ޖެހޭ ކޮންމެ މީހަކާ މެދު ވިޔަސް ފިޔަވަޅު އަޅާނެ. އަޅުގަނޑުމެން ހިމާޔަތްކުރަން ޖެހޭ އެއްވެސް މަސްލަހަތެއް ނޯންނާނެ. އާސިފަކީ އަޅުގަނޑު މިތަނަށް އައިއިރު ދަންނަ މީހެއް ވެސް ނޫން،" ޒަރީރު ވިދާޅުވި އެވެ.