އައިޝަތު ޝިހާމްގެ އަމާޒު އޮތީ މިނިސްޓްރީއަށް އިތުބާރު ހޯދަން

އާ ސަރުކާރުގެ ސޯޝަލް އެންޑް ފެމިލީ ޑިވެލޮޕްމަންޓް މިނިސްޓަރު ޑރ. އައިޝަތު ޝިހާމްއަށް މި ދާއިރާ އަލެއް ނޫނެވެ. އޭނާ ހޯއްދަވާފައިވާ ތަޖުރިބާތަކާއި ފިލާވަޅުތަކުގެ އަލީގައި، މި ދާއިރާގެ އެކި ދިމަދިމާލަށް ރަނގަޅަށް ލޯ ހުޅުވިފައިވާ ކަމަށް ދެކެވަޑައިގަންނަވަ އެވެ.

އައިޝަތު ޝިހާމް ވަނީ ކުރިން މިނިސްޓްރީ އޮފް ވިމެންސް އެފެއާޒް އެންޑް ސޯޝަލް ސެކިއުރިޓީގެ އިސް މަގާމުތަކުގައި 10 އަހަރަށް ވުރެ ގިނަ ދުވަހު ހިދުމަތްކުރައްވައިފަ އެވެ. އެ މިނިސްޓްރީގެ މަސައްކަތްތަކާއި ނަން އެކި ސަރުކާރުތަކުގައި ބަދަލުވަމުން އައިސް އަނެއްކާވެސް ބަދަލު އަތުވެއްޖެ އެވެ. އެކަމަކު، ތަނުގެ ތެރޭގައި ހުރި ޒިންމާތައް ކުޑައެއް ނުވެ އެވެ. ބައެއް ޒިންމާތައް ވީ އިތުރެވެ.

"މި ދާއިރާއަކީ އަޅުގަނޑަށް ފެށުނީއްސުރެ ވެސް މަސައްކަތް ކުރެވިފައި އޮތް ދާއިރާއެއް. މި ދާއިރާއިން ރައްޔިތުންނަށް ހިދުމަތް ކުރުމަކީ އަޅުގަނޑުގެ ވަރަށް ބޮޑު އެދުމެއް،" މި ދާއިރާއަށް އޮތް ޝައުގުވެރިކަމާ ބެހޭގޮތުން ސުވާލު ކުރުމުން އައިޝަތު ޝިހާމް ވިދާޅުވީ މިހެންނެވެ.

ހާސިލްކުރައްވާފައިވާ ތައުލީމާއި ސައިކޮލޮޖީ ކައުންސެލަރެއްގެ ގޮތުގައި ލިިބިވަޑައިގެންފައިވާ ތަޖުރިބާގެ އަލީގައި އާންމުންގެ ޝަކުވާތައް އަޑުއަހަން އޭނާ ހުންނެވީ ތައްޔާރަށެވެ. އެ ކަންކަމަށް ހައްލު ގެންނާނެ ގޮތްތައް ރާވައި ނިޒާމުތައް ތަރުތީބު ކުރެއްވުމަކީ އޭނާގެ މައިގަނޑު މަސައްކަތެވެ.

އެކަމަކު އޭނާއަށް ވެސް އެއްބަސްވެވޭ ހަގީގަތަކީ މި މިނިސްޓްރީއަކީ "ބޮޑު މައްސަލަ ފުންޏެއް" ކަމެވެ. އެކި ސަރުކާރުތަކުގައި ހައްލެއް ނުގެނެވި މަތިމައްޗަށް ފުނިޖެހެމުންދިޔަ މައްސަލަތަކާއި ޝަކުވާތަކުގެ ނަތީޖާއަކީ އެ މިނިސްޓްރީއަށް އިތުބާރު ގެއްލިގެން ދިއުމެވެ. އައިޝަތު ޝިހާމަށް އޮތް އެންމެ ބޮޑު ގޮންޖެހުމަކީ އެއީ އެވެ. އެ އިތުބާރު ހޯދުމެވެ.

"މި މިނިސްޓްރީއަކީ ވަރަށް ގިނަ ދަތިތަކެއް ދިމާވެފައި އޮތް ބައެއްގެ ބޭނުން ފުއްދަން އުފެދިފައި އޮތް މިނިސްޓްރީއެއް. އަޅުގަނޑު ފާހަގަކޮށްލަން ބޭނުން، މީގެ ކުރިން ވަޑައިގަތް މިނިސްޓަރުން ވެސް ވަރަށް މަސައްކަތް ކުރައްވާފައި، ހަރުދަނާ ކަންތައްތަކެއް ވެސް [ކުރައްވާފައި ހުރިކަން] އަޅުގަނޑުމެންނަށް ފާހަގަވެގެން އެބަދޭ،" މައްސަލަތަކުގެ ގިނަކަމާއި ބޮޑުކަން ފާހަގަކުރައްވައި އައިޝަތު ޝިހާމް ވިދާޅުވި އެެވެ.

އައިޝަތު ޝިހާމް ފުރަތަމަ މަސައްކަތް ކުރައްވަން ފެއްޓެވީ މުދައްރިއްސެއްގެ ގޮތުގަ އެެވެ. އެ ވަޒީފާގައި 1983 އިން ފެށިގެން ހޭދަކުރެއްވި ދުވަސްތަކުގައި، ތަފާތު އެހީތަކެއް ބޭނުންވާ ހާއްސަ ކުދިންތަކެއް ތިބިކަން ފާހަގަކުރެއްވުނެވެ. އެކަމަށް ވިސްނުން ހިންގަވަން ފެށުމުން ޝައުގުވެރިކަން އުފެދުނީ އެ ދާއިރާއިން އިތުރަށް ތައުލީމް ހޯދައި ކަންކަން ދެނެގަތުމަށެވެ.

އެ ޝައުގުވެރިކަމުގައި އޭނާ ސައިކޮލޮޖީގެ ދާއިރާއިން ޑިގްރީ ހެއްދެވި އެވެ. އެއަށް ފަހު މަސައްކަތަށް އެނބުރި ވަޑައިގަތީ ވެސް، ފުރަތަމަ މުދައްރިސެއްގެ ވަޒީފާ އަދާކުރެއްވި ސްކޫލަށެވެ. އެކަމަކު މިފަހަރު އެ ސްކޫލުގެ ކައުންސެލަރުގެ ގޮތުގަ އެވެ.

އެ ސްކޫލުގެ ތަފާތު އެކި ދަރިވަރުންގެ މައްސަލަތައް އަޑުއައްސަވައި އެ ކަންކަން ހައްލުކުރުމަށް އެހީތެރިވެދިނުމުގައި ހަތަރު އަހަރު ހޭދަކުރެއްވުމުގެ ތެރޭގައި ދެން ވިސްނިވަޑައިގަތީ، އެ ކުދިންނަށް އެހީތެރިކަން ފޯރުކޮށްދިނުމަށް އުނގެނެންޖެހޭ އިތުރު ފިލާވަޅުތަކާއި ދެނެގަންނަންޖެހޭ ކަންކަން ހުރި ކަމެވެ. އެހެންވެ، އަނެއްކާވެސް އޭނާ ވަޑައިގަތީ އިތުރަށް އެ ދާއިރާއިން ތައުލީމް ހާސިލުކުރައްވާށެވެ. ކައުންސެލިން ދާއިރާ އިން މާސްޓާސް ހައްދަވައިގެން އޭނާ ދެން ގުޅިވަޑައިގަތީ ރާއްޖޭގައި އަލަށް އުފެދުނު ކުޑަކުދިންގެ ހައްގުތަކާ ބެހޭ ޔުނިޓާ އެވެ. އެ ޔުނިޓު 2006 ވަނަ އަހަރު އުވާލީ އެވެ. 

ނަމަވެސް، އައިޝަތު ޝިހާމްގެ ހިތުގައި އެ ދާއިރާއަށް އޮތް ލޯތްބާއި އެ ދާއިރާ އިން އިތުރަށް ކަންކަން ދެނެގަނެ އުގެނުމުގެ ޝައުގުވެރިކަން ކުޑައެއް ނުވި އެވެ. އަނެއްކާވެސް އިތުރަށް ކިޔަވައި ވިދާޅުވެ، އޭރުގެ ޔޫތު މިނިސްޓްރީގައި މަސައްކަތް ކުރެއްވި އެވެ. އޭނާ ވަނީ ޔޫތު އެންޑް ސްޕޯޓްސް މިނިސްޓަރުކަމުގެ މަގާމު އަދާކުރައްވާފަ އެވެ. އަދި ރައީސް އަބްދުﷲ ޔާމީންގެ ސަރުކާރުގެ އެޑިއުކޭޝަން މިނިސްޓަރުކަން ކުރެއްވި އެވެ.

ގެއްލިފައިވާ އިތުބާރެއް ހޯދުމަކީ އެއްވެސް އިރެއްގައި ފަސޭހަ ކަމަކަށް ނުވާނެ އެވެ. އެކަމަށްޓަކައި ރާވަންޖެހޭނީ ވަރަށް ވިސްނުންތެރި ރޭވުންތަކެކެވެ. އައިޝަތު ޝިހާމް ވިދާޅުވިގޮތުގައި އޭނާ އެކަން ހާސިލުކުރެއްވުމަށް ގެންގުޅުއްވާ ވިސްނުމަކީ އެންމެންނާ ގުޅިގެން މަސައްކަތް ކުރެއްވުމެވެ. ޝަކުވާއައިގެން އަންނަ މީހާގެ އަޑު އެއްސެވުމެވެ. އެ ޝަކުވާތަކަށް އަވަހަށް ޖަވާބުދާރީވެވޭ ތަނަކަށް އެ މިނިސްޓްރީ ހެދުމެވެ. 

"އިރާދަ ކުރެއްވިއްޔާ އަޅުގަނޑުމެންގެ އުންމީދަކީ މި މިނިސްޓްރީއަކީ ރައްޔިތުންގެ ބޭނުންތަކަށް ވަރަށް އިތުބާރު ހުރި ގޮތަކަށް ޖަވާބުދާރީވެވޭ ތަނެއްގެ ގޮތަށް ފެނިގެން ދިއުން،" އައިޝަތު ޝިހާމް ވިދާޅުވި އެވެ.

އެ އަމާޒުގައި އޭނާގެ އިރުޝާދުގެ ދަށުން މިނިސްޓްރީން ވަނީ މިހާރު މަސައްކަތްތަކެއް ފަށާފަ އެވެ. އެގޮތުން ކުރަން ރާވާފައިވާ ކަންކަން އައިޝަތު ޝިހާމް ވިދާޅުވެދެއްވި އެވެ. އެންމެ ފުރަތަމަ ކަމަކީ، އެ މިނިސްޓްރީއަކީ، އެހީތެރިކަމަށް އެދިގެން ގުޅާ މީހުންގެ ކޯލްތައް އަވަހަށް ނަގައި ޖަވާބު ދޭ ތަނަކަށް ހެދުމެވެ. އަދި ހައްލު ހޯދައިދިނުމަށް ވީހާވެސް އަވަހަކަށް މަސައްކަތް ކުރެވޭނެ ގޮތަށް ނިޒާމުތައް ބަދަލު ކުރެއްވުމަަކީ ވެސް އައިޝަތު ޝިހާމްގެ މިވަގުތުގެ އިސް އެއް މަސައްކަތެވެ.

"އެއީ މީހަކަށް ދަތިވެގެން ފޯނެއް ކުރާ ވަގުތު އެއަށް ޖަވާބު ނުދެވޭ ކަމަށް ވަންޏާ އެ މީހަކަށް ވަރަށް ދަތި ކަމަކަށް ވާނީ. އެ [އެހީތެރިކަން ބޭނުންވާ] މީހުން، އެ އެދޭ ކަންތައް ނުވަތަ [މިިނިސްޓްރީ އަކީ] ޖަވާބުދާރީވާ ބައެއް ކަމަށް ފާހަގަވެއްޖެއްޔާ އަޅުގަނޑަށް ހީވަނީ މައްސަލަތައް ހައްލުކުރަން ފަސޭހަވެ، މިނިސްޓްރީއަށް ރައްޔިތުންގެ އިތުބާރު ހޯދޭނެ ހެން،" އައިޝަތު ޝިހާމް ވިދާޅުވި އެވެ.

އަންހެނަކު އޭނާގެ ކުޑަ ދެ ކުދިންނާ އެކު ބޭރަށް ނެރެލާފައި ހުންނަތާ ދެ ގަޑިއިރަށް ވުރެ ގިނައިރުވީ އިރު އެހީތެރިކަމެއް ނުލިބުމާއި މިނިސްޓްރީއަށް ގުޅުމުން ރަސްމީ ވަގުތު ނޫން ކަމަށް ބުނެ އެހީތެރިކަން ފޯރުކޮށް ނުދިން ކަމަށް ބުނާ މައްސަލައެއް މިދިޔަ މަހުގެ ތެރޭގައި ރަށެއްގައި ވަނީ ފެންމަތިވެފަ އެވެ. އިޖުތިމާއީ ހިދުމަތްތައް ދޭ މިނިސްޓްރީއާ މެދު އަބަދުވެސް އާންމުންގެ އެންމެ ބޮޑު އެއް ޝަކުވާއަކީ އެކިއެކި މައްސަލަތަކާ ގުޅިގެން އެހީތެރިކަމަށް އެދި ގުޅާ މީހުންނަށް ޖަވާބުދިނުމާއި އެހީތެރިވުން ލަސްވުމެވެ.

އައިޝަތު ޝިހާމްގެ ވިސްނުން ހުރީ އެކަން ބަދަލުކޮށްލެއްވުމަށެވެ. އެއީ މިނިސްޓްރީއަށް އިތުބާރު ހޯދަން އޭނާ އަޅުއްވާ ފުރަތަމަ ފިޔަަވަޅެވެ. ދެވަނަ ފިޔަވަޅަކީ، އެހީތެރިކަމަށް ބޭނުންވާ މީހުންނަކީ ކޮބައިކަން ދެނެގަތުމެވެ. އަމިއްލަ ޖަމިއްޔާތަކާ ގުޅިގެން، އެހީތެރިކަން ބޭނުންވާ މީހުންނާ ވާހަކަދައްކައި އެ މީހުންގެ ބޭނުންތައް ދެނެގަނެ އެހީތެރިކަން ފޯރުކޮށްދިނުމެވެ.

އެހީތެރިކަމަށް ބޭނުންވެފައިވާ އަދި ދައުލަތުގެ ބެލުމުގެ ދަށުގައި ތިބި މީހުންގެ ދަފްތަރެއް އެކުލަވާލުމުގެ މަސައްކަތް ވެސް އޭނާގެ އިރުޝާދުގެ ދަށުން މިނިސްޓްރީ ދަނީ ކުރަމުން ނެވެ. އައިޝަތު ޝިހާމް ވިދާޅުވި ގޮތުގައި، ދަފްތަރެއް އެކުލަވާލުމަކީ، އެހީތެރިކަމަށް ބޭނުންވާ ނުވަތަ ބޭނުންވެދާނެ މީހުން ދެނެގަތުމަށް އެންމެ ފަސޭހަ މަގެވެ. އޭރުން، ކައުންސިލްތަކުގެ ބެލެނިވެރި ފަރާތް ކަމަށްވާ އެލްޖީއޭ އާއި ހެލްތު މިނިސްޓްރީއާ ގުޅިގެން، ރަށްރަށުގައި ތިބޭ އެފަދަ މީހުން ދެނެގަނެ، އެހީތެރިކަން ފޯރުކޮށްދޭންވީ ގޮތްތައް ދެނެގަނެވޭނެ ކަމަށް އައިޝަތު ޝިހާމް ވިދާޅުވި އެވެ.

އުމުރުން ދުވަސްވެ ގައިބާރު ދެރަވާ ދުވަހު، އާއިލާގައި ބަލާނެ މީހަކު ނެތް އެތައް މައިންބަފައިންނެއް ހިޔާވަހިކަން ހޯދަނީ، ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒުންނެވެ. އޭގެ ތެރޭގައި ގިނައީ ހާއްސަ އެހީއަށް ބޭނުންވާ މީހުންނެއް ނޫނެވެ. އެކަމަކު ކޮންމެވެސް މީހެއްގެ އެހީތެރިކަން ބޭނުންވާތީ، އެ ކެޓަގަރީއަށް ކޮންމެވެސް ގޮތަކަށް ފައްތާލައިގެން ދައުލަތުން ބަަލަހައްޓަމުންދާ މީހުންނެވެ. އެ މީހުން އެ ކެޓަގަރީއަށް ފެތެނީ މުސްކުޅިވާ ދުވަހު އެ މީހުންގެ ދަރިން ނުވަތަ އާއިލާއިން ނުބަލައި ދޫކޮށްލާތީ އެވެ. އެންމެ ބޮޑަށް އެހީތެރިކަމަށް ބޭނުންވާ ދުވަހު އާއިލާގެ އެހީތެރިކަން ނުލިބި އަމިއްލަ ހިޔާވަހިން ވެސް ބޭރުވެ، މާދުރުގައި އެކަހެރި މާހުލެއްގައި، ތަފާތު މިޒާޖުގެ އެތައް ބައެއްގެ ކައިރީ ދިރިއުޅެން މަޖުބޫރުވަނީ އެ ނޫން ގޮތެއް އެ މީހުންނަށް ނެތީމަ އެވެ.

އެގޮތަށް އުޅެންޖެހުމުން، ހާއްސަ އެހީއަށް ބޭނުންނުވާ މީހާ ވެސް، އެންމެ ފަހުން ހާއްސަ އެހީއަށް ބޭނުންވާ މީހަކަށް ބަދަލުވެގެންދަނީ ނަފްސާނީ ގޮތުން ވެސް ލިބޭ އެތަކެއް އަނިޔާތަކާއި ވޭނެއްގެ ސަބަބުންނެވެ. އެތަނުގައި އެ މީހުން ބަލަހައްޓަން ތިބޭ މީހުން އިހުމާލުވާކަމުގެ އަޑުތައް ވެސް ދޭތެރެދޭތެރެއިން ފެތުރެވެ. ހަގީގަތުގައި އެއިން ކޮންމެ މީހަކު ވެސް ބޭނުންވަނީ އާއިލާއެކެވެ.

ދައުލަތުގެ ބެލުމުގެ ދަށުގައި ތިބޭ ކުޑަކުދިންގެ ދިރިއުޅުން ހުރީ ވެސް މިހެންނެވެ. އެ އުމުރުގައި ލިބެންޖެހޭ ތައުލީމާއި އާއިލާގެ ލޯބިން މުޅިން މަހުރޫމުވެ ބަންދު ތަނެއްގެ ތެރޭގައި ތަފާތު މިޒާޖުގެ ކުދިންނާ އެކު ދިރިއުޅެން ޖެހުމުން އެ ކުދިން ފުރާފުރިހަމަވަނީ އެތަކެއް ހައްގުތަކުން މަހުރޫމުވެފައިވާ ކުދިންގެ ގޮތުގަ އެވެ. ނަތީޖާއަކީ އެކަމުގެ ސަބަބުން އެކުދިންގެ އުޅުމާއި ވިސްނުމުގައި ވެސް މުޖުތަމައު ގަބޫލުނުކުރާ ސިފަތައް އަށަގަތުމެވެ. ފާއިތުވެދިޔަ ސަރުކާރުތަކުގައި ވެސް އެކުދިންނާއި، ދައުލަތުގެ ބެލުމުގެ ދަށުގައި ތިބި މީހުންނަށް ހައްގުތައް ހޯދައިދިނުމުގައި މާބޮޑު ކުރިއެރުމެއް ލިބިފައެއް ނެތެވެ. މިއަދާ ހަމަޔަށް ވެސް މިއީ ސޯޝަލް މިނިސްޓްރީއަށް އޮތް ބޮޑު ގޮންޖެހުމެކެވެ. ގިނަ ޝަކުވާތަކެއް ލިބެމުންދާ ކަމެކެވެ.

އައިޝަތު ޝިހާމްގެ ވިސްނުން ހުރީ މައްސަަލައިގެ 'މުގުލަށް' ފަރުވާ ކުރުމަށެވެ. އޭނާ ގަބޫލުކުރައްވާ ގޮތުގައި އެ މައްސަލަ ހައްލުވާނީ ފުރަތަމަ މަރުހަލާގައި ވެސް އެ މީހުންގެ ނުވަތަ ކުދިންގެ ދާއިމީ ހިޔާވައްސަކީ ދައުލަތުގެ މަރުކަޒުތައް ކަމަށް ވިސްނާ ވިސްނުމާ ދުރުވެގެންނެވެ.

އޭގެ ބަދަލުގައި ވިސްނުން ގެންގުޅެންވީ، އައިޝަތު ޝިހާމް ވިދާޅުވިގޮތުގައި، ދައުލަތުގެ ބެލުމުގެ ދަށަށް ގެންދާ މީހުންނާއި ކުދިންގެ ދާއިމީ ހިޔާވައްސަކީ އެހެން މީހުންނެކޭ ވެސް އެއްގޮތަށް މުޖުތަމައު ތެރޭގައިވާ އެ މީހުންގެ އާއިލާ ކަމަށެވެ. ދައުލަތުގެ ފުރާޅު ދަށުން ނެރެދީ، މުޖުތަމައުގެ ތެރެއިން އެ މީހުންނަށް ނުވަތަ ކުދިންނަށް އާއިލާއެއް ހޯދުމަށް މަސައްކަތް ކޮށްދޭން ދައުލަތުން ވިސްނުން ބަހައްޓަންޖެހެ އެވެ.

"މާލެތެރޭ ހުރި ފިޔަވަތި ކަމަށް ވިޔަސް، އަތޮޅުތެރޭ ހުރި އަމާންވެށި ކަމަށް ވިޔަސް އަދި ގުރައިދޫ މަރުކަޒުގައި ތިބޭ މީހުން ވިޔަސް، މިއިން ކޮންމެ މީހަކަށް އަޅުގަނޑުމެން މި ގަބޫލުކުރަނީ އެ މީހުންގެ ދިރިއުޅުމަށް ހެޔޮ ބަދަލުތައް ގެނެވޭނީ އާއިލާއަކާ ގުޅިގެންނޭ،" އައިޝަތު ޝިހާމް ވިދާޅުވި އެވެ.

'ކޮންމެ ކުއްޖަކަށް އާއިލާއެއް' މި ޝިއާރުގެ ދަށުން އެކަން ކުރުމަށް ވިސްނުން ގެންގުޅޭ ގޮތް ވެސް އޭނާ ވިދާޅުވެ ދެއްވި އެވެ. މިހާރު މިނިސްޓްރީ ތެެރެއިން ފަށާފައިވާ އެ ޕްރޮގްރާމުގެ ތެރެއިން އެންމެ ފުރަތަމަ މަސައްކަތް ކުރާނީ، ދައުލަތުގެ ބެލުމުގެ ދަށުގައި ތިބޭ ކުދިން ނުވަތަ މީހުންގެ އަމިއްލަ އާއިލާއާ ގުޅުން ބަދަހިކުރުވާ، އެ އާއިލާއާ އެކު އުޅެވޭނެ ގޮތެއް ފަހި ކޮށްދިނުމަށެވެ.

އެކަން ކުރެވެން ނެތް ނަމަ، ނުވަތަ އާއިލާއަށް އެކަމަށް ތައްޔާރުވެވެން ނެތް ނަމަ، ދެން މަސައްކަތް ކުރާނީ އެފަދަ މީހުން ނުވަތަ ކުދިން ނަގަން ޝައުގުވެރިކަން ހުރި އެހެން އާއިލާއެއް ވޭތޯ ބެލުމަށެވެ. އަދި އެފަދަ އާއިލާއެއް ހުރި ނަމަ، އެ ކުއްޖަކާ ނުވަތަ އެ މީހަކާ އާއިލާ މެޗުކޮށް، އެ ކުއްޖާ ނުވަތަ އެ މީހާ ގެންގުޅެން ތަމްރީނުތައް ދޭނެ އެވެ. އެ ތަމްރީންތަކުގެ ތެރެއިން ދެބައިމީހުން ބައްދަލުވެ މުއާމަލާތު ކުރަން ފެށުމުން ގުޅުން ބަދަހިވެ، އާއިލާއެއްގެ ހިޔާވަހިކަން އެފަދަ ކުދިންނާއި މީހުންނަށް ލިބިގެންދާނެ ކަމަށް އައިޝަތު ޝިހާމް އުންމީދު ކުރައްވަ އެވެ.

"މިއިން ކޮންމެ ކުއްޖެއް ވެސް އަދި އުމުރުން ދުވަސްވީ މީހަކަށް ވެސް އަޅުގަނޑުމެން މި އެދެވެނީ އާއިލާއަކާ އެކީ އެ މީހުންގެ ދިރިއުޅުން ބަދަލުކުރުމަށް، އެއީއޭ އެ މީހުން ވެސް ހިތްހަމަޖެހޭނެ ގޮތަކީ. އަދި ދިރިއުޅުމުގެ ހާލަތު ރަނގަޅުވެގެންދާނެ ކަމަކީ ވެސް. އެ ތަންތަނަކީ ވަގުތީ ގޮތުން ތިބޭ ތަންތަން ކަމަށް ދެކި، ބޮޑު ހައްލެއް ގެނެވޭނީ މުޖުތަމައުތެރެއަށް އެ ކުދިންނާއި އެ މީހުން ނެރެ އާއިލާއެއްގެ ތެރެއަށް ދެވޭ ގޮތް ވުމުން،" އައިޝަތު ޝިހާމް އުންމީދާ އެކު ވިދާޅުވި އެވެ.

މި ހުރިހާ މަސައްކަތެއްގެ ތެރެއިން ވެސް މިނިސްޓްރީއަށް ކުރިމަތިވާނެ ގޮންޖެހުމަކީ އެތަނަށް ގެއްލިފައިވާ އިތުބާރެވެ. އައިޝަތު ޝިހާމް ގަބޫލުކުރައްވަނީ، އެ މަސައްކަތްތައް ރަނގަޅު ކުރެވިއްޖެ ނަމަ އިތުބާރު ހޯދަން ފަސޭހަ ވެގެންދާނެ ކަަމަށް ކަމަށެވެ. އޭނާގެ އުންމީދަކީ، އޭނާގެ މިނިސްޓަރުކަމުގެ ދަށުން، ބަދަލުވި ނަމާ އެކު، އެ މިނިސްޓްރީއާ މެދު މީހުން ދެކޭ ގޮތް ވެސް ބަދަލުވެގެން ދިއުމެވެ. ޝަކުވާތައް މަދުވެ، އެ މިނިސްޓްރީއަކީ ރައްޔިތުން ގަބޫލުކުރާ ފެންވަރުގެ ހިދުމަތެއް ދެވޭ ތަނަކަށް ވެގެން ދިއުމެވެ.

"މި މަސައްކަތުގެ ބޭނުމަކީ އެހީތެރިކަމަށް ބޭނުންވާ މީހުންނަށް އެ މީހުންނާ ގުޅިގެން ހިދުމަތް ދިނުން. އެހީތެރިކަން ބޭނުންވާ މީހުން މިހާރު ތިބި ހިސާބުން އެއަށް ވުރެ ފަސޭހަ ހިސާބަކަށް ގެންދިއުން. އަދި މި ކުރެވޭ މަސައްކަތުގެ ތެރެއިން އެހީތެރިކަމަށް އެދިގެން އަންނަ މީހާއަށް އަވަހަށް ޖަވާބުދާރީވެވޭ، ރައްޔިތުންނަށް ގަބޫލުކުރެވޭ ފެންވަރުގެ ހިދުމަތެއް ދެވޭނެ ފަރާތަކަށް ވުން،" 'ދައުރު' އަށް ދެއްވި އިންޓަވިއު ނިންމާލައްވަމުން، އާއްމުންނަށް ދެއްވި މެސެޖެއްގެ ގޮތުގައި އައިޝަތު ޝިހާމް ވިދާޅުވީ މިހެންނެވެ.