އާ ސަރުކާރުގައި ވެސް މި ފެންނަނީ 'އާއިލީ ވެރިކަން'

ރައީސް މުހައްމަދު މުއިއްޒު ވެރިކަމާ ހަވާލުވެވަޑައިގެންނެވީ ކާމިޔާބު ކެމްޕޭނަކަށް ފަހު ފުރަތަމަ ފަހަރަށް ރިޔާސީ އިންތިހާބުގެ ދެ ބުރުން ވެސް ކުރި ހޯއްދެވި ހަމައެކަނި ކެންޑިޑޭޓުގެ ގޮތުގަ އެވެ. އެމަނިކުފާނު ވެވަޑައިގެންނެވި ވައުދުތަކާއި، ގައުމު އިސްލާހު ކުރުމަށް ކުރެއްސެވި ތަސައްވުރުގައި ކުލަ ޖެހޭނެ ކަމުގެ ފޮނި އުންމީދުގައި ތިބި ދިވެހިން 'ދިވެހީންގެ ރާއްޖެ' އަށް ގެންގޮސްދެއްވާނެ ކަމުގެ ޔަގީންކަން ދެއްވަމުންނެވެ.

ވެރިކަން ބަދަލުވުމުގެ އޮމާން މަރުހަލާ ނިމި، 22 މިލިއަން ރުފިޔާގެ ކުލަގަދަ ރަސްމިއްޔާތެއްގައި ޖުމްހޫރީ މައިދާނުގައި ހުރި ބޮޑު ދިދަ ދަށުގައި ވެރިކަމުގެ ހުވާ ކުރެއްވި އެވެ. ގައުމިއްޔަތުގެ ރޫހު ދިރިގެންދިޔަ އެ ޖަލްސާއަށް ފަހު، ރައީސް މުއިއްޒުއަށް މާ ބޮޑު ތާއީދެއް ނުކުރާ ދިވެހިން ވެސް ތިބީ މި ވެރިކަން ތަފާތުވާނެ ކަމަށް އުންމީދު ކޮށްގެންނެވެ.

ނަމަވެސް ވެރިކަމާ ހަވާލުވިތާ ދެ ހަފްތާ ތެރޭގައި ފާޑު ކިޔުންތައް ގިނަވެ، ރައީސް މުއިއްޒުގެ މަގުބޫލުކަން ކުޑަވާން ފެށި އެވެ. އެންމެ ބޮޑު ފާޑުކިޔުމެއް އަމާޒުވަނީ ސަރުކާރުގެ މަތީފަޑިއަށް އައްޔަންކުރައްވާ ބޭފުޅުންނާ ގުޅޭ ގޮތުންނެވެ.

ރައީސް މުއިއްޒު ވެސް ގެންދަވަނީ އާއިލީ ބޭފުޅުންނަށް މަގާމުތައް ދެއްވަމުންނެވެ. އެގޮތުން ރައީސްގެ ދެބެންގެ ދެދަރި ތިން ބޭފުޅަކަށް ވަނީ ރައީސް އޮފީހުގެ މިނިސްޓަރު ކަމާއި ނައިބު ރައީސްގެ ރަސްމީ ގެކޮޅުގެ ޗީފް އޮފް ސްޓާފްކަން، ސްޓޭޓް މިނިސްޓަރުގެ ފެންވަރުގައި ދެއްވައިފަ އެވެ.

އާ ސަރުކާރުގެ ރައީސްގެ ހާއްސަ އެޑްވައިޒަރުގެ މަގާމަށް އައްޔަންކުރެއްވީ ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) އެވެ. ކުރީގެ ރައީސް އަބްދުﷲ ޔާމީނަށް އެންމެ ވަފާތެރި ބޭފުޅާގެ ގޮތުގައި އޭރު ސިފަކުރި އަބްދުއްރަހީމް 'ކޮޅު ބަދަލުކޮށްލެއްވީ' ރައީސް މުއިއްޒުގެ ސަރުކާރުގެ ގިނަ މަގާމުތަކެއް ލިބޭ ގޮތަށް ކަމަށް އެއްބަޔަކު ތުހުމަތުކުރެ އެވެ.

އެ ތުހުމަތުތައް އަމާޒުވަނީ އަބްދުއްރަހީމްގެ އާއިލާގެ ބޭފުޅުން، ނުވަތަ އޭނާއާ ގުޅުން ހުރި  ބޭފުޅުން ސަރުކާރުގެ މަތީ މަގާމުތަކުގައި ގިނަވުމުންނެވެ. އޭގެ ތެރޭގައި:

މި މަގާމުތަކަށް ބޭފުޅުން އައްޔަން ކުރުމާ އެކު، 'މުޅި ސަރުކާރުގައި އޮތީ އަބްދުއްރަހީމްގެ ދެ ފައި' ކަމަށާއި، ވެރިކަން ބަދަލުވީ ރައީސް މުއިއްޒު ގެންނަން ވައުދުވެވަޑައިގެންނެވި ދިވެހީންގެ ރާއްޖޭގެ ބަދަލުގައި 'އަދުރޭގެ ރާއްޖެ'އަށް ކަމަށް އެއް ބަޔަކު ބުނެ އެވެ.

ރައީސް މުއިއްޒު އަބްދުއްރަހީމްގެ 'އަތްދަށު ވެފައި' ހުންނެވި ކަމުގެ އަޑުތައް ގަދަވަމުންދާ އިރު، ވެރިކަމާ ހަވާލުވެ މިހާ ކުޑަ ދުވަސްކޮޅެއްގެ ތެރޭގައި ރައީސްއަށް 'ކޮންޓްރޯލް ގެއްލިފައި'ވާ ކަމުގެ ވާހަކަ ވެސް ކޮންމެވެސް ވަރަކަށް އެބަ ދެކެވެ އެވެ.

ކުރީގެ ރައީސް އަބްދުﷲ ޔާމީންގެ އިސް ގާނޫނީ ވަކީލު އަދި ކުރީގެ ނައިބު ރައީސް މުހައްމަދު ޖަމީލު ތުހުމަތުކުރައްވާފައިވާ ގޮތުގައި، "ޕީޕީއެމް މިހާރު އެ އޮތީ ވަކި ބަޔަކު ހައިޖެކް ކޮށްފަ" އެވެ. އެކަމުގެ ފަހަތުގައި ހުންނެވީ، އޭނާ ވިދާޅުވި ގޮތުން ނަމަ، އަބްދުއްރަހީމެވެ.

ޖަމީލުގެ ވާހަކަތަކަށް ބާރު ލިބޭ ގޮތަށް ޕީޕީއެމް އާއި ޕީއެންސީން މި ފަހުން ވަކިވެވަޑައިގެންނެވި ބައެއް މެމްބަރުން ވެސް ވާހަކަދައްކަވާފައިވެ އެވެ.

"މުއިއްޒު ހަފްތާއަކުން ފެއިލް މި ވަނީ. ކުރި އުންމީދުތައް ފެނަށް. ހަމައެކަނި ވީ ކަމަކީ އެންމެ ކައިރީގައި އުޅުނު މީހުންނަށާއި އަދުރޭގެ އާއިލާއަށް ބޮޑެތި މުސާރަ ލިބޭ ވަޒީފާތައް ދިނުން،" އާންމު މީހަކު 'އެކްސް'ގައި ލިއުނެވެ.

މި މަގާމުތައް ލިބިފައިވާ ބޭފުޅުންގެ ތެރެއިން އެންމެ ބޮޑެތި ފާޑުކިޔުންތައް އަމާޒުވަމުން ދަނީ ރާއްޖޭގެ އެންމެ މުހިއްމު އެއް މިނިސްޓްރީ ކަމަށްވާ ޓޫރިޒަމް މިނިސްޓްރީ ހަވާލުކޮށްފައިވާ އަބްދުއްރަހީމްގެ ދަރިކަލުންނަށެވެ. ފަތުރުވެރިކަމުގެ ދާއިރާގައި އެއްވެސް ތަޖުރިބާއެއް ނެތް ފައިސަލްއަކީ ކެބިނެޓުގައި އިންނެވި އެންމެ ނާގާބިލު މިނިސްޓަރު ކަމަށް ބުނެ ސޯޝަލް މީޑިއާގައި ފާޑުކިއުން އަމާޒުވި އެވެ.

މިދިޔަ ހޮނިހިރު ދުވަހުގެ ރޭ ބޯޓިން އެސޯސިއޭޝަނުން ބޭއްވި ހަފްލާއެއްގައި ފައިސަލް ދެއްކެވި ވާހަކައާ އެކު، އޭނާގެ އެއްވެސް 'ފެންވަރެއް ނެތް' ކަމަށް ބުނެ، އިސްތިއުފާއަށް ވެސް ބައެއް މީހުން ގޮވި އެވެ.

މާލޭ ސިޓީ ކައުންސިލްގެ މޭޔަރަކަށް ހުންނެވި ރައީސް މުއިއްޒު ވެރިކަމަށް އަންނަން މަގުކޮއްޓެވީ ސިޓީ ކައުންސިލް މެދުވެރިކޮށެވެ. ބައެއް ފަރާތްތަކުން ބުނި ގޮތުގައި، ޕީޕީއެމް-ޕީއެންސީގެ ސެނެޓުގައި ހިމެނިވަޑައިގަންނަވާ ބޭފުޅުންނާއި، އެ ކޯލިޝަންގެ އިސް ބައެއް ބޭފުޅުންގެ ތާއީދާއި ވަފާތެރިކަން ރައީސް ހޯއްދެވީ ސިޓީ ކައުންސިލްގެ ތެރެއިން ވަޒީފާ ދެއްވައިގެން، ނުވަތަ ވިޔަފާރީގެ ޑީލްތައް ހައްދަވައިގެންނެވެ.

ވެރިކަމަށް ވަޑައިގަތުމަށް ފަހު މިހާތަނަށް ސިޓީ ކައުންސިލްގެ 13 މުވައްޒަފަކު ސިޔާސީ މަގާމުތަކަށް އައްޔަންކުރެއްވުމަކީ އެ ވާހަކަތަކަށް ބާރު ލިބޭ ހެއްކެކެވެ.

ސިޓީ ކައުންސިލްގެ މުވައްޒަފުންގެ ތެރެއިން ސިޔާސީ މަގާމު ދެއްވާފައިވާ ބޭފުޅުން:

ސަރުކާރު ވަޒީފާ ދީގެން ސިޓީ ކައުންސިލްގެ ވަޒީފާ ދޫކޮށްލި ހުރިހާ މުވައްޒަފުން ސިޓީ ކައުންސިލްގެ ޓްވިޓާގައި ޕޯސްޓު ކޮށްފައި އެބަ ހުއްޓެވެ. ޕީޕީއެމް-ޕީއެންސީ ސެނެޓުގައި ހިމެނިވަޑައިގަންނަވާ ބައިވަރު މެމްބަރުން ވެސް މި ލިސްޓުގައި ހިމެނެ އެވެ. 

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ސިޔާސީ މަގާމުތަކުގެ އަދަދަކީ 1،063 އެވެ. އެއީ މާ ބޮޑު އަދަދެއް ކަމަށް ވިދާޅުވެފައިވާ ރައީސް މުއިއްޒުގެ ނިންމެވުމަކީ ސިޔާސީ މަގާމުތައް 700އަށް ވުރެ އިތުރު ނުކުރުމެވެ.

ނަމަވެސް ކުޑަ ދުވަސްކޮޅެއްގެ ތެރޭގައި މުއިއްޒު ވަނީ އެތައް ސިޔާސީ މަގާމަކަށް ބޭފުޅުން އައްޔަންކުރައްވާފަ އެވެ. އެގޮތުން:

ކުރިއަށް އޮތް ތަނުގައި ވެސް ސިޔާސީ އެތައް މަގާމަކަށް މީހުން ކަނޑައަޅުއްވާނެ އެވެ. މީގެ އިތުރުން މިނިސްޓްރީތަަކަށް ކޯޑިނޭޓަރުންގެ ފެންވަރުގައި ވެސް ސިޔާސީ މަގާމުތައް ހިމެނޭނެކަމުގެ މައުލޫމާތު ލިބެ އެވެ. އެހެންކަމުން ރައީސް ވިދާޅުވި ގޮތަށް 700ގައި އަދަދު ހިފެހެއްޓިދާނެ ކަމާ މެދު ސުވާލު އުފެއްދި ދާނެ އެވެ.

ކުރީގެ ރައީސް އަބްދުﷲ ޔާމީން ޕީޕީއެމް ދޫކުރައްވާ އާ ޕާޓީއެއް އުފެއްދެވުމުގެ މަސައްކަތް ކުރައްވަމުން އަންނަ ދަނޑިވަޅެއްގައި، ސިޔާސީ އިތުރު ވަޒީފާތައް 'އުފައްދަން' ޖެހިދާނެ ކަމުގެ ބިރު ވެސް އެބަ އޮތެވެ. އެއީ އެފަދަ ވަޒީފާއަކަށް ޑިމާންޑް ކުރާ މީހުންނަށް ރައީސް މުއިއްޒު އެ ފުރުސަތު ނުދެއްވައިފި ނަމަ، އެމީހުން ޔާމީންގެ ކޮޅަށް ދީލާލުމުގެ ފުރުސަތު ބޮޑުވާނެތީ އެވެ.

ރައްޔިތުންގެ މަޖިލިހުގެ އިންތިހާބާ ގުޅިގެން ވެސް ސިޔާސީ މަގާމުތައް އިތުރުވުން ކައިރި އެވެ.

މީހާގެ ހުރި ގާބިލުކަމާއި ތައުލީމީ ފެންވަރާއި މަސައްކަތުގެ ތަޖުރިބާއަށް ބެލުމެއް ނެތި، ހަމައެކަނި އޮންނަ އާއިލީ ނުވަތަ އެކުވެރިކަމުގެ ގުޅުމުގެ ސަބަބުން ގައުމުގެ ބޮޑެތި މަސްއޫލިއްޔަތުތައް ހަވާލުކުރުމަކީ ހެޔޮ ވެރިކަމެއްގެ އެންމެ މުހިއްމު އެއް ސިފަ ބޮލާލައި ޖަހައި، ސަރުކާރުގެ ބިންގާ ކައްޗަށް އެޅުމެވެ.

އެ އުސޫލުން ސިޔާސީ މަގާމުތައް ބަހާލުމަކީ ދިވެހިން އަބަދުވެސް ހަރުއަޑުން ދެކޮޅުހަދާ ކަމެކެވެ. ރައީސް މުއިއްޒުގެ ވައުދުތަކާ އެކު ގިނަ ބަޔަކު އުންމީދުކޮށްގެން ތިބީ މި ސަރުކާރުގައި އެ މަންޒަރު ނުފެންނާނެ ކަމަށެވެ. 

ރައީސް މުއިއްޒު ކެމްޕޭނުގެ ތެރޭގައި ސަރުކާރުގެ މަގާމުތަކަށް އައްޔަންކުރާނީ ގާބިލު، ތައުލީމީ ބޭފުޅުން ކަމުގެ ޔަގީންކަން ތަކުރާރުކޮށް ދެއްވި އެވެ. ރިޔާސީ އިންތިހާބުގެ ދެވަނަ ބުރުގެ ކުރިން ދެއްވި އެންމެ ފަހުގެ ކެމްޕޭން ހިތާބުގައި ވެސް އެވާހަކަ ވިދާޅުވި އެވެ.

ނަމަވެސް މި ފެންނަނީ އެހެން މަންޒަރެކެވެ.