ރިޔާސީ ބަހުސް: ފާޑުކިޔުންތަކާއި ހިޔާލުތަކާ އެކު ސޯޝަލް މީޑިއާ ހިލުވާލައިފި

ސޯޝަލް މީޑިއާގައި ހާއްސަކޮށް ޓްވިޓާ ނުވަތަ މިހާރުގެ ބަހުން ނަމަ 'އެކްސް'ގައި މިހާ ފޯރިއެއް ނެގީ އެންމެ ފަހުން ކޮން އިރަކު ހެއްޔެވެ؟

އެއީ ޔަގީނުން ވެސް މީގެ ފަސް އަހަރު ކުރިން، އެންމެ ފަހުން 'މޯލްޑިވިއަން އައިޑޮލް' ބޭއްވި އިރު އެވެ. ބައިބަޔަށް އެންމެން އެކައްޗެއް ކީ، ލަވަ ކިޔުންތެރިން ލަވަ ހުށަހަޅައިދޭ ގޮތަށެވެ. މާ ބޮޑު ޒާތީ ކަމެއް ނެތި، އެ މީހުން ޖަޖުކުރީ ލަވަކިޔުންތެރިންގެ ފެންވަރަށެވެ. ބައެއް ފަހަރު ރުޅިއައިސްގެން ކެކެނީ، ޖަޖުން މާކްސް ދޭ ގޮތާއި ކޮމެންޓް ދޭ ގޮތަށެވެ. ޝޯ ހުށަހަޅައިދިން މޫސާ ވަސީމުގެ 'ސަސްޕެންސް' އަށް ޖަހާ ޖޯކެވެ.

އާއްމު ގޮތެއްގައި ޒުވާބާއި ފުރައްސާރަ އާއި އާޑައިން ފުރިފައި އޮންނަ އެ ޕްލެޓްފޯމަކީ އޭރު މަޖާ، މީހުން ފޫހިފިލުވާލުމަށް ވެސް ވަދެނުކުމެ އުޅުނު ތަނެކެވެ.

އެކަމަކު ޝޯއާ އެކު، އެ ފޯރި އާއި ސަކަރާތް ވެސް ގެއްލުނީ އެވެ. ރެއާ ހަމައަށެވެ.

"ގިނަ ދުވަސްތަކަކަށް ފަހު ޓްވިޓާ، ޓްވިޓާއަށް ވެއްޖެހެން ހީވެއްޖެ. އެންމެންގެ ޓްވީޓްތައް ވެސް އެހާ މަޖާ،" އެކްސްގައި މީހަކު ލިޔުނެވެ. 

ރޭ އޮތީ، މީގެ ހަ ދުވަސް ފަހުން ބާއްވާ ރިޔާސީ އިންތިހާބުގައި ވާދަކުރައްވާ  ކެންޑިޑޭޓުންގެ ބަހުސް އެވެ. ފަހު ވަގުތު، ދައުލަތުގެ މީޑިއާ ޕީއެސްއެމް އިން ކެންސަލް ކުރުމުން ސަންގު ޓީވީއިން ގެނެސްދިން އެ ބަހުސް ރެކޯޑު އަދަދަކަށް މީހުން ބެލި ކަމަށް އެ ޗެނަލުން ބުނެ އެވެ.

އަށް ކެންޑިޑޭޓުންގެ ވާހަކަތައް، އެ ބޭފުޅުންނަށް 'މަރުދަން ޖެހޭ' ސަޕޯޓަރުންނާއި ތާއީދު ކުރާ މީހުން ބެލި އެވެ. އިންތިހާބުގައި ވަކި ގޮތެއް ނުނިންމާ ތިބި މީހުން، ވޯޓު ދޭނީ ކާކަށްތޯ ކަަނޑަައަޅަން ވެސް އެ ބަހުސް ބެލި އެވެ. ޓީވީ ނޫނީ ފޯނުން ބަހުސް ބަލަމުން، ހަމައެއާ އެއްވަރަށް ސޯޝަލް މީޑިއާގައި ވެސް އެ މީހުންގެ ހިޔާލުތައް ލިޔުނެވެ.

އެކްސްގައި ލިޔެފައިވާ ވާހަކަތަކަށް ރޭގެ ބަހުސް އިން އެންމެ ފާހަގަވީ:

'ފާރިސް މައުމޫނަކީ މިހާރު އަންޑަޑޯގެއް ނޫން'

އިންތިހާބުގައި ވާދަކުރައްވާކަން އިއުލާން ކުރެއްވުމާއި ބައެއް ސިޔާސަތުތައް ސޯޝަލް މީޑިއާގައި އާއްމު ކުރެއްވުމާއި ޓްވީޓްގެ ޒަރީއާއިން ބައެއް މީހުންނާ މުއާމަލާތު ކުރެއްވުން ފިޔަވައި، ވެރިކަން ހޯއްދެވުމަށް ފާރިސް މައުމޫން މާ ބޮޑު މަސައްކަތް ކުރައްވާތަނެއް މިހާތަނަކަށް ނުފެނެ އެވެ. އެހެންވެ، އޭނާގެ ސިޔާސަތުތަކާއި ވިސްނުމަށް އާއްމުންގެ ގިނަ ބަޔަކު ވަރަށް ބީރައްޓެއްސެވެ.

ނަމަވެސް ރޭގެ ބަހުސްގައި، މޮޑަރޭޓަރު ކުރި ސުވާލުތަކަށް އެންމެ 'ހަމަޖެހޭ' ޖަވާބުތަކެއް ދެއްވީ ފާރިސްކަމަށް ގިނަ ބަޔަކު އެއްބަސްވެ އެވެ. މަޑުމައިތިރިކަމާ އެކު، ވަރަށް ހަމަޖެހިވަޑައިގެން ހުންނަވައިގެން އޭނާ ސުވާލުތަކާ ކުރިމަތިލެއްވީ، ހުށިޔާރުކަމާ އެކުގަ އެވެ. ހާއްސަކޮށް ގައުމީ ސަލާމަތާއި ރައްކާތެރިކަމާއި ބޯހިޔާވަހިކަމާ ގުޅޭ ސުވާލަށް އޭނާ ދެއްވި ޖަވާބު ގިނަ ބަޔަކަށް ކަމުދެ އެވެ.

"ފާރިސް މައުމޫން މިރޭގެ ބަހުސް އިން ކުރި ހޯއްދަވައިފި."

"ބަހުސް ބެލުމަށް ފަހު އަހަރެން ވޯޓު ދޭނެ ކެންޑިޑޭޓު ޔަގީން ވެއްޖެ، އެއީ ފާރިސް."

"ފާރިސްއަކީ މިހާރު އަންޑަޑޯގެއް ނޫން. ކުރިއަށް އޮތް ފަސް ދުވަހު އޭނާގެ އަތަށް މައިކު ދޭން ޖެހޭ."

"ދެއްކެވި ވާހަކަތައް ވަރަށް ފުރިހަމަ. އެކަމަކު ހިތަށް އަރަނީ މިއޮތް ހުރިހާ ދުވަހު މި ވާހަކަތައް ނުދެއްކެވީ ކީއްވެބާއޭ؟"

ގިނަ ބަޔަކަށް މޮޑަރޭޓަރު ނާއިންސާފު

މޮޑަރޭޓަރަކަށް އިން އިބްރާހިމް ވަހީދުގެ ބައެއް ސުވާލުތަކާ މެދު ސޯޝަލް މީޑިއާގެ އަހުލުވެރިން، މާ ގަޔާވި ހެނެއް ހިޔެއް ނުވެ އެވެ.

ހިއުމަން ރައިޓްސް ކޮމިޝަނުގެ ކުރީގެ ރައީސް އަހުމަދު ތޮލާލް ކުރެއްވި ޓްވީޓެއްގައި ވިދާޅުވީ، ރިޔާސީ ބަހުސްގައި ސުވާލު ކުރަން ޖެހޭ ވަރަށް މޮޑަރޭޓަރު 'ހޯމްވޯކް' ހަދާފައި ނުވާ ކަމަށެވެ. އޭނާގެ ނަޒަރުގައި ކުރި ސުވާލުތަކަކީ ބަހުސްގެ މަގްސަދާ މާ ބޮޑު ގުޅުމެއް ނެތް ސުވާލުތަކެކެވެ.

ކެންޑިޑޭޓުންނާ ސުވާލު ކުރާއިރު މީހަކާ ޒުވާބު ކުރާ ގޮތަށް ނުކުރުމާއި ވަކި ކޮޅަކަށް ނުޖެހުމަށް ވެސް އިރުޝާދު ދެއްވި އެވެ. މިއީ ބަހުސަކަށް ވުރެ ބޮޑަށް، ތަހުގީގު ކުރުމެއް ކަމަށް ވެސް ބައެއް މީހުން ސިފަކުރި އެވެ.

"ރަނގަޅު ބަހުސެއް. ..ރަނގަޅު މޮޑަރޭޓަރަކާ އެކު މި ބަހުސް މިއަށް ވުރެ ފުރިހަމަ ވީސް،" ތޮލާލް ވިދާޅުވި އެވެ.

ބައެއް މީހުން ބުނިގޮތުގައި މޮޑަރޭޓަރު ސުވާލު ކުރަން އެއް ގަޑިއިރު ބޭނުންވާއިރު، ކެންޑިޑޭޓުން ޖަވާބު ދެއްވުމަށް ލިބެނީ 1 މިނިޓެވެ. 

މި ޝަކުވާ ބައެއް ކެންޑިޑޭޓުން ވެސް ކުރެއްވި އެވެ. ފާރިސް އާއި ޑިމޮކްރެޓިކްސްގެ ކެންޑިޑޭޓު އިލްޔާސް ލަބީބު ވަނީ ވަރަށް ހިތްހަމަނުޖެހި ވަޑައިގެން ހުންނަވައި، އެކަމުގައި 'އެހެން އެޖެންޑާއެއް އޮތީތޯ' އާއި 'އެހެން ކެންޑިޑޭޓުންނަށް ގިނަ ވަގުތު ދެއްވާ ކަމަށް' ވިދާޅުވެފަ އެވެ.

ސޯޝަލް މީޑިއާގައި ދެން ފާހަގަކުރެވުނު ސަމާސާތަކަށް ބަލާއިރު، ކުރީގެ ރައީސުން ޖަލަށް ލުމުގެ ސަގާފަތް ރާއްޖޭގައި ދެމިގެން ދާތީ އެކަމާ ގުޅޭ ގޮތުން ކުރި ސުވާލަށް ރައީސް އިބްރާހިމް މުހައްމަދު ސޯލިހު ދެއްވި ޖަވާބަށް، ޕީއެންސީ ކޯލިޝަނުގެ ކެންޑިޑޭޓު ޑރ. މުހައްމަދު މުއިއްޒު ރިއެކްޓް ކުރައްވާ ގޮތް ވެސް ބައެއް މީހުންނަށް މަޖާވި އެވެ. މިހާރު އެ ވެފައިވަނީ 'މީމަކަ'ށެވެ. 

އެ ސުވާލުގެ ޖަވާބުގައި ރައީސް ވިދާޅުވީ ކުރީގެ ރައީސް އަބްދުﷲ ޔާމީން ޖަލަށް ލާފައިވަނީ ސިޔާސީ ކަމެއްގައި ނޫން ކަމަށާއި އެފަދަ ކަމަކާ ގުޅުމެއް ނެތް ކަމަށެވެ. އެއާއެކު މުއިއްޒު، ރައީސަށް ' ލޯ އަޅުއްވާލައްވަ' އެވެ. އަދި ރައީސް ވެސް ހަމަ އެކަހަލަ ގޮތަކަށް މުއިއްޒަށް ބައްލަވާލައްވާ ތަން ފެނެ އެވެ.

ރޭގެ ބަހުސްގައި އެ ދެ ބޭފުޅުންނާއި ޖުމްހޫރީ ޕާޓީގެ ކެންޑިޑޭޓު ގާސިމް އިބްރާހިމްގެ ފަރާތުން ވެސް ބޮޑަށް އިވުނީ، ކެމްޕޭންގައި މިހާރު އެންމެ އަޑުހަރުކޮށް ވިދާޅުވަމުން ގެންދަވާ ސިޔާސަތުތަކެވެ. އެކަމަކު ބައެއް ކަންކަމުގައި ގާސިމް މާ ގިނައިން 'ހާމަނައިޒް ކުރައްވާނެ' ކަމަށް ވިދާޅުވާތީ އެކަމަށް ބައެއް މީހުން ޖޯކު ޖެހި އެވެ.

އޭގެ އިތުރުން އަމިއްލަ ކެންޑިޑޭޓު ޒަމީލްގެ ވާހަކަތަކާ މެދު ގިނަ މީހުން މާގަޔައެއް ނުވި އެވެ. ހުރިހާ ކަމެއްގެ ޖުމްލަ ޖަވާބެއްގެ ގޮތުގައި އޭނާ ވިދާޅުވަނީ 'ކޮރަޕްޝަން ނެތް ނަމަ' ނުވަތަ 'ކޮރަޕްޝަން ހުއްޓުވިއްޖެ' ނަމަ ކަމަށާއި އެއީ މާ ބޮޑު އޮއްޓަރެއް ހުރި ޖަވާބުތަކެއް ނޫން ކަމަށް، ހިޔާލުފާޅުކުރި މީހުން އެއްބަސްވެ އެވެ.

ކޮންމެއަކަސް، ސަމާސާތަކާއި ފާޑުކިޔުންތަކާ އެކު ވެސް ރޭގެ ބަހުސް ވެފައިވަނީ ގިނަ ބަޔަކު ބެލި އަދި ހިޔާލުފާޅު ކުރި ހަރަކާތަށެވެ. ތާއީދުކުރާ ކެންޑިޑޭޓާ ބެހޭ އިތުރު ކަންކަން ނުވަތަ ވޯޓުލާންވީ ކެންޑިޑޭޓު ޔަގީންވި ބަހުސް އަކަށެވެ.

ވަރަށް ޒަމާންތަކަކަށް ފަހު، ސޯޝަލް މީޑިއާގައި ގިނަ ދިވެހިން ހިޔާލުފާޅުކޮށް ކޮމެންޓް ކުރި ބަހުސަކަށެވެ.