ވިލާ ޝިޕިން އިން ތިލަފުށިން ގަނެގެން މި އުޅެނީ ކޮން ބިންތަކެއް؟

މިދިއަ ބުރާސްފަތިދުވަހު ސިވިލް ކޯޓުން ނިންމި މައްސަލައެއްގެ ހުކުމުގެ މައްޗަށް ބިނާކޮށް ބައެއް މީޑިއާތަކުން ފެތުރި ހަބަރާ ގުޅިގެން ޖުމްހޫރީ ޕާޓީގެ އިސް ތަރުޖަމާން އަލީ ސޯލިހު ހިތްހަމަޖެހިވަޑައެއްނުގަތެވެ. އޭނާ 'ދުއްވައިގަތީ' ނޫސްވެރިންގެ ފަހަތުންނެވެ. އާންމުކޮށް ބޭނުންކުރައްވާ ޖުމްލަ، ވިލާ ކުންފުނީގެ ވެރިޔާ 'ގާސިމް އިބްރާހިމްއާ މެދު އާންމުންގެ މެދުގައި ނުރުހުމާއި ނަފުރަތު އުފެއްދުމުގެ ކެހިވެރި ނިޔަތް' އެ ހަބަރުތަކުގައި ހުރި ކަމަށް ވިދާޅުވި އެވެ.

ސިވިލް ކޯޓަށް އެޗުޑީސީން، މިހާރު ނަމަ އާބަންކޯއިން މާޗު މަހު ހުށައެޅީ ތިލަފުށީގެ ދެ ބިމެއް ގާސިމްގެ މައި ކުންފުނި، ވިލާ ޝިޕިންއަށް މިލްކުކޮށްދިނުމަށާއި އެ ދެ ބިމުގެ އަގަށް ވާ 228.7 މިލިއަން ރުފިޔާ، ވިލާ ޝިޕިންއިން އާބަންކޯއަށް ދައްކާފައި އޮތް ކަމަށް ބުނެ އެވެ.

ކޯޓަށް ހުށައެޅި ދެ ބިމުގެ ބޮޑުމިން ބައި މިލިއަން އަކަފޫޓަށް ވުރެ ބޮޑެވެ. އޭގެ ތެރެއިން އެއް ބިމުގެ ބޮޑު މިނަކީ 393،212 އަކަ ފޫޓެވެ. އަނެއް ބިމުގައި ހުރީ 156،693 އަކަފޫޓެވެ. 

މި މުއާމަލާތް ސިވިލް ކޯޓުން ނިންމައި، އެއީ ވިލާ ޝިޕިންއަށް މިލްކުވެފައިވާ ބިންތަކެއް ކަމަށް، 11 މޭ 2023ގައި، ކަނޑައެޅި އެވެ.

އަލީ ސޯލިހުގެ ޓްވީޓްގައި، މި މުއާމަލާތާ ބެހޭ، އާންމުންނަށް ނޭނގޭ އެހެން މައުލޫމާތުތަކެއް ހިމެނެ އެވެ. ނަމަވެސް އެ ހުރިހާ ވާހަކައެއް ލިއުއްވާފައި، ނިންމާލެއްވީ 'މިއީ ވިލާގެ ބަހެއް' ނޫން ކަމަށް ވިދާޅުވަމުންނެވެ. އެހެންކަމުން އޭނާ އެ ހިއްސާކުރެއްވީ އޭނާއަށް ލިބިވަޑައިގެންފައި ހުރި މައުލޫމާތެއް އެކަމަކު ވިލާ ޝިޕިންގެ ރަސްމީ ބަހެއްގެ ގޮތަކު ނޫނެވެ.

މި މުއާމަލާތާ ބެހޭ ގޮތުން ވިލާ ޝިޕިން އާއި އާބަންކޯގެ އެއްވެސް ބޭފުޅެއްގެ ރަސްމީ ބަހެއް، 'ދައުރު'އަށް ލިބޭ ގޮތެއް ނުވި އެވެ. އެހެންކަމުން އަލީ ސޯލިހު ހިއްސާކުރެއްވި ބައެއް މައުލޫމާތުތަކަކީ ހަގީގަތެއް ކަމަށް، ބަލަން ޖެހެ އެވެ. ފުރަތަމަ ކަމަކީ ޖޭޕީއަކީ ގާސިމްގެ ޕާޓީއަށް ވެފައި ވިލާގެ ވިޔަފާރިތަކާ ބެހޭ ގޮތުން އެ ޕާޓީގެ ތަރުޖަމާން އާންމުކުރައްވާ އަމިއްލަ މައުލޫމާތުތަކުގައި ވެސް ކޮންމެވެސް ވަރެއްގެ ހަގީގަތެއް އެކުލެވޭނެތީ އެވެ. އިއްޔެ ޓްވީޓްގައި ގާސިމް ހިތްހަމަޖެހިވަޑައިނުގަންނަވާނެ މައުލޫމާތެއް ހުރި ނަމަ، އަލީ ސޯލިހުގެ ޓްވީޓް މިހާރު އޮންނާނީ ޑިލީޓްކުރައްވައިފަ އެވެ.

ހުޅުމާލޭ ފޭސް އެކެއް، އުތުރުކޮޅުން ނިމޭ ހިސާބުން ވިލާ ޝިޕިންއިން 2008ގައި ބޮޑެތި ބިންތަކެއް ގަތެވެ. ޕްލެޓިނަމް ރެސިޑެންސްއާ ޖެހިގެން އިރުމައްޗަށް އޮތް ބޮޑު ކޮއްޓަކީ އެ ބިމެވެ. އެތަނަށް ވިލާ ޝިޕިންއިން އޮތީ ފައިސާ ވެސް ދައްކައިފަ އެވެ. ކުރީގެ ރައީސް އަބްދުﷲ ޔާމީންގެ ވެރިކަމުގައި އެމަނިކުފާނާ ދެކޮޅަށް ގާސިމް ނުކުންނެވުމުގެ 'އަދަބެއް'ގެ ގޮތުން ބިންތައް އަތު ލި އެވެ. އެއީ މަތީ ފަންތީގެ އެޕާޓްމަންޓްތައް ހަދަން ވިއްކި ބިންތަކަކަށް ވެފައި، އޭގެ ފަހުން 10 އަހަރު ވީ އިރު ވެސް އެކަން ކުރެވިފައި ނެތުމަކީ، އޭރުގެ އެޗުޑީސީއަށް ބިން އެތުލެވިދާނެ ސަބަބެކެވެ. ނަމަވެސް މި ސަރުކާރު އައުމާ އެކު އެ ބިންތައް އަަލުން ވިލާ ޝިޕިންއަށް ދިނެވެ.

ބުރާސްފަތި ދުވަހުގެ ހުކުމުން އެނގެނީ ތިލަފުށީގެ ދެ ބިން ވިލާ ޝިޕިންއަށް މިލްކުކޮށްދިނީ އޭގެ އަގަށް ޖެހޭ 228.7 މިލިއަން ރުފިޔާ ދައްކާފައި އޮތުމުން ކަމެވެ. އެއީ ހުޅުމާލެއިން ވިލާ ޝިޕިންއިން ގަތް ބިންތަކަށް އޭރު ދެއްކި އަގުކަން، ނުވަތަ ބިންތަކެއް ލާޖެއްސުމުގެ މުއާމަލާތެއް ކަމަކަށް ބުނެފައެއް ނުވެ އެވެ. އެހެންކަމުން ހުކުމުގެ މައްޗަށް ހަބަރު ލިޔާ ނޫސްވެރިޔަކަށް އެނގެން އޮންނާނީ އެއީ ވިލާ ޝިޕިންއިން ގަތް ދެ ބިން ކަމަށެވެ.

އެކަމަކު އަލީ ސޯލިހުގެ ޓްވީޓްގައި ވިދާޅުވި ގޮތުގައި އެއީ ހުޅުމާލޭގައި އޮތް ބިންތަކުގައި އެހެން ބަޔަކު އިންވެސްޓްކުރަން ޝައުގުވެރިވުމުން، ތިލަފުށީގެ ދެ ބިމަށް ބަދަލުކުރި ބަދަލުކުރުމެކެވެ. އަދި ތިލަފުށިން ގަނެފައި ވަނީ މިހާރު ވެސް ވިލާ ސިމެންތި އާއި ވިލާ ގޭސްގެ ވިޔަފާރި ހިންގާ ދެ ބިން ކަމަށް ވެސް، އޭނާ ވިދާޅުވި އެވެ.

"އެއީ ރައްޔިތުންނަށް މިހާރުވެސް ހެޔޮ އަގެއްގައި ފޯރުކޮށްދެމުން ދާ ޚިދުމަތްތަކަކާ ގުޅުން ހުރި މަސައްކަތްތަކަކަށް ވެފައި އެ ދެ ބިމުގައި ކޮށްފައިވާ އިންވެސްޓްމަންޓް ރޫޅާ އެހެން ތާކަށް ރިލޮކޭޓް ކުރުން ނުވަތަ ހުއްޓާލަން ޖެހިދާނެތީ ހުޅުމާލޭގައި ވިލާއަށް އޮތް، ނުހަނު ޕްރައިމް ބިމެއް ދޫކޮށްލާ ވިލާއިން އިޚްތިޔާރުކުރީ ދެމެހެއްޓެވިނި ގޮތެއްގައި ރައްޔިތުންނަށް ފޯރުކޮށްދެމުން ދިޔަ ވިލާ ގޭސް އަދި ވިލާ ސިމެންޓި ފެކްޓްރީގެ މަސައްކަތް ހިނގަމުންދިޔަ ދެ ބިމެވެ،" އަލީ ސޯލިހު ލިއުއްވި އެވެ.

'ދައުރު'އަށް ވެސް އެނގިފައިވާ ގޮތުގައި ތިލަފުށީގައި ވިލާ ޝިޕިންއިން ކުއްޔަށް ނަގާފައި އޮތް ދެ ބިމުގެ މުއްދަތު ހަމަވާން މާ ގިނަ ދުވަހެއް ނެތެވެ. 

ސިވިލް ކޯޓުގެ ހުކުމުން އެނގެނީ ވިލާ ޝިޕިންއިން ތިލަފުށިން ދެ ބިމެއް ގަތް ކަމެވެ. އޭގެ ފަހަތުގައި ހުރި ކަންކަން، އާބަންކޯ އިން ވެސް އަދި ވިލާ ޝިޕިންއިން ވެސް ރައްޔިތުންނަށް ސާފުކޮށްދީފައެއް ނުވެ އެވެ.

ހުޅުމާލެއިން ވިލާ ޝިޕިންއިން ގަތް ބިންތަކުގެ އަގު މިހާރުގެ ނިސްބަތުން ވަރަށް ބޮޑުވާނެ އެވެ. އެ ބިންތައް އާބަންކޯއަށް ދޫކޮށްލައިފައި، ތިލަފުށިން ބިންތަކެއް ހޯދުމަކީ، ވިޔަފާރީގެ ނަޒަރުން ބަލާ ނަމަ މައްސަލައަކަށް ނުވެ އެވެ. އެކަމަކު ދައުލަތުގެ މުދަލަކަށް ވުމާ އެކު އެފަދަ ބޮޑެތި މުއާމަލާތްތަކުގެ މައުލޫމާތު ރަނގަޅަށް އެނގެން ޖެހޭނެ އެވެ.

އެފަދަ މައުލޫމާތު ނުލިބި، ނޫސްވެރިން ހަބަރު ލިއުމުން ވެސް އަލީ ސޯލިހުމެން ފަދަ ބޭފުޅުންނަށް ނެންގެވީ އެހެން މާނައެކެވެ.

"އެއްގޮތަކުން ނުވިއްޔާ އަނެއް ގޮތަކުން އެމަނިކުފާނުގެ އަގު ރައްޔިތުންގެ ކުރިމަތީގައި ވައްޓާލާ މިފަދަ ވާހަކަތައް ފެތުރި ވަރަކަށް ރައްޔިތުންގެ ހިތްތަކުގައި އެމަނިކުފާނާ މެދު އޮތް ލޯބި ފޮހެލެވިދާނޭކަމަށް އެމީހުން ދެކެނީ އެވެ،" ހަބަރު ފެތުރި މީޑިއާތަކަށް ނިސްބަތްކުރައްވާ، އޭނާ ވިދާޅުވި އެވެ.

އެކަމަކު ސިވިލް ކޯޓުގެ ހުކުމުގެ މައްޗަށް ބިނާކޮށް ލިއާ ހަބަރެއްގައި އޮންނާނީ 228 މިލިއަން ރުފިޔާއަށް ވުރެ ބޮޑު އަގެއް ދައްކައި، ވިލާ ޝިޕިންއިން ތިލަފުށިން ބޮޑު ދެ ބިމެއް ގަނެފި ކަމަށެވެ. އޭގެ ފަހަތުގައި ހުރި އެއްވެސް މުއާމަލާތެއް، އެ ހުކުމުން ފެންނާކަށް ނެތެވެ.

ގާސިމަކީ ބޮޑު ވިޔަފާރިވެރިޔަކަށް ވުމުން ފަޅުތަކާއި ރަށްތަކާއި ބިންތައް ވެސް ގެންދަވަނީ ބައްލަވައިގަންނަވަމުންނެވެ. އެހެންކަމުން އެހެން ގޮތަކަށް އަޑުތައް އަރުވަން ބޭނުން ނޫން ނަމަ މިފަދަ މުއާމަލާތްތަކުގެ ފަހަތުގައި ހުރި، ދެ ކުންފުނީގެ ރުހުމާ އެކު ނިންމި ނިންމުންތަކުގެ މައުލޫމާތު، ލިބުން ވަރަށް މުހިންމެވެ. އޭރުން އަލީ ސޯލިހު އެ ގަބޫލުކުރައްވާ ކަހަލަ ނަފުރަތު އުފައްދަން މީޑިއާއަށް ލިބޭ ޖާގަ ވަރަށް ކުޑަވާނެ އެވެ.