ހައުސިން މިނިސްޓްރީގެ އިމާރާތް ތާރީހަށް

އިމާރާތްތައް ބާވެގެން ތަޅާލައި، ސާފުކުރުމަކީ އާންމު ކަމެކެވެ. ނަމަވެސް އަލިފާނުގެ ހާދިސާއެއްގައި ތަނެއް އަނދާ ހުލިވެ، ސާފުކުރަން ޖެހުމުން އެތައް ބަޔަކަށް ލިބެނީ ހިތާމަ އެވެ. އޭގެ ގެއްލުން އެހާމެ ބޮޑެވެ. ތިމާ އުޅޭ ތަން، ތިމާ ކޮންމެ ދުވަހަކު ވަދެނުުކުމެ އުޅޭ ތަން، އެގޮތަށް ނެތިދިއުމަކީ ހަނދާނުން ނުފިލާނެ ހާދިސާއެއް ވެސް މެ އެވެ.

މިދިއަ ބުރާސްފަތިދުވަހު ހައުސިން މިނިސްޓްރީގެ އިމާރާތުގައި ހިނގީ އެފަދަ ހާދިސާއެކެވެ. ސަރުކާރުގެ އެންމެ ބޮޑު އެއް މިނިސްޓްރީގެ އިމާރާތް ރޫޅާލަން ޖެހޭ މިންވަރަށް ތަން ވަނީ އަނދައިފަ އެވެ.

މިހާރު ކުރަމުން އެ އަންނަނީ އެ މަސައްކަތެވެ.

މިއީ އިމާރާތުގެ ލިފްޓް ހަރުކޮށްފައި ހުންނަ ހިސާބެވެ. މި އިމާރާތުގެ ބޮޑު ބައި ހަދާފައި ހުރީ ދަގަނޑުންނެވެ. އެހެންވެ އެތެރެ ފިނިކުރަން ބޭނުންކޮށްފައި ހުރި އެއްޗެހީގެ ސަބަބުން އަލިފާންގަނޑު ބޮޑަށް ހިފައި، ފެތުރުމުގެ ފުރުސަތު އޮންނާނެ ކަމަށް، ބައެއް ތަޖުރިބާކާރުން ބުނެ އެވެ.

އަމީނީ މަގު ބަންދުކޮށްގެން ކުރަމުން އަންނަ މަސައްކަތް ނިންމާލަން އަދި ދުވަސްތަކެއް ނަގާނެ ކަމަށް ބެލެވެ އެވެ. މިހާރު އެ އިމާރާތަށް ނަޒަރު ހިންގާލާ ކޮންމެ މީހެއްގެ ހިތަށް އަރާނީ 'މިއީ ހާދަ ބޮޑު ހާދިސާއެއް' ކަމެވެ.

ހައުސިން މިނިސްޓްރީގައި ވަނީ އާންމުންގެ ދިރިއުޅުމާއި ގެދޮރާ ބެހޭ ވަރަށް ގިނަ މައުލޫމާތު ރައްކޮށްފަ އެވެ. އެހެންކަމުން އިމާރާތުގައި އަލިފާނުގެ މިވަރުގެ ހާދިސާއެއް ހިނގުމުން އެތައް ބަޔަކު ކަންބޮޑު ވެސް ވާނެ އެވެ. އެ މީހުންނާ ގުޅޭ ލިއުންތައް ރައްކާތެރިކޮށް ހުރިތޯ ނުވަތަ ނޫންތޯއާ މެދުގަ އެވެ.

ސަރުކާރުން ބުނާ ގޮތުގައި އާންމުންގެ ގެދޮރާ ގުޅޭ މައުލޫމާތު ހުރީ ރައްކާތެރިކޮށެވެ. އެކަމަކު އެ ވާހަކައާ ތައާރުޒުވާ ވާހަކަތަކެއް ވެސް ސަރުކާރުގެ އިސް ބައެއް ވެރިން ވަނީ ދައްކަވައިފަ އެވެ. އެހެންކަމުން މި ހާދިސާގެ ސީދާ ގެއްލުމަކީ ކޮބައިކަން އަދި ވަޒަންކުރެވޭ ވަރެއް ނުވެ އެވެ.

ހައުސިން މިނިސްޓްރީ ހިންގަމުން އައި އިމާރާތާ ޖެހިގެން އިތުރު ދެ މިނިސްޓްރީއެއް ހުރި އިމާރާތްތައް ވެސް ހިމެނެ އެވެ. އެތަންތަނަށް ވެސް ބޮޑެތި ގެއްލުންތަކެއް ލިބުނެވެ. އެ ހުރިހާ އޮފީހެއްގެ މަސައްކަތް ވަގުތީ ގޮތުން މިހާރު ހިނގަމުން އަންނަނީ ދަރުބާރުގޭގަ އެވެ.