އިންޑިއަން އޯޝަން އައިލެންޑް ގޭމްސްގެ ޓީޓީގައި މިކްސްޑް ޑަބަލްސް ޗެމްޕިއަންކަން ހޯދުމަށް ފަހު ރާއްޖޭގެ މޫސާ މުންސިފް އަހުމަދާއި އައިޝަތު ރަފާ ނާޒިމް ރަން މެޑެލްއާ އެކު -- (ފޮޓޯ/އެމްއޯސީ)
މުންސިފާއި ރަފާ ރަން މެޑެލްގެ ކާމިޔާބީގައި
އިއްޔެއަކީ އަނެއްކާވެސް އައިއޯއައިޖީގައި ރާއްޖޭގެ މެޑެލް ތާވަލް ފަޅުފިލުވާލަދިން ދުވަހެކެވެ. އެންމެ ފާހަގަކޮށްލެވެނީ ޓީޓީގެ މިކްސްޑް ޑަބަލްސްގެ ޗެމްޕިއަންކަން މޫސާ މުންސިފް އަހުމަދާއި އައިޝަތު ރަފާ ނާޒިމް ހޯދައި، ރަން މެޑެލް ކަރުގައި އަޅުވާލުމެވެ. މިއީ އަންހެން ޓީމު އިވެންޓުން ރަން މެޑެލް ހޯދި ރަފާ އާއި ފިރިހެނުންގެ ޓީމު އިވެންޓުން ރިހި މެޑެލް ހޯދި މުންސިފަށް އުފާވެރި ދުވަހެއް ވެސް މެ އެވެ.
މިކްސްޑް ޑަބަލްސްގެ ލޯ މެޑެލް ވެސް ކާމިޔާބުކުރީ ރާއްޖެއިންނެވެ. ފާތުމަތު ދީމާ އަލީ އާއި މުހައްމަދު ޝައްފާން އިސްމާއިލް ލޯ މެޑެލް ހޯދީ މަޑަގަސްކަރައިގެ ޕެއާ ސީދާ ތިން ގޭމުން ބަލިކޮށްގެންނެވެ.
އެހެން ކުޅިވަރުތަކަށް ބަލާއިރު ބާސްކެޓްބޯޅައިގައި އަންހެން އަދި ފިރިހެން ޓީމު ވެސް ވަނީ، ތާރީހީ ކާމިޔާބީއެއް ހޯދައިފަ އެވެ. އެގޮތުން ތްރީ އޮން ތްރީ ބާސްކެޓްބޯޅަ އިވެންޓްގައި ރާއްޖޭގެ ދެ ޓީމު ވެސް ލޯ މެޑެލް ކާމިޔާބުކުރި އެވެ. މިއީ އައިއޯއައިޖީގެ ބާސްކެޓްގައި ރާއްޖެއަށް މިހާތަނަށް ލިބުނު މެޑެލްތަކެވެ.
ފިރިހެން ޓީމު ލޯ މެޑެލްއާ ހިސާބަށް ދެވުނީ މޮރިޝަސް އަތުން ވާދަވެރި ކުޅުމަކަށް ފަހު 14-13 އިން މޮޅުވެގެންނެވެ. އަންހެން ޓީމު ވާދަކުރީ މަޔޯޓްއާ އެވެ. ރާއްޖެ މޮޅުވީ 19-15 އިންނެވެ.
މިހާތަނަށް ރާއްޖެ އިން ވަނީ މި ގޭމްސްގައި 13 މެޑެލް ކާމިޔާބުކޮށްފަ އެވެ. އެންމެ ފަހުން 2019ގައި އޮތް އައިއޯއައިޖީގައި މުޅި ޖުމްލަ ރާއްޖެއަށް ހޯދުނީ 15 މެޑެލް އެވެ. އެހެންކަމުން ކުރިއަށް އޮތް ދުވަސްތަކުގައި ރާއްޖޭގެ މެޑެލް ލިސްޓަށް އިތުރު ކުރިއެރުން ލިބޭނެ ކަމުގެ އުއްމީދު ބޮޑެވެ.