ޅެންވެރިކަމުގައި މަޑުމަޑުން ފައްކާވި އިއްޒާގެ ހިތުގެ ލޯބި

ހިތުގެ ހަމަޖެހުން ގެއްލި ބޭގަރާރުވީ ހެއްޔެވެ؟ ތަހައްމަލު ކުރަން އުނދަގޫ ތަކުލީފުތަކުން ހަޔާތް ބަރާވީ ހެއްޔެވެ؟ ހާއްސަ ދުވަހެއް، އުފާވެރި މުނާސަބާއެއްގެ ޝުއޫރުތައް ވެރިވެގަތީ ހެއްޔެވެ؟

ޅެން ބައިތަކަށް، މިއިން ކޮންމެ އިހުސާސެއް ވެސް ފުދެ އެވެ. މިއިން ކޮންމެ ޖަޒުބާތަކާ މެދު ޒުވާން ޝާއިރާ، އިއްޒާ އަހުމަދު ނިޒާރު ދައްކާނެ ވާހަކައެއް އޮންނާނެ އެވެ. ބުނެދޭން ނޭނގިގެން އުޅޭ ތިޔަ ޝުއޫރުތައް ނިކަން ފަސޭހައިން އޭނާ ކަރުދާސްގަނޑަކަށް ތިލަކޮށްދީފާނެ އެވެ. މި ޒުވާނާގެ ހިތުގެ ލޯތްބަކީ ޅެންވެރިކަމެވެ. މަޑުމަޑުން ފައްކާވަމުން، ކުރިއަރައިގެން ގޮސްފައިވާ މި ލޯބީގައި އޭނާ ކިތަންމެ ވާހަކައެއް ވެސް ކިޔައިދީފާނެ އެވެ. 

އިއްޒާގެ ޅެންބަހުރުވައިން ބުނެދެ އެވެ.

އަނެއްކާވެސް އޭނާ ކިޔައިދެ އެވެ.

ޅެންވެރިކަމުގެ ބަގީޗާގައި މިހާރު ފަރިވެފައިވާ އިއްޒާގެ ޅެންތައް، ސޯޝަލް މީޑިއާ ހާވާލައިފި ނަމަ ވަރަށް ފަސޭހައިން އަތުޖެހޭނެ އެވެ. ހދ. މަކުނުދޫގައި ދިރިއުޅެމުން އަންނަ އަދި އެ ރަށު ކޯޓުގައި ވަޒީފާ އަދާކުރާ ޅެންވެރިޔާގެ ފޭސްބުކް އެކައުންޓުގައި ދޭތެރެ ދޭތެރެއިން އާއްމުކުރާ ޅެންތައް ވަރަށް ފަސޭހައިން ވައިރަލްވެ އެވެ. ގިނަ ބަޔަކު އެ ޝެއާކޮށް، ކޮމެންޓު ކުރެ އެވެ. ބައެއް ދުވަސް ދުވަހު، އޭނާގެ ޅެންތަކުން ލޯބީގެ ޖަޒުބާތުތައް ހޭލައްވާލަ އެވެ. އަނެއް ބައި ދުވަސްދުވަހު ހިތް ރޮއްވާލަ އެވެ. ބައެއް ޅެންތަކުން ފިލާވަޅެއް ދޭއިރު، ހެއްވާލާ ދުވަސްތައް ވެސް މަދެއް ނޫނެވެ. ކޮންމެ މައުލޫއަކަށް ވެސް، ކޮންމެ ކަހަލަ ޝުއޫރަކަށް ވެސް އިއްޒާގެ ގަލަން ފަރިތަ އެވެ.

ގިނަ ބަޔަކު މިހާރު އެ ޅެންވެރިޔާ ދަންނަނީ ވެސް، އުފެދޭ ކޮންމެ ކަހަލަ އިހުސާސެއް ވެސް، ހަމަތަކާއި ވަޒަންތަކަށް ފައްތައިގެން، ދިވެހި ބަހުގެ އެންމެ މަތީ ދަރަޖައިގައި ފަށުއިކޮށް ތިލަކޮށްދޭ ޒުވާނެއްގެ ގޮތުގަ އެވެ.

"ބަޔަކު ދައްކާ ވާހަކައަކުން ވެސް [ޅެން ލިޔަން] ހިޔާލެއް އަތުވެދާނެ. ފެންނަ މަންޒަރަކުން ވެސް ހިޔާލެއް އަތުވެދާނެ. ނޫނީ ކުރެވޭ އިހުސާސަކުން ހިޔާލެއް އަތުވެދާނެ،" އިއްޒާ، 32، ބުންޏެވެ.

"ކޮންމެ ކަމެއްގައި އުޅުނަސް ހިޔާލެއް އަންނައިރަށް ފޯނުގައި ނޯޓުކޮށްލަނީ. ފޯނު ނެތް ވަގުތެއްގައި ހިތުގައި ބަހައްޓަނީ."

ޅެންވެރިކަމުގައި އިއްޒާއަކީ މިހާރު އާއްމު ނަމެކެވެ. ސްކޫލެއްގެ އަހަރީ ދުވަހެއް ވިޔަސް، މިނިސްޓްރީއެއްގައި ހަފުލާއެއް ވިޔަސް، ސްޓޭޖްމަތީގައި ބާއްވާ މުބާރާތަކަށް ވިޔަސް، އޭނާގެ ޅެމަކާ ނުލައި އެ މެހެފިލް ފުރިހަމައެއް ނުވެ އެވެ.

އޭނާއަށް އެންމެ ބާރުބޮޑީ ރޯދަ މަހާ ދިމާކޮށެވެ. އެކި ރަށްރަށުގައި ބާއްވާ މަދަހަ މުބާރާތްތަކަށް ޅެން ހަދަން، ދެތިން މަސް ކުރިން ފެށިގެން މީހުން ގުޅަން ފަށަ އެވެ. ރޯދަ މަސް ނޫނަސް، ޓީޗަރުންގެ ދުވަހާއި އަހަރީ ދުވަސްތަކާއި އެކި ކަހަލަ މުނާސަބާތަކާ ގުޅުވައިގެން އޭނާއަށް އަބަދުވެސް އޮންނަނީ ޅެމެއް ހަދަން ޖެހިފަ އެވެ.

އިއްޒާ ބުނާ ގޮތުން އެފަދަ މަސައްކަތެއް އޭނާ އަތުގައި ނެތް އިރެއް މިހާރު ނުދެ އެވެ.

ޅެންވެރިއަކަށް ވުމަކީ އެއް އިރެއްގައި ވެސް އޭނާ ދުށް ހުވަފެނެއް ނޫނެވެ. އަދަބިއްޔާތުގެ ހުނަރު ހުރުމުން، އޭނާ ފުރަތަމަ ގަލަން ހިއްލާލީ ވާހަކަ ލިޔާށެވެ. އެކަމަކު ވަކި ހިސާބަކުން، ތަފާތު ކަމެއްކޮށްލުމުގެ ނިޔަތުގައި ޅެންވެރިކަމުގެ ތެރެއަށް ވަދެވުނީ އެވެ. އޭރު އޭނާގެ އުމުރުން އެންމެ 17 އަހަރެވެ. 

ޓީޗަރެއްގެ އެދުމަށް ފުރަތަމަ ޅެމެއް ލިޔަން ޖެހުނު އިރު، އެކަން އޭނާ ހީކުރި ވަރަށް ވުރެ އުނދަގޫވި އެވެ. އެކަމަކު އަދަބީ ލިޔުންތައް ހިމެނޭ ފަތްތޫރަ އާއި ޖަމާއަތުގެ ހަބަރުގައި ޝާއިއުކޮށްފައި ހުންނަ ޅެންތަކުން ހިޔާލު ހޯދައިގެން، ޅެންވެރިކަމުގެ ބަގީޗާގައި އިއްޒާ ހަމަޖެހިލިތާ މިހާރު ކިތަންމެ ދުވަހެއް ވެއްޖެ އެވެ.

އެއީ ބުރަ މަސައްކަތުން، މަޑުމަޑުން ފައްކާވި ހުނަރެކެވެ.

ޅެންވެރިންގެ ބަގީޗާގައި ކިތަންމެ ޅަޔަސް، އިއްޒާ ވަނީ މޮޅެތި ޅެންވެރިންގެ ސަފުން ޖާގަ ހޯދައިފަ އެވެ. އޭނާ ލައްވާ ޅެމެއް ހައްދުވަން ބައެއް ފަހަރު ކިޔުއެއްގައި ވެސް ޖެހެން ޖެހެ އެވެ. އޭނާއަށް ގުޅާ ބައެއް މީހުން، 'އިއްޒާ ލައްވާ ނޫނީ ޅެމެއް ހަދަން ބޭނުން ނޫން' ކަމަށް ބުނެ އުޅެ އެވެ. 

އޭނާއަށް ލިބިފައިވާ ކާމިޔާބީތަކަށް ބަލާލުމުން ވެސް، އެ މަގާމު އެނގެ އެވެ. ޅެންވެރިކަމުގައި ސަރަހައްދީ އިނާމާއި ގައުމީ ފެންވަރުގެ އިނާމުތައް ވެސް އޭނާ ވަނީ ހޯދާފަ އެވެ. ސަރުކާރުގެ ރަސްމީ ބޮޑެތި ހަފުލާތަކާއި ގައުމީ އަލްބަމުން ވެސް އިއްޒާގެ ޅެންވެރިކަން ހިމެނެ އެވެ. އަމިއްލަ ޅެން ފޮތެއް ވަނީ ޝާއިއުކޮށްފަ އެވެ. އެކަމަކު އެ ކާމިޔާބީތަކުގެ ވާހަކަ އޭނާ މިހާރު ދައްކާކަށް ބޭނުމެއް ނުވެ އެވެ. އިއްޒާ ގަބޫލުކުރާ ގޮތުގައި އޭނާއަށް ލިބުނު އެންމެ ބޮޑު ކާމިޔާބީއަކީ އޭނާގެ ޅެންވެރިކަމަށް މީހުން ދޭ ލޯތްބާއި ގަދަރެވެ.

އިއްޒާއަކީ އޭނާއަށް ލިބިފައިވާ އެ ހުނަރު، ގިނަ ބަޔަކަށް ދަސްކޮށްދޭން ވެސް މަސައްކަތް ކުރާ މީހެކެވެ. ގިނަ ސްކޫލުތަކެއްގައި ޅެންވެރިކަން ކިޔަވައިދީ، އެކަމަށް ކުދިން ލޯބި ޖެއްސުމަށް ގިނަ މަސައްކަތްތަކެއް މިހާތަނަށް އިއްޒާ ވަނީ ކޮށްފަ އެވެ. އަދި އެތައް ސަތޭކަ ބަޔަކަށް ޅެން ހަދާނެ ގޮތް ކިޔައިދީ، ވޯކްޝޮޕްތަކެއް ވެސް ބޭއްވި އެވެ.

ޅެންވެރިކަމަށް ޝައުގުވެރިކަން ހުންނަ، ހުނަރުވެރި ކިތަންެ ކުދިންނަކާ އޭނާއާ ދިމާވެއްޖެ އެވެ. އެކަމަކު އެންމެ ބޮޑު މާޔޫސްކަމަކީ ކިތަންމެ ހުނަރުވެރިޔަސް، ގިނަ ކުދިން އެ ކަމުގައި ކުރިއަށް ދާން ބޭނުން ނުވުމެވެ. ހުނަރު ތަރައްގީކޮށް، އަދަބިއްޔާތު ކުރިއަރުވަން މަސައްކަތްނުކުރުމެވެ.

އިއްޒާ ދެކޭގޮތުގައި މިއީ ކުރިމަގެއް އޮތް މަސައްކަތެކެވެ. އޮފީހަކަށް ގޮސްގެން، ލިބޭ އާމްދަނީއާ އެއްވަރުގެ އާމްދަނީއެއް، ހަމައެކަނި ޅެންވެރިކަމުން ވެސް އޭނާ ހޯދަ އެވެ. ގިނައީ އޭނާ ހިލޭ ސާބަހަށް ކޮށްދޭ މަސައްކަތެވެ. އެހެންވެ އާމްދަނީ ހޯދަން ހިތުލައިގެން އެ މަސައްކަތް ކުރާ ނަމަ، އެއަށް ވުރެ ބޮޑު މަންފާއެއް މާލީ ގޮތުން ލިބިދާނެ ކަމަށް އޭނާ ގަބޫލުކުރެ އެވެ.

ޅެންވެރިކަމުގެ ބަގީޗާގައި މިހާރު އެންމެ އާއްމު، އެންމެ ޒުވާން މަލަކީ އިއްޒާ އެވެ. އެކަމަކު އޭނާގެ އުއްމީދަކީ އެ ބަގީޗާގައި ވީހާވެސް ގިނަ މާތަކެއް ފޮޅި، ރީތި ދިވެހި ބަހާއި އަދަބިއްޔާތަށް ހިދުމަތްކޮށްދޭނެ ބަޔަކު އުފަންވުމެވެ. މަޑުމަޑުން، ގިނަ ދުވަހުން ނަމަވެސް މި ފަދަ ލޯތްބެއް އެހެން ބައެއްގެ ހިތުގައި އަށަގަތުމެވެ.