ޝިމާނީ: އާޓްގެ ލޯބިން އެންމެންގެ ހިތްފުރައިދޭ ޓީޗަރު

ހިތްކިޔާ ދާއިރާއިން ކެރިއަރެއް ބިނާކުރުމަކީ ގިނަ ފަހަރަށް އެހާ ފަސޭހަ ކަމަަކަށް ނުވެ އެވެ. ކުރިއަށް ދާން ބޭނުންވާ ރޮނގު އެނގުނަސް، ދާން އޮންނަ މަގު އެހާ ފަސޭހައެއް ނޫނެވެ. އަދި ކުރިއަށް ދާން ގިނަ ގޮންޖެހުންތަކަކާ ކުރިމަތިލާން ޖެހެ އެވެ. އެކަމަކު ވެސް ވިލުންވެރިކަމާ އެކު ކެރިއަރުގެ ކުރިބޯއްޓަށް ވާސިލްވުމަކީ ނުކުރެވޭނެ ކަމެއް ނޫނެވެ. ހިތްވަރު ހުރެެއްޖެ ނަމަ ވާނެ އެވެ. މިއީ ވެސް އޭގެ މިސާލެކެވެ.

އަހަރެން އާމިނަތު ޝިމާނީ ޝަރީފްގެ އާޓް ސްޓޫޑިއޯއަށް ވަދެގެން ދިޔައިރު އޭނާ ހެދުން އަޅައިގެން ހުރީ ހަމައެކަނި ކަޅު ކުލައިންނެވެ. އެކަމަކު އޭނާގެ ލޮލުގެ ވިދުމެކޭ އެއްގޮތަށް ދިރިއުޅުމުގައި ކުލަ ވެސް ގަދަ އެވެ. އޭނާ ކުލަ ފިހިން ޖައްސާހިތްވަނީ ވެސް ގަދަ ކުލަކުލަ އެވެ. 

ޝިމާނީއަކީ މަލްޓިޑިސިޕްލިނަރީ އާޓިސްޓެއްގެ އިތުރުން އާޓް ޓީޗަރެެކެވެ. އިންސްޓަގްރާމްގެ 'ކްރިއޭޓިވް ޖޫސް' ޕޭޖުގައި އޭނާގެ ސްޓޫޑިއޯގެ މަސައްކަތްތައް ދައްކާލާ ޝިމާނީ ގާތަށް އާޓް ކްލާސް ނަގަން އެކި އުމުރުފުރައިގެ އަދި އެކި ގާބިލިއްޔަތުކަން ލިބިފައިވާ ކުދިންނާއި މީހުން އާދެ އެވެ.

މާލޭގެ ހިތްފަސޭހަ ހިސާބެއްގައި، އިރުގެ އަލި ވަންނަ ގޮތަށް ބޮޑެތި ދޮރު ދެފަރާތުގައި ލައިފައި ހުރި ސްޓޫޑިއޯ އެޕާޓްމަންޓެކެވެ. ސްޓޫޑިއޯއަށް ވަދެގެން އަންނަ އިރު އެންމެ ފުރަތަމަ މޫނުޖެހޭ ގޮތަށް ހުންނަ ފާރުގައި ހަރުކޮށްފައި ހުރީ އާޓިސްޓުންގެ އުފެއްދުންތަކެވެ.

ނޫސްވެރިއެއްގެ ގޮތުގައި އަހަރެންނާ ތަފާތު އާޓިސްޓުން ބައްދަލުވެ އެ މީހުން މަސައްކަތް ކުރާ ސްޓޫޑިއޯތަކަށް ދެވިއްޖެ އެވެ. އެ އެންމެންގެ ސްޓޫޑިއޯތަކުން ބޮޑަށް ފެންނަނީ އެ މީހެއްގެ އަމިއްލަ މަސައްކަތެވެ. ނިމިފައި ހުރި އުފެއްދުންތަކާއި ކުރަމުންދާ މަސައްކަތްތަކެވެ. ޝިމާނީގެ ސްޓޫޑިއޯ ތަފާތެވެ.

ޝިމާނީއާ ވާހަކަ ދެއްކުމުގެ ކުރިން ވެސް، އޭނާ ސިފަވީ އާޓިސްޓުން ކުރިއަރުވަރުން މަސައްކަތް ކުރާ ހިތްވާ މީހެއްގެ ގޮތުގަ އެވެ.

ސްޓޫޑިއޯގައި ބެންޗް ޖަހައި ދަރިވަރުންނަށް އާޓް މަސައްކަތް ދަސްކުރަން ފަސޭހައިން ތިބެވޭނެ އިންތިޒާމް ހަމަޖައްސާފައި ހުއްޓެވެ. ސްޓޫޑީއޯގެ ގޮނޑިއެއްގައި ހަމަޖެހިލައިގެން އިށީނދެ އިނދެ ޝިމާނީގެ މި ދަތުރާ ގުޅޭ ގޮތުން އަހަރެން ސުވާލުތައް އޮއްސާލީމެވެ.

ޝިމާނީ ބުނި ގޮތުގައި އޭނާ ބޮޑުވެގެން އައި އިރު ވެސް އާޓާއި ކުރެހުމަށް ހިތުގައި ލޯބި އޮތެވެ. އެކަމަކު އާޓްގެ ދާއިރާ އިން ކުރިއަށް ދާން ގަސްދުކުރާ ކުދިންނަށް ދިމާވާ ބޮޑު އެއް ގޮންޖެހުމަކީ ވަރަށް މަސައްކަތުން ނިންމާލާ ކުރެހުމަކަަށް ވިޔަސް ޓީޗަރުންގެ ފަރާތުން ތައުރީފްގެ ބަހެއް ނުލިބުމެވެ. ދެން އިވެނީ ކެރިއަރެއްގެ ގޮތުގައި އާޓްގެ ދާއިރާ އިން ކުރިއަށް ދިއުމަކީ މޮޔަ ހިޔާލެއް ކަމެވެ. ޝިމާނީ ބުނި ގޮތުގައި މިފަދަ ތަޖުރިބާތަކެއް އޭނާއަށް ވެސް ކުރަން ޖެހުނެވެ.

"ކުޑައިރު އަބަދުވެސް ކްލާސްތެރޭ މާ މޮޅަށް ނުވަތަ މާ ރީއްޗަށް ކުރަހާ އެހެން ކުދިން ތިބެފައި ބައެއް ޓީޗަރުންގެ ފަރާތުން އެންމެ އެންކަރޭޖިން ކޮމެންޓް ނުލިބޭތީ ޖެހިލުންވޭ،" އޭނާ އޭރުގެ ހަނދާންތައް އާ ކުރަމުން ބުންޏެވެ.

ބޮޑުވަމުން އައި އިރު ވެސް ކުރެހުން އަދި ކުރެހުމާ ގުޅޭ ދާއިރާތަކުން އެންމެ ރަނގަޅު އާމްދަނީ ނުލިބިދާނެ ކަމުގެ ކޮމެންޓްސް މީހުންގެ ފަރާތުން ލިބޭތީ އެކަހަލަ ގޮތަކަށް ގަބޫލު ކުރެވި، ބޮޑަށް ސައިޑް ގިގެއް ގޮތަށް ކުރެހުމާއި ޑިޒައިން ކުރުން ކުރިޔަށް ގެންދިޔައީ." 

އެހެންކަމުން، ކެރިއަރެއްގެ ގޮތުގައި އޭނާ އިހްތިޔާރު ކުރީ މާކެޓިން ދާއިރާ އެވެ. އޭނާ 10 އަހަރު އެ ދާއިރާގައި މަސައްކަތްކޮށް ތަޖުރިބާ ހޯދި އެވެ. 

އެކަމަކު އަބަދުވެސް ޝިމާނީގެ ހިތުގައި އޮތީ އާޓާ ގުޅޭ ކޮންމެވެސް މަސައްކަތެއް އޭނާ ކުރާނެ ކަމުގެ ޔަގީންކަމެވެ. އެހެންކަމުން އޭނާ އައީ ފްރީލާންސްކޮށް އިލަސްޓްރޭޝަނާއި ޑިޒަައިން މަސައްކަތް ކުރަމުންނެވެ. އައިލެންޑް ބާޒާރުން ނެރުނު އައިލެންޑް ސީރީސްގެ 'ޓުއާޑީ ޖޮއި' އަކީ އޭނާގެ ހިތްގައިމު މަސައްކަތެކެވެ.

އަދި މިހާތަނަށް އަމިއްލަ މައުރަޒެއް ނުބޭއްވިޔަސް، މާލޭގައި ބާއްވާ އެކި މައުރަޒުތަކުގައި ޝިމާނީ އަންނަނީ އޭނާގެ ފަންނީ ހުނަރު ދައްކާލަމުންނެވެ.

ޝިމާނީ ބުނިގޮތުގައި އޭނާ ބޮޑަށް ހަދާ ހިތްވަނީ ވޯލް މިއުރަލް ކަހަލަ ބިޔަ އާޓް އިންސްޓޮލޭޝަންތަކެވެ.

"ހަދާފައި ހުރި މިއުރަލްތަކުގެ ތެރޭގައި ފަހުރުވެރިވާ ހަ މިއުރަލްއެއް އެބަހުރި،" އޭނާ ފާހަގަ ކުރި އެވެ.

އޭގެ ތެރޭގައި ކޮމިއުނިޓީ ކެފޭގައި ހެދި މިއުރަލްއަކާއި އޯގާ އާޓް ރިސޯޓްގައި ހެދި 4×90 ފޫޓުގެ މިއުރަލް އެއީ ފާހަގަކޮށްލެވޭ މަސައްކަތްތަކެވެ. 

އާޓް ކެރިއަރުގައި ތަފާތު ގޮތަކަށް ކުލަޖައްސަން ޝިމާނީއަށް ލިބުނު ފުރުސަތަކީ ކޮވިޑް-19ގެ ހާލަތެވެ.

ވަޒީފާއަށް ނުގޮސް ގެއިން މަސައްކަތް ކުރަން ފެށި އެ ދަނޑިވަޅުގައި އޮންލައިންކޮށް އާޓް ކްލާހެއް ހިންގަން އޭނާ ފެށި އެވެ. ކޮވިޑްގެ ހާލަތު ނިމުމުމުން ވެސް ކްލާސްތަކަށް އޮތް ތަރުހީބު ފެނި ރައްޓެއްސެއްގެ ސްޓޫޑިއޯގައި ކްލާސްތައް ކުރިއަށް ގެންދިޔައީ އެވެ. 

"އަމިއްލަ މަސައްކަތެއް ފަށަން ޖެހިލުންވި، ފިކްސްޑް އިންކަމްއެއް ލިބެމުން އައި ވަޒިފާ ދޫކޮށްލައިފިއްޔާ މުހިއްމު ހަރަދުތައް ނުބެލެހެއްޓިދާނެތީ،" ޝިމާނީ ކިޔައިދިނެވެ. ނަމަވެސް އަމިއްލަ ވިޔަފާރިއެއް ފަށައިގަންނަ ގިނަ މީހުންނެކޭ އެއްގޮތަށް އޭނާ ވެސް އެ ރިސްކާ ކުރިމަތިލީ އެވެ.

ޝިމާނީގެ ކްލާސްތައް އިސާހިތަކު ފުލްވެ، އޭނާ އެންމެ ފަހުން، އެއީ ވާނެ ކަމެއްކަން ގަބޫލު ކުރި އެވެ. ކުރިން ނުވާނެޔޭ ބުނި އެންމެންނަށް އޭނާ ސާބިތުކޮށްދެނީ އާޓް މަސައްކަތަކީ ރަނގަޅު އާމްދަނީއެއް ލިބިދާނެ ކަމެއް ކަމެވެ.

އޮންލައިންކޮށް ކުޑަކުދިންނަށް ކިޔަވައިދޭން ފެށި ކްލާސްތައް މިހާރު ވަނީ ސްޓޫޑިއޯ ކްލާސްތަކަކަށް ބަދަލުވެ، އެކި ކަހަލަ އާޓް ދަސްކުރަން އެކި ގާބިލިއްޔަތުކަން ހުރި އެކި އުމުރުފުރައިގެ ކުދިންނާއި ބޮޑެތި މީހުން ވެސް އަންނަ ތަނަކަށް ވެފަ އެވެ.

ޝިމާނީ ކުޑަކުދިންނަށް އާޓް މަސައްކަތް ދަސްކޮށްދިނުމުގައި އެންމެ ބޮޑު އިސްކަމެއް ދެނީ ކުދިންގެ ހިތްމަރާނުލާ އެ ކުއްޖެއްގެ ކިބައިގައި ހުރި ހުނަރެއް ތަރައްގީ ކުރަން އެހީތެރިވުމަށެވެ. އޯގާތެރިކަމާ އެކު ބުނެދެނީ ކޮންމެ އުފެއްދުމަކީ އެންމެ ފުރިހަމަ މަސައްކަތަކަށް ނުވިޔަސް ފިހި ދޫކޮށްނުލުމަށެވެ.

"އަބަދުވެސް ދަރިވަރުންނަށް ހަނދާން ކޮށްދޭން ބޭނުން ވަނީ، މޮޅެތި އާޓިސްޓުންނަކީ އެތައް ދުވަހަކު ޕްރެކްޓިސްކޮށް، އެ ހުނަރު ދަސްކޮށް، އެމީހުން ކުރާ ކުރެހުންތަކަކީ ވަރަށް ގިނަ ވަގުތުގެ މަސައްކަތް ކަން،" ޝިމާނީ ބުންޏެވެ.

އޭނާ ހިންގާ އާޓް ކްލާސްތަކަކީ ތަފާތު ގާބިލިއްޔަތުކަން ހުންނަ މީހުން އާޓް މަސައްކަތްކޮށް، ހުނަރު ދަސްކުރާ ކްލާސްތަކެއްކަމުން، ހާއްްސަ އެހީއަށް ބޭނުންވާ ކުދިންނަށް ވެސް ފުރުސަތު އޮވެ އެވެ.

ހާއްސަ އެހީއަށް ބޭނުންވާ މީހުންނާއި ކުދިންނަށް ކްލާސް ހިންގުމުގެ މަގްސަދަކީ އެ މީހުންނަށް އާޓް ތަޖުރިބާ ކޮށްލާނެ ތަނެއް ހޯދައިދީ، ގެއިން ބޭރު މާހައުލެއްގައި ތެރަޕިއުޓިކް އަދި އުފާވާ ކަމެއް ހޯދައިދިނުން ކަމުގައި ޝިމާނީ ބުންޏެވެ.

އާޓިސްޓެއްގެ ގޮތުގައި ޝިމާނީއަށް ލިބޭ އެންމެ ބޮޑު ހިތްހަމަޖެހުމަކީ އަމިއްލަ ހުނަރާއި އުފެއްދުންތެރިކަން މިނިވަންކަމާ އެކު ބޭނުންކުރަން ޖާގަ ލިބުމެވެ. އޭނާގެ ދަރިވަރުންނަށް ވެސް އެ މިނިވަންކަން ހޯދައިދޭން ޝިމާނީ ބޭނުންވެ އެވެ.

"ކުއްޖަކު އެންމެ ފުރަތަމަ ކުރަހާ ކުރެހުން ނުވެދާނެ އެންމެ ފުރިހަމަ ކުރެހުމަކަށް. އާޓަށް ޝައުގުވެރިވާ ކުއްޖެއް ނަމަ އެކި ކަހަލަ މީޑިއަމްތައް އެކްސްޕްލޯ ކުރަން ފުރުސަދު ދިނުމާއި އެކި ކަހަލަ ސްޓައިލްތައް ދަސް ކޮށްދިނުމާއި އެކި އާޓިސްޓުންގެ މަސައްކަތްތައް ފެނުން ވަރަށް މުހިއްމު،" ޝިމާނީ ބުންޏެވެ.

އާޓް ކިޔަވައިދިނުން އިތުރު ހަރުފަތަކަށް ގެންދިއުމަށް އޭނާ އަންނަނީ ތަފާތު ކޯސްތައް ވެސް ހަދަމުންނެވެ. އޯލެވެލް ކެމްބްރިޖް އާޓް ޓީޗާ ޓްރެއިނިން އާއި އެޑަޕްޓިވް އާޓް ޓްރެއިނިން ފުރިހަމަކޮށް، އާޓް އެތިކްސް އެންޑް ސޯޝަލް ޗޭންޖް ފަދަ ރޮނގުތަކުން ކުރު ކޯސްތައް އޭނާ އަންނަނީ ހަދަމުންނެވެ.

ޝިމާނީގެ ސްޓޫޑިއޯގައި މިފަހުން އެންމެ ބޮޑު މަގުބޫލުކަމެއް ލިބިފައިވަނީ ބޮޑެތި މީހުންނަށް އާޓް ހުނަރު ދަސްކޮށްދޭ ކްލާސްތަކާއި 'ޖޫސް ބިންޖް' ސެޝަންތަކަށެވެ.

އޭނާ ހިންގާ އާޓް ވޯކްޝޮޕްތަކަކީ އެކި ކަހަލަ އާޓް ހުނަރު ތަފްސީލްކޮށް ކިޔަވައިދޭ، ސަމާލުކަން ބޭނުންވާ ކްލާސްތަކެކެވެ. 'ޖޫސް ބިންޖް' އަކީ ވޯކްޝޮޕްތަކަށް ވުރެ ލުއިކޮށް ދޮޅު ގަޑިއިރު ނޫނީ ދެ ގަޑިއިރަށް ތީމްތަކަކަށް ބަހާލައިގެން ކުރިއަށްގެންދާ ހަރަކާތެކެވެ. ޝިމާނީ ބުނީ މަހަކު ދެތިން ފަހަރު ބާއްވާ މި ސެޝަންތަކަކީ އެހެން މީހުންނާ އެކުގައި ވަގުތު ހޭދަކުރަން ލިބޭ ފުރުސަތެއް ކަމަށެވެ.  

"ކޮފީއެއް ނުވަތަ ލުއި ބުއިމަކާއި ނުވަތަ ލުއި ކޮންމެވެސް ހަފާލާ ކާ އެއްޗަކާ އެކީ، ރައްޓެހިންނާ އެކު މަޖާ ތަފާތު ކަމެއް ކޮށްލާ ހޭންގްއައުޓް ކޮންލަން އެންމެ ރަނގަޅު އެއް ކަންތައް މިއީ،" ޝިމާނީ ބުންޏެވެ.

މި ސެޝަންތައް ޑިޒައިންކޮށްފައިވަނީ އަލަށް ކުރަހަން ބޭނުންވާ މީހުންނަށް ވެސް ބައިވެރިވެވޭ ގޮތަށެވެ. މިއީ އާ ހުނަރެއް ދަސްކޮށްލަން ނުވަތަ އެއްކަހަލަ ހިޔާލު ހުންނަ މީހުންނާ ދިމާވެލާ، ގުޅުން ބަދަހިކުރަން ފުރުސަތު ދިނުމުގެ މަގްސަދުގައި ކުރިއަށް ގެންދާ ސެޝަންތަކެއް ކަމުގައި ޝިމާނީ ބުންޏެވެ.

ކުޑަކުދިންނެކޭ އެއްގޮތަށް ބޮޑެތި މީހުންނަށް ވެސް އާޓް މަސައްކަތް ކުރުމުގައި ގޮންެޖެހުންތައް ދިމާވެ އެވެ. ދުވަހަކު ނުކުރަހާ މީހަކު އަލަށް ކުރަހަން ފަށައިގަންނަ އިރު އެހެން މީހުންގެ ހުނަރާ އަޅާބެލުމާއި ތިމަންނާއަކީ އާޓިސްޓެއް ނޫން ކަމުގައި އިހްސާސްވުން ފަދަ ކަންކަން ދިމާވެ އެވެ.

"އެންމެ މުހިއްމީ އެ ޕްރޮސެސް އިން އުފާ ހޯދުން. އެހެން މީހުންގެ މަސައްކަތާ އަޅާނުބެލުން. ކްލާހަށް އަންނަ ގަޑި ވަގުތު ކުރާ މަސައްކަތަކީ އޭނާގެ ބެސްޓަށް ވެސް ނުވެދާނެ،" ޝިމާނީ ބުންޏެވެ.

އާޓް އަކީ އެ އުފެއްދުމެއް ބަލާ މީހާގެ އިތުރުން، އުފައްދާ މީހާއަށް ވެސް ބޮޑު ހިތްހަމަޖެހުމެއް ގެންނަ އެއްޗެކެވެ. އާޓް ކްލާސްތަކުގެ ސަބަބުން އެކުވެރިކަން އާލާވެ، ދަރިވަރުންނަށް މުޅިން އެހެން ލޮލަކުން ދުނިޔެ ބެލުމަށް ދަސްވެފައިވާކަން ޝިމާނީ ފާހަގަ ކުރި އެވެ. އޭނާ ބުނިގޮތުގައި އާޓް މަސައްކަތާ އެކު މީހާއަށް މަޑުޖެހިލައި ދިރިއުޅުމުގެ ހަލަބޮލިކަމުން ބޭރުވެ ސްޓްރެސް ކުޑަކުރަން ފުރުސަތު ލިބެ އެވެ. އަދި އެހެން މީހުންގެ މަސައްކަތް ބަލައިގަންނަން ދަސްވެ އެވެ.

ޝިމާނީ ދެކޭ ގޮތުގައި މިހާ ހިސާބަށް މަސައްކަތް ކުރިއަށް ގެންގޮސް 'ކްރިއޭޓިވް ޖޫސް'ގެ އަސާސްތައް ދަމަހައްޓަމުން އާދެވުން އެއީ ކާމިޔާބީއެކެވެ.

"އަދިވެސް އުއްމީދަކީ އިތުރަށް މިކަން ކުރިއަރުވައި އާޓްއަށް އިތުރު މީހުންނާއި ކުދިން ޝައުގުވެރިކޮށް ލޯބިޖެއްސުން،" ޝިމާނީ ބުންޏެވެ.

ހަރުފަތަކަށް ފަހު، ހަރުފަތެއް ގިރާ ކުރަމުން އާޓިސްޓެއްގެ ގޮތުން އަދި އާޓް ޓީޗަރެއްގެ ގޮތުން އޭނާ މިހާރު ހުރީ އުހުގަ އެވެ. އަދިވެސް ޝިމާނީގެ އުއްމީދަކީ ހުނަރު ފުޅާކުރުމެވެ.