ފަލަސްތީނަށްޓަކައި މި ތިން އަންހެނުންގެ އަޒުމް ވަރުގަދަ

މެގަފޯނު ހިފައިގެން ފަލަސްތީނުގެ ހައްގުގައި ވަކާލާތުކުރާ ތިން އަންހެނުން މާލެ އާއި ހުޅުމާލޭގެ އެކި ސަރަހައްދުތަކުން ފެނެ އެވެ. ބައެއް ފަހަރު އެމީހުންނާ ބައިވެރިވާނެ ބަޔަކު ނެތުމުން، އެކަނިމާއެކަނި އަޑުއުފުލަ އެވެ. އެކަމަކު ވެސް ޖެހިލުމެއް ނެތެވެ.  ބިރެއް  ވެސް ނެތެވެ.

މި މީހުންގެ މަގުސަދަކީ ފަލަސްތީނުގެ ހައްގުގައި އެ މީހުންނަށް ކުރެވެން އޮތް ކުޑަކަމުން ފަށައިގެން ގޮސް ބޮޑު ކަމަކާ ޖެހުނަސް އެކަން ކުރިއަށް ގެންދިއުމެވެ. 

މި ތިން އަންހެނުން އިސްވެގެން މިވަގުތު އަންނަނީ އެންޖީއޯއެއް ރެޖިސްޓްރީކުރުމާއި ތަފާތު އެކި މަސައްކަތް ރާވާ ކުރިއަށް ގެންދަމުންނެވެ.

މިއީ އަސްލު ކޮން ބައެއް ހެއްޔެވެ؟

ހެންވޭރުކޮޅުގައި ހުންނަ ކެފޭއަކަށް އިންޓަވިއުއަށް ވަން ގޮތަށް ޑރ. ޝަޒްރާ އިބްރާހިމް އެންމެ ފުރަތަމަ ވެސް ނަޒަރު ހިންގާލީ އެތަނުގައި ހުރި ފެންފުޅިތަކުގެ ބްރޭންޑަށެވެ. އިޒްރޭލަށް ނުސީދާކޮށް ނަމަވެސް މަދަދު ދޭ ބްރޭންޑެއް ނަމަ އެއާ ދުރަށް ދެ އެވެ. އެހެންކަމުން އޭނާ އެދުނީ އިސްކުރު ފެން ގެެނެސްދިނުމަށެވެ. ދަބަހުން ނެގީ ޕެނެޑޯލް ގުޅައެކެވެ. އެ ކާލުމަށް ފަހު ގޮނޑީގައި ހަމަޖެހިލި އެވެ.

އޭނާގެ ތައާރަފު ދިނެވެ. ޑރ. ޝަޒްރާއަކީ ރާއްޖޭގެ ގައުމީ ޔުނިވާސިޓީގެ ފެކަލްޓީ އޮފް ބިޒްނަސް ސްޓަޑީސްގެ ގިނަ މާއްދާތަކެއް ކިޔަވައިދެމުން އަންނަ ލެކްޗަރާއެކެވެ. ހަތަރު ކުދިންގެ މަންމައެކެވެ. ފުލްޓައިމް ވަޒީފާގައި އުޅެފައި މެގަފޯން ހިފައިގެން އޭނާ މަގުމައްޗަށް ނުކުންނަނީ ކުރާނެ އިތުރު ކަމެއް ނެތިގެންނެއް ނޫނެވެ. ވަގުތު ގިނަވެގެންނެއް ވެސް ނޫނެވެ. ޒިންމާތަައް ބައިވަރެވެ. އެކަމަކު މިއީ ވެސް އޭނާ ކުރަން ޖެހޭ ކަމެެއްގެ ގޮތުގައި ދެކިގެންނެވެ.

 މި ކޮފީ މޭޒުން ދެން މި ބައްދަލުވީ ޑރ. ރަނާ އަހުމަދު ހަމީދުއާ އެވެ. މިއީ ވެސް ގައުމީ ޔުނިވާސިޓީގެ ލެކްޗަރާއެކެވެ. މަންމައެކެވެ. މި ހަރަކާތުގެ އެއް ބާނީ އެވެ.

ޝަޒްރާ އާއި ރަނާގެ އެކުވެރިކަން އުފެދުނީ، އެމްއެންޔޫގެ ބިޒްނަސް ފެކަލްޓީގެ ވަޒީފާއަށް ދެ މީހުން ވެސް އެއް ދުވަހަކު ހޮވުނު ހިސާބުންނެވެ. މިއީ އެ ފެކަލްޓީގައި މަސައްކަތްކުރާ އެންމެ ހަގު ދެ ލެކްޗަރާ ވެސް މެއެވެ.

މަސައްކަތުގެ ގޮތުން ދެ މީހުންނަކީ ރިސާޗް ޕާޓްނަރުން ވެސް މެއެވެ. ހިޔާލު އެއްގޮތްވެފައި ދެ މީހުންގެ މިޒާޖު ވެސް ދިމާވެ އެވެ. ކަންބޮޑުވަނީ ވެސް އެއްކަހަލަ ކަންތައްތަކާ އެވެ.

މި ދިޔަ އޮކްޓޯބަރުން ފެށިގެން އިޒްރޭލުން ފަލަސްތީނުގައި ހިންގަމުންދާ ގަތުލުއާއްމާ ގުޅިގެން މި ދެ މީހުުންގެ ހިތުގައި އުފެދުނު ރުޅިވެރިކަން ބޮޑެވެ. އެކަމާ މެދު ކުރެވެން ހުރި ކޮންމެ ކަމެއްގައި އިސްނަގަން އެއްބަސްވި އެވެ. 

އިޒްރޭލުގެ ޕާސްޕޯޓުގައި ރާއްޖެއަށް އެތެރެވުން މަނާކުރަން 'ސޮލިޑާރިޓީ އެމްވީ' ނަމުގައި ހަރަކާތްތެރިވި މީހުން ރައްޔިތުންގެ މަޖްލިސް ދޮށުގައި ބޭއްވި މުޒަހަރާއެއްގައި ބައިވެރިވި އެވެ.

އޭގެ ކުރިން އެއްވެސް ކަހަލަ މުޒާހަރާއެއްގައި ބައިވެރިވެފައި ނުވާ، އަދި ސިޔާސީ އެއްވެސް ކުލައެއްގައި ވެސް ޖެހިފައި ނުވާ ޝަޒްރާ އާއި ރަނާ އެ މުޒާހަރާތަކުން ދެން ބައްދަލުވަނީ އައިޝަތު ޝާދިޔާއާ އެވެ.

ޝާދިޔާއަކީ ފަސް ކުދިންގެ މަންމަ އެވެ. މިހާރު މާމައެއް ވެސް މެއެވެ. ފަސޭހަކަމާ އެކު އަރަބި ބަހުން އޭނާ ވާހަކަ ދައްކަ އެވެ. ދޫފަރިތަ އެވެ. ސޯޝަލް މީޑިއާގައި ފަލަސްތީނު ރައްުޔިތުންގެ ހައްގުގައި އަޑުއުފުލައި، އަށްޑަނައަކަށް ކީބޯޑު ހަދައިގެން ހުރި މީހެކެވެ.

މި ތިން އަންހެނުން އެކުވެން މިހާރު އަންނަނީ ފަލަސްތީނުގެ ހައްގުގައި ވަކާލާތު ކުރަން 'އިންޓަނޭޝަނަލް މުސްލިމާ އެއިޑް އެންޑް އެޑިއުކޭޝަން'ގެ ނަމުގައި އެންޖީއޯއެއް ރެޖިސްޓްރީ ކުރަަން މަސައްކަތްކުރަމުންނެވެ.

އެންޖީއޯ ރެޖިސްޓްރީ ކުރުމުގެ އެންމެ ބޮޑު ބޭނުމަކީ ފަލަސްތީނުގެ ހައްގުގައި ކުރާ މަސައްކަތް ރަސްމީކޮށް އަދި ދެފުށް ފެންނަ ގޮތަށް ކުރިއަށް ގެންދިއުމެވެ.

މިދިޔަ އަހަރުގެ އޮކްޓޯބަރު ފަހުން ޝަޒްރާ އާއި ރަނާ އަދި ޝާދިޔާ ވަނީ މާލެ އާއި ހުޅުމާލޭގައި 40 އަކަށް މުޒާހަރާ ބާއްވައިފަ އެވެ. 

ރާއްޖޭގައި ހުންނަ އިނގިރޭސިވިލާތުގެ އެމްބަސީ އާއި ޖަރުމަން އެމްބަސީ އާއި ޔޫއެން އޮފީހާއި އިނގިރޭސިވިލާތު އެމްބަސަޑަރު ހުންނަވާ ގޭ ކައިރިއަށް އެއްވެފަ އެވެ. އަދި އިޒްރޭލަށް އެހީތެރިވާ ކަމަށް އަޑުއަރާފައިވާ ބްރޭންޑްތައް ކަމަށްވާ ކޭއެފްސީ އާއި ޕިއްޒާހަޓް ފަދަ ބޮޑެތި ބްރޭންްޑްތަކުގެ އައުޓްލެޓް ދޮށަށް ގޮސް އަޑުއުފުލައިފަ އެވެ.

އެއްބަޔަކު ދެކޭ ގޮތުގައި ރާއްޖޭގައި މުޒާހަރާކުރުމަކީ ބޭނުން ކަމެއް ނޫނެވެ. ރާއްޖެއަކީ އިޒްރޭލަށް ސީދާ އެހީވާ ގައުމެއް ނޫނެވެ. ދިވެހިން އިޒްރޭލާ ދެކޮޅެވެ. ދިވެހިން އަންނަނީ ފަލަސްތީނު ރައްޔިތުންނަށް އެހީތެރިވަމުންނެވެ. ދުއާކުރަމުންނެވެ.

އެކަމަކު ޝަޒްރާ ދެކޭ ގޮތުގައި ލާމެހިފައިވާ ދުނިޔެއެއްގައި ފަލަސްތީނުގެ ހައްގުގައި މަސައްކަތް ކުރަން އެންމެން ތެދުވަން ޖެހެ އެވެ. ހަމައެކަނި އިޒްރޭލަށް އެކި ގޮތްގޮތުން އެހީވާ ގައުމުތަކުގެ އާންމު ރައްޔިތުންނެއް ނޫނެވެ.

ތިން އަންހެނުން ދެކޭ ގޮތުގައި މިއީ ދުނިޔޭގެ އިސްތިއުމާރީ ބާރުތަކާއި ދުނިޔޭގެ ރައްޔިތުންނާ ދެމެދު އޮތް މަައްސަލައެކެވެ. އެހެންކަމުން ފަލަސްތީނުގެ އާންމުންނާއި ކުޑަކުދިން މަރަން، ބޮޑެތި އަނިޔާދޭން، ނިކަމެތިކުރަން، އެމެރިކާ އާއި އިނގިރޭސި ވިލާތާއި ޖަރުމަނުން ފައިސާ އާއި ހަތިޔާރުން އިޒްރޭލަށް އެހީ ދޭ އިރު، އެކަންކަމާ ދެކޮޅަށް ދިވެހިން އަޑުއުފުލަމުން ދާކަން އެ ގައުމުތަކުގެ ޑިޕްލޮމެޓުންނަށް އެނގެން ޖެހޭނެ އެވެ. އެމީހުންގެ ކަންފަތަށް އެ އަޑު އިއްވާނެ ބަޔަކު ތިބެން ވެސް ޖެހޭނެ އެވެ.

ރާއްޖޭގައި ހުރި ހުޅަނގު ގައުމުތަކުގެ އެމްބަސީތައް ދޮށުގައި ހިތްވަރާ އެކު ރަނާ އާއި ޝަޒްރާ އަދި ޝާދިޔާ މުޒާހަރާކުރަނީ އިޒްރޭލަށް ހިމާޔަތާއި އެހީތެރިކަން ދިނުމާ ދެކޮޅަށެވެ. އެ ގައުމުތަކުން ގެންގުޅޭ އުސޫލުތަކާ މެދު ނުރުހޭކަން ބުނެދިނުމެވެ.

ޝަޒްރާ ބުނި ގޮތުގައި މިއީ މުޅި ދުނިޔެ ބައިވެރިވާ ދެކޮޅުވެރިކަމެކެވެ. ދުނިޔޭގެ ގިނަ ބަޔަކު އެ ހަރަކާތުގައި ބައިވެރިވެ އެވެ. މުޖާހިދުންނާއި މީޑިއާ އާއި ޔުނިވާސިޓީތަކާއި ވިޔަފާރި އާއި އެކި ޖަމިއްޔާ ޖަމާއަތްތަކުން ވެސް ބައިވެރިވެ އެވެ.

މަގުސަދަކީ ފަލަސްތީނު މިނިވަންކުރުމެވެ. އިޒްރޭލުން ފަލަސްތީނުގެ ރައްޔިތުންނަށް ކުރަމުންދާ ލާއިންސާނީ ޖަރީމާތައް ހުއްޓުވުމެވެ. ދުނިޔޭގެ ތާއީދެއް އިޒްރޭލަށް ނެތްކަން ހަމާކުރެމެވެ. މީގެ އިތުރުން އިޒްރޭލާ ދެކޮޅަށް ބޮއިކޮޓް، ޑައިވެސްޓް އަދި ސެންކްޝަން (ބީޑީއެސް) މޫވްމަންޓް ހިންގުމެވެ.

އަމިއްލަ އަތުން ހޭދަކޮށްގެން މާލޭގައި ޕިކަޕު ބުރު ބާއްވައި، މެގަފޯނެއް ގަނެގެން ޑިއުޓީ އުސޫލުން ފާއިތުވީ ހަތް މަސްދުވަހު މި ތިން އަންހެނުން ބަރާބަރަށް އަންނަނީ އެ އަޑު އިއްވަމުންނެވެ. ފުލުހުންނާ ކުރިމަތިލާން ޖެހޭ ހިނދެއްގައި އެކަން ވެސް ކުރެ އެވެ.

މި މަސައްކަތުގައި އެމީހުން އުޅޭ އިރު އާއްމުންގެ ތާއީދު ލިބޭއިރު ބައެއް މީހުން މަލާމާތް ވެސް ކުރެ އެވެ. 

"މަގުމަތިން ފެނިގެން އެއްބަޔަކު ތަމްބްސް އަޕްއެއް ދީފައި ވަރަށް ރަނގަޅު ކަމެކޭ ތި ކުރަނީ ބުނެފައި ދާނެ. އަނެއް ބަޔަކު ނުރުހުންވޭ. ކޮންމެވެސް އެޓޭކެއް ދޭ،" ޝާދިޔާ ބުންޏެވެ.

"އަޅުގަނޑުމެންނަކީ ތިން އަންހެނުން ކަމުން ތިއީ އަންހެނުން ކުރަން ޖެހޭ ކަމެއް ނޫނޭ ބުނެފައި އެބަހުރި." 

"މުޒާހަރާތަކަށް ތަރުހީބު ނުލިބުމަކީ ގޮންޖެހުމެއް. އެކަމުވެސް އެކަނި ވެސް މި މަސައްކަތް ކުރަން ތައްޔާރަށް މިތިބީ،" ޝަޒްރާ ބުންޏެވެ.

އޭނާ ބުނީ ފަލަސްތީނުގެ ރައްޔިތުންނަށް އެންމެ ސިކުންތެއްގެ އަމާންކަން ވެސް ނެތް ކަމަށެވެ. އެހެންކަމުން އެ ރައްޔިތުން އެ އުޅޭ ބިރުވެރި، ނިކަމެތިކަމުގެ މަތިން ހަނދާން ނައްތާލައި އެއީ ނުހިނގާ ކަމެއް ކަމަށް ހަދައިގެން ނުތިބެވޭނެ ކަމަށް ވެސް އޭނާ ގަބޫލުކުރެ އެވެ.

"މިކަން ހުއްޓުވުމަށް އެމީހަކަށް ވީ ވަރެއް ކުރަން ޖެހޭ. ކަމެއް ނުކޮށް ހުރުމަކީ މިކަމުގައި ބައިވެރިވުން،" ޝަޒްރާ ބުންޏެވެ.

ރަނާ ބުނިގޮތުގައި ތައުލީމީ ގޮތުން މަތީ ފެންވަރުގައި ތިބި ބަޔަކު މުޒާހަރާ ފަދަ ކަންކަމަށް ނުނިކުންނާނެއޭ ބުނެ ބައެއް މީހުން މަލާމާތުގެ ބަސް ރައްދުކުރެ އެވެ. އެކަމަކު މި ތިން އަންހެނުންގެ އަޒުމަށް އެކަހަލަ މަލާމާތަކުން ގުޑުމެއް ނާރަ އެވެ.

މުޒާހަރާކުރުމާއި އަޑު އުފުލުމަކީ ފަލަސްތީނުގެ ހައްގުގައި ޝަޒްރާ އާއި ރަނާ އަދި ޝާދިޔާ ކުރަން ނިންމައިގެން ތިބި ހަމައެކަނި މަސައްކަތެެއް ނޫނެވެ.

"ބައިވަރު ކަންކަން ކުރަން ނިންމައިގެން މިތިބީ،" ޝަޒްރާ ބުންޏެވެ.

ޝަޒްރާ އާއި ރަނާ އަންނަނީ ފަލަސްތީނާ ބެހޭ ފޮތެއް ލިޔަމުންނެވެ. 'ސޯލް އޮފް އޯލް ސޯލްސް'ގެ ނަމުގައި އެ ފޮތް ލިޔަމުން އަންނަނީ އިނގިރޭސި ބަހުންނެވެ. 

"ފޮތުގެ މަސައްކަތް މިހާރު މި އޮތީ އެންމެ ފަހު މަރުހަލާގައި. ފޮތް އިނގިރޭސި ބަހުން ނެރެ ހުރިހާ ޕްލެޓްފޯމެއްގައި ވިއްކަން ބެހެއްޓުން އަޒުމަކީ. މި ފޮތުގެ ދިވެހި އަދި އަރަބި ތަރުޖަމާ ނެރެން ވެސް މަސައްކަތް ކުރާނަން،" ޝަޒްރާ ބުންޏެވެ.

މީގެ އިތުރުން ބައިސްކޯފާ ގުޅިގެން 'ސޯލް އޮފް އޯލް ސޯލްސް' ނަމުގައި ޕޮޑްކާސްޓެެއް ރިކޯޑު ކުރުމުގެ މަސައްކަތް އެމީހުން އަންނަނީ ކުރަމުންނެވެ. މިހާތަނަށް ފަސް އެޕިސޯޑު ވަނީ ރެކޯޑްކޮށްފަ އެވެ. މި ޕޮޑްކާސްޓް ވަރަށް އަަވަހަށް ބައިސްކޯފު އެޕުން އަޑުއަހާލެވޭނެ އެވެ.

މީގެ އިތުރުން ފަލަސްތީނުގެ މައްސަލާގައި އަންހެނުންނަށް ހާއްސަކޮށްގެން ގަތަރުގައި އޮތް ކޮންފަރެންސެއްގައި ވެސް ޝަޒްރާ އާއި ޝާދިޔާ ބައިވެރިވި އެވެ. އެ ކޮންފަރެންސަށް ދުނިޔޭގެ 58 ގައުމަކުން 300އަށް ވުރެ ގިނަ މީހުން ދިޔަ އެވެ.

ޝަޒްރާ ބުނި ގޮތުގައި ކުރިއަށް އޮތް އަހަރު ހިންގާނެ އެކި ކަންކަން މިހާރު އަންނަނީ ރާވަމުންނެވެ. އެގޮތުން ރާއްޖޭގައި އިންޓަނޭޝަނަލް ކޮންފަރެންސެއް ބޭއްވުމަކީ އެންމެ އަވަހަށް ކުރަން ބޭނުން މަސައްކަތެވެ.

މާލެ އާއި ރަށްރަށުގެ ސްކޫލްތަކުގައި ހޭލުންތެރިކަމުގެ ޕްރޮގްރާމްތައް ހިންގަން ވެސް ތިބީ ތައްޔާރުވެގެންނެވެ.

މި ތިން އަންހެނުންގެ ހިތްވަރަށް ބަދަލެއް ނާދެ އެވެ. މާލެ އާއި ހުޅުމާލޭގެ އެކި ހިސާބުތަކުގައި ތިން މީހުން އެކަނި އަޑުއުފުލަން ޖެހުނަސް އެކަން ކުރިއަށް ދާނެ އެވެ. އެމީހުން ދެން ފެންނަ ފަހަރަކުން ހިތްވަރުގެ ބަހެއް ނަމަވެސް ބުނެލާށެވެ. އެއީ ވެސް އެ ހަރަކާތުގައި ބައިވެރިވުމެވެ.