އޭނާއަށް ވެސް، އޭނާގެ ކްލާހުގެ ބައިވެރިންނަށް ވެސް އެއީ ބޮޑު އުފަލެއް

މުޅި ތަނުގައި އޮތީ ފަނޑު އައްޔެކެވެ. ޑިސްކޯ ލައިޓެވެ. އެކި އުމުރުގެ އެކި ބައްޓަމުގެ އަދި އެކި ސައިޒުގެ 40 އަކަށް އަންހެނުން ހަފްތާއަކު ތިން ދުވަހު މި ތަނަށް ޖަމާވެ އެވެ. މަގްސަދަކީ ހަށިގަނޑަށް ބޭނުންވާ ކަސްރަތު ހޯދުމެވެ. ނެށުމާއި ފޯރިގަނޑެއް ތެރެއިން އެކަން ކުރުމެވެ. ޒުންބާ ހެދުމެވެ.

ދަ ވެލްނަސް ކްލަބްގައި ހިންގާ ޒުންބާ ކްލާސް އާދަޔާހިލާފެވެ. އެ ކްލާހުގައި އެ ބޭރުކޮށްލެވެނީ އާދަޔާހިލާފު ހަކަތައެކެވެ. އެ އެންމެން އެވަގުތު ބަލަހައްޓަނީ ސްޓޭޖް މަތީގައި އެމީހުންނަށް ކްލާސް ނަގައިދޭ އިންސްޓްރަކްޓަރެވެ.

އެއީ އަބަދުވެސް ރީތިކޮށް ނަށާ ހިތްވާ، ޒުންބާގެ އިންސްޓްރަކްޓަރުކަން ކުރާ ހިތުން، އެކަމާ ގަޔާވެގެން އުޅޭ އާމިނަތު ޝުޒާނާ (ސުޒާ) އެވެ. އޭނާ އެ ކްލާސް ނަގައިދޭތާ 15 އަހަރު ވީ އެވެ. އެންމެ އަޖައިބުކުރުވަނިވި އެއް ކަމަކީ ފެށުނީއްސުރެ އޭނާގެ ކްލައިންޓުންގެ ގޮތުގައި ތިބި ބައެއް މީހުން އަދިވެސް އޭނާ ދޫނުކޮށްލުމެވެ. އަނެއް ބަޔަކު އެ ކަސްރަތުގައި އުޅޭތާ 10 އަހަރު ވެދާނެ އެވެ. ކްލާހުގެ ގިނަ ބައިވެރިން މިހާތަނަށް ފަސް އަހަރު ހޭދަކޮށްފި އެވެ. 

ޒުންބާ ހަދަން އެންމެ ފުރަތަމަ ޝުޒާނާ ގުޅުނީ ހީޓް ހެލްތު އެންޑް ފިޓްނަސްއާ އެވެ. އޭޑީކޭ ހޮސްޕިޓަލުން ތަރައްގީކުރި ދަ ވެލްނަސް ކްލަބްގައި އެ ކްލާސް ނަގައިދޭން އޭނާ ފެށީ އެތަނުގައި ކަސްރަތުގެ ބައި ކުރިއަށް ގެންދަނީ ހީޓުން ކަމަށް ވާތީ އެވެ. 

ހީޓްގައި ސްޓެޕް އެރޮބިކްސް ތަމްރީން ހެދީ 2008 ގަ އެވެ. އެއަށް ފަހު ލެސްމިލްސްގެ ޕްރޮގްރާމެއް ކަމުގައިވާ ބޮޑީ ޖޭމް އިންސްޓްރަކްޓަރަށް ވި އެވެ. އަދި 2012ގައި ހީޓުން ޒުންބާ ތައާރަފު ކުރުމާ އެކު އޭނާ ވީ ޒުންބާ އިންސްޓްރަކްޓަރަކަށެވެ. މީގެ އިތުރުން އޭނާ އަކީ އޭސް ސާޓިފައިޑް ޕާސަނަލް ޓްރެއިނާއެއް ވެސް މެ އެވެ.

އަދިވެސް އޭނާ އެހެެރީ އެ ގޮތުގައި، އެ ލޯބީގަ އެވެ. ޖިމްތަކަށް އޮންނަ އެންމެ ބޮޑު އެއް ގޮންޖެހުމަކީ ކްލައިންޓުން ހަރުނުލުމެވެ. ކިތަންމެ ފިޓުވާން އަޒުމްކަނޑައަޅައިގެން ދާ މީހާ ވެސް، އަހަރުގެ ކުރީކޮޅު ނުވަތަ މަހުގެ ކުރީކޮޅު ވަކިވެދާނެ އެވެ. 

ޝުޒާނާ ކާމިޔާބުކަމާ އެކު ކްލައިންޓުން ހިފަހައްޓަން ކުރާ އެންމެ މުހިއްމު އެއް ކަމަކީ އެއްވެސް ކްލައިންޓަކަށް ތިމާއަކީ ބާކީވެފައި ހުރި މީހެއްކަމުގެ އިހުސާސްވިޔަ ނުދިނުމެވެ. ތަފާތު ނުކުރުމެވެ. އޭނާގެ ކްލާހަށް އަންނަ މީހުންގެ އުމުރުގެ ތަފާތެއް އޭނާ ނުގެންގުޅެ އެވެ. ފުރަތަމަ ބައިވެރިވާ އިރު އޭގެ ހަމަތަކަށް ފައި އަޅަން އެނގުނަސް، ނޭނގުނަސް އޭނާ ކަންބޮޑެއް ނުވެ އެވެ.

"ކްލާސް ހަދާ އިރު އެއްވެސް މީހަކަށް އިހްސާސެއް ނުކުރެވޭނެ ތިމަންނައަކީ ނަށަން ނޭނގޭ މީހެކޭ، ނުވަތަ ދުވަސްވީ މީހެކޭ،" ޝުޒާނާ ބުންޏެވެ.

"ޒުންބާއަކީ އެކަހަލަ އެއްޗެއް. ކޮންމެ މީހަކަށް ވެސް އިހްސާސްކުރެވޭނީ 'އައި އެމް ވެރި ގުޑް އެޓް ދިސް' އޭ." 

ކްލާހުގެ އެއްވެސް މީހަކަށް އަނެކަކު ހަދާ ގޮތް ބަލާނެ ފުރުސަތެއް ނުދެ އެވެ. އެމީހަކު އުޅެނީ އެމީހެއްގެ ހާލައިގެންނެވެ. ބީޓާ އެއްވަރަށް ފައިހަމަކޮށް އުނަގަނޑު އަނބުރާލައި، ގައިން ކެލޮރީސް އަންދާލެވޭތޯ އެވެ. އެ ފޯރި އާއި ހަކަތަ ޝުޒާނާ ނެރެދެެ އެވެ. 

ޒުންބާއަކީ ކަސްރަތެއްގެ ގޮތުގައި ގިނަ ފަައިދާތަކެއް ލިބޭ ހަރަކާތެކެވެ. އެގޮތުން؛

ގަޑިއެއްގެ އިރަށް ދެމިގެންދާ ކްލާހުގައި އެންމެ ޒުވާން އުމުރުގެ މީހުން ފެށިގެން މާމައިން ވެސް ބައިވެރިވެ އެވެ. ބޭނުންކުރަނީ އެންމެނަށް ވެސް ނަށާލެވޭ ފަސޭހަ ލަވަތަކެކެވެ. ހަމައެކަނި އުނަގަނޑު ތަޅުވާލައިގެން ވެސް ފުއްދާލެވޭހާ ހަކަތަ، އޭގެން އޭނާ ނެރެދެ އެވެ. 

"ޓްރެންޑްވާ ލަވަތަކަށް ބަލައިގެން އަމިއްލައަށް ޗޫސް ކުރަން. ކޮރިއޮގްރަފީ ވެސް ހަދަން. ޒުންބާގައި އެ ފްލެކްސިބިލިޓީ އޮވޭ،" ޝުޒާނާ ބުންޏެވެ.

އޭނާގެ ޒުންބާ ކްލާހަށް މީހުންގެ ޝައުގުވެރިކަން ދަމައިގަންނަން ފެށި އަނެއް ކަމަކީ ވަކި ހާއްސަ ހެދުމެއް ލާން ޖެހޭ ދުވަހެއް ތައާރަފުކުރުމެވެ. ކޮންމެ މަހަކު ވެސް ކޮންމެވެސް އެއް ތީމަކަށް އެންމެން ދާނީ ހެދުން އަޅައިގެންނެވެ.

"ފެށީ ސްކާޓް ލުމުން. [އެކަމަކު] ސްކާޓް ލައިގެން ސުޒާ އެކަނި ނެށިޔަސް އަދި ނުވޭ. އެ އިހްސާސް އެބަ ޖެހޭ ކްލައިންޓުންނަށް ވެސް ކުރެވެން،" ޝުޒާނާ ބުންޏެވެ.

އެހެންކަމުން ޒުންބާއަށް ތައްޔާރުވެގެން އެ ކްލާހަށް ވަންނަ އިރު ގިނަ މީހުން ތިބޭނީ މިނީ ސްކާޓްގަ އެވެ. ދަ ވެލްނަސް ކުލަބުން އެމީހުންނަށް ހޯދައިދެނީ ރައްކާތެރި ޖާގައެކެވެ. ބޮލީވުޑް، ހަވާއިއަން ފަދަ ތީމްތަކަށް ނަށަން ނުކުންނަ އިރު ތިބެނީ ފުލް މޭކަޕްގަ އެވެ.

ހަށިގަނޑަށް ބަނޑިބަނޑި ލައްވާލައި، ދާތައް ނެރެ ނިންމާލާ އިރު، އެ މަޖާގަނޑާއި ފޯރީގައި ބައިވެރިން ތިބެނީ އެތައް ސަތޭކަ ކެލޮރީއެއް އަންދާލައިގެންނެވެ. 

"ބައެއް ކްލައިންޓުން ޒުންބާ ހަދަން ހޯދާ ވަގުތަކީ ހަމައެކަނި އަމިއްލަ ނަފްސަށް އެމީހުން ހޯދާ ވަގުތުކޮޅެއް،" ބައިވެރިންގެ މިޒާޖާ ބެހޭ ގޮތުން ޝުޒާނާ ބުންޏެވެ.

އެފަދަ ކްލާހެއްގައި ބައިވެރިވާނީ އެކި ކަހަލަ މިޒާޖުގެ މީހުންނެވެ. ނަމަވެސް ކަސްރަތުގެ ބައި ނިންލާ އިރު އެންމެ މޫޑު ގޯސްކޮށް ހުންނަ މީހާގެ މޫޑު ވެސް ރަނގަޅުކޮށްލަ އެވެ. މޫނުމަތިން ފެންނަނީ ބޮޑު ހިނިތުންވުމެކެވެ.

ކްލާހުގެ ފޯރި ގަދަކުރަން ކޮންމެ މަހަކު އެންމެ ލުއިވި މީހާ ހޮވައި، 'ބިގަސްޓް ލޫޒާ އެވޯޑް' ދިނުމާއި ކޮސްޓިއުމް ޑޭގައި އެންމެ ފުރިހަމައަށް ހެދުން އަޅައިގެން ދާ މީހާ ހޮވަ އެވެ.

ޒުންބާއަކީ ދަ ވެލްނެސް ކްލަބްގައި ޝުޒާނާގެ މެއިން ވޯކްއައުޓް އެވެ. 

އެތަނުގައި ހިންގާ މުހިއްމު އެއް ޕްރޮގްރާމް ކަމަށްވާ 'ޓްރާންސްފޯމާ'އާ ގުޅޭ ކްލައިންޓުންގެ މެންޓާއަކީ ވެސް ޝުޒާނާ އެވެ. ބަރުދަން ލުއިކުރަން އުނދަގޫ އަދި ޕޮލިސިސްޓިކް އޯވާރީސް ސިންޑްރޯމް ކަހަލަ ސިއްހީ ހާލަތެއް ހުންނަ މީހުންނަށް ހާއްސަކޮށްގެން އެމީހުންގެ ބަރުދަން ލުއިކޮށްދޭން އެންމެ ގުޅޭ ޕްރޮގްރާމެއް ހޯދަން އޭނާ އެހީތެރިވެ އެވެ.

ކަސްރަތުކޮށްގެން ރަނގަޅު ނުވިޔަސް ޕޮލިސިސްޓިކް އޯވަރީސް ސިންޑްރޯމް ހުންނަ މީހުންނަށް އެ ކަސްރަތުތަކުގެ ސަބަބުން ލުއިވެ އެވެ. ޝުޒާނާ ވަނީ އެކަން ތަޖުރިބާކޮށްފަ އެވެ.

އެ ލިބޭ ލުޔަކީ، އޭނާ ދެކޭ ގޮތުގައި، ބަލިމީހުންނަށް ވެސް ބޮޑު ކާމިޔާބީއެކެވެ. 

އަހަރެމެންނަށް ޔަގީންކަމާ އެކު ބުނެވިދާނެ އެވެ. ފިޓްނަސް އިންސްޓްރަކްޓަރެއްގެ ގޮތުގައި އެހާ ދިގު މުއްދަތެއް ހޭދަކުރުމަކީ ޝުޒާނާއަށް ވެސް ފަހުރެކެވެ. ގިނަ ދުވަސްވީ ކްލައިންޓުންނާ އެކު އޮންނަ ގުޅުން އެހާމެ ބަދަހި އެވެ. އެހެންކަމުން އެއީ އޭނާގެ ގާތް ރަހުމަތްތެރިންކަމުގެ އިހުސާސްކުރެވެ އެވެ.

އޭނާ މާބަނޑުވި ދުވަސްވަރު ކަސްރަތާ ދުރުވާން މަޖުބޫރުވާ ވަރަށް ސިއްހީ ހާލަތު ބަދަލުވި އެވެ. އެކަމަކު މިހާރު ދެ ކުދިން ތިބި ޝުޒާނާ އެ ދެ ފަހަރު ވެސް ވިހައި ގަދަވެގެން ކްލާހަށް ނުުކުތީ އިތުރު ފޯރި އާއި ހިތްވަރާ އެކުގަ އެވެ.

ޒުމްބާ ކްލާސް ނެގުމުގައި ހޭދަކުރަނީ ވަޒީފާއެއްގެ ވަގުތަށް ވުރެ ބޮޑަށް އޭނާ ގަބޫލުކުރަނީ އެކަން ގުޅިފައި އޮތީ އެ ދާއިރާއަށް ހުންނަ ހާއްސަ ލޯތްބާ ކަމަށެވެ. އެހެންކަމުން 15 އަހަރު ހޭދަވީކަމުގެ އިހުސާސެއް ނުކުރެވެ އެވެ.

ކްލާސް ނިންމާލާ އިރު އަދިވެސް އޭނާއަށް ލިބެނީ އާ ހަކަތައަކާއި އާ އަޒުމެކެވެ. ކްލާހުގެ ބައިވެރިންނަށް އާ ހިތްވަރެކެވެ.