ޔޫނުސް، 11 އަހަރުގައި ހާފިޒަކަށް، ފައިނުގެ ވެސް ފުރަތަމަ ހާފިޒް

މިދިއަ ހޮނިހިރުދުވަހު ވަރަށް ހާއްސަ ފަަރާތަކަށް މަރުހަބާ ކިޔަން ރ. ފައިނުގެ ޖެޓީ ކައިރީގައި ރަތް ދޫލަ އަޅައި، ރަށުގެ ރައްޔިތުން ތިބީ ދެ ސަފަށް އެތުރިގެންނެވެ. އެކަމަކު ރަށަށް އެރީ ސަރުކާރުގެ ވެރިއެއް ނޫނެވެ. ރައްޔިތުންގެ މަޖިލިހުގެ މެމްބަރެއް ވެސް ނޫނެވެ. ނުވަތަ އެއީ މަޝްހޫރު ތަރިއެއްގެ ޒިޔާރަތް ކުރުމެއް ވެސް ނޫން މެ އެވެ.

އުފަލާއި ޝަރަފުގައި ފައިނުގެ ރައްޔިތުން އެ ދުވަހު އެއްވީ އެންމެ 11 އަހަރުގެ މުހައްމަދު ޔޫނުސް ބިން އިބްރާހިމް ޒާހިރަށް އޮތް ލޯބި ދައްކައިދޭށެވެ. އެ ކުއްޖާ އެ ދުވަހު ރަށަށް އެ ފޭބީ ގުރުއާން ހިތުދަސްކޮށް ހާފިޒަކަށް ވެގެންނެވެ. ފައިނުގެ ވެސް ފުރަތަމަ ހާފިޒެވެ.

ގާތްގަނޑަކަށް 500 މީހުންގެ އާބާދީއެއް އޮތް ރަށުން މިހާ ކުޑަކުއްޖަކު ގުރުއާން ހިތުދަސްކުރުމަކީ، ރައްޔިތުން ގަބޫލުކުރި ގޮތުގައި، މުޅި ރަށަށް ވެސް ލިބުނު ޝަރަފެކެވެ. އެހެންކަމުން ބައެއް މީހުންނަށް އިހުސާސްކުރެވޭނީ މިހެންނެވެ؛ ޔޫނުސްގެ ބޮލުގައި ތާޖެއް އަޅުވައި މާބޮނޑި އާއި ހަދިޔާތައް ދީ އަގުވަޒަންކުރިޔަސް، އޭނާ އެ ގެނެސްދިން ރީތި ނަމާއި ދީނީ ގޮތުން އެ ހޯދި އެހާ ބޮޑު ހާސިލްކުރުމަކަށް ބަލާއިރު އެއީ އަދި ކުޑަވަރެކެވެ.

އެކަމަކު ޔަގީނުން ވެސް ޔޫނުސްއަކީ މިހާރު ފައިނު ރައްޔިތުންގެ އެންމެ އަލިގަދަ ތަރި އެވެ.

ޖެހިގެން އައި އާދިއްތަދުވަހު ފައިނު ސްކޫލަށް ޔޫނުސް ވަނީ ވެސް އެހާމެ ބޮޑު މަރުހަބާއެއްގެ ތެރޭގަ އެވެ. އޭނާއަށްޓަކައި ހާއްސަ އެސެމްބްލީއެއް ބޭއްވި އެވެ. އޭގެ ފަހުން އެކި ގްރޭޑްތަކުން ޕާޓީ ފަދަ އުފާ ފާޅުކުރުމުގެ އެއްވުންތައް ކުރިއަށް ގެންދިޔަ އެވެ.

ޔޫނުސްގެ ބައްޕަ އިބްރާހިމް ޒާހިރަކީ ފައިނުގެ މެޖިސްޓްރޭޓެވެ. ގއ. ގެމަނަފުއްޓަށް އުފަން ޒާހިރުގެ އަނބިކަނބަލުންނަކީ ފައިނުގެ ބޭފުޅެކެވެ. އެހެންކަމުން އާއިލާ ދިރިއުޅެމުން ގެންދަނީ ފައިނުގަ އެވެ.

ގުރުއާނަށް ދަރިފުޅު ހުންނަ ޝައުގުވެރިކަން އެލްކޭޖީގައި ޔޫނުސް އުޅުނު އިރު ވެސް، ޒާހިރަށް ފާހަގަކުރެއްވުނެވެ. އޭނާ ގުރުއާން ކިޔަވާވިދާޅުވާ އިރު ޝައުގުވެރިކަމާ އެކު އަޑުއެހުމަކީ ޔޫނުސްގެ އާދައެކެވެ. ޒާހިރަށް ގަބޫލުކުރެއްވުނީ އެއީ ރަނގަޅު ފާލެއްގެ ގޮތުގަ އެވެ.

ގުރުއާނާ މެދު ޔޫނުސްގެ ހިތުގައި އޮތް ލޯބި ބޮޑުވުމާ އެކު ހިތުދަސްކުރުމުގެ މަަސައްކަތް އޭނާ ލައްވާ ފެއްޓުވީ 2022ގަ އެވެ. އެކަމުގައި ޔޫނުސްގެ މުދައްރިސެއްގެ ޒިންމާ ނެންގެވީ ވެސް ޒާހިރު އެވެ. ދެން ހުންނެވި އެހީތެރިޔަކީ މަންމަ އެވެ.

"ޔޫނުސް ވަރަށް ޝައުގުވެރިވެ، އެހާމެ ހިތްވަރު ވެސް ކުރި،" ޒާހިރު ވިދާޅުވި އެވެ.

ފާހަގަކޮށްލަން ޖެހޭ ކަމަކީ ގްރޭޑް 6ގައި މިހާރު ކިޔަވަމުން އަންނަ ދަރިވަރު އެ ހިތްވަރުކުރީ ސްކޫލްގެ ހަރަކާތްތަކުގައި ވެސް ބައިވެރިވަމުން ކަމެވެ. އޭނާ ފަތަން ދެ އެވެ. ފުޓްބޯޅަ ކުޅެން ދެ އެވެ. މަދަހަ މުބާރާތްތަކުގައި ބައިވެރިވެ އެވެ. 

އެ ހުރިހާ ކަމެއްގައި އުޅެމުން ގުރުއާން ހިތުދަސްކުރަން ޔޫނުސް ދިން ސަމާލުކަން އެހާމެ ބޮޑެވެ. ރޭގަނޑާއި ފަތިހާއި ހަވީރު ގަޑީގެ އެކި ވަގުތުތައް ހުސްކުރީ ގުރުއާންގެ އާޔަތްތައް ހިތުގައި ބިންވަޅު ނެގުމުގެ މާތް މަސައްކަތުގަ އެވެ.

ގުއުރާން ހިތުދަސްކުރުމަކީ ބައެއް ކުދިންނާއި މީހުންނަށް މާ އުނދަގޫ ކަމަކަށް ނުވެ އެވެ. އާޔަތަކަށް ފަހު އާޔަތެއް، ސަފުހާއަކަށް ފަހު ސަފުހާއެއް ހިތަށް ނެގުމުގައި ފޫހިވުމެއް ނެތި އުޅެ އެވެ. ޔޫނުސް ވެސް ކުރިއަށް ދިޔައީ އެގޮތަށެވެ.

މިދިއަ ދޮޅު އަހަރުގެ ތެރޭގައި ޔޫނުސްގެ އާންމު އާދަތަކަކީ؛

މި އާދަތަކުގައި ގާތްގަނޑަކަށް ކޮންމެ ދުވަހަކު އުޅެ ގުރުއާން އެކުގައި ޔޫނުސްގެ ހިތަށް ނަގައިގަނެ ނިމުނީ އޮގަސްޓް 2023ގަ އެވެ. އެއީ ގުރުއާން އެއްކޮޅުން އަނެއް ކޮޅަށް ހިތުން އޭނާގެ ބައްޕައަށް ކިޔަައިދިން މަހެވެ. 

ދެން އޮތީ ގުރުއާނާ ބެހޭ ގައުމީ މަރުކަޒުގެ ތަޖުރިބާކާރެއްގެ ކުރިމަތީގައި މުޅި ގުރުއާން ހިތުން ކިޔައިދިނުމެވެ. އެ ބައި ކުރިއަށް ގެންދިޔައީ އޮންލައިންކޮށެވެ.

އޭގެ ފަހުން އެ މަރުކަޒުގެ މުރާޖާ ކުލާހަށް ދުވާލަކު ދެ ފޮތް ކިޔައިދީ 15 ދުވަހުން ހަތިމްކުރި އެވެ.

ހާފިޒު ކަމުގެ އިމްތިހާނުގައި އިށީނީ 26 ޑިސެމްބަރު 2023ގަ އެވެ. އޭގެ ފަހުން، އިމްތިހާން އެއްކޮށް ނިންމީ މި މަހު 16 ގަ އެވެ. އެ ކާމިޔާބީގެ ހިނިތުންވުމުގައި އެނބުރި ރަށަށް ގޮސް، ރައްޔިތުންގެ ރަން ދޫލައިގެ މަރުހަބާއާ ކުރިމަތިލީ 20 ވަނަ ދުވަހު އެވެ.

ފައިނަށް މިއީ ކުޑަ ކަމެއް ނޫނެވެ. ޔޫނުސް އާއި ޔޫނުސްގެ އާއިލާއަށް ވެސް މިއީ ކުޑަ ކަމެއް ނޫނެވެ. ރަށަށް އުފަން ފުރަތަމަ ހާފިޒްގެ މަގާމާ އެކު ޔޫނުސްގެ ނަން އެވަނީ ފައިނުގެ ތާރީހުގައި ވެސް ރަން އަކުރުން ލިޔެވިފަ އެވެ.

އުފާވެރިކަން ހުއްޓެވެ. ބާއްޖަވެރިކަން ހުއްޓެވެ.