ހައުސިން މިނިސްޓްރީގެ އަލިފާން: އެތައް ބަޔަކަށް އެތައް ސުވާލެއް

އަލިފާން ރޯވިކަން ފުރަތަމަ އެނގުނީ ހެނދުނު 7:30ހާއިރު އެވެ. އަލިފާން ނިއްވުމުގެ ޒިންމާ ނަގާ އެމްއެންޑީއެފްގެ ފަޔާ އެންޑް ރެސްކިއު ސާވިސްގެ މައި މަރުކަޒު، ނުވަތަ މާލޭގެ ފަޔާ ސްޓޭޝަން އެހުރީ ހައުސިން މިނިސްޓްރީ ހުރި ބްލޮކް ނޫން އަނެއް ބްލޮކްގަ އެވެ. ކުދިކުދި ގޯޅިތަކެއް ނެތެވެ. މާލޭގެ އެންމެ ބޮޑު މަގުތަކެވެ.

އެކަމަކު އަލިފާންގަނޑު ބޮޑުވަމުން ދިޔައީ ބަލަބަލާ ތިއްބަ އެވެ. އަލިފާން ނިއްވާ ލޮރީއެއް އަތުވެދާނެ އެވެ. އެއަށް އޮބިއޮންނަ ވަރެއް ނުވެ އެވެ. އެއަށް ވުރެ ބޮޑު ވެހިކަލެއް ގެނެސްފާނެ އެވެ. އެއަށް ވެސް ކުޅަދާނައެއް ނުވި އެވެ. ދެން ޖެހޭނީ ވެލާނާ އިންޓަނޭޝަނަލް އެއާޕޯޓްގެ ފަޔަ ލޮރީތައް ގެންނާށެވެ.

މި ގޮތަށް މާލޭގައި އަލިފާން ނިއްވާތާ ވީ ކިހާ ދުވަހެއް ހެއްޔެވެ؟ ކޮންމެ ހާދިސާއަކަށް ފަހު، ކޮންމެ ސަރުކާރަކުން ވެސް ފިޔަވަޅުތަކެއް އިއުލާންކުރެ އެވެ. ބައެއް ކަންކަން ރަނގަޅު ނުކުރާ ވާހަކައެއް ނޫނެވެ. ނަމަވެސް މާލޭގެ ފަޔާ ސްޓޭޝަން ބުޑުގައި ހުރި ސަރުކާރުގެ މައި އެއް މިނިސްޓްރީ އަނދާ ހުލިވެގެން އެ ދިޔައީ، ކޮން ކަމެއް ގޯސްވެގެންތޯ ސުވާލުކުރަންވީ އެވެ.

އަލިފާން ނިއްވުމުގެ ދާއިރާގެ ތަޖުރިބާކާރަކަށް އަޅުގަނޑު ސުވާލެއް ކުރީމެވެ. މާލޭގެ ފަޔާ ސްޓޭޝަންއާ އެހާ ކައިރީގައި ހައުސިން މިނިސްޓްރީ ހުރި އިރު އަލިފާން ނިއްވަން އެ ނެގީ ހާދަ ގިނަ އިރެކެވެ.

އިނގިރޭސި ބަހުން އޭނާ ދިން ޖަވާބަކީ މި އެވެ: އާއެނކެވެ. އެއްބަސްވަމެވެ. ލަސްވުމުގައި ބައިވަރު ސަބަބުތައް ހުރެދާނެ އެވެ. ހިތާމަކުރަން ޖެހޭ ކަމަކީ މާޒީގައި ހިނގި އަލިފާނުގެ ހާދިސާތަކުން އެއްޗެއް ދަސްވިކަމަށް ނުފެންނާތީ އެވެ. ގަބޫލުކުރަން ދަތިވަނީ އިމާރާތްކުރުމުގައި ހުންނަން ޖެހޭނެ ފެންވަރާ ބެހޭ އުސޫލުތައް ކަނޑައަޅާ މިނިސްޓްރީ އަނދާހުލިވީމަ އެވެ."

އަލިފާންގެ ހާދިސާ ފެށުނީއްސުރެ ނިމެންދެން އެތަނުގައި ހުރި މީހަކު ބުނީ "ލޮރީ އައިސް ފެން ފޮދެއް ޖަހައިފި، އަނެއްކާ ވެސް ފެން ފޮދެއް ޖަހައިފި، އެކަމަކު ރާސްލާފައި ހުޅުގަނޑު ދިޔައީ ބޮޑުވަމުން" ކަމަށެވެ.

މާލޭގެ ކުދިކުދި މަގުތަކުގައި ހުންނަ ބައެއް އިމާރާތްތަކުގައި އަލިފާނުގެ ނުރައްކާތެރި އެތައް ހާދިސާއެއް ހިނގައި، އެތައް ބައެއްގެ ފުރާނަ ވަނީ ގެއްލިފަ އެވެ. އެ ހާދިސާތަކާ ގުޅިގެން މާލޭގެ މަގުތަކުގައި އަވަހަށް ފެން ލިބޭނެ އިންތިޒާމް ވެސް ހަމަޖައްސާފައި ހުރި ކަމަށް، އެކި ސަރުކާރުތަކުން ބުނެ އެވެ. އެކަމަކު އަލިފާނުގެ ބޮޑެތި ހާދިސާތައް ހިނގުން ހުއްޓުވޭ ތަނެއް ނާދެ އެވެ.

ހައުސިން މިނިސްޓްރީގައި ރޯވީ ކީއްވެކަން ނޭނގުނަސް އާންމުންގެ ހިތުގައި އުފެދޭނެ ސުވާލަކީ އެހާ ފަސޭހައިން އަލިފާން ނިއްވުމުގެ މަސައްކަތްކުރެވޭނެ ހިސާބެއްގައި، އެފްއާރުއެސްއަށް ކުރިމަތިވީ ކޮން ހުރަސްތަކެއް ހެއްޔެވެ؟ މި ސުވާލަށް އެމްއެންޑީއެފްއިން ޖަވާބު ދިނުން ރަނގަޅެވެ. އެފްއާރުއެސްއަކީ ވެރިރަށުގައި ހިނގާފާނެ އަލިފާނުގެ ހާދިސާތަކަށް އެކަށީގެންވާ ވަރަށް ތައްޔާރުވެފައި އޮތް އިދާރާއެއްތޯ ކަށަވަރުކުރަން ވެސް އެބަ ޖެހެ އެވެ. ބޭނުންވާ ވަރަށް ސާމާނު ނެތް ނަމަ އެ ވާހަކަ ވެސް އާންމުންނަށް އެނގެން ޖެހޭނެތާ އެވެ. މިިއިން ކޮންމެ ހާދިސާއެއް ވެސް ގުޅިފައި ވަނީ އާންމުންނާ އެވެ. އާންމުންގެ ހައްގުތަކާ އެވެ.

އެކަމަކު ދެން ވެސް އިވުން ކައިރީ "މިހާރަށް ވުރެ ބޮޑަށް އަލިފާންގެ ހާދިސާތަކަށް އަޅުގަނޑުމެން ތައްޔާރުވާން ޖެހެއޭ"، ސަރުކާރުގެ އިސް ވެރިން ވިދާޅުވާ ވާހަކަ ކަމަށް ވުން ކައިރި އެވެ. އެއީ ކުރީގެ ސަރުކާރުތަކުން ވެސް އެންމެ ފަސޭހައިން ދެއްކި ވާހަކަތަކެވެ.

ހުޅުގަނޑު ކުޑަކޮށް ފެނުނަސް އަލިފާނުގެ ހާދިސާއެއް ބޮޑުވާން ދިމާވެދާނެ އެތައް ސަބަބެއް ހުންނާނެ އެވެ. އެ އިމާރާތެއްގައި ހުރި ފަސޭހައިން އަލިފާން ހިފާނެ އެއްޗިއްސާއި އެހެން ވެސް ސަބަބުތަކެވެ. އެކަމަކު އަޅުގަނޑާ ވާހަކަ ދެއްކި މީހުން ގަބޫލުކުރާ ގޮތުގައި، އެފްއާރުއެސްގެ ސްޓޭޝަނެއް އެހާ ކައިރީގައި ހުރެމެ މިއަދުގެ އަލިފާންގަނޑު ނިއްވާނުލެވި ބޮޑުވެ، މުޅި އިމާރާތް އަނދައިގެން ދިޔަ ގޮތުން ހައިރާންވެ އެވެ.

މިއީ އެއްވެސް ބަޔަކު ކުށްވެރިކޮށް، އެއްވެސް ބައެއްގެ ބޮލަށް ކަމެއް ކަނޑާލަން މީހުން ދައްކާ ވާހަކައެއް ނޫނެވެ. ހަގީގަތުގައި ވެސް ހިތުގައި އުފެދޭ ޝުއޫރުތަކެވެ.

ހައުސިން މިނިސްޓްރީ ހުރި ދިމާލުގެ ގޮތުން ނުލިބުނު ރައްކާތެރިކަމެއް ނުވަތަ އަލިފާން ނިއްވަން ނުހޯދުނު ފަސޭހައެއް، މާލޭގެ އެހެން އެއްވެސް ދިމާއަކުން ނުލިބޭނެ އެވެ. ނުހޯދޭނެ އެވެ. އެހެންކަމުން މިއަދުގެ އަލިފާނަކީ އެމްއެންޑީއެފުން ވެސް އިތުރަށް ވިސްނަން ޖެހޭނެ ހާދިސާއެކެވެ. އާންމުންނަށް ޖަވާބުދާރީވާން ވެސް ޖެހޭނެ އެވެ.