ސިފައިންނާއި ފުލުހުންނަށް ގެދޮރު ދިނަސް މި މަގު ދީގެން ނުވާނެ

މީގެ ދުވަސްކޮޅެއް ކުރިން އަޅުގަނޑަށް، ނުދަންނަ މީހެއްގެ، ފޯނު ކޯލެއް އަ އެވެ. އޭނާ ފުރަތަމަ ވެސް އެހީ 'މީގެ އަހަރުތަކެއް ކުރިން މުންނާރު ކައިރީގައި ހިނގި އެކްސިޑެންޓް ހަނދާން ހުރިތޯ' އެވެ.

އާނއެކެވެ. ހަނދާން އެބަ ހުއްޓެވެ. އެއީ 1990ގެ އަހަރުތަކުގެ ކުރީކޮޅެވެ. ރޭގަނޑު ދަންވަރު ސައިކަލް އެކްސިޑެންޓް ހިނގީ އެ ސަރަހައްދުގެ މަގު ހެދިއިރު މުންނާރު ކައިރިން މަގަށް މާ ބޮޑު ބައެއް ނެރެފައި ހުރުމުންނެވެ. މުންނާރު ވައްކޮށް ހުންނަ އިރު އެ ބައި އޮތީ މަގަށް ސީދަލަށް ވާ ގޮތަށެވެ. އެއްޗެއް ދުއްވާފައި ދާއިރު މުންނާރު ކައިރިން މަގަށް ސީދާކުރަން އުޅެފި ނަމަ އެބައިގައި ޖެހުމުގެ ފުރުސަތު ބޮޑެވެ.

އެރޭ ސައިކަލް ދުއްވީ އޭރު މާލޭގައި ބޮޑެތި ސައިކަލް ގެންގުޅުނު މަދު މީހުންގެ ތެރެއިން އެކެކެވެ. ބާރު ސްޕީޑްގައި ދިޔަ ސައިކަލް ޖެހުނީ މަގަށް ނުކުމެފައި އޮތް ބައިގަ އެވެ. ވެއްޓި އޭނާ ވަގުތުން މަރުވީ އެވެ.

މި ނުރައްކާތެރި އެކްސިޑެންޓަށް ފަހު އެތަންކޮޅު ސީދަލަށް ބެހެއްޓުމުގެ ބަދަލުގައި ވައްކޮށްލި އެވެ.

އަޅުގަނޑަށް ފޯންކުރި މީހާ ބުނީ ހުޅުމާލޭގައި ސިފައިންނާއި ފުލުހުންނަށް އަޅާފައި ހުރި ފްލެޓްތައް ކައިރީގައި ވެސް ދުވާރު ހަދާފައި ހުރީ އެގޮތަށް ކަމަށެވެ. ނުރައްކާތެރި އެކްސިޑެންޓެއް ކޮންމެ ވަގުތަކު ވެސް ހިނގާފާނެ ކަމަށް ވެސް ބުންޏެވެ. އޭނާ އެދުނީ 'މޫސަ ގޮސް ބަލާލައިފައި އެއްޗެއް ލިޔެދޭށޭ' އެވެ.

އަޅުގަނޑު ދިޔައިމެވެ. އެކަމަކު ހައިވަކަރު މަގުގެ ގާތްގަނޑަކަށް މެދާ ހިސާބަށް ދާވަރަށް ފުޅާކޮށް ދުވާރު ހަދާފައި ވަނީ އެ މަގަށް ވާ ގޮތަށް ބޮޑު ޕާކިން ޒޯނެއް ނަގާތީ އެވެ. މިއީ ހުޅުމާލޭގައި މީހުން ދިރިއުޅޭ ހިސާބެއްގައި މިހާތަނަށް ހަދާ އެންމެ ބޮޑު ޕާކިން ޒޯނެވެ.

ފުލުހުންނާއި ސިފައިންނަށް ޖުމްލަ ހަ ޓަވަރު ވަނީ އިމާރަތްކޮށްފަ އެވެ. މީހުންނަށް ވަދެވޭ ވަރަށް ތަން ނިންމަން 10 އަހަރަށް ވުރެ ގިނަ ދުވަސް ނެގި އެވެ. މިއީ ސިފައިންނާއި ފުލުހުންނަށް ހާއްސަކޮށްގެން ސަރުކާރުން ދިން އެންމެ ބޮޑު ބޯހިޔާވަހިކަމެވެ.

އިއްޔެ އޮތް ސިފައިންގެ ރަސްމިއްޔާތެއްގައި ޑިފެންސް މިނިސްޓަރު ގައްސާން މައުމޫން، ދިވެހި ސިފައިންނަށް އުފާވެރި ހަބަރެއް ދެއްވި އެވެ. އެއީ ދިގު މުއްދަތެއްގައި ސިފައިންގެ ތެރޭގައި ހިދުމަތްކޮށް، ރިޓަޔަކުރާ ހިސާބަށް ދިއުމުން ގެދޮރު މިލްކުކުރެވޭނެ ނިޒާމެއް ހަމަޖައްސަން ރައީސް މުހައްމަދު މުއިއްޒު ބޭނުންފުޅުވާކަމުގެ ހަބަރެވެ.

ސިފައިންނާއި ފުލުހުންނަށް ގެދޮރު ދެވިދާނެ އެވެ. ނުދޭންވީ ހައިވަކަރު މަގު ކަހަލަ ބޮޑު މަގެކެވެ. އެކަމަކު މިހާރު މި އޮތީ އެ މަގު ވެސް ދީފަ އެވެ. ސިފައިންގެ ފްލެޓްތައް ކައިރީގައި ކާރު ޕާކްކުރަނީ ވެސް ހުރަހަށެވެ. މާނައަކީ ހުރަހަށް ކާރު ޕާކްކުރެވޭ ވަރަށް ޕާކިން ޒޯން ބޮޑުކޮށްފައި އޮތުމެވެ.

ފްލެޓްތައް ކުރިމަތީގައި އެ އޮތީ ހުޅުމާލޭގެ އިންޑަސްޓްރިއަލް ޒޯން އެވެ. ބޮޑެތި ކުންފުނިތަކުގެ ގުދަންތަކެވެ. ބޮޑެތި ވެހިކަލްތައް އާންމުކޮށް ދުއްވާ ހަދާ ހިސާބެކެވެ. އެޗުޑީސީއަށް އާމްދަނީ ލިބޭ އެންމެ މުހިންމު ބަޔަކީ އެ ސަރަހައްދުގައި ހުރި ބޮޑެތި ބިންތަކުން ދައްކާ ކުއްޔެވެ.

ވިޔަފާރީގެ ހަރަކާތްތަކަށް ހާއްސަ ސަރަހައްދަކަށް ވެސް ވުމާ އެކު މަގުތަކުގެ ޖާގަ ވަރަށް މުހިންމެވެ. އެހެންކަމުން ސިފައިންނާއި ފުލުހުންގެ ކާރުތައް ހުރަހަށް ހުރަސްކުރެވޭ ވަރަށް ޕާކިން ޒޯން ނެގުމަކީ، ވަކި ބަޔަކަށްޓަކައި އެހެން މީހުންގެ މަތިން ހަނދާން ނައްތާލުން ކަމަށް ބަލަމާ ހިނގާށެވެ. 

ހުޅުމާލޭގެ އާބާދީ އާއި ވިޔަފާރީގެ ހަރަކާތްތައް ވެސް ދަނީ ބޮޑުވަމުންނެވެ. މަގެއްގައި ހަދާ ޕާކިން ޒޯނަށް ވެސް ޖާގަ ދޭންވާނީ ކުރިމަގުގައި ކުރިމަތިވާނެ އުނދަގޫތަކަށް ވެސް ވިސްނައިފަ އެވެ. އެއީ ސިފައިންނާއި ފުލުހުންނަށްޓަކައި އާދަޔާ ހިލާފު ގޮތަކަށް ބައްޓަންކޮށްގެންވާނެ ކަމެއް ނޫނެވެ. ފުލުހުންނާއި ސިފައިންނަށް ވެސް މަގުގެ ހައްގު އޮންނަން ޖެހޭނީ އާންމު އެހެން މީހުންނެކޭ އެއްގޮތަށެވެ. މިހާރު ވެސް ސަލާމަތީ ބާރުތަކުގެ މީހުންނަށް ދައުލަތުން ކުރާ ހޭދަ އާންމު އެހެން ފަރުދުންނަށް ވުރެ ބޮޑެވެ. މިސާލަކަށް ސިފައިންނާއި ފުލުހުންގެ ފްލެޓްތައް ދީފައި އެހުރީ އާންމުންނަށް ފްލެޓް ދޭ އަގަށް ވުރެ މާ ކުޑަކޮށެވެ.

މިކަހަލަ އެތައް ބައިވަރު އިނާޔަތްތަކެއް ސިފައިންނާއި ފުލުހުންނަށް ދީގެން ބަޔަކު މައްސަލައެއް ނުޖައްސަ އެވެ. އެކަމަކު ހައިވަކަރު މަގު މި ގޮތަށް ދެންޏާ އޭގައި ޝަކުވާ ހުންނާނެ އެވެ. ފުލުހުންނާއި ސިފައިންގެ އަމިއްލަ ކާރުތައް ޕާކްކުރަން، އާންމު އެހެން މީހުން ފަދައިން، ހުޅުމާލޭގެ އެކި ހިސާބުތަކުން ހުސް ޖާގަ ހޯދަންވީ އެވެ. އެއީ މުހިންމު ބޮޑު މަގަކުން ބޮޑު ޖާގައެއް ދީގެން ހަމަޖައްސަން ޖެހޭ އިންތިޒާމެއް ނޫނެވެ.

އަޅުގަނޑަށް ފޯނުކުރި މީހާ ކަންބޮޑުވީ ދުވާރުގެ ނިމޭ ކޮޅު މާ ބޮޑަށް މަގަށް ނެރެފައި އޮތުމުންނެވެ. އަޅުގަނޑު ގޮސް ބެލުމުން އެނގުނީ އެގޮތަށް ފުޅާވެފައި އެ އޮތީ ޕާކިން ޒޯން ބޮޑުކުރާތީ ކަމެވެ. އެކަމަކު ބޭއިންސާފު އުސޫލެއްގެ ތެރެއިންނެވެ.