ހަނގުރާމަވެރި ސަރަހައްދުތަކުގައި ހާލުގައި ޖެހިފައި ތިބި ދިވެހިން ރާއްޖެ ގެންނަން އަވަސް ފިޔަޅުތަކެއް އަޅަންޖެހޭ: ރެޕަޓުއާ

ހަނގުރާމަވެރި ސަރަހައްދުތަކުގައި ހާލުގައި ޖެހިފައިވާ ދިވެހިން އަނބުރާ ރާއްޖެ ގެނައުމަށް، އަވަސް އަދި ވަށާޖެހޭ ފިޔަވަޅުތަކެއް އަޅަން ޖެހޭ ކަމަށް ޓެރަރިޒަމާ ދެކޮޅަށް މަސައްކަތްކުރުމާއި އިންސާނީ ހައްގުތަކާއި މިނިވަންކަން ރައްކާތެރިކޮށް ކުރިއެރުވުމާ ގުޅޭ އދ.ގެ ސްޕެޝަލް ރެޕަޓުއާ ފިއޮނުއެލާ ނީ އައޮލެއިން މިއަދު ވިދާޅުވެއްޖެ އެވެ.

ވީ ކިހިނެއް؟ - ރާއްޖެއަށް ކުރެއްވި 10 ދުވަހުގެ ދަތުރެއް ނިންމަވާލައްވަމުން ނީ އައޮލެއިން ވަނީ ނޫސްވެރިންނާ ބައްދަލުކުރައްވައި އޭނާގެ ހޯދުންތަކާ ބެހޭގޮތުން ވާހަކަދައްކަވައިފަ އެވެ.

މި ދަތުރުގައި ނީ އައޮލެއިން ވަނީ ސަރުކާރުގެ އޮފިޝަލުންނާއި ފުލުހުންނާއި ސިފައިންނާއި ދީނީ ލީޑަރުންނާއި ޖަމިއްޔާތަކާ ބައްދަލުކުރައްވާފަ އެވެ. އަދި ކ. ހިންމަފުށީގައި ހުންނަ ނޭޝަނަލް ރީ-އިންޓަގްރޭޝަން ސެންޓަރަށާއި ޖަލުތަކަށް ވެސް ޒިޔާރާތްކުރެއްވި އެވެ.

މި ދަތުރުގެ ރިޕޯޓު އަންނަ އަހަރުގެ މާޗް މަހު އދ.ގެ އިންސާނީ ހައްގުތަކާ ގުޅޭ ކައުންސިލަށް ހުށަހަޅާނެ އެވެ.

ބުނީ ކީކޭ؟ - ނޫސްވެރިންގެ ބައްދަލުވުމުގައި ނީ އައޮލެއިން ވަނީ، ކުޑަކުދިން ހިމެނޭ ގޮތަށް، ހަނގުރާމަވެރި ސަރަހައްދުތަކުގައި ތިބި ދިވެހިންނަށް ދިމާވަމުންދާ ބިރުވެރި އަދި ފުރާނަ ނުރައްކަލަކަށް ހުށަހަޅޭ ހާލަތްތަކަށް އިޖާބަ ދިނުމުގެ ގޮތުން އަވަސް، ވަށާ ޖެހޭ ފިޔަވަޅުތަކެއް އެޅުމަށް ސަރުކާރުގެ ކަމާބެހޭ އިދާރާތަކަށް ގޮވާލައްވާފަ އެވެ. އެގޮތުން އިރު އުތުރު ސީރިޔާގެ އަލް ހޮލް އަދި ރިޖް ކޭމްޕްތަކުގައި ތިބި ދިވެހިން އަނބުރާ ރާއްޖެ ގެނައުމުގެ މުހިއްމުކަން އޭނާ ފާހަގަކުރެއްވި އެވެ.

ނީ އައޮލެއިން ވިދާޅުވިގޮތުގައި މި ކޭމްޕްތަކުގައި 50 އަށް ވުރެ ގިނަ ދިވެހިން، ބޯފެނާއި ކާނާ އާއި އެކަށީގެންވާ ސިއްހީ ހިދުމަތާއި ތައުލީމަކާ ނުލައި، އުޅެމުން އެބަގެންދެ އެވެ. އަދި އެ ކޭމްޕުތަކުގައި، ދިރިއުޅެން އެކަށީގެންނުވާ ބިރުވެރި މާހައުލުތަކުގައި، ކުޑަކުދިން ވެސް އުޅެމުންދާ ކަން ފާހަގަކުރެއްވި އެވެ.

"މި ކުދިންނަކީ ޓެރަރިޒަމްގެ ޝިކާރައަކަށް ވެފައިވާ ކުދިން ކަމުން، އެ ކުދިންނާ މެދު ކަން ކުރަން ޖެހެނީ އިންސާނީ ކަރާމާތަށް ފުރިހަމަ އިހުތިރާމާ އެކު. މި ކުދިން އަނބުރާ ރާއްޖެ ގެނެސް، ސްޓިގްމާއަކާ ނުލާ އާއްމު އާދައިގެ އުފެއްދުންތެރި ދިރިއުުމެއް އުޅުމުގެ ފުރުސަތު ފަހިކޮށްދޭން ޖެހޭ،" ނީ އައޮލެއިން ވިދާޅުވި އެވެ.

ހަނގުރާމަވެރި ސަރަހައްދުތަކުން ގެންނަ ދިވެހިން އަނބުރާ މުޖުތަމަައުގެ ތެރެއަށް ފޮނުވުމަށް ރަނގަޅު ރޭވުންތަކެއް ބޭނުންވާކަން ފާހަގަކުރައްވާ ނީ އައޮލެއިން ވިދާޅުވީ މިގޮތަށް ގެންނަ މީހުންގެ އާއިލާތަކާއި މުޖުތަމައުއަކީ އެ މަސައްކަތުގެ ބައިވެރިން ކަމަށް ދެކެން ޖެހޭ ކަމަށެވެ.

 ހަނގުރާމައިގެ ސަރަހައްދުތަކުން ގެންނަ ދިވެހިންނަށް ހާއްސަކޮށްގެން ރީ-އިންޓަގްރޭޝަން ސެންޓަރެއް ގާއިމުކޮށްފައިވާއިރު، ނީ އައޮލެއިން ވިދާޅުވިގޮތުގައި، އެ މަސައްކަތް ކުރިއަށް ގެންދަން ޖެހެނީ ފަރުވާތެރިކަމާ އެކުގަ އެވެ.

އޭނާ ވިދާޅުވީ، ކުޑަކުދިން ހިމެނޭ ގޮތަށް، މީހުން ދިގު މުއްދަތަށް އިދާރީ ގޮތުން ބަންދުކޮށްފައި ބޭތިއްބުމަކީ ރާއްޖެއިން ބައިވެރިވެފައިވާ އިންސާނީ ހައްގުތަކާ ގުޅޭ މުއާހަދާތަކުގެ ދަށުން ރާއްޖެއަށް ލާޒިމުވާ ކަންކަމާ ހިލާފުވާނެ ކަމެއް ކަމަށެވެ.

އެނގުން މުހިއްމު - ރާއްޖެއިން ބޭރަށް ހަނގުރާމައަށް ދިޔަ އާއިލާއެއް މިދިޔަ މާޗް މަހުގެ 11 ވަނަ ދުވަހު ރާއްޖެ ގެނައުމަށް ފަހު ނޭޝަނަލް ރީ-އިންޓެގްރޭޝަން ސެންޓަރުގައި "އިދާރީގޮތުން" ބަންދުކޮށްފައިވެ އެވެ. އެއީ އުމުރުން 33 އަހަރުގެ އަންހެނަކާއި އެ މީހާގެ 18 އަހަރު ނުފުރޭ ހަތަރު ދަރިންނެވެ.

ޓެރަރިޒަމާއި ހައްދުފަހަނައެޅުމުގެ ސަބަބުން ފާއިތުވެދިޔަ އަހަރުތަކުގެ ތެރޭގައި ރާއްޖެއަށް ކުރިމަތިވެފައިވާ ގޮންޖެހުންތަކާ ގުޅިގެން ގާނޫނުތަކާއި ސިޔާސަތުތައް ވަރުގަދަކޮށްފައިވާކަން ފާހަގަކުރައްވައި ނީ އައޮލެއިން ވަނީ ޓެރަރިޒަމްގެ ގާނޫނުތައް ބައިނަލްއަގްވާމީ އިންސާނީ ހައްގުތަކުގެ މިންގަނޑުތަކަށް ފައްތަން ސަރުކާރަށް ގޮވާލައްވައިފަ އެވެ. އަދި ޓެރަރިޒަމްގެ އަމަލުތައް ކުރާ ފަރާތްތައް ފުރިހަމައަށް އިންސާފުގެ ކުރިމައްޗަށް ގެނައުމުގެ މުހިއްމުކަން ވެސް ފާހަގަކުރެއްވި އެވެ.

"އިންސާނީ ހައްގުތަކުގެ މިންގަނޑުތަކަށް ފުރިހަމައަށް ފެތޭ ގޮތަށް ޓެރަރިޒަމްއާ ދެކޮޅަށް ފިޔަވަޅު އެޅުމަށް ޖަލުތަކުގެ ހާލަތު ރަނގަޅުކޮށް، ޝަރުއީ ދާއިރާގެ މިނިވަންކަން ޔަގީންކޮށް، މިފަދަ ކުށްތަކުގެ ތުހުމަތު ކުރެވޭ ފަރާތްތަކުގެ ވަކީލުންނަށް ވަކާލާތު ކުރުމުގެ ފުރުސަތު ދިނުމާއި ތަހުގީގީ މަރުހަލާގައި ގާނޫނާ ހިލާފަށް ކުރެވޭ ހުރިހާ ކަމަކަށް ފުލުހުން ޒިންމާދާރުކުރުވަން ޖެހޭ،" ނީ އައޮލެއިން ވިދާޅުވި އެވެ.