ހާޝިމް މަރުވީ އެކަނި ސިޑިން އަރަނިކޮށް ވެއްޓި ލިބުނު އަނިޔާގައި: އާއިލާ

މީގެ ދެ ދުވަސް ކުރިން މާލޭ ގެއެއްގެ ތެރޭ މަރުވެފައި އޮއްވާ ފެނުނު ހާޝިމް މުހައްމަދު މަރުވުމުގެ ސަބަބަކީ ސިޑިން އެކަނި އަރަނިކޮށް ވެއްޓި ލިބުނު އަނިޔާ ކަމަށް، އާއިލާއިން މިއަދު ބުނެފި އެވެ.

ހއ. ހޯރަފުއްޓަށް އުފަން ހާޝިމް، 44،ގެ މަރުގައި ޖިނާއީ ކުށެއް އޮވެދާނެ ކަމަށް ތުހުމަތުކުރުމުން ފުލުހުން ވަނީ އޭނާ ވަޅުނުލައި މޯޗަރީގައި ބާއްވައިގެން، ތަހުގީގު ވެސް ކޮށްފަ އެވެ. އަދި އެ ތަހުގީގަށް ފަހު ފުލުހުން މިއަދު ބުނީ އެއްވެސް މީހެއްގެ އިހުމާލެއް އޮތް ކަން ފާހަގަކުރެވިފައި ނުވާ ކަމަށެވެ.

ވީ ކިހިނެއް؟ - ހާޝިމްގެ ހަށިގަނޑު ފެނުނީ މާފަންނު ގެއެއްގެ ތެރެއިން މިދިޔަ އާދިއްތަ ދުވަހުގެ ރޭ ގާތްގަނޑަކަށް 9:00 ގަ އެވެ. އެކަމަކު އެ މަރާ މެދު ޝައްކުތަކެއް އުފެދުމުން ޖަނާޒާގެ ކަންކަން ކުރިއަށް ނުގެންގޮސް ހަށިގަނޑު ބޭއްވި އެވެ. ތަހުގީގު ނިންމައި، އޭނާގެ ޖަނާޒާ ބޭއްވީ ރޭ މަގުރިބު ނަމާދަށް ފަހު އެވެ.

އާއިލާގެ ބަސް - ހާޝިމްގެ އާއިލާގެ ފަރާތުން ވާހަކަ ދެއްކި އޭނާގެ އެއްބަޑު އެއްބަފާ ބޭބެ، މޫސާ ހަލީލު 'ދައުރު'އަށް ބުނީ ފުލުހުންގެ ތަހުގީގުން ހޯދި ހޯދުންތަކަށް ބަލައި، އާއިލާއަށް ވެސް މިހާރު ގަބޫލުކުރެވެނީ މީހެއްގެ އިހުމާލެއް ނެތް ކަމަށެވެ.

"ފުލުހުން ވަނީ އެ ހާދިސާގެ ސީސީޓީވީ ފުޓޭޖާއި ބަޔާންތައް އާއިލާއާ ހިއްސާކޮށްފައި. އެކަމުގައި އެއްވެސް މީހެއްގެ ބައިވެރިވުމެއް ނެތް،" މޫސަ ބުންޏެވެ.

ފުލުހުންގެ ބަސް - ފުލުހުން މިއަދު މީޑިއާތަކަށް ފޮނުވި މެސެޖްގައި ބުނީ އެ މައްސަލައިގައި މިހާތަނަށް ބެލި ބެލުމުން މީހެއްގެ "ޖިނާއީ އަމަލެއް އަދި އިހުމާލެއް ފާހަގަކުރެވިފައި [ނުވާ]" ކަމަށެވެ. އެކަމަކު މައްސަލަ އަދިވެސް ތަހުގީގު ކުރަމުން އަންނަ ކަމަށް މެސެޖްގައި ބުންޏެވެ.

ހާޝިމް ދިރިއުޅެމުން އައީ އޭނާއާ އެކު އެއް ތަނެއްގައި މަސައްކަތް ކުރާ ބިދޭސީންނާ އެކު ދެ ކޮޓަރީގެ އެޕާޓްމަންޓެއްގަ އެވެ. މޫސަ ބުނި ގޮތުގައި ހާޝިމް އެކަނި ސިޑިން އަރަނިކޮށް ވެއްޓޭ މަންޒަރު، ފުލުހުން ދިން ސީސީޓީވީ ފުޓޭޖުން ފެންނަ ކަމަށެވެ. އެކަމަކު ވެއްޓިފައި އޮތް ތަން އެހެން މީހަކަށް ފެންނަން ގިނަ އިރު ނެގި ކަމަށް އޭނާ ބުންޏެވެ.

"ސީސީޓީވީން ފެނޭ ސިޑިން ވެއްޓޭ މަންޒަރު. ވެއްޓި ބޯ ފަޅައިގެން ދިޔައީ،" މޫސަ ބުންޏެވެ.

އޭނާ ބުނީ ހާޝިމް މަރުވީ ލިބުނު އަނިޔާގައި ލޭ ފޭބި އިރު އެވަގުތު އެތަނަށް މީހަކަށް ނުދެވި ގިނައިރު ވުމުން ކަމަށެވެ.

ހާޝިމްގެ ހަތަރު ކުދިން އެބަ ތިއްބެވެ. އަދި އެހާ ޒުވާން އިރު ދިމާވި މި ހާދިސާގެ ސަބަބުން މުޅި އާއިލާއަށް ލިބުނު ޝޮކާއި ހިތާމަ ވަރަށް ބޮޑު ކަމަށް ވެސް، އޭނާގެ ބޭބެ ބުންޏެވެ.