އެމްޑީޕީ އާއި ޑިމޮކްރެޓްސް ގުޅިގެން މީގެ ކުރިން ބާއްވާ ނޫސްވެރިންގެ ބައްދަލުވުމެއްގައި އެމްޑީޕީގެ ޗެއާޕާސަން ފައްޔާޒު އިސްމާއިލް (ކ) އާއި ޑިމޮކްރެޓްސްގެ ރައީސް ހަސަން ލަތީފު. (ދައުރު ފޮޓޯ/މުހައްމަދު އަމާން)
ސަރުކާރު ހަމައަކަށް އަޅުވަން ޑިމްކޮރެޓްސް އެހެން ޕާޓީތަކާ ގުޅެނީ
ސަރުކާރު ހަމައަކަށް އަޅުވައި، ޒިންމާދާރު ކުރުމުގެ މަސައްކަތް އިތުރަށް ފުޅާކޮށް، ދަ ޑިމޮކްރެޓްސްއިން އެ ކަމަށް އެއްބަސްވާ ހުރިހާ ސިޔާސީ ޕާޓީތަކާއި ޖަމިއްޔާ ޖަމާއަތްތަކާ ގުޅިގެން މަސައްކަތް ކުރަން ނިންމައިފި އެވެ.
ވީ ކިހިނެއް؟ - ޑިމޮކްރެޓްސްއިން މިގޮތަށް ނިންމީ މިދިޔަ ބުރާސްފަތި ދުވަހު ބޭއްވި އެ ޕާޓީގެ ނެޝަނަލް އެސެމްބްލީގެ 11 ވަނަ ބައްދަލުވުމުގައި ފާސްކުރި ގަރާރަކުންނެވެ.
ނެޝަނަލް އެސެމްބްލީއަށް އެ ގަރާރު ހުށަހެޅުއްވީ ޑިމޮކްރެޓްސްގެ ނައިބު ރައީސް މުހައްމަދު ޝިފާޒު އެވެ.
ތަފްސީލު - އެ ގަރާރު ހުށަހެޅި މައިގަނޑު ސަބަބުތަކަކީ:
-
ސަރުކާރުގައި އޮތް ސިޔާސީ ޕާޓީއަކަށް ނުވެ، އިދިކޮޅު ޕާޓީއެއްގެ ގޮތުގައި މަސައްކަތް ކުރަމުން ދިއުމާއި ސަރުކާރުން ގަސްތުގައި އަދި އިހުމާލުން ރައްޔިތުންނަށާއި ރާއްޖެއަށް ބޭއިންސާފުވެ، ގެއްލުން ބޮޑު އެތައް ކަމެއް ކުރަމުންދާތީ
-
ސަރުކާރުން ވެފައިވާ ވައުދުތައް ނުފުއްދުމާއި ވައުދުތަކާ ހިލާފުވާތީ
-
ރާއްޖޭގެ އިގްތިސާދަށާއި މާލިއްޔަތަށް ގެއްލުން ބޮޑު އެތައް ކަމެއް ތަކުރާރުކޮށް ކުރާތީ؛ ސަރުކާރުގެ ކޮރަޕްޝަނާއި ވައްކަން އިތުރުވަމުންދާތީ
-
ގާނޫނުއަސާސީން ތަރުތީބުކޮށްފައިވާ ޑިމޮކްރެޓިކް ނިޒާމު ބަލިކަށިކޮށް، ދައުލަތުގެ މުއައްސަސާތައް ރައީސުލްޖުމްހޫރިއްޔާއަށް ކޮންޓްރޯލް ލިބޭނެ ގޮތަށް ބަދަލުކޮށް، ރައްޔިތުންގެ ބާރުވެރިކަން ގެއްލޭ ގޮތަށް ގާނޫނުއަސާސީއަށް ކުއްލި ބޮޑެތި ބަދަލުތައް ގެނެސް، ސަރުކާރު ޖަވާބުދާރީ ކުރުވުމުގެ ދޮރުރތައް ބަންދުކުރާތީ
އެފަދަ ކަންކަމަކީ، ޑިމޮކްރެޓްސްއިން ބުނި ގޮތުގައި ޒިންމާދާރު ސަރުކާރަކުން ކޮށްގެންވާނެ ކަމެއް ނޫނެވެ. އަދި އެ ކަންކަން އެ ގޮތަށް ކުރަމުންދަނީ ރަނގަޅު ނިޔަތުގައި ނޫންކަމާއި ނުވަތަ ގަސްތުގައި ކަމަށް އެ ޕާޓީއިން ދެކޭއިރު، ސަރުކާރު ހަމަ މަގަށް އަޅުވައި، ޖަވާބުދާރީ ކުރުވަން މަސައްކަތް ކުރުމަކީ، ޑިމޮކްރެޓްސްއިން ބުނި ގޮތުގައި ސިޔާސީ ޕާޓިތަކާއި ރައްޔިތުންގެ ޒިންމާއެކެވެ.
"ދަ ޑިމޮކްރެޓްސް ދެމިއޮތް މަގުސަދާއި އަދި އެކަމަށް މި ޕާޓީން ކުރަމުންދާ މަސައްކަތް ކާމިޔާބުކޮށް ހާސިލުކުރުމަށްޓަކައި މިހާރު މި އޮތް ސަރުކާރު ހަމަ މަގަށް އަޅުވައި ޒިންމާދާރު ކުރުވުމުގެ މަސައްކަތް އިތުރަށް ފުޅާކުރުމުގެ ގޮތުން، މި މަސައްކަތް ކުރުމަށް އެއްބަސްވާ ހުރިހާ ސިޔާސީ ޕާޓީތަކާއި ޖަމިއްޔާ ޖަމާއަތްތަކާ އެކު އެއްބަސްވެވޭ ހަމަތަކެއްގެ މަތިން މަސައްކަތް ކުރުމަށް ދަ ޑިމޮކްރެޓްސް އިގުރާރުވަމެވެ،" އެ ގަރާރުގައިވެ އެވެ.
ގުޅުންހުރި ކަމެއް - ގާނޫނުއަސާސީއަށް މިފަހުން ގެނައި އިސްލާހަކާ އެކު، މަޖިލިސް މެންބަރަކު އޭނާ ނިސްބަތްވާ ޕާޓީން ވަކިވެއްޖެ ނަމަ، ނުވަތަ ޕާޓީން ކަނޑާލައިގެން އެހެން ޕާޓީއަކަށް ސޮއިކޮށްފި ނަމަ، މެންބަރުކަމުގެ މަގާމު ގެއްލޭނެ އެވެ.
އެ އިސްލާހާ ގުޅިގެން އިދިކޮޅު އެމްޑީޕީއިން 10 ޑިސެމްބަރުގައި ބޭއްވި ގައުމީ މަޖިލީހުގައި އެހެން ސިޔާސީ ޕާޓީތަކާ އެކު މަސައްކަތް ކުރުމާއި އިތުރު ގިނަ ކަންކަން ހިމެނޭ ގަރާރެއް ވަނީ ފާާސްކޮށްފަ އެވެ.
އެ ގަރާރުގައި ހިމެނޭ ބައެއް ކަންތައްތަކަކީ:
-
1-
އިސްލާހާ ގުޅިގެން ގޮނޑި ގެއްލުވާލާ މެންބަރުން ބައި-އިލެކްޝަންގައި ވާދަ ކުރާ ނަމަ، އޭނާއަށް ތާއީދުކޮށް އެމްޑީޕީން ކެމްޕެއިންކޮށްދިނުން
-
2-
އެމްޑިޕީން އިސްނަގައިގެން ސިޔާސީ އެހެން ޕާޓީތަކަށާއި މަދަނީ ޖަމިއްޔާތަކަށާއި ފަންނީ ދާއިރާތަކުގެ ބޭފުޅުންނަށް މިކަމުގައި އެކުގައި މަސައްކަތް ކުރަން ދައުވަތު ދިނުން
-
3-
އެ ދޭ ދައުވަތު ގަބޫލުކުރާ ފަރާތްތަކާ އެކު، އަދި އެމްޑީޕީން ވަކިންވިޔަސް މުޅި ރާއްޖޭގައި މި ހަރަކާތް ފުޅާކޮށް އެކި ކަންކޮޅުތަކުގައި އިހުތިޖާޖުތައް ރާވައި ސިޔާސީ ހަރަކާތްތައް ހިންގަމުން ގެންދިޔުން
-
4-
މުޅި ރާއްޖޭގެ އެކި ކަންކޮޅުތަކުގައި އިހުތިޖާޖުކުރުމުގެ ގޮތުން ސިޔާސީ ހަރަކާތްތައް ހިންގަމުން ގެންދިއުން
ކޮމެންޓް