އެމްއެންޑީއެފްގެ މެރިޓައިމް އޮޕަރޭޝަންތައް ވަރުގަދަކުރަން ޖަޕާނުގެ އެހީ

 މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ކޯސްޓްގާޑުގެ މެރިޓައިމް ސާޗް އެންޑް ރެސްކިއު އޮޕަރޭޝަންތައް އިތުރަށް ހަރުދަނާ ކުރުމަށް ބޭނުންވާ މުހިއްމު ސާމާނު ޖަޕާނުން ރާއްޖެ އަށް ހަދިޔާކޮށްފި އެވެ.

ވީ ކިހިނެއް؟ - މިއަދު ބޭއްވި ރަސްމިއްޔާތެއްގައި ޖަޕާނު ސަރުކާރުގެ ފަރާތުން މިތަކެތި ހަދިޔާކޮށްދެއްވީ އެ ގައުމުން ރާއްޖެ އަށް ކަނޑައަޅާފައި ހުންނަވާ ސަފީރު ޓަކޭޗީ މިޑޯރީ އެވެ. ޑިފެންސް މިނިސްޓްރީގެ ފަރާތުން މި ތަކެއްޗާ ހަވާލުވެ ލެއްވީ މިނިސްޓަރު މުހައްމަދު ގައްސާން މައުމޫން އެވެ.

ތަފްސީލް - އެމްއެންޑީއެފް އިން ބުނީ ޖަޕާނުން ހަދިޔާކުރި ތަކެއްޗަކީ ކަނޑުމަތީގެ ސަލާމަތާއި ރައްކާތެރިކަން ކަށަވަރުކޮށް ކަނޑުމަތީގެ ހާދިސާތަކުގައި މީހުންގެ ފުރާނައާއި މުދާ ރައްކާތެރިކުރުމަށް ކުރާ މަސައްކަތް ހަރުދަނާކުރުމަށް ލިބުނު އެހީއެއް ކަމަށެވެ.

މިއަދުގެ ރަސްމިއްޔާތުގައި ޖަޕާނު ސަފީރު ވަނީ ރާއްޖޭގެ މެރިޓައިމް ގާބިލުކަން ވަރުގަދަކުރުމަށް ޖަޕާނުންދޭ އެއްބާރުލުން އަބަދު ވެސް ދޭނެ ކަމުގެ ޔަގީންކަން އަރުވައިފަ އެވެ. މީގެ އިތުރުން ސަރަހައްދީ ސަލާމަތާއި ރައްކާތެރިކަން ކަށަވަރު ކުރުމަށް ގުޅިގެން މަސައްކަތް ކުރުމުގެ މުހިއްމުކަން ފާހަގަ ކުރެއްވި އެވެ.

ޑިފެންސް މިނިސްްޓަރު ގައްސާނު ވިދާޅުވީ ޖަޕާނުން ހަދިޔާކުރި ސާމާނާ އެކު، ކަނޑުމަތީގެ ކުއްލި ހާލަތްތަކުގައި އެމްއެންޑީއެފް ކޯސްޓްގާޑުގެ ގާބިލުކަން އިތުރުވާނެ ކަމަށެވެ.

ފާހަގަ ކުރެވޭ - މި އެހީގެ ސަބަބުން އެމްއެންޑީއެފްގެ ސާޗް އެންޑް ރެސްކިއު އޮޕަރޭޝަންތައް ހަރުދަނާވެ، ރާއްޖޭގެ ކަނޑުގެ ސަރަހައްދުން ދަތުރުކުރާ އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށް ކުރާ މަސައްކަތް ވެސް ވަރުގަދަވާނެ ކަމަށް އެމްއެންޑީއެފް އިން ބުންޏެވެ.