އަލިފާނުގެ މައްސަލާގައި ދައުރުން ބޭރު ޖަލްސާއެއް ބާއްވަން އެމްޑީޕީން އެދެނީ

މިދިޔަ ބުރާސްފަތި ދުވަހު ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ އަނދައި ހުލިވި މައްސަލާގައި، ރައްޔިތުންގެ މަޖިލީހުގެ ދައުރުން ބޭރު ޖަލްސާއެއް ބާއްވައިދިނުމަށް އެދޭނެ ކަމަށް އިދިކޮޅު އެމްޑީޕީން މިއަދު ބުނެފި އެވެ.

ވީ ކިިހިނެއް؟ - ބުރާސްފަތި ދުވަހު ހެނދުނު ހައުސިން މިނިސްޓްރީގައި ހިފި އަލިފާންގަނޑު މުޅިން ކޮންޓްރޯލް ކުރެވުނީ ހަ ގަޑިއިރެއްހާ އިރު ފަހުން އެ ދުވަހު މެންދުރުގެ ވަގުތެއްގަ އެވެ. އޭރު ހައުސިން މިނިސްޓްރީގެ އިތުރަށް ކޮންސްޓްރަކްޝަން މިނިސްޓްރީއާއި ކުރިމަތީގައި ހުންނަ އެންވަޔަރަމަންޓް މިނިސްޓްރީ ހިންގާ ގްރީން ބިލްޑިން ވެސް އަނދައި ހުލިވި އެވެ.  

އެ މައްސަލާގައި ހުރި ކަންބޮޑުވުންތައް ހިއްސާކުރުމަށް އެމްޑީޕީން އެ ޕާޓީގެ އޮފީހުގައި މިއަދު ހެނދުނު ނޫސްވެރިންގެ ބައްދަލުވުމެއް ބޭއްވި އެވެ.

ބުނީ ކީކޭ؟ - އެމްޑީޕީން ބޭއްވި ބައްދަލުވުމުގައި އެ ޕާޓީގެ ޕާލިމެންޓްރީ ގްރޫޕްގެ ލީޑަރު، ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވީ އަލިފާނުގެ މައްސަލަގާއި ރައްޔިތުންގެ ގިނަ ކަންބޮޑުވުންތަކެއް ހުރުމުން ދައުރުން ބޭރުގައި ޖަލްސާއެއް ބާއްވައިދިނުމަށް އެދޭނެ ކަމަށެވެ.

"މަޖިލީހުގެ ގަވާއިދު ބަދަލުކޮށްފައި އޮތުމުން 31 މެންބަރުންގެ ސޮއި އެބަ ބޭނުންވޭ ހާއްސަ ޖަލްސާއެއް ބާއްވަން. އަޅުގަނޑުމެން އެމްޑީޕީއަށް އެކަނި އެ އަދަދު ހަމައެއް ނުކުރެވޭނެ. އެހެންވެ، ޕީއެންސީގެ ވެސް އެހީތެރިކަމަށް މި އެދެނީ. އެ ކަމަށް އެދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއަށް އަޅުގަނޑުމެންގެ ޕާލިމެންޓްރީ ގްރޫޕުން ސިޓީއެއް ފޮނުވާނަން،" ނާޒިލް ވިދާޅުވި އެވެ.

އެނގުން މުހިންމު - މި މަޖިލީހުގައި 93 މެންބަރުން ތިއްބަވާއިރު، އެމްޑީޕީ ތަމްސީލްކުރައްވަނީ އެންމެ 12 މެންބަރުންނެވެ. މަޖިލީހުގެ ބޮޑު މެޖޯރިޓީއެއް އޮތީ ވެރިކަންކުރާ ޕީއެންސީއަށެވެ. ޕީއެންސީގެ 75 މެންބަރުން މަޖިލީހުގައި ތިއްބަވަ އެވެ.

ފާހަގަކޮށްލެވޭ - މި މައްސަލާގައި ޖިނާއީ ތަހުގީގެއް ކޮށްދިނުމަށް ފުލުހަށް ހުށަހަޅާފައިވާނެ ކަމަށް ވެސް އެމްޑީޕީން މިއަދު ބުންޏެވެ. އަދި އިހުމާލުގެ ގިނަ ކަންކަން ފާހަގަވާތީ ވަކި މައްސަލައެއް ނެޝަނަލް އިންޓެގްރިޓީ ކޮމިޝަން (އެންއައިސީ) އަށް ހުށަހަޅާނެ ކަމަށް ވެސް އެ ޕާޓީން ބުންޏެވެ.