'ސިހުރު'ގައި ބަޔަކު ބަލިވެގެން ކެލައަށް ފުލުހުން އަރާ ފާސްކުރަން ފަށައިފި

ސިހުރުގެ ސަބަބުން ހއ. ކެލާގައި ބަޔަކު ބަލިވިކަމުގެ ތުހުމަތުގައި ގިނަ އަދަދެއްގެ ފުލުހުން މިއަދު އެ ރަށަށް އަރާ ގެތައް ފާސްކޮށް، ބަޔަކު ފުލުހުންގެ ބެލުމުގެ ދަށަށް ގެންގޮސްފި އެވެ.

ވީ ކިހިނެއް؟- އެނގިފައިވާ ގޮތުގައި ކެލައަށް މިއަދު ދިޔައީ ހއ. ދިއްދޫގައި ތިބޭ ފުލުހުންނެވެ. ގާތްގަނޑަކަށް ފަންސާހަކަށް ފުލުހުން އެ ރަށަށް އަރާ ގެތައް ފާސްކުރަން ފެށީ ކަމަށް ރަށު ކައުންސިލުން ބުނެ އެވެ.

"ހުރިހާ ގެއަކަށް އެއް ވަގުތެއްގައި ފުލުހުން ވަނީ. އެ ގެތަކުން އެކި ފާޑުފާޑުގެ ފޮތްތަކާއި ބައެއް މީހުން ވެސް ފުލުހުންގެ ބެލުމުގެ ދަށަށް ގެންދިޔަ،" ކެލާ ކައުންސިލްގެ މެމްބަރަކު ވިދާޅުވި އެވެ.

އޭނާ ވިދާޅުވި ގޮތުގައި ފުލުހުން އެ ރަށަށް ދިޔައީ، މީގެ ދެ ދުވަސް ކުރިން ތިން ހަތަރު މީހަކު ވަރަށް ބޮޑަށް ބަލިވެ، ރުގުޔާކުރުމުން، ބަލީގެ އަސްލަކީ ސިހުރު ކަމަށް ތުހުމަތުވުމުންނެވެ.

ކެލައިން ވާހަކަ ދެއްކި ބައެއް މީހުން ބުނާގޮތުގައި ވަރަށް ކުރިއްސުރެ އެ ރަށުގައި ސިހުރުވެރިންގެ އުނދަގޫ ބޮޑެވެ. ހާއްސަކޮށް ސްކޫލްގެ ބޮޑެތިއިމްތިހާނު އޮންނަ ދުވަސްވަރު ސްކޫލު ކުދިން އާދަޔާހިލާފަށް ބަލިވުމާއި އޭގެ ފަހުން ވެސް، އެކި ދުވަސްވަރު ބަލިގަނޑު ހިލިގަންނަ ކަމަށް އެ މީހުން ބުނެ އެވެ. ބައެއް މީހުން ސިހުރުގައި ވޭންދެނިވި ގޮތަކަށް ފުރާނަ ގޮސްފައިވާ ކަމަށް ވެސް ބައެއް މީހުން ގަބޫލުކުރެ އެވެ.

އެނގިފައިވާ ގޮތުގައި ކެލާގެ ބައެއް މީހުން ތުުހުމަތުކުރާ ނުވަވަރަކަށް ސިހުރުވެރިން އެރަށުގައި އުޅެ އެވެ. އެމީހުންނާ މެދު ކުރިއްސުރެ ޝައްކުކުރާ ކަމަށް ވެސް، ބައެއް މީހުން 'ދައުރު'އަށް ކިޔައިދިނެވެ.

"އަޅުގަނޑުމެންގެ މުޅި އާއިލާ ވެސް އެކަން ތަހައްމަލު ކޮށްފި. މަދު އާއިލާއެއް ފިޔަވައި، ހުރިހާ ގެއެއްގައި ވެސް އުޅޭނެ ސިހުރުގެ ކަންތައްގަނޑު ތަހައްމަލު ކުރާ އެކެއް ނޫނީ ދެ މީހުން،" ކެލައިން ވާހަކަ ދެއްކި މީހަކު ބުންޏެވެ.

"މުޅި ރަށް މި ބަލިމަޑުކަމުގައި އުޅޭތާ އެތައް އަހަރެއް ވެއްޖެ މިހާރު. ހައްލެއް ނުލިބުނު ކަމެއް މިއީ."