ޔާމީން މުއިއްޒަށް: ރައްޔިތުންގެ ފައިސާއަށް ވީ ގޮތް ބުނެދެއްވާ

ސަރުކާރަށް މިވީ އަހަރު ދުވަހުގެ ތެރޭގައި ރަށްރަށުގައި ތަރައްގީގެ އެއްވެސް މަޝްރޫއެއް ނުހިންގައި، ރައްޔިތުންގެ ފައިސާ ހުރީ 'ފޮރުވާފައި' ކަމަށާއި އެހެންވެ، އެ ފައިސާއަށް ވީގޮތް ބުނެދެއްވުމަށް، ރައީސް ޑރ. މުހައްމަދު މުއިއްޒުގެ ކިބައިން ކުރީގެ ރައީސް އަބްދުﷲ ޔާމީން އެދިވަޑައިގެންފި އެވެ.

ވީ ކިހިނެއް؟- ރިޔާސީ އިންތިހާބަށް ފަހު ސިޔާސީ ހަތުރުންނަށް ވެ، އޭގެ ފަހުން ޔާމީން އުފެއްދެވި ޕާޓީ، ޕީއެންއެފްއަށް އަހަރެއް ފުރުން ފާހަގަ ކުރުމަށް މިއަދު އެ ޕާޓީގެ ޖަގަހައިގައި ބޭއްވި ޖަލްސާގައި ޔާމީން ވަނީ ރައީސް މުއިއްޒަށް ވަރަށް ބޮޑަށް ފާޑު ވިދާޅުވެފަ އެވެ. އަދި އެ މަނިކުފާނުގެ ނަޒާހާތްތެރިކަމާ މެދު ވެސް ޔާމީން ސުވާލު އުފެއްދެވި އެވެ.

އެހެން ރޭރެއާ ހިލާފަށް، މިރޭގެ ޖަލްސާގައި ޔާމީން މާދިގުކޮށެއް ވާހަކައެއް ނުދައްކަވަ އެވެ. ތަކުރާރުކޮށް ވިދާޅުވީ ރައީސް އަދި ސަރުކާރުގައި އައްސަވަން، އަދި ދަންނަވަން އޮތީ އެންމެ ވާހަކައެއް ކަމަށެވެ.

"މިހާރު ދައުލަތް ހިންގަވަން ތިޔަ ހުންނެވި ރައީސް އާއި ރައީސްގެ އަރިހުގައި އިސްކޮށް އާރުކާޓީގެ ގޮތުގައި ތިއްބެވި ބޭފުޅުން ރައްޔިތުންނަށް ކަށަވަރު ކޮށްދެއްވާ ތިޔަ ބޭފުޅުންގެ ކަރަޕްޝަންގެ މައްސަލައެއް ނެތް ކަމަށް،" ޔާމީން ވިދާޅުވި އެވެ.

"އަޅުގަނޑަށް މައްސަލައެއް ނެތް ރައީސް މުއިއްޒު ޖަވާބު ދެއްވިޔަސް. މަޖިލީހުގެ ރައީސް އަބްދުއްރަހީމް ނޫނީ ހީނާ ޖަވާބު ދެއްވިޔަސް. ދިވެހިންނަށް ތިޔަ ބޭފުޅުންގެ ނަޒާހާތްތެރިކަން ދައްކުވައިދޭންވީ ނޫންތޯ. މިއަކަށް ޖަވާބެއް ނުދެއްވޭނެ،"

ޖަލްސާގައި ޔާމީން އެންމެ ކަންބޮޑުވުން ފާޅުކުރެއްވީ، ގާނޫނުތަކަށް ބަދަލު ގެނެސް، ހުރިހާ ބާރެއް އަމިއްލަ މުށުތެރެއަށް ލެއްވުމަށް ރައީސް މަސައްކަތް ކުރައްވާ ކަމަށް ވިދާޅުވެ އެވެ. އެގޮތުން އެ މަނިކުފާނު ފާހަގަ ކުރެއްވި ކަންތައްތަކުގެ ތެރޭގައި:

އެކަމަށް ފާޑުވިދާޅުވެ ޔާމީން ވިދާޅުވީ އަނެއްކާ ވެސް ރާއްޖެ 30 އަހަރު ފަހަތަށް ހިނގައްޖެ ކަމަށެވެ.

"މީގެ 30 އަހަރު ކުރިން، އޭރު ހުންނަވާ ރައީސަކު މި ތަންތަނަށް މީހުން އައްޔަން ކުރައްވާނީ. ޑިމޮކްރަސީގެ މަގުގައި އަޅުގަނޑުމެން ކުރި ދިގު ޖިހާދު، އަދި އިސްލާހީ މަގުގައި ވަކާލާތު ކުރެއްވި ބޭފުޅުން މިއަދު އެ ތިބީ މަންމަންވެ، އަތާފައި ގުޑުވާ ނުލެވިފައި،" ޔާމީން ވިދާޅުވި އެވެ.

'ދާއިރާގައި ހިނގާ މަޝްރޫއު މެމްބަރަށް ވެސް ނޭނގޭ'

ސަރުކާރުގެ ނަޒާހާތްތެރިކަމާ މެދު ސުވާލު އުފައްދަވަމުން ޔާމީން ދެން ވިދާޅުވީ އަންނަ އަހަރަށް މަޖިލީހުން ބަޖެޓް ފާސްކޮށްފައިވާއިރު މާބޮޑު ތަފްސީލެއް، އެއިން އެނގެން ނެތުމެވެ.

ޔާމީން ވިދާޅުވި ގޮތުގައި:

"ރައްޔިތުން އަބަދުވެސް ކަންބޮޑުވާ ކަމެއް، ރައްޔިތުން އަބަދު ވެސް އެނގެން ބޭނުންވޭ ދައުލަތުގެ ފައިސާއަށް ވާނުވާ. ވިދާޅުވެ ދެއްވާ ދައުލަތުގެ ފައިސާއަށް ވެފައިވާ ގޮތް. ވިދާޅުވެ ދެއްވާ އޭސީސީގައި ހުރި މައްސަލަތައް ނުހިނގައިގެން މިއުޅެނީ ކީއްވެގެންކަން. އޭރުން ރައްޔިތުން ގޮތް ނިންމާނެ،" ކޮރަޕްޝަނުގެ މައްސަލައިގައި ހުކުމް ތަންފީޒު ކުރައްވަމުން ގެންދަވާ ޔާމީން ވިދާޅުވި އެވެ.

އެ މަނިކުފާނު ވިދާޅުވި ގޮތުގައި:

ޔާމީން ވިދާޅުވީ ސަރުކާރުގައި ފައިސާ އާއި ނުފޫޒު އޮތީމާ "މަޖިލީހުގެ މެޖޯރިޓީ ހޯދައި، ގާނޫނު އަސާސީއަށް ބޭނުންވާ ބަދަލުތައް ގެނެސް، މުއައްސަސާތަކަށް އަތް ބޭނިދާނެ" ކަމަށެވެ. އެކަމަކު ރައީސަށް ވުރެ، ރާއްޖެ އާއި ރައްޔިތުންގެ ހައްގުތައް މާބޮޑު ކަމަށް ވިދާޅުވި އެވެ.

"ރައީސަކީ ރައްޔިތުންގެ ހާދިމެއް. އޭގެ ބަދަލުގައި މިހާރު މި ފެންނަނީ އެ ބޭފުޅާއަށް ފަހިވާ ގޮތަށް ގާނޫނުތަކަށް ބޭނުންވާ ބަދަލުތައް ގެންނަތަން." ޔާމީން ވިދާޅުވި އެވެ.