މީޑިއާ ބިލް މަޖިލީހުން ބޭރުކުރާނަން؛ އޭގައި އޮތީ އަޅުގަނޑުގެ ސިޔާސަތެއް ނޫން: ރައީސް

މީޑިއާގެ މިނިވަންކަން ގެއްލޭ ގޮތަށް އެމްއެމްސީ އާއި ބްރޯޑްކާސްޓިން ކޮމިޝަން އެއްކޮށްލުމަށް މަޖިލިހަށް އަމިއްލަ މެންބަރަކު މިހާރު ހުށަހަޅާފައިވާ ބިލުގައި އޮތީ އެ މަނިކުފާނުގެ ސިޔާސަތެއް ނޫން ކަމަށާއި އެ ބިލަށް ޕީއެންސީގެ ޕާލިމަންޓްރީ ގްރޫޕުން ވޯޓް ނުދޭނޭ ކަމަށް ރައީސް މުހައްމަދު މުއިއްޒު މިރޭ ވިދާޅުވެއްޖެ އެވެ.

ވީ ކިހިނެއް؟ - އެ ބިލާ ގުޅޭ ގޮތުން ރައީސް މިރޭ އެންމެ ފުރަތަމަ ވާހަކަ ދެއްކެވީ، އެމަނިކުފާނުގެ ސަރުކާރަށް އެއް އަހަރު ފުރުމުގެ މުނާސަބަތުގައި މިރޭ ސޯޝަލް ސެންޓަރުގައި ބޭއްވި ޖަލްސާގަ އެވެ. އަދި އެ ޖަލްސާއަށް ފަހު ރައީސް ނިކުންނަވައި ސަޕޯޓަރުންނާ ސަލާމް ކުރައްވަމުން ވަޑައިގަތް ވަގުތު 'ދައުރު'ން، އެ ބިލު ބޭރު ކުރާނެތޯ އެހުމުން ރައީސް ވިދާޅުވީ، އެ ބިލް ބަލައިގަންނަން ޕީއެންސީގެ ޕާލިމަންޓްރީ ގުރޫޕުން ތާއީދު ނުކުރާނެ ކަމަށެވެ.

ބުނީ ކީކޭ؟- "އޭތި [މީޑިއާޔާ ގުޅޭ ބިލް] ބޭރު ކުރާނެ، ބޭރު ކުރާނެ..ޔާ ޔާ އޮފްކޯސް،" ބިލު ބޭރު ކުރާނެތޯ އެހުމުން އެ މަނިކުފާނު ވިދާޅުވި އެވެ.

"އެހެންނޫނީ ދެން ކީއްކުރަންތޯ އޭތި ދެކޮޅޭ ބުނެފައި އޭތި ބަލައިގަތީމަ ކޮންތާކަށް އެދިޔައި."

ރައީސްގެ ނިންމުމާއެކު، ނޫސްވެރިންގެ ޖަމިއްޔާ (އެމްޖޭއޭަ)އިން ވަނީ އެކަމަށް މަރުހަބާ ވެސް ކިޔާފަ އެވެ. އަދި ދިވެހި ނޫސްވެރިންގެ ނަމުގައި ރައީސްގެ އެ ނިންމުމަށް ވަނީ ޝުކުރު އަދާކޮށްފަ އެވެ. 

ގުޅުން ހުރި - އަމިއްލަ މެންބަރެއް ކަމަށްވާ، ތުޅާދޫ ދާއިރާގެ މެންބަރު އަބްދުލްހަންނާން އަބޫބަކު އެ ބިލު މިދިޔަ ހަފްތާގައި މަޖިލީހަށް ހުށަހެޅުމާއެކު، ނޫސްވެރިންނާއި އެމްޖޭއޭ އަދި މީޑިއާތަކުގެ އިތުރުން ސިޔާސީ ޕާޓީތަކުން ވެސް އަންނަނީ ކަންބޮޑުވުން ފާޅު ކުރަމުންނެެވެ. ކަންބޮޑުވުން ފާޅުކުރަން ފެށުމުން ރައީސް މިދިޔަ ހަފްތާގައި އަޒަރުބައިޖާންގައި ހުންނަވައި، އެކްސްގައި ކުރެއްވި ޕޯސްޓެއްގައި ވިދާޅުވީ މީޑިއާތައް ކޮންޓްރޯލް ކުރުމަކީ އެ މަނިކުފާނުގެ ހަމައެއް ނޫން ކަމަށެވެ.

މިރޭގެ ޖަލްސާގައި ވެސް ރައީސް ވަނީ އެ ވާހަކަ ތަކުރާރު ކުރައްވާފަ އެވެ. އޭގެ އިތުރުން ރައީސް ވިދާޅުވީ:

ފަސް މަންޒަރު - މަޖިލީހަށް ހުށަހަޅާފައިވާ ބިލުގައިވާ ގޮތުން އެ ބިލު ތަސްދީގު ކުރުމާއެކު، މީޑީއާތައް ރެގިއުލޭޓް ކުރުމަށް މިހާރު އޮތް އެމްއެމްސީ އާއި ބްރޯޑްކާސްޓިން ކޮމިޝަން އުވުނީ އެވެ. އަދި މުއްދަތެއް ނެތް ގޮތަށް އޮތް އިންތިގާލީ މަރުހަލާއަކަށް ފަހު، އަލަށް އުފައްދާ މީޑިއާ ކޮމިޝަނުން ނޫސްވެރިންނާއި މީޑިއާތައް ބޮޑެތި އަދަދުތަކުން ޖޫރިމަނާ ކުރުމުގެ ބާރު ދީފައިވެ އެވެ. އެ ކޮމިޝަންގެ މެޖޯރިޓީ ވެސް ލިބެނީ ސަރުކާރަށެވެ. އެގޮތުން، އެ ކޮމިޝަން އެކުލެވިގެންވަނީ، ބިލުގައިވާ ގޮތުން: