މިފްކޯ އިން ޅ. ފެލިވަރުގައި ބަންދުކޮށްގެން ވިއްކާ މަސްދަޅުތަކެއް. ( ފައިލް ފޮޓޯ/މިފްކޯ)
ކުރިއަށް އޮތް ރޯދަ މަހު ކޮންމެ ގޭބީސީއަކަށް މަސްދަޅު ކޭހެއް ދޭނަން: ރައީސް
ކުރިއަށް އޮތް ރޯދަ މަހު ކާޑުގެ ބަދަލުގައި ކޮންމެ ގޭބީސީއަކަށް މަސް ދަޅު ކޭހެއް ހިލޭ ދެއްވާނެ ކަމަށް ރައީސް މުހައްމަދު މުއިއްޒު މިރޭ ވިދާޅުވެއްޖެ އެވެ.
ވީ ކިހިނެއް؟ - މީގެ އެއް އަހަރު ކުރިން، 17 ނޮވެމްބަރު 2023ގައި ވެރިކަމަށް ވަޑައިގެންނެވި ރައީސް މުއިއްޒު މިކަން އިއުލާން ކުރެއްވީ، ސަރުކާރަށް އެއް އަހަރު ފުރުމުގެ މުނާސަބަތުގައި ޝޯޝަލް ސެސްޓަރުގައި ބޭއްވި ހާއްސަ ރަސްމިއްޔާތުގަ އެވެ.
ތަފްސީލު - އެ ރަސްމިއްޔާތުގައި އެކަން އިއުލާން ކުރެއްވުމުގެ ކުރިން ރައީސް ރައްޔިތުންނަށް ހަނދާން އާކޮށްދެއްވީ، ނިމިދިޔަ ރޯދަ މަހުގައ ސަރުކާރުން ރައްޔިތުންނަށް ދިން ލުއިތަކާއި އެހީތަކާ ގުޅޭ ގޮތުންނެވެ. އެގޮތުން ރައީސް ވިދާޅުވީ:
-
ކަރަންޓު ބިލާއި ފެންބިލުތަކަށް 142 މިލިއަން ރުފިޔާގެ ޑިސްކައުންޓެއް ދީފައިވޭ
-
82،000 ގޭބީސީއަކަށް 1.6 ބިލިއަން ކިލޯގެ ކާޑުގެ ބާވަތްތައް ދީފައިވޭ
"މިއީ ކުރިން [ކުރީގެ ސަރުކާރުތަކުގައި] ނުކުރާ ކަންތައްތައް. ކުރިއަށް އޮތް ރަމަޟާން މަހު، އަޅުގަނޑު ދަންނަވައިފިން އެސްޓީއޯގެ އެމްޑީއަށް އަޅުގަނޑު ދަންނަވައިފިން ކާޑުގެ ބަދަލުގައި މަސްދަޅު ކޭސް ކޮންމެ ގެއަކަށް ދޭން،" ރައީސް ވިދާޅުވި އެވެ.
އޭގެ އިތުރުންވެސް މިދިޔަ އެއް އަހަރު ތެރޭ ރައްޔިތުންނަށް ދިން ލުއިތަކާ ގުޅޭ ގޮތުން ވެސް ރައީސް ވާހަކަ ދެއްކެވި އެވެ. އޭގެ ތެރޭގައި ހިމެނެނީ:
-
މި ސަރުކާރުގައި 14 ކުއްޖަކު ބޯންމެރޯ ޓްރާންސްޕްލާންޓު ފަރުވާއަށް ދައުލަތުގެ ހަރަދުގައި ފުރުވުން؛ މިދިޔަ އެމްޑީޕީ ސަރުކާރުގެ ފަސް އަހަރު އެ ހަރަދު ދީފައި ވަނީ، އެންމެ ކުއްޖަކަށް ކަމަށް ފާހަގަކުރެއްވި
-
ރަށްރަށުގައި ހުރި ހައުސިން ޔުނިޓްގެ އަގުތައް 5،000ރ. އިން 3،000ރ.އަށް ކުޑަ ކުރި
-
ހިޔާ ފްލެޓްގެ ފިނިޝިން މަސައްކަތައް ދިޔަ ހަރަދު އެއީ، އެވްރެޖްކޮށް 200،000ރ. ކަމަށް ބަލައި ކުލިން އެ ބައި އުނިކޮށްދީފައިވޭ
-
ހުޅުމާލެ ފޭސް 1ގެ ފްލެޓްތަކުގެ މަހު ކުލި ވެސް ވަނީ ކުޑަކޮށްދީފައި
މީގެ އިތުރަށް ރައީސް ވިދާޅުވީ މުޅި ރާއްޖޭގައި ހުރި އިޖްތިމާއީ ބޯހިޔާވަހިކަމުގެ މަޝްރޫއުތަކަށް އަރާފައިވާ 77 މިލިއަން ރުފިޔާގެ ޖޫރިމަނާ މާފްކޮށްދީފައިވާ ކަމަށެވެ.
ކޮމެންޓް (4)
އެމް.ޕީ
ސިކުނޑި
ޑޮލަރޭ
ފައިސާ