ގެއެއްގައި ރޯވި އަލިފާންގަނޑެއް ނިންމަން ސިފައިން މަސައްކަތްކުރަނީ: މިފަދަ ކޮންމެ ހާލަތެއްގައި 911 ނަމްބަރަށް ގުޅޭނެ ކަމަށް ސަރުކާރުން ބުނޭ (ދައުރު ފޮޓޯ/ އަބްދުﷲ އަނޫފް ޖުނައިދު)
ކުއްލި ހާލަތުގައި ގުޅާނެ ނަމްބަރު ތައާރަފްކޮށްފި، ނަމްބަރަކީ 911
ދިމާވާ ކުއްލި ހާލަތްތަކުގައި ގުޅޭނެ ނަމްބަރެއްގެ ގޮތުގައި 911 ނަމްބަރު ތައާރަފްކޮށް، ހިދުމަތް މިއަދު ފަށައިފި އެވެ.
ވީ ކިހިނެއް؟- ކުއްލި ހާލަތްތަކުގައި އެއް ނަމްބަރަކުން ގުޅޭނެ ނަންބަރެއް ތައާރަފް ކުރައްވާނެ ކަމަށް، ރައީސް މުހައްމަދު މުއިއްޒު ވަނީ މި އަހަރުގެ ކުރީކޮޅު ވިދާޅުވެފަ އެވެ. އެގޮތަށް ރައީސް ނިންމެވީ އުނދަގޫ ހާލަތްތަކުގައި ސަލާމަތާއި ރައްކާތެރިކަން ހޯދަން ފަސޭހައިން ގުޅޭނެ އެއް ނަމްބަރެއް އޮތުން މުހިއްމުކަން ފާހަގަކޮށެވެ.
ހޯމްލޭންޑް މިނިސްޓަރު އަލީ އިހުސާން މިރޭ އެކްސްގައި ވިދާޅުވީ ނެޝަނަލް އިމަޖެންސީ ކޯލް ސެންޓަރުގެ ގޮތުގައި '911'ގެ ހިދުމަތް މިހާރު ފަށައިފި ކަމަށެވެ. މި ހިދުމަތް ފަށަން އެ މިނިސްޓްރީ އާއި ފުލުހުންނާއި ސިފައިން އަދި ހެލްތު މިނިސްޓްރީން ބުރަކޮށް މަސައްކަތް ކުރި ކަމަށް އޭނާ ވިދާޅުވި އެވެ.
އަލިފާނުގެ ހާދިސާތަކާއި ކަނޑުމަތީގެ ނުރައްކާތެރި ހާދިސާތަކުގައި ގުޅަން ފުލުހުންނާއި ސިފައިންގެ ވަކި ނަމްބަރުތަކެއް ހުރެ އެވެ. އެކަމަކު ސިއްހީ އިމަޖެންސީތަކަށް ވަކި ނަމްބަރެއް ނޯންނައިރު، ކުއްލި ހާލަތްތަކުގައި އެކި ނަމްބަރުތަކަށް ގުޅަން ޖެހުމުން އޭގެ ތަކުލީފު އާއްމުންނަށް ފޯރަ އެވެ. އެހެންވެ ސަރުކާރުން ނިންމީ ކުއްލި ހުރިހާ ހާލަތްތަކެއްގައި ވެސް ގުޅަން އެއް ނަމްބަރެއް ހާއްސަ ކުރުމަށެވެ.
ސަރުކާރުން ބުނެފައިވާ ގޮތުގައި ނުރައްކާތެރި ކޮންމެ ހާލަތެއްގައި ވެސް އެ ނަމްބަރަށް ގުޅުމުން، އެކަމާ ގުޅޭ އިދާރާއިން އެކަމަށް ހާޒިރުވާނެ އެވެ.
ކޮމެންޓް