މަސްތުވާތަކެތީގެ ވިޔަފާރިކުރަމުން ދިޔަ 65 އަހަރުގެ މީހަކު ހައްޔަރުކޮށްފި

މަސްތުވާތަކެތީ ވިޔަފާރި ކުރާ އުމުރުން 65 އަހަރުގެ ފިރިހެނަކު ފުލުހުން ހައްޔަރުކޮށްފި އެވެ.

ވީ ކިހިނެއް؟- ރ. އިންނަމާދުއަށް އުފަން، މުހައްމަދު ސަލީމް ހައްޔަރުކުރީ މިދިޔަ އަންގާރަ ދުވަހު ހިޔާ ފްލެޓް ޓަވަރަކުންނެވެ. ފުލުހުން ބުނިގޮތުގައި އޭނާގެ އަތުންނާއި ދިރިއުޅޭ އެޕާޓްމެންޓުން ވެސް މަސްތުވާތަކެތި ކަމަށް ބެލެވޭ ގިނަ ޕެކެޓްތަކެއް ވަނީ ފެނިފަ އެވެ.

ފުލުހުން ތުހުމަތުކުރާ ގޮތުގައި ސަލީމަކީ ވަރަށް ކުރިއްސުރެ މަސްތުވާތަކެތީގެ ވިޔަފާރީގައި އުޅޭ މީހެކެވެ. އެގޮތުން މަސްތުވާތަކެތީގެ ބާވަތެއް ކަމަށްވާ، ޑައިމޯފިން ޑްރަގް ޓްރެފިކްކުރި މައްސަލައެއްގައި 2016ގައި އޭނާގެ މައްޗަށް ދައުވާކޮށް، އޭގެ ތިން އަހަރު ފަހުން ވަނީ އުމުރު ދުވަހަށް ޖަލަށް ހުކުމްކޮށްފަ އެވެ. އެކަމަކު 2021އިން ފެށިގެން އޭނާ ހުންނަނީ ގޭބަންދުގަ އެވެ.

"ގޭބަންދުގައި ހުރެގެން ވެސް އޭނާ މަސްތުވާތަކެތީގެ ވިޔަފާރިކުރޭ،" މިއަދު އޮތް ފުލުހުންގެ ނޫސްވެރިންގެ ބައްދަލުވުމުގައި ޑްރަގް އެންފޯސްމަންޓް ޑިޕާޓްމަންޓުގެ ހެޑް، ސުޕްރިޓެންޑެންޓް އޮފް ޕޮލިސް ނާހިދު ވިދާޅުވި އެވެ.

އޭނާ ވިދާޅުވީ ސަލީމް މަސްތުވާތަކެތި ޓްރެފިކްކުރި މައްސަލައެއް މިދިޔަ އަހަރު ވެސް ތަހުގީގުކުރި ކަމަށެވެ.

އޭނާ ގޭ ބަންދަށް ބަދަލުކުރި ސަބަބެއް ފުލުހުން ނުބުނެ އެވެ. އެކަމަކު ނާހިދު ވިދާޅުވީ މަސްތުވާތަކެތި ބޭނުންކުރާ ގިނަ ބަޔަކާ އެމީހާ ގުޅުން އޮންނާތީ ގޭ ބަންދުގައި ހުރެގެން ވެސް އޭނާއަށް އެ ވިޔަފާރި ހިންގޭ ކަމަށެވެ.