ރާއްޖޭގެ ޓޫރިޒަމަށް 50 އަހަރު ފާހަގަކުރުމަށް، ރާއްޖޭގެ އެންމެ ފުރަތަމަ ރިސޯޓު ކަމަށްވާ ކުރުނބާ މޯލްޑިވްސްގައި 3 އޮކްޓޯބަރު 2022 ވަނަ ދުވަހުގެ ރޭ ބޭއްވި 'ރަންޔޫބީލް ގާލާ' ގައި އެމްޔޫ މަނިކު ވާހަކަ ދައްކަވަނީ (ފޮޓޯ/ރައީސް އޮފީސް)
ރައީސްގެ އެޑްވައިޒަރު ހަލީލުގެ ކުންފުންޏާއި ޔުނިވާސަލް އިން ވެސް ޑޮލަރު މާރުކުރަން ދެކޮޅު
ރާއްޖޭގެ ބޭންކުތަކަށް ޑޮލަރު މާރުކުރަން މަޖުބޫރުކޮށް، މަރުކަޒީ ބޭންކް، އެމްއެމްއޭއިން އެކުލަވާލި އާ ގަވައިދަށް އަމަލު ނުކުރާނެކަން، ރައީސް މުހައްމަދު މުއިއްޒުގެ ޓޫރިޒަމް އެޑްވައިޒަރު މުހައްމަދު ހަލީލް، މެނޭޖިން ޑިރެކްޓަރުގެ މަގާމް ފުރުއްވާ ޕަލްސް ކުންފުންޏާއި ގިނަ ރިސޯޓުތަކެއް ހިންގާ ޔުނިވާސަލްއިިން އަންގައިފި އެވެ.
ވީ ކިހިނެއް؟- އެމްއެމްއޭގެ އާ ގަވައިދުގެ ދަށުން، ރިސޯޓަށް އަންނަ ކޮންމެ ޓޫރިސްޓެއްގެ ބޮލަށް 500 ޑޮލަރުގެ މަގުން ޑޮލަރު މާރުކުރަން މަޖުބޫރެވެ. އެކަމަކު އެ ގަވައިދަށް އަމަލު ނުކުރާނެ ކަމަށް ބައެއް ރިސޯޓުތަކުން ދަނީ ބުނަމުންނެވެ.
ޕަލްސް ކުންފުނީގެ ފަރާތުން ހަލީލް ސޮއިކުރައްވައި، އެމްއެމްއޭއަށް ފޮނުއްވި ސިޓީގައި ބުނިގޮތުގައި:
-
އާ ގަވައިދާ އެއްގޮތަށް، ކޮންމެ މީހެއްގެ ބޮލަށް 500 ޑޮލަރުގެ މަގުން ޑޮލަރު މާރުކުރުމަކީ އުނދަގޫ ކަމެއް. އަދި އެއީ އެންމެ ރަނގަޅު ނިންމުމެއް ކަމަށް ގަބޫލެއް ނުކުރެވޭ
-
ޑޮލަރުން ލިބޭ އާމްދަނީއަށް ވުރެ ބޮޑު އަދަދެއް، ކުންފުނީގެ ހަރަދުތަކަށް ދައްކަން ޖެހޭ. އެހެންވެ، ބޭރުގެ ބާޒާރުން ޑޮލަރު ގަތުމަށް ވެސް ބޮޑު ހަރަދެއް ކުރަން ޖެހޭ
-
ކުންފުންޏަށް ލިބޭ ޑޮލަރު ބޭނުންކުރަނީ މުވައްޒަފުންގެ މުސާރައަށާއި ލޯނު އަނބުރާ ދެއްކުމަށާއި ސަރުކާރަށް ދައްކަން ޖެހޭ ޓެކްސްތަކަށް
-
ސަރުކާރުގެ މި ނިންމުމުގެ ސަބަބުން ކުންފުންޏަށް ގެއްލުންވާނެ ކަމަށް. އަދި އެ ނިންމުން ބަދަލުކުރުމަށް އެމްއެމްއޭގައި އެދިފައިވާ ކަމަށް
ޕަލްސް ކުންފުނިން ރާއްޖޭގައި ހަތަރު ރިސޯޓެއް ހިންގަ އެވެ. އެއީ، ކަނޑިންމަ މޯލްޑިވްސް އާއި ނޯވާ މޯލްޑިވްސް އަދި ނޮޓިލަސް މޯލްޑިވްސްގެ އިތުރުން އެވަލަން މޯލްޑިވްސް އެވެ.
ރާއްޖޭގައި ގިނަ ރިސޯޓުތަކެއް ހިންގާ އެންމެ ބޮޑު އެއް ކުންފުނި ކަމަށްވާ ޔުނިވާސަލްއިން އެމްއެމްއޭއަށް ފޮނުވި ސިޓީގައި ވެސް މި ވާހަކަތައް ބަޔާންކޮށްފައިވެ އެވެ.
ކުންފުނީގެ ޗެއާމަން، މުހައްމަދު އުމަރު މަނިކު (އެމްޔޫ މަނިކު) ސޮއިކުރައްވާ ފޮނުއްވި ސިޓީގައި ބުނީ:
-
ކޮޓަރީގެ އަގަށް، ޓޫރިސްޓު މީހާ މަޑުކުރާ މުއްދަތަށް، އުމުރަކަށް ބެލުމެއް ނެތި ކޮންމެ މީހެއްގެ އަތުން 500 ޑޮލަރުގެ މަގުން މާރުކުރުމަކީ ހަމަޖެހޭ ނިންމުމެއް ނޫން ކަމަށް. އަދި އެކި މާކެޓްތަކަށް އަމާޒުކޮށްގެން ހިންގާ ރިސޯޓުތަކަށް ލިބޭނެ ގެއްލުމެއް ކަމަށް
-
މިސާލެއްގެ ގޮތުން، ބޮލަކަށް 250 ޑޮލަރުގެ މަގުން، ހަތަރު ދުވަހަށް އަންނަ ހަތަރު މީހުންގެ އާއިލާއަކުން އާމްދަނީގެ ގޮތުގައި ރިސޯޓަށް 1،000 ޑޮލަރު ލިބޭއިރު، 2،000 ޑޮލަރު މާރުކުރަން ޖެހުމަކީ ހަމަޖެހޭ ކަމެއް ނޫން
-
އެ ކުންފުނީގެ ހުރިހާ އެކައުންޓެއް ހުޅުވާފައި ހުރީ ރާއްޖޭގައި ކަމަށް
ޕަލްސްއެކޭ އެއްގޮތަށް ޔުނިވާސަލްއިން ވެސް އެދިފައިވަނީ ސަރުކާރުގެ މި ނިންމުމާ މެދު ދެ ވަނަ ވިސްނުމަކަށް ދިޔުމަށެވެ.
ޔުނިވާސަލްއިން ރާއްޖޭގައި އަށް ރިސޯޓެއް ހިންގަ އެވެ. އެއީ، ކުރުނބާ މޯލްޑިވްސް އާއި ވެލައްސަަރު މޯލްޑިވްސް އާއި ބަރޮސް މޯލްޑިވްސް އާއި ހުވަފެންފުށި މޯލްޑިވްސް އެވެ. އޭގެ އިތުރުން، ކުރަމަތި މޯލްޑިވްސް އާއި ކަނދޮޅު މޯލްޑިވްސް އާއި މިލައިދޫ މޯލްޑިވްސް އަދި ދިގަލި މޯލްޑިވްސް އެވެ.
އާ ގަވައިދުތަކާ އެއްގޮތަށް ޑޮލަރު މާރުކުރުމަކީ ކުރެވޭނެ ކަމެއް ނޫންކަން ފާހަގަކޮށް އެ ގަވައިދު އުވާލަން ރާއްޖޭގެ އެންމެ ބޮޑު އެއް ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު)ގެ ކުންފުނިތަކުން ވެސް ވަނީ ސަރުކާރުގައި އެދިފަ އެވެ.
ކޮމެންޓް (2)
ޢަބްދުﷲ
އެދުރު