އަގަސްޓު 20، 2023: ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ފަތުރުވެރިން. (ދައުރު ފޮޓޯ/ މުޒައްޔިން ނާޒިމް)
ޑޮލަރު މާރުކުރުމާ ގުޅޭ ކަންބޮޑުވުން އޮޅުންފިލުވަން ޓޫރިޒަމް ބޭފުޅުން ކޮމެޓީއަށް ގެންނަން އެދިއްޖެ
ބޭރު ފައިސާގެ މުއާމަލާތްތައް ކުރުމަށް މިފަހުން މަރުކަޒީ ބޭންކް، އެމްއެމްއޭއިން އެކުލަވާލި އާ ގަވައިދުތަކާ އެއްގޮތަށް ޑޮލަރު މާރުކުރުމާ ގުޅޭ ގޮތުން ޓޫރިޒަމް ދާއިރާގައި ހަރަކާތްތެރިވާ ފަރާތްތައް ރައްޔިތުންގެ މަޖިލީހުގެ އިގްތިސޯދީ ކޮމެޓީއަށް ގެންނަން ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ރޭ އެދިވަޑައިގެންފި އެވެ.
ވީ ކިހިނެއް؟ - އެކަމާ ގުޅޭ ގޮތުން އެ ދާއިރާގެ ފަރާތްތަކުގެ ކަންބޮޑުވުންތަކެއް ހުރިކަން ފާހަގަކުރައްވައި އެ ކަންބޮޑުވުންތައް އޮޅުން ފިލުވަން އެ ފަރާތްތައް އިގްތިސޯދީ ކޮމެޓީއަށް ހާޒިރުކޮށްދިނުމަށް އެދި މުހައްމަދު އިބްރާހީމް ވަނީ މަޖިލީހުގެ ރައީސް އަބްދުއްރަހީމް އަބްދުﷲއަށް އިއްޔެ ސިޓީއެއް ފޮނުއްވާފަ އެވެ.
ތަފްސީލް - އެ ސިޓީގައި މުހައްމަދު އިބްރާހީމް ވިދާޅުވީ ޑޮލަރު މާރުކުރުމުގެ އާ ގަވާއިދާ ގުޅޭ ގޮތުން މިހާތަނަށް ކަން ހިނގާފައިވާ ގޮތް ސާފުކުރުމަށާއި ޓޫރިޒަމް ސިނާއަތުގެ ކަންބޮޑުވުންތައް ދެނެގަންނަން އާންމުން ހުޅުވާލައިގެން އެ ފަރާތްތަކާ އެކު އިގްތިސޯދީ ކޮމެޓީގެ ބައްދަލުވުމެއް އިންތިޒާމްކޮށްދެއްވުމަށް އެދިވަޑައިގެންފަ އެވެ.
އޭގެ އިތުރުން އެ ސިޓީގައި ބަޔާންކޮށްފައިވަނީ:
-
ބޭންކަށް ޑޮލަރު މާރުކުރަން ލާޒިމްކޮސްފައިވާތީ ޓޫރިޒަމް ސިނާއަތުގައި އެކަމާ މެދު ކަންބޮޑުވުން އެބައޮތް
-
އެ ސިނާއަތުގައި އުޅޭ ފަރާތްތަކާއި އެމްއެމްއޭ އިން ބައްދަލުކޮށް، އެ ބައްދަލުވުމުގައި ހުށަހެޅި ކަންތައްތައް އެމްއެމްއޭ އިން ބަލައިގެންފައި ނުވާ ކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ހާމަކޮށްފައިވޭ
-
އާ ގަވާއިދުގެ ދަށުން އެމްއެމްއޭގައި ރަޖިސްޓްރީވާން ދިން ފުރަތަމަ މުއްދަތު (30 އޮކްޓޫބަރު)ގައި ޓޫރިޒަމް ސިނާއަތުގެ ގިނަ ފަރާތްތަކުން ރަޖިސްޓްރީވެފައި ނުވާ ކަމަށް މައުލޫމާތު ލިބޭ
-
އެ ގަވާއިދަށް އަމަލުކުރަން ދަތިވާ ކަމަށް ބުނެ 50އަށް ވުރެ ގިނަ ރިސޯޓް އޮޕަރޭޓަރުން މިހާތަނަށް އެމްއެމްއޭއަށް ސިޓީ ފޮނުވާފައިވާ ކަމަށް މައުލޫމާތު ލިބޭ
"ދެންނެވުނު ގަވާއިދަކީ ޓޫރިޒަމް ސިނާއަތުގެ ވިޔަފާރީގެ ހަގީގަތްތަކާ ދުރު، ދިވެހިރާއްޖޭގެ މި ވަގުތުގެ އިގްތިސޯދީ ހާލަތާ ނުބައްދަލު ގަވާއިދެއް ކަމަށާއި އަދި އޭގެ ސަބަބުން މާލީ ހާލަތަށް ކުރާނޭ ނޭދެވޭ އަސަރުތަކުގެ ވާހަކަތައް، ތަފުސީލާއި ހިސާބުތަކާ އެކު ބަޔާންކޮށްދީފައިވާ ކަމަށް ވެސް މައުލޫމާތު ލިބެ އެވެ،" މުހައްމަދު އިބްރާހީމްގެ ސިޓީގައި ވިދާޅުވެފައިވެ އެވެ.
އެ ސިޓީގައި ވިދާޅުވެފައިވަނީ:
-
ރާއްޖޭގެ އެންމެ ބޮޑު އެއް ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު)ގެ ކުންފުނިތަކުން އެ ގަވާއިދު އުވާލަން ސަރުކާރުގައި އެދިފައިވޭ
-
އެ ފަރާތްތަކަކީ ރާއްޖޭގެ ޓޫރިޒަމް މި ފެންވަރަށް ގެނައުމަށްޓަކައި ބޮޑެތި އިންވެސްޓްމަންޓުތަކެއްކޮށް ބުރަ މަސައްކަތް ކޮށްފައިވާ ތަޖުރިބާކާރު ފަރާތްތަކަށް ވާތީ އެފަދަ މުހިންމު މައްސަލައެއްގައި އެ ފަރާތްތަކުން ކަންބޮޑުވުން ހާމަކުރުމަކީ މަޖިލީހުން ނުބަލައި ދޫކޮށްލައިގެންވާނޭ ކަމެއެް ނޫން
ގުޅުން ހުރި - ޗަމްޕާ މުހައްމަދު މޫސާ ފޮނުއްވާފައިވާ ސިޓީގައި ވިދާޅުވެފައި ވަނީ އެމްއެމްއޭއިން މިފަހުން ގެޒެޓްކޮށް އަމަލުކުރަން ފަށާފައިވާ ބޭރު ފައިސާގެ މުއާމަލާތްތައް ކުރުމުގެ ގަވައިދަކީ ޓޫރިޒަމް ދާއިރާގެ ވިޔަފާރިތަކަށް ވަރަށް ބޮޑު ގޮންޖެހުމެއް އަދި ބޭއިންސާފެއް ކަމަށެވެ.
އެ ގަވައިދުގައި ކަނޑައަޅާފައިވާ ގޮތަށް ކޮންމެ ރިސޯޓަކަށް އަންނަ ޓޫރިސްޓެއްގެ ބޮލަށް 500 ޑޮލަރު މާރުކުރުމަކީ ކުރެވޭނެ ކަމެއް ނޫން ކަމަށް ވެސް ވަނީ ފާހަގަކުރައްވާފަ އެވެ. އެކަމުގެ ސަބަބުން ރިސޯޓްތަކަށް ލިބޭ އާމްދަނީއަށް ވުރެ އިތުރަށް ހަރަދުކުރަން ޖެހި، ރިސޯޓްތަކަށް މާލީ ގެއްލުމާ ކުރިމަތިލާން ޖެހިދާނެ ކަމަށް ވެސް އެ ސިޓީގައިވެ އެވެ.
ކޮމެންޓް