ސަރުކާރު މެންބަރުން: 25ގެ ބަޖެޓަކީ މަޝްރޫއުތައް ފަށައި ނިންމާނެ ސާފު ސީދާ ބަޖެޓެއް

އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބަޖެޓަށް މެންބަރުން މިއަދު ވަނީ ތަޅުމުގައި ބަހުސްކުރައްވަން ފައްޓަވައިފަ އެވެ. ބަޖެޓް ބަހުސްގައި ބައިވެރިވި ސަރުކާރު ހިންގާ ޕީއެންސީގެ ހުރިހާ މެންބަރުން ވެސް، 56.6 ބިލިއަން ރުފިޔާގެ ބޮޑު ބަޖެޓް ދިފާއުކުރައްވައި ވާހަކަ ދެއްކެވި އެވެ. އެ މެންބަރުންގެ ވާހަކައިގައި ވިދާޅުވަމުން ގެންދެވީ އެ ބަޖެޓަކީ "ހުށަހަޅަން ޖެހޭ ގޮތަށް ހުށަހަޅާފައިވާ ތަފްސީލީ، ސާފު، ސީދާ" ބަޖެޓެއް ކަމަށެވެ. 

އިދިކޮޅު އެމްޑީޕީގެ އެންމެ ބޮޑު ކަންބޮޑުވުމަކަށްވެފައި އޮތް ރަށްރަށުގެ ވަކިވަކި މަޝްރޫއުތަކާއި މުސާރަތަކަށް ކުރާ ހަރަދުގެ ތަފްސީލްތައް މިފަހަރުގެ ބަޖެޓުގައި ނެތުމުންނެވެ. އެހެންވެ، އެކަން ސާފުކޮށްދެއްވަން ޕީއެންސީގެ މެންބަރުން މަސައްކަތްކޮށްދެއްވި އެވެ. 

ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ވިދާޅުވި ގޮތުގައި، މީގެ ކުރިން އެތައް ޒަމާނެއް ވަންދެން ބަޖެޓުގައި ރަށްރަށުގެ މަޝްރޫއުތަކުގެ ތަފްސީލްތައް ހިމަނާފައި އޮތް ނަމަވެސް މިފަހަރުގެ ބަޖެޓުގައި އެކަން ހިމަނާފައި ނުވަނީ ރައީސް މުހައްމަދު މުއިއްޒުގެ ސިޔާސަތަކީ ގައުމީ ބޮޑެތި މައްސަލަތަކަށް ބަޖެޓުން ހައްލު ހޯދަން ކަމަށް ވާތީ އެކަންކަމަށް ފޯކަސް ކުރެއްވުމުގެ ގޮތުންނެވެ.

އޭނާ ވިދާޅުވީ ރައީސް މުއިއްޒުގެ އަމާޒު ހުންނެވީ މިދިޔަ ހަ ރައީސުންނަށް ވެސް ހައްލު ނުކުރެވިފައިވާ މައްސަލަތައް ބަޖެޓުގެ ތެރެއިން ހައްލުކުރަން ކަމަށެވެ.

"މީގެ ކުރިން މައިކްރޯވެލަލްގައި މަޝްރޫއުތަކުގެ ވާހަކަ ޖަހާފައި އޮތީ. ރަނގަޅު ނ. އަތޮޅުގައި އޮންނާނެ ގެމެންދޫ ކިޔާ ކުޑަކުޑަ ރަށެއް. އެ ރަށުގައި ނަރުދަމާ އަޅަން 2ރ. ޖަހާފައެއް ނެތް. މީގައި އެކަމަކު އެބަ އޮތް ރާއްޖެއަށް ދިމާވެފައިވާ ބޮޑެތި މައްސަލަތަކަށް ހައްލު ހޯދަން ފައިސާ ހިމަނާފައި. އެކަންކަން ހައްލު ކުރާ ބަޖެޓް މިއީ،" އަބްދުއްސައްތާރު ވިދާޅުވި އެވެ. 

އޭނާ ފާހަގަ ކުރެއްވި ކަންކަމަކީ:

"އާ އުސްމިނަކަށް ދިވެހިން އުފުލައިލާނެ ބަޖެޓެއް މިއީ،" އަބްދުއްސައްތާރު ވިދާޅުވި އެވެ. 

އޭނާ ވިދާޅުވީ އެމްޑީޕީން މީގެ ކުރިން ކުރިކަމަކީ ބަޖެޓުގައި ރަށްރަށުގެ މަޝްރޫއުތައް ހިންގަން ޖަހައި އެކަމަށް ބޭނުންވާ އަދަދަށް ވުރެ ކުޑަ ފައިސާކޮޅެއް ހިމަނައިގެން މަޝްރޫއުތައް ފެށުން ކަމަށެވެ. އެއީ ރައްޔިތުންނަށް ދައްކާ ދަޅައެއްކަން ފާހަގަ ކުރައްވައި އޭނާ ވިދާޅުވީ އެކަމުގެ ސަބަބުން ރަށްރަށް ފަސްބާޑިވުން ނޫން ކަމެއް ނުވި ކަމަށެވެ. 

"އަޅުގަނޑުމެން އެއަށް ކިޔަނީ ހޭވުން ފަސްބާޑި ޖެހުން. މި ބަޖެޓް މި އޮތީ މަޝްރޫއުތައް ފަށައި ނިންމާނެ ބަޖެޓެއްގެ ގޮތުގައި އެކުލަވާލާފައި. ރައީސް ބޭނުންފުޅުވާ ބޮޑެތި މައްސަލަތަކެއް ފައިސާ ހަރަދުކޮށް ނިންމޭ ގޮތަށް،" އަބްދުއްސައްތާރު ވިދާޅުވި އެވެ.

ތިނަދޫ ދާއިރާގެ މެންބަރު ސައުދުﷲ ހިލްމީ ވިދާޅުވި ގޮތުގައި، މިފަހަރުގެ ބަޖެޓަކީ އުފެއްދުންތެރި ރަނގަޅު ބަޖެޓަކަށް ވާނެ އެވެ. އަދި މިއީ ރައީސްގެ ވައުދުތައް ފުއްދަން ފުރުސަތު ލިބޭ ފުރިހަމަ ބަޖެޓެއްގެ ގޮތުގައި އޭނާ ސިފަކުރެއްވި އެވެ.

އެހެން އަހަރުތަކާ ހިލާފަށް ބަޖެޓުގައި ވަކިވަކި ރަށްރަށަށް ހުރި މަޝްރޫއުތަކުގެ ތަފްސީލް ނެތްކަން ފާހަގަ ކުރައްވައި ސައުދުﷲ ވިދާޅުވީ މަޝްރޫއުތަކުގެ ތަފްސީލްތައް ނެތަސް ކޮންމެ ރަށެއްގެ އުމްރާނީ ތަރައްގީގެ މަޝްރޫއުތަކަށް ޖުމްލަ އަދަދެއް ޖަހާފައިވާ ކަމަށެވެ. އަދި ތަފްސީލްތައް ޖަހަން ފުރުސަތު ދިނުމުން ކޮންމެ މެންބަރަކު ވެސް ދާއިރާގެ ރަށްތަކަށް ގިނަ މަޝްރޫއުތަކެއް ހިމަނަން ބޭނުންވާ ކަމަށް އޭނާ ވިދާޅުވި އެވެ. އެހެންވުމުން ރާއްޖޭގެ މާލީ ހާލަތާ ނުބައްދަލު ވަރަކަށް ބަޖެޓް އަރައިގެން ދާ ކަމަށް ސައުދުﷲ ވިދާޅުވި އެވެ.

"9.3 ބިލިއަން ޑެފިސިޓް ބަޖެޓެއްކަން އަޅުގަނޑުމެން ފާހަގަކުރާއިރު މިއީ މިފަހުން އައި ބަޖެޓްތަކަށް ބަލާއިރު އެންމެ ދަށް ޑެފިސިޓް ދަށް ބަޖެޓް. އެހެންވީމާ، އަޅުގަނޑު މި ދަންނަވަނީ މިއީ އުންމީދީ ބަޖެޓެކޭ،" ސައުދުﷲ ވިދާޅުވި އެވެ.

މާފަންނު ހުޅަނގު ދާއިރާގެ މެންބަރު މުހައްމަދު މުސްތަފާ އިބްރާހިމް ގަބޫލުކުރައްވާ ގޮތުގައި، މިފަހަރުގެ ބަޖެޓް ހުށަހެޅީ ބަޖެޓަކީ ކޯޗެއްކަން ދެނެ ތިބެ އެކަން ކުރަން އެނގޭ އެ ފަންނުގެ މީހުންނެވެ. މިއީ ހުށަހަޅަން ޖެހޭ ގޮތަށް ހުށަހަޅާފައިވާ ބަޖެޓެއްކަން ފާހަގަ ކުރައްވައި އޭނާ ވިދާޅުވީ މިފަހަރުގެ ބަޖެޓުގައި އިޖުތިމާއީ ރައްކާތެރިކަމާއި ރާއްޖެއަށް ބޭނުންވާ އުމްރާނީ ތަރައްގީގެ ބޮޑެތި މަޝްރޫއުތަކަށް އެކަށީގެންވާ ފައިސާ ވަނީ ހިމަނައިފަ އެވެ.

ތިލަމާމެ ބްރިޖް ނިންމުމާއި އެއާޕޯޓް ޓާމިނަލްގެ މަޝްރޫއު ފަދަ މަސައްކަތްތައް ނިންމުމަށް އެކަށީގެންވާ ފައިސާ ބަޖެޓުގައި ހިމަނާފައިވާ ކަމަށް އޭނާ ވިދާޅުވި އެވެ. މުސްތޮފާ ވިދާޅުވީ އެ މަޝްރޫއުތަކުން އަތޮޅުތަކަށް ވެސް ފައިދާ ކުރާނެ އެވެ. 

"މަޝްރޫއުތަކުގެ ތަފްސީލްތައް ނެތް ނަމަވެސް މިއީ ހުށަހަޅަން ޖެހޭ ގޮތަށް ހުށަހަޅާފައިވާ ފުރިހަމަ ތަފްސީލީ ބަޖެޓެއް،" މުސްތޮފާ ވިދާޅުވި އެވެ.