ރައްޔިތުންގެ މަޖިލީހުގެ ތަޅުމުގައި ޖަލްސާއެއް ކުރިއަށް ދަނީ (ފޮޓޯ/ މަޖިލިސް)
ވޭޕް މަނާ ކުރާ ބިލު މަޖިލީހުން ފާސްކޮށްފި
ވޭޕް މަނާ ކުރުމަށް ދުންފަތް ކޮންޓްރޯލް ކުރުމުގެ ގާނޫނަށް ސަރުކާރުގެ ފަރާތުން ހުށަހެޅި އިސްލާހު މަޖިލީހުން މިއަދު ފާސްކޮށްފި އެވެ.
ވީ ކިހިނެއް؟ - ސަރުކާރުގެ ފަރާތުން ހެންވޭރު އުތުރު ދާއިރާގެ ޕީއެންސީ މެންބަރު އަހްމަދު އައިފާން މިދިޔަ މަހު ފަހުކޮޅު ހުށަހެޅުއްވި މި ބިލުގެ ދިރާސާ ކުރި އިޖުތިމާއީ ކޮމިޓީން އެންމެ ފުރަތަމަ ނިންމީ، ބިލުގައިވާ މުއްދަތު ތެރޭ ވޭޕް މަނާ ކުރެވޭ ގޮތަށް އެ މުއްދަތު ތެރޭގައި ބިލު ދިރާސާކޮށް ނިންމުމަށެވެ. ނަމަވެސް:
-
ފަހުން އެ ކޮމިޓީން ބޭނުންވީ އަވަސް އަރުވާލައިގެން ބިލު ފާސް ނުކޮށް، ދިރާސާ ކުރުމަށް އިތުރު ވަގުތު ނެގުމަށް
-
އެއާ އެކު، މިދިޔަ ހަފްތާ އަންގާރަ ދުވަހު ބޭއްވި އެ ކޮމިޓީގެ ބައްދަލުވުމުގައި ނިންމާފައި އޮތީ މި މަހު 21އަށް ބިލުގެ ސުންގަޑި ދިގު ދެންމަށް؛ އެހެން ހެދުމުން ސަރުކާރުން ނިންމާފައިވާ ގޮތަށް މި މަހު 15 ނުވަތަ އަންނަ ހުުކުރު ދުވަހަށް ވޭޕް ރާއްޖެ އެތެރެ ކުރުން މަނާ ނުވުމުގެ ފުރުސަތު އޮތް
-
ނަމަވެސް ފަހުން އަނެއްކާވެސް ކުއްލި ގޮތަކަށް މިދިޔަ ބުދަ ދުވަހު ހަވީރު ބޭއްވި އެ ކޮމިޓީގެ ބައްދަލުވުމުގައި، ސަރުކާރުން ފޮނުވި މައިގަނޑު ހުރިހާ އިސްލާހުތަކާ އެކު ކުދި އިސްލާހުތަކެއް ގެނެސް، ބިލު ފާސް ކުރަން ކޮމިޓީން ނިންމާފައިވޭ
-
މިއަދު ބޭއްވި މަޖިލީހުގެ ޖަލްސާގައި ކޮމިޓީގެ ރިޕޯޓު ވަނީ ތަޅުމަށް ހުށަހަޅާފައި
ތަފްސީލު - ބިލު ތަޅުމުން ފާސް ކުރަން ފެނޭތޯ ވޯޓަށް އެހުމުން، އެ ބިލު މަޖިލީހުން ފާސްކޮށްފައި ވަނީ 54 މެންބަރުންގެ ވޯޓުންނެެވެ. އަށް މެންބަރުން ވަކި ކޮޅަކަށް ވޯޓެއް ނުދެއްވަ އެވެ. އެއީ، އެމްޑީޕީގެ ހަތް މެންބަރުންނާއި އައްޑޫ މީދޫ ދާއިރާގެ އަމިއްލަ މެންބަރު އަބްދުއްރަހްމާން އެވެ.
މި ބިލު ރައީސް ތަސްދީގު ކުުރެއްވުމާ އެކު، އަންނަ ހުކުރު ދުވަހުން ފެށިގެން ވޭޕް ރާއްޖެ އެތެރެ ކުރުން މަނާވާނެ އެވެ. އަދި އަންނަ މަހު 15 އިން ފެށިގެން ވޭޕް ބޭނުން ކުރުމާއި ވިއްކުން އަދި ބެހުން މަނާވާނެ އެވެ. މަނާ ކުރާ ފަހުން މިކަން ކޮށްފި ނަމަ، ބޮޑެތި ޖޫރިމަނާ އަންނާނެ އެވެ.
ކޮމިޓީން ބިލަށް ގެނެސްފައިވަނީ ދެ އިސްލާހެކެވެ. އެއީ:
-
1-
ދައުލަތުގެ އޮފީސްތައް ހިންގާ އިމާރާތާއި އެ ތަންތަނުގެ ގޯތި ތެރޭ ދުންފަތުގެ އިސްތިއުމާލު ނުކުރެވޭ ގޮތަށް ބިލުގައި އޮތް އޮތުން ބަދަލުކޮށް، ގާނޫނުގެ ދަށުން ހަދާ ގަވައިދަކުން ކަނޑައަޅާ ގޮތެއްގެ މަތިން އެކަން ކުރެވޭނެ ފުރުސަތު ދިނުން
-
2-
ރާއްޖެއަށް އެތެރެ ކުރުން މަނާ ކުރާ ދުންފަތުގެ ބާވަތްތަކުގެ ތެރޭގައި، ދުންފަތުން ދުރުހެލިވުމަށް ދެވޭ ފަރުވާގެ ތެރެއިން ދޭ އަދި ފަންނީ އިދާރާތަކުން ހުއްދަ ކުރާ ނިކޮޓިން ރިޕްލޭސްމަންޓު ތެރަޕީ ނުވަތަ ފަރުވާގެ ގޮތުގައި ބޭނުން ކުރާ އެފަދަ އެހެން ބާވަތްތަކަށް އިސްތިސްނާ ދިނުން
ވޭޕް އެތެރެކުރުމާއި ބޭނުން ކުރުން މަނާ ކުރާ ތާރީހުގެ ފަހުން އެފަަދަ ކަމެއް ކޮށްފި ނަމަ ބޮޑެތި އަދަދުން ޖޫރިމަނާ ކުރުމަށް ސަރުކާރުން ބިލު ހުށަހެޅި އިރު ވެސް ހިމަނާފައިވެ އެވެ. އެގޮތުން:
-
ވޭޕް ކުރުމަށް ބޭނުން ކުރާ އާލާތްތަކާއި އެ އެއްޗެއްސަށް ބޭނުން ކުރުމަށް ތައްޔާރުކޮށްފައިވާ އުފެއްދުންތައް އެތެރެކޮށްފި ނަމަ، 50،000ރ. އިން ޖޫރިމަނާ ކުރެވޭނެ؛ އެތެރެކުރި ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް ކުރުމަށް ބޭނުން ކުރާ އާލާތަކަށް 10،000ރ.ގެ މަގުން ޖޫރިމަނާ ކުރެވޭނެ
-
އެފަދަ އާލާތެއް ނުވަތަ އުފެއްދުމެއް ވިއްކައިފި ނަމަ، 20،000ރ. އިން ޖޫރިމަނާ ކުރެވޭނެ؛ ވިއްކި ކޮންމެ އެއްޗަކަށް 10،000ރ.ގެ މަގުން ޖޫރިމަނާ ކުރެވޭނެ
-
އެފަދަ އާލާތެއް ނުވަތަ އުފެއްދުމެއް ހިލޭ ބަހައިފި ނަމަ، 10،000ރ. އިން ޖޫރިމަނާ ކުރެވޭނެ
-
އެފަދަ އާލާތެއް ނުވަތަ އުފެއްދުމެއް ވިއްކީ ނުވަތަ ހިލޭ ބެހީ ކުޑަކުއްޖަކަށް ނަމަ، އިތުރު 50،000ރ. އިން ޖޫރިމަނާ ކުރެވޭނެ
-
އެފަދަ އުފެއްދުމެއް ބޭނުންކޮށްފި ނަމަ، 5،000ރ. އިން ޖޫރިމަނާ ކުރެވޭނެ
ސަރުކާރުން ވަނީ، ދުންފަތުންގެ ބާވަތެއް ވިއްކޭނެ އެންމެ ހަގު އުމުރަކީ 18 އަހަރުގެ ބަދަލުގައި 21އަށް ހެދުމަށް ވެސް ނިންމާފަ އެވެ. އެ ނިންމުން ތަންފީޒު ކުރާނީ ބިލުގައިވާ ގޮތުން، އަންނަ ހުކުރު ދުވަހުން ފެށިގެންނެވެ.
މީގެ އިތުރުން، މަނާ ތަންތަނުގައި ދުންފަތުގެ އިސްތިއުމާލުކޮށްފި ނަމަ، ހަރުކަށި ފިޔަވަޅު އެޅުމަށް ވެސް އިސްލާހުގައި ހިމަނާފައިވެ އެވެ.
ކޮމެންޓް (1)
ނިޒާމް