އަންހެނަކު ޓެކްސީއެއް ލިބޭތޯ މަސައްކަތް ކުރަނީ. (ދައުރު ފޮޓޯ/ އަބްދުﷲ އަނޫފް ޖުނައިދް)
އުޅަނދުގެ ޑޮމެއިން ނަންބަރުތައް ބަދަލުކުރަން 2 މަސް ދެނީ
އެއްގަމުގައި ދުއްވާ އުޅަނދުތަކުގައި ބޭނުން ކުރަން ކުރިން ދޫކޮށްފައިވާ ޑޮމެއިން ނަންބަރުތައް އަލަށް ތައާރަފުކުރާ ޑޮމެއިންތަކަށް ބަދަލުކުރަން ދެ މަސްދުވަހުގެ މުއްދަތެއް ލިބޭ ގޮތަށް އަންނަ ހަފްތާއިން ފެށިގެން ހުށަހެޅޭނެ ކަމަށް ޓްރާންސްޕޯޓް މިނިސްޓްރީން މިއަދު ބުނެފި އެވެ.
ވީ ކިހިނެއް؟ - ރީތި ނަންބަރުތައް ހިމެނޭ ޑޮމެއިންގެ 'ވަގު ވިޔަފާރި'އާ ގުޅިގެން، ކުރީ ސަރުކާރުގައި ވަނީ ޑޮމެއިން ވިއްކުމުގެ މަސައްކަތް ހުއްޓާލައިފަ އެވެ. ޓްރާންސްޕޯޓް މިނިސްޓްރީގެ ރިކޯޑުތަކުން ދައްކާ ގޮތުން، 700އަށް ވުރެ ގިނަ ވަގު ޑޮމެއިން ވަނީ ވިއްކާފަ އެވެ. މިހާރު ބޭނުންކުރަނީ ތިނެއް ނުވަތަ ހަތަރު އަދަދުގެ ޑޮމެއިން އެވެ.
ޑޮމެއިން ހިދުމަތުގެ ސެކިއުރިޓީ ހަރުދަނާ ކުރުމުގެ ގޮތުން އާ ސަލާމަތީ ފިޔަވަޅުތަކާ އެކު ރަޖިސްޓްރީ ސެޓްފިކެޓާއި ޑޮމެއިން ބޭނުންކުރުމުގެ ހުއްދަ މި މަސް ތެރޭ އަލުން ތައާރަފުކުރާނެ ކަމަށް ޓްރާންސްޕޯޓް މިނިސްޓްރީން މިދިޔަ މަހު ވަނީ ބުނެފަ އެވެ.
ތަފްސީލް - އެ މިނިސްޓްރީން މިއަދު ނެރުނު ބަޔާނެއްގައި ބުނީ ކުރިން ދޫކޮށްފައިވާ ޑޮމެއިން ބޭނުންކުރުމުގެ ހުއްދަ ނުވަތަ ފައިސާ ދެއްކިކަމުގެ ރަސީދު މިނިސްޓްރީއަށް ހުށަހަޅައިގެން އަލަށް ތައާރަފުކުރާ ޑޮމެއިންއަށް ބަދަލުކުރުމަށް ދެ މަސްދުވަހުގެ މުއްދަތެއް ދިނުމަށް ނިންމާފައިވާ ކަމަށެވެ. އަދި އަންނަ އާދިއްތަ ދުވަހުން ފެށިގެން އެ ކަމަށް އެދި ހުށަހެޅުމަށް އަންގާފައިވެ އެވެ.
އެ މުއްދަތަށް ފަހު ޑޮމެއިންގެ ގޮތުގައި ބަލައިގަންނާނީ އަލަށް ތައާރަފުކޮށްފައިވާ ޑޮމެއިން ރަޖިސްޓްރީ ސެޓްފިކެޓާއި ހުއްދަ އެކަނި ކަމަށް ވެސް ބަޔާނުގައިވެ އެވެ.
އާ ޑޮމެއިންއަށް އެދި ހުށަހަޅާނީ:
-
އެ ކަމަށް ކަނޑައަޅާފައިވާ ފޯމާ އެކު ޑޮމެއިން މަސައްކަތަށް ހާއްސަކޮށްފައިވާ މެއިލްއަށް ނުވަތަ ކައުންޓަރަށް
-
ކައުންޓަރު ހުޅުވާފައި ހުންނާނީ ރަސްމީ ދުވަސްތަކުގައި ހެނދުނު 9 އިން މެންދުރު ފަހު 2އަށް
ފާހަގަކޮށްލެވޭ ކަމެއް - ޓްރާންސްޕޯޓް މިނިސްޓަރު މުހައްމަދު އަމީން މީގެ ކުރިން ވިދާޅުވެފައިވާ ގޮތުގައި، ވަގު ޑޮމެއިންތަކުން މުޅި ރާއްޖެ އޮތީ ފުރިފަ އެވެ. އޭނާ ވިދާޅުވެފައިވާ ގޮތުގައި:
-
ރާއްޖޭގައި ގާތްގަނޑަކަށް 1،400 ޑޮމެއިން ގެންގުޅޭ
-
އޭގެ ތެރެއިން ސައްހަ ނަންބަރުތަކުގެ ނިސްބަތަކީ 700 ނުވަތަ %50
-
ބާކީ ހުރީ ވަގު ނަންބަރުތައް
ކޮމެންޓް