ހިޔާނާތުގެ ތުހުމަތުކުރެވޭ އޭސީޕީ އާސިފު ސަސްޕެންޑުކޮށްފި

ހިޔާނާތުގެ މައްސަލައެއްގައި ތުހުމަތުކުރެވޭ އެސިސްޓެންޓް ކޮމިޝަނާ އޮފް ޕްރިޒަންސް މުހައްމަދު އާސިފް މޯލްޑިވްސް ކަރެކްޝަނަލް ސާވިސްގެ ވަޒީފާއިން ސަސްޕެންޑުކޮށްފި އެވެ.

ވީ ކިހިނެއް؟ - ޕްރިޒަންސް ކުލަބުގެ އެކައުންޓުން 200،000ރ.އަށް ވުރެ ގިނަ ރުފިޔާ އެކި އެކައުންޓުތަކަށް ޖަމާކުރިކަމަށް ބުނާ މައްސަލައެއް ފެންމަތިވީ މިދިޔަ ޖުލައިގަ އެވެ. އެ ހިޔާނާތުގެ މުގުލުގައި ހުންނެވި ކަމަށް، ބައެއް މުވައްޒަފުން ތުހުމަތުކުރަނީ އެ ކުލަބުގެ ރައީސްކަން ވެސް ކުރައްވާ އާސިފަށެވެ.

ބުނީ ކީކޭ؟ - ކަރެކްޝަނުން ބުނީ އާސިފު އެ ސާވިސްގެ ވަޒީފާއިން ވަގުތީ ގޮތުން ސަސްޕެންޑުކުރީ އިއްޔެ ކަމަށެވެ.

"އެހެންކަމުން އިސްވެ ދެންނެވުނު ތާރީހުން ފެށިގެން (7 ނޮވެމްބަރުން ފެށިގެން) މި ސާވިސްގެ ހިއުމަން ރިސޯސް ސެކްޝަންގެ ހުއްދަ ނެތި އެސިސްޓެންޓް ކޮމިޝަނާ އޮފް ޕްރިޒަންސް މުހައްމަދު އާސިފް މި ސާވިސްގެ އެއްވެސް އިމާރާތަކަށް ވަނުމަކީ މަނާ ކަމެކެވެ،" މުވައްޒަފުންނަށް ފޮނުވި އެންގުމެއްގައި ބުނެފައިވެ އެވެ.

އެ އެންގުމާ ހިލާފަށް އާސިފު އަމަލުކުރައްވައިފި ނަމަ އެކަން ކަރެކްޝަންސްގެ އެޗުއާރު ސެކްޝަނަށް އަންގައިދޭން ވެސް ވަނީ އެދިފަ އެވެ.

މައްސަލަ - ޕްރިޒަންސް ކްލަބްގެ ފައިސާއާ ގުޅޭ ހިޔާނާތާ ބެހޭ ބައެއް މައުލޫމާތާއި ގުޅުން ހުރި ލިޔެކިޔުންތަކެއް އިތުބާރު ހުރި މަސްދަރުތަކުން 'ދައުރު'އަށް ވަނީ ލިބިފަ އެވެ.

އެ މައްސަލައާ ގުޅިގެން މިދިޔަ އޮގަސްޓު މަހު އެތަނުގެ 35 އޮފިސަރަކު ސޮއިކޮށް ކޮމިޝަނާ އޮފް ޕްރިޒަންސް ހަސަން ޒަރީރަށް ޕެޓިޝަނެއް ވެސް ހުށަހެޅި އެވެ. އެ ޕެޓިޝަނަށް ދެއްވި ޖަވާބުގައި ޒަރީރު ވިދާޅުވެފައި ވަނީ އެ މައްސަލަ މިހާރު ބަލަމުން އަންނަ ކަމަށެވެ.

މައްސަލަ ފެންމަތިވުމާ އެކު އާސިފު ވަނީ ދެ ޓްރާންސެކްޝަނަކުން ކްލަބްގެ އެ އެކައުންޓަށް 70،000ރ. ޖަމާކުރައްވައިފަ އެވެ. ނަމަވެސް އެއީ ކިހިނެއް ޖަމާވި ފައިސާއެއް ކަމެއް ނޭނގެ އެވެ.

އާސިފްގެ މައްސަލަ ކޮޅެއްގައި ނުޖެހި ދިގުލައިގެން ދާތީ، މައްސަލަ 'އޮއްބާލަން' އުޅޭ ކަމަށް ބުނެ ބައެއް މުވައްޒަފުން އޭރު ކަންބޮޑުވުން ވެސް ފާޅުކުރި އެވެ.