ކުއްލި ގޮތަކަށް ވަކިވި އަނބިމީހާގެ ނަމުގައި މިސްކިތެއް އަޅައިފި

ލޯބިވާ އަނބިމީހާގެ ކުއްލި މަރާ އެކު، މުހައްމަދު ޝާހިދުގެ މުޅި ދިރިއުޅުން އެ ފުށްމިފުށަށް ޖެހުނެވެ. ވަރަށް ޅައުމުރުގައި ކުރި އެ ކައިވެންޏަށް ދެ ދަރިން ވެސް ލިބިފައިވަނިކޮށް، އައިޝަތު ޝިފާ މަރުވީ އުމުރުން 25 އަހަރުގަ އެވެ. އޭގެ ފަހުން ތިން އަހަރު ފާއިތުވި ނަމަވެސް، ޝާހިދު ބުނިގޮތުގައި އޭނާގެ ހިތުން އަނބިމީހާއަށް ދިން ޖާގަ އާއި ލޯތްބަކަށް ބަދަލެއް ނާދެ އެވެ.

އެހެންވެ، އެ ލޯބީގެ ރަމްޒެއްގެ ގޮތުން އޭނާ އެޅީ ކުޑަ މިސްކިތެކެވެ. އޭނާގެ މަގްސަދަކީ އަބަދު ވެސް އަނބިމީހާއަށް ހެޔޮ ޖަޒާ ލިބިދެނިވި ކަމެއް ހަދިޔާ ކުރާށެވެ.

"ވަރަށް ހެޔޮ، ވަރަށް ލޯބިވި އަތްބެއް އެއީ. އޭގެ ބަދަލެއްގެ ގޮތުން މިހާރު ދެން އަޅުގަނޑުމެންނަށް ކުރެވޭނީ މި ފަދަ ކަމެއް،" ޝާހިދު ބުންޏެވެ.

އޭނާ މިސްކިތް އެޅީ، ކ. ހުރާ ސްކޫލުގެ ގޯތިތެރޭގަ އެވެ. ދަރިވަރުންނާއި ޓީޗަރުންނާއި މުވައްޒަފުން ނަމާދުކުރުމަށް އެޅި އެތަނަށް ދިނީ 'މަސްޖިދުއްޝިފާ'ގެ ނަމެވެ. މިއަދު ރަސްމީކޮށް ހުޅުވި އެ މިސްކިތުގައި، ނަމާދުކުރުމުގެ އިތުރުން ސްކޫލުގެ ގުރުއާން ކްލާސްތައް ވެސް އަންނަނީ ނަގައިދެމުންނެވެ.

ޝިފާއަކީ ހދ. ވައިކަރަދުއަށް އުފަން ޒުވާނެކެވެ. ކައިވެންޏަށް ފަހު ފިރިމީހާގެ ރަށް، ހުރާގައި ދިރިއުޅޭތާ އަށް އަހަރުވީ އިރު އެ މީހުންނަށް ވަނީ 6 އަހަރުގެ ކުއްޖަކާއި 4 އަހަރުގެ ކުއްޖެއް ލިބިފަ އެވެ. ވަރަށް ލޯބިން އުޅެމުން އައި އެ އާއިލާއަށް، ކުއްލި ހިތާމައާ ކުރިމަތިލާން ޖެހުނީ ނުވެސް އެނގި ތިއްބަ އެވެ.

ޝިފާ މަރުވީ ސިކުނޑީގައި އުފެދުނު ޓިއުމަރެއްގެ ސަބަބުން ނަމަވެސް، އެކަން އެ މީހުންނަށް އެނގުނީ ވަރަށް ފަހުންނެވެ. ބޮލުގައި ރިއްސައި، ހޮޑުލާފައި ކުއްލި ގޮތަކަށް ޝިފާ މަރުވީ، އޭނާގެ ބަލީގެ އަސްލު އެނގުނުތާ އެންމެ ހަފުތާއެއް ފަހުންނެވެ.

ޝާހިދު ބުނި ގޮތުގައި، އަނބިމީހާއަކީ ކުރިއްސުރެ ބޮލުގައި ރިއްސި މީހެކެވެ. އެކަން މައިތިރި ކޮށްލަނީ ޕެނެޑޯލް ކަހަލަ ބޭސްގުޅައެއް ކާލައިގެންނެވެ. އެކަމަކު އޭގެ އަހަރުތަކެއް ފަހުން މާލެއަށް ކުރި ދަތުރެއްގައި ސީޓީ ސްކޭނެއް ހެއްދި ނަމަވެސް އޭގެ ފަހުން އައި ކޮވިޑް-19ގެ ލޮކްޑައުންއާ ހެދި، ސްކޭން ނަގައި ޑޮކްޓަރަށް ދައްކާކަށް ނުދެވުނެވެ. އެހެންވެ، ފަހުން ވެސް އަނބިމީހާގެ ބޮލުގެ ރިހުން ހަމައަކަށް އެޅުވީ، ޝާހިދު ބުނިގޮތުގައި އާދައިގެ ބޭސް ގުޅައެއް ކާލައިގެންނެވެ.

އެކަމަކު ޑިސެމްބަރު 2021ގައި، ބޮލުގެ ރިއްސުން ބޮޑުވެ، ހޮޑުލައި ހާލު މާ ސީރިއަސްވުމުން މާލެ ގެންދިޔައިރު މާ ބޮޑަށް ވެސް އޮތީ ލަސްވެފަ އެވެ. އޭރު ސްކޭންގެ ނަތީޖާ ބެލި އިރު، ސިކުނޑީގައި ޓިއުމަރެއް އުފެދިފައިވާ ކަން ވަނީ ފާހަގަ ކުރެވިފަ އެވެ. އެ ޓިއުމަރު އުފެދިފައި އިނީ ވެސް ސިކުނޑީގެ އެންމެ މުހިއްމު ހިސާބުގަ އެވެ.

ޝިފާ މަރުވި އިރު އޭނާ ދިޔައީ އާއިލާއާ އެކު އުމްރާއަށް ދާން ތައްޔާރުވަމުންނެވެ. އެކަމަށް އޮތީ ފައިސާ ވެސް ދައްކާފަ އެވެ.

"ކުޑަކުޑަ ދެ ކުދިން ގޮވައިގެން، ވަޒީފާ އަދާކުރަމުން ދިރިއުޅެން ދަތިވާތީ އެ ކުދިންނަށްޓަކައި އަޅުގަނޑު ފަހުން ކައިވެންޏެއް ކުރިން. އެކަމަކު ދިރިއުޅުން ސެޓްލްޑް އެއް ނުވި. ޝިފާގެ ފަޅުކަން އަދިވެސް އަޅުގަނޑުމެންގެ ދިރިއުޅުގައި ބޮޑު،" ޝާހިދު ބުންޏެވެ.

އޭނާ ބުނީ އަނބިމީހާ ވަކިވި ފަހުން، އޭނާގެ ހަނދާނުގައި ގިނަ ކަންތައްތަކެއް ކުރި ކަމަށެވެ. އެކަމަކު މިސްކިތެއް އެޅީ، އޭގެ ސަބަބުން އަނބިމީހާގެ ފުރާނައަށް އަބަދުމެ ސަވާބު ލިބިލިބި ހުންނާނެ ކަމުގެ އުުއްމީދުގައި ކަމަށް ބުންޏެވެ.

"އެއީ އަނބިމީހާއަށްޓަކައި ދިން ހަދިޔާއެއް،" އޭނާ ބުންޏެވެ.