ލ. އޮޅުވެލި ރިސޯޓުގެ ބައެއް މާމެންދޫ އިހްތިސޯސްގެ ތެރެއަށް ވަންނާތީ އެ ބައި އުނިކޮށްފި

ސިކްސް ސެންސަސް އިން ލ. އަތޮޅުގައި ހިންގާ ރިސޯޓް ހަދާފައިވާ ރަށް ކަމަށްވާ އޮޅުވެލީގެ ފަޅުން ބައެއް، ކައިރީގައި އޮންނަ މާމެންދޫގެ އިހްތިސޯސްގެ ތެރެއަށް ވަންނާތީ، އެކަން އިސްލާހުކޮށް މިއަދު އަލުން ގެޒެޓުކޮށްފި އެވެ.

ވީ ކިހިނެއް؟ - މިދިޔަ ސަރުކާރުން ރަށްރަށުގެ އިހްތިސޯސް ކަނޑައެޅި އިރު، ރިސޯޓުގެ ފަޅުން ބައެއް މާމެންދޫގެ އިހްތިސޯސްގެ ތެރެއަށް ވަދެ އެވެ. އެގޮތުން، ރިސޯޓުގެ ސަޕްލައި ޖެޓީ އާއި ޓޫރިސްޓުން ގޮވައިގެން ފީނަން ދާ ސަރަހައްދު ވެސް އޮންނަނީ މާމެންދޫގެ އިހްތިސޯސްގެ ތެރޭގަ އެވެ.

އެހެންވެ، އެކަން އިސްލާހު ކުރުމަށް މާމެންދޫއިން އެދުމުން، ރައީސް މުހައްމަދު މުއިއްޒު މިއަދު ނެރުއްވި ރިޔާސީ ގަރާރަކުން ވަނީ އެ ބައި އުނިކޮށްފަ އެވެ.

ތަފްސީލް - މިހާރު މާމެންދޫގެ އިހްތިސޯސްގެ ތެރޭގައި އޮތީ، އެ ރަށް ކައިރީގައި އޮންނަ ފަޅުރަށެއް ކަމުގައިވާ ހުޅިމެންދޫ އެކަންޏެވެ.

"[މާމެންދޫ އިހްތިސޯސްގެ ތެރެއަށް ވަންނަނީ] ވަރަށް ކުޑަކުޑަ ތަންކޮޅެއް. އަޅުގަނޑުމެން އެދިގެން އިސްލާހު ގެނައީ،" އެ ރަށުގެ ކައުންސިލް މެމްބަރު ޔޫސުފް ޖަޒްލާން މިއަދު 'ދައުރު'އަށް ވިދާޅުވި އެވެ.