ހޯކްސްގެ ބޯޓުން ރާއްޖެ ވަގަށް އެތެރެކުރި ސިނގިރޭޓްތައް ކޮފިސަރުން ޗެކް ކުރަނީ. (ފޮޓޯ/ކަސްޓަމްސް)
ނުގަވަވައިދުން ގެންނަ ދުންފަތުގެ ބާވަތްތައް ނައްތާލުމުގެ ހަރަދު ގެންނަ މީހަކު ދައްކަން ޖެހޭ ގޮތަށް ހަދައިފި
ނުގަވައިދުން ރާއްޖެ ގެންނަ ދުންފަތުގެ ބާވަތްތައް ނައްތާލުމަށް ހިނގާ ހަރަދު އެ ގެންނަ މީހަކު ދޭން ޖެހޭ ގޮތަށް ހެލްތް މިނިސްޓްރީން ހަދައިފި އެވެ.
ވީ ކިހިނެއް؟ - މިނިސްޓްރީން މިގޮތަށް ހެދީ، އެ މިނިސްޓްރީގެ މެންޑޭޓް ދަށުގައި އޮތް 'ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާބެހޭ ގަވައިދު'އަށް މިއަދު ގެނައި އިސްލާހުންނެވެ. އެ ގަވައިދަށް މި ގެނައި ތިން ވަނަ އިސްލާހު މިހާރު ސަރުކާރުގެ ގެޒެޓްގައި ވަނީ ޝާއިއުކޮށްފަ އެވެ.
ތަފްސީލު - ގަވައިދުގައި ނައްތާލެވޭ ތަކެތި މީގެ ކުރިންވެސް ބަޔާންކޮށްފައިވެ އެވެ. އޭގެ ތެރޭގައި ހިމެނެނީ:
-
ޕެކެޓް ކުރުމަށް ނުވަތަ ލޭބަލްޖެހުމަށް ކަނޑައަޅާފައިވާ އުސޫލުތަކާ ހިލާފަށް ތިމާއަށް އެކަން އެނގިހުރެ ނުވަތަ ނޭނގިނަމަވެސް ދުންފަތުގެ ބާވަތްތައް ޕެކެޓްކޮށް ލޭބަލްކުރުމަށް ނުވަތަ ގަވައިދުގެ މައްދާއަކާ ހިލާފުވުމަށް ބޭނުންކުރެވިދާނެ ގޮތަށް އަތުގައި އޮންނަ އެއްޗެއް ނުވަތަ މެޝިނެއް ނުވަތަ ލިޔުމެއް
-
ދުންފަތުގެ ބާވަތްތަކުގައި ހުންނަޖެހޭނެކަމަށް މި ގަވައިދުގައި ބުނެފައިވާ މިންގަނޑުތަކާ ހިލާފަށް ތައްޔާރުކޮށްފައިވާ ދުންފަތުގެ ކޮންމެ އެއްޗަކާއި، ރާއްޖޭގެ ކޮންމެވެސް ތަނެއްގައި ބަޔަކު މީހުން ގަސްތުގައި ނުވަތަ ގަސްތުގައި ނުވަތަ އެނޫން ގޮތަކަށް ނަމަވެސް ބަހައްޓާފައިވާ އުސޫލު ނޫން ދުންފަތުގެ ބާވަތްތައް
މި ތަކެތި ނައްތާލުމަށް ގަވައިދުގައި ކުރިން ބަޔާންކޮށްފައި ވަނީ، އިހްތިޔާރު ލިބިފައިވާ ފަރާތުގެ ބާރުގެ ދަށަށް ގެނެސް ތިމާވެއްޓަށް ގެއްލުންނުވާނެ ގޮތުގެމަތިން ނައްތާލުމަށެވެ. ވަކި މުއައްސަސާއެއްގެ ނަމެއް ނޯވެ އެވެ.
މިފަހަރުގެ އިސްލާހުގައި މި ތަކެތި ނައްތާލުމަށް މަތިކޮށްފައިވަނީ ކަސްޓަމްސްއަށެވެ. އޭގެ އިތުރުން އިސްލާހުގައި ބުނެފައި ވަނީ:
-
ތިމާވެއްޓަށް ގެއްލުންނުވާނެ ގޮތުގެ މަތިން ނައްތާޅުމަށް ހިނގާ ހަރަދު، އެތަކެތި ރާއްޖެ ގެނައި ފަރާތުން ކަސްޓަމްސްއަށް ދައްކަން ޖެހޭނެ
-
ހިފެހެއްޓޭ ތަކެތި ކަސްޓަމްސްގެ ބެލުމުގެ ދަށުގައި ހުންނައިރު ހިގާ ހަރަދުވެސް އެތަކެތި ގެނައި ފަރާތަކުން ކަސްޓަމްސްއަށް ދައްކަން ޖެހޭނެ
މި ގަވައިދު ތަންފީޒު ކުރުމުގެ އެންމެހާ ބަރުތައް ކުރިން ދީފައިވަނީ އެޗްޕީއޭއަށެވެ. މިހާރު ގެނެސްފައިވާ އިސްލާގުގައި އެޗްޕީއޭގެ އިތުރުން، ކަސްޓަމް އާއި ފުލުހުނަނަށެވެ ބައެއް ކަންކަން ތަންފީޒުކުރުމުގެ ބާރު ދީފައިވެ އެވެ. އެގޮތުން:
-
ދުންފަތުގެ ބާވަތްތައް ރާއްޖެއަށް އެތެރެ ކުރާ މަރުހަލާގައި ގަވައިދު ތަންޒީރު ކުރުމުގެ ގޮތުން ގަވައިދާ ހިލާފުވާ ފަރާތްތައް ޖޫރިމަނާ ކުރުމާއި ޖޫރިމަނާގެ ފައިސާ ނުދައްކާ ފަރާތްތަކުގެ އަތުން ފައިސާ ހޯދުމުގެ މަސައްކަތް ކަންކަން ކުރާނީ ކަސްޓަމްސްއިން
-
މި ތަކެތި އެތެރެ ކުރާ މަރުހަލާ ފިޔަވައި، ގަވައިދު ތަންފީޒުކުރުމުގެ ގޮތުން ދެން ހިމެނޭ އެހެން ކަންކަން ކުރާނީ އެޗްޕީއޭއީން
-
އިކޮނޮމިކް މިނިސްޓްރީ އާއި ފުލުހުން ހިންގާ އިންސްޕެކްޝަން ގަވައިދާ ހިލާފުވާ ފަރާތްތައް ޖޫރިމަނާ ކުރުމުގެ ބާރު އެ ދެ މުއައްސަސާއަށް ލިބިގެންވޭ
ކޮމެންޓް