ގުޅިފަޅު ގޯތިތަކުގެ ގުރުއަތާމާ މެދު ޝަކުވާ ހުށަހަޅަން ހުޅުވާލައިފި

ގުޅިފަޅުން ގޯތި ލިބުނު މީހުންގެ މެދުގައި މިދިޔަ އަންގާރަ ދުވަހު ނެގި ގުރުއަތުލުމާ މެދު ޝަކުވާއެއް އޮތް ނަމަ ޝަކުވާ ހުށަހަޅަން މިއަދު ހުޅުވާލައިފި އެވެ.

ވީ ކިހިނެއް؟ - ގުޅިފަޅުގެ ލޭންޑު ޔޫސް ޕްލޭނަށް ބަދަލު ގެނެސް، އެ ތަނުން ގޯތި ލިބުނު މީހުންގެ މެދުގައި އަލުން ގުރުއަތު ނަގާފައި ވާއިރު، ގިރާވަރުފަޅުން ގޯތި ލިބުނު މީހުންގެ ތެރެއިން ގުޅިފަޅަށް ގޯތި ބަދަލުކުރި މީހުންގެ މެދުގައި ވެސް ވަނީ ގުރުއަތު ނަގައިފަ އެވެ.

ތަފްސީލް - ހައުސިން މިނިސްޓްރީން މިއަދު ގެޒެޓު ކުރި އިއުލާނެއްގައި ބުނީ ގުޅިފަޅުން ގޯތި ލިބުނު މީހުންގެ އެއްވެސް ޝަކުވާއެއް އޮތް ނަމަ 'ހިޔާވަހި' ޕޯޓަލް މެދުވެރިކޮށް ޝަކުވާ ހުށަހެޅޭނެ ކަމަށެވެ.

ގޯތި ލިބުނު މީހުންގެ ލިސްޓު ވެސް ހައުސިން މިނިސްޓްރީން ވަނީ އާންމުކޮށްފަ އެވެ. އެގޮތުން، ގުޅިފަޅުން ދޫކޮށްފައިވަނީ:

ހައުސިން މިނިސްޓަރު އަލީ ހައިދަރު މިދިޔަ އޯގަސްޓު މަހު ވިދާޅުވީ ގުޅިފަޅުން ގޯތި ލިބޭ ފަރާތްތަކަށް ގޯތި ދޫކުރެވޭނީ ތިލަމާލެ ބްރިޖް ހަދަން ގުޅީފަޅުން ބޭނުންކުރާ ސަރަހައްދު ދޫކޮށްލައި އެ ތަން އެއްކޮށް ހިއްކާ ނިމުމުން ކަމަށެވެ.

އެނގުން މުހިންމު - މާލޭ މައި ވިޔަފާރި ބަނދަރު ބަދަލުކުރާ މަޝްރޫއުގެ ދަށުން ގުޅީފަޅު ހިއްކަން ފެށީ ޖޫން 2020ގަ އެވެ. ރިޔާސީ އިންތިހާބާ ގާތް ވެފައި ވަނިކޮށް، އޭރުގެ ރައީސް އިބްރާހިމް މުހައްމަދު ސޯލިހް ނިންމެވީ، މާލޭ މީހުންނަށް ގޯތި ދިނުމަށް ވެސް އެ ސަރަހައްދުން ބައެއް ހާއްސަކުރުމަށެވެ.

މި ސަރުކާރުން އެންމެ ފަހުން ބުނެފައިވާ ގޮތުގައި، ގުޅީފަޅުން ހިއްކަން ހަމަޖެހިފައިވާ 150 ހެކްޓަރުގެ ތެރެއިން 100 ހެކްޓަރުގެ ބިން ހިއްކައި މިހާރު އޮތީ ނިމިފަ އެވެ. އެ ތަން ހިއްކުމުގެ މަސައްކަތް ކުރަމުންދަނީ ބޮސްކާލިސްއާ އެކު ހަދާފައިވާ އެއްބަސްވުމެއްގެ ދަށުންނެވެ. މި ސަރުކާރުން ވެސް ވަނީ ގުޅިފަޅުން އިތުރު 85 ހެކްޓަރު ހިއްކަން ނިންމައިފަ އެވެ.