ފަރަށް އަރައިގެން ކުރި އެތައް މިލިޔަން ރުފިޔާގެ ޖޫރިމަނާ ނުހޯދި އުޅެނިކޮށް އުޅަނދު ބޭރަށް

ރާއްޖޭގެ ފަރަކަށް އަރައިގެން އެތައް މިލިޔަން ރުފިޔާގެ ޖޫރިމަނާ ކުރި ނަމަވެސް އެ ފައިސާ ނުހޯދި އުޅެނިކޮށް އުޅަނދު ރާއްޖޭން ފުރައިގެން ދާ މައްސަލަ ބޮޑުވެފައިވާ ކަމަށް އެޓާނީ ޖެނެރަލް އިން މިއަދު ބުނެފި އެވެ.

ވީ ކިހިނެއް؟ - މިވޭތުވެ ދިޔަ ދެތިން އަހަރުގެ ތެރޭގައި ބޭރުގެ އުޅަނދުތައް ރާއްޖޭގެ ފަރުތަކަށް އަރައި އޭގެ ސަބަބުން ފަރުތައް ހަލާކުވުމުގެ ގިނަ ހާދިސާތަކެއް ވަނީ ހިނގާފަ އެވެ. އެއާ ގުޅިގެން އެ ބޯޓުތައް އެތައް މިލިޔަން ރުފިޔާއިން ޖޫރިމަނާ ކުރިޔަސް، ދައުލަތަށް ލިބިފައިވަނީ ވަރަށް މަދު އަދަދެއްގެ ފައިސާ އެވެ. އަދި ފައިސާ ހޯދަން ކޯޓަށް ހުށަހެޅި އެއްވެސް މައްސަލައެއް މިހާތަނަށް ނިމިފައެއް ނުވެ އެވެ.

މި ގޮތަށް ކުރާ ޖޫރިމަނާގެ ފައިސާ ދައުލަތަށް ނުލިބޭތީ، ތިމާވެއްޓާއި މޫސުމަށް އަންނަ ބަދަލުތަކާ ގުޅޭ ރައްޔިތުންގެ މަޖިލީހުގެ ކޮމިޓީއިން މިއަދު ވަނީ އެޓާނީ ޖެނެރަލްގެ އޮފީހުގެ ބައެއް ވެރިން މަޖިލީހަށް ހާޒިރު ކުރައްވައި ސުވާލު ކުރައްވާފަ އެވެ.

ތަފްސީލް - އެ ބައްދަލުވުމުގައި ވާހަކަ ދައްކަވަމުން އެޓާނީ ޖެނެރަލްގެ ކައުންސެލް ޖެނެރަލް ފާތުމަތު ހަލީމް ވިދާޅުވީ ފަރަށް އަރައިގެން ކުރި ޖޫރިމަނާގެ ފައިސާ ނުލިބޭތީ އެ ހޯދުމަށް، 2022 ވަނަ އަހަރުން ފެށިގެން މިހާތަނަށް އަށް މައްސަލައެއް އެތަނަށް ހުށަހަޅާފައިވާ ކަމަށެވެ. އޭގެ ތެރޭގައި 100 މިލިޔަނުން ކުރި ޖޫރިމަނާ ފަދަ ބޮޑެތި މައްސަލަތައް ހިމެނެ އެވެ. 

ފާތުމަތު ހަލީމް ވިދާޅުވި ގޮތުގައި، އޭގެ ތެރެއިން ދެ މައްސަލައެއް ފިޔަވައި، ދެން ހުރި މައްސަލަތަކުގައި ދައުވާ ކުރުމަށް މިހާރު ވަނީ ކޯޓަށް ފޮނުވާފަ އެވެ. އެކަމަކު މިހާތަނަށް އެއްވެސް މައްސަލައެއްގައި ކުރިއެރުން ހޯދިފައި ނުވާ ކަމަށް އޭނާ ވިދާޅުވި އެވެ.

ފައިސާ ހޯދުމަށް ކުރިމަތިވާ އެންމެ ބޮޑު އެއް ގޮންޖެހުމަކީ ކައުންސެލް ޖެނެރަލް ވިދާޅުވި ގޮތުގައި މައްސަލައިގައި ދައުވާ ނުކުރެވި އުޅެނިކޮށް، ބޯޓު ފުރައިގެން ދިޔުމެވެ. އެހެންވެ، އެ ބޯޓު އޮތްތަން ހޯދައި، ދައުވާ ރައްދުކުރުމަށް ބޮޑު ތަކުލީފަކަށް ވާކަމަށް އޭނާ ވިދާޅުވި އެވެ.

"މިއީ ވަރަށް ބޮޑު ދައްޗެއް. ކޯޓަށް މައްސަލަ ހުށަހަޅާއިރު އެ ރައްދުވާ ފަރާތަކީ ކޮބައިކަން ބަޔާންކުރަން ޖެހޭ. އެ ފަރާތަށް ދައުވާ ރައްދުކުރެވޭނެ ގޮތް ވެސް ބަޔާން އެބަ ކުރަން ޖެހޭ،" ފާތުމަތު ހަލީމް ވިދާޅުވި އެވެ.

"އެކަމަކު ދައުވާ ރައްދު ކުރަން ބަލާއިރު އަޅުގަނޑުމެންނަކަށް ނޭނގޭ ބޯޓު އޮތް އެޑްރެހެއް، ރައްދު ކުރާނެ ގޮތެއް."

މި ފަދަ މައްސަލަތައް ކުރިއަށް ނުދާ އަނެއް ސަބަބެއްގެ ގޮތުގައި އޭނާ ފާހަގަ ކުރެއްވީ:

އެޓާނީ ޖެނެރަލްގެ އޮފީހުން ބުނީ ތިމާވެއްޓަށް ލިބޭ ގެއްލުމުގެ ބަދަލު ހޯދުމުގައި މިހާރު އަމަލު ކުރަމުން އަންނަނީ މީގެ 30 އަހަރު ކުރިން ހަދާފައިވާ ގާނޫނަކުން ކަމަށެވެ. އެހެންވެ، އެންމެ އެދެވޭ ގޮތެއްގައި އެކަން ކުރުމަށް ގާނޫނަށް ބަދަލުތަކެއް ގެންނަން ޖެހޭ ކަމަށާއި ކަމާ ގުޅޭގޮތުން އިދާރާތަކާއެކު އެކަމަށް މަޝްވަރާ ކުރަމުން އަންނަ ކަމަށް ބުންޏެވެ.

އެނގުން މުހިންމު - ފަރަށް އަރާ ބާޖުތަކާއި ބޯޓުތަކުގެ ސަބަބުން ތިމާވެއްޓަށް ލިބޭ ގެއްލުމުގެ ބަދަލު ހޯދުމަށް ކުރާ ޖޫރިމަނާ ފައިސާ ނުލިބޭ މައްސަލަ އީޕީއޭއިން މީގެ ކުރިން ވެސް ވަނީ ފާހަގަކޮށްފަ އެވެ. މި ފައިސާ ހޯދުމުގައި އެންމެ ބޮޑު މައްސަލައެއްގެ ގޮތުގައި އެތަނުން ފާހަގަކޮށްފައިވަނީ، މައްސަލަ ހިފައިގެން އީޕީއޭއަށް ކޯޓަށް ނުދެވުމެވެ. އެހެންވެ، މައްސަލަ ކުރިއަށް ނުގޮސް ވަރަށް ގިނަ ދުވަސްވާންދެން އޭޖީ އޮފީހުގައި ޕާކުވެފައި އޮންނަކަން އެތަނުން މީގެ ކުރިން ފާހަގަކޮށްފައިވެ އެވެ.