ގޯތީގެ ގުރުނެގުމުގައި ހާމަކަމެއް ނެތް ކަމަށް ބުނެ ހުށަހެޅި ކުއްލި މައްސަލަ ބޭރުކޮށްލައިފި

ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި 'ބިންވެރިޔާ' ސްކީމްގެ ދަށުން ގުޅީފަޅާއި ގިރާވަރުން ގޯތި ލިބުނު މީހުންގެ މެދުގައި ގުރުއަތު ނެގުން އިއްޔެ ގެންގޮސްފައި ވަނީ، ހާމަކަމެއް ނެތް ކަމަށް ބުނެ ކަންބޮޑުވުން ފާޅުކޮށް އިދިކޮޅު އެމްޑީޕީން މިއަދު މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފި އެވެ.

ވީ ކިހިނެއް؟ - މިއަދުގެ މަޖިލިސް ޖަލްސާއަށް އެމްޑީޕީގެ ފަރާތުން މި ކުއްލި މައްސަލަ ހުށަހެޅުއްވީ، ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމް އެވެ. އެ މައްސަލަ ބަލައިގަތުމަށް ފެނޭތޯ ވޯޓަށް އެހުމުން، އެއަށް ތާއީދުކުރެއްވީ އެމްޑީޕީގެ 10 މެންބަރުންނެވެ. މައްސަލަ ބޭރުކޮށްލީ 46 މެންބަރުންގެ ވޯޓާ އެކު އެވެ.

ތަފްސީލު - ކުއްލި މައްސަލައިގައި މީކާއިލް ވިދާޅުވީ، މި ސަރުކާރުން ވެރިކަމާ ހަވާލުވެ، ގުޅީފަޅާއި ގިރާވަރުފަޅުގެ ލޭންޑް ޔޫސް ޕްލޭން ތިން ފަހަރަށް ބަދަލު ގެނައި ކަމަށެވެ. އެއާ އެކު، މިހާރު ގުރުއަތުލުމުގެ ކަންކަން ދަނީ ގޯތި ލިބުނު އޭގެ "ހައްގުވެރިންނަށް އެނގުމަކާ ނުލާ" ކަމަށް އޭނާ ވިދާޅުވި އެވެ. އަދި މިކަން ކުރިއަށް ގެންގޮސްފައި ވަނީ ކޮރަޕްޝަނަށް މަގުފަހިވާ ގޮތަށް ކަމަށް އޭނާ ތުހުމަތު ކުރެެއްވި އެވެ.

"ގޯތީގެ ހައްގުވެރިންނަށް ގުރުނެގުުގައި ބައިވެރިނުވެވޭ ގޮތަށް، ސީދާ މިނިސްޓަރުގެ އޮފިޝަލުން ގުރު ނަގާ ގޮތަށް ހަމަޖެއްސުމަކީ ކޮރަޕްޝަނަށް މަގުފަހިވެ، ގޯތީގެ ހައްގުވެރިންގެ މުދަލަކަށް ނުހައްގުން އަރައިގަތުމުގެ ފުރުސަތު ހުޅުވިގެންދާ ގޮތަށް،" އޭނާ ވިދާޅުވި އެވެ.

"އެއްވެސް ހާމަކަމެއް ނެތް ގޮތަށް އަދި ރައްޔިތުންގެ މެދުގައި ނުތަނަވަސްކަމާއި ޝައްކު އުފެދިގެންދާ ގޮތަށް މިކަން ކުރިއަށް ގެންދިއުމަކީ އެތައް ހާސް ރައްޔިތުންގެ ބޯހިޔަވަހިކަމުގެ ހައްގަށް އުނިކަން އަންނާނެ ކަމެއް."

މީކާއިލް ވިދާޅުވި ގޮތުގައި، ގުރު ނެގުމުގެ ކކަންކަން ކުރިއަށް ގެންގޮސްފައިވާ ގޮތާ މެދު ރައްޔިތުންގެ ތެރެއިން ގިނަ ބައެއްގެ މެދުގައި ކަންބޮޑުވުން އުފެދި މިކަމާ ނުރުހުން ފާޅުކޮށްފައިވެ އެވެ. އޭގެ އިތުރުން ކުރީ ސަރުކާރުން ގޯތި ދީފައިވަނީ ފަޅާއި ކަނޑުން، ވުޖޫދުގައި ނެތް ގޯތިތަކެއް ކަމަށް ބުނެ، ފާޑުކިޔުމަށް ފަހު، "މި ސަރުކާރުން ވެސް އިއްޔެ ގުރުނެގުން ކުރިއަށް ގެންދިޔަ ގޯތިތަކަކީ ވެސް "'ނުހިއްކާ އޮތް ފަޅަކުން' ދީފައިވާ ގޯތިތަކެއް" ކަމަށް އޭނާ ވިދާޅުވި އެވެ.

ބިންވެރިޔާ ސްކީމްގެ ދަށުން ގޯތި ލިބުނު ފަރާތްތަކުގެ "ބޯހިޔާވަހިކަމުގެ ހައްގަށް އުނިކަން އަންނަ ގޮތަށް ސަރުކާރުން ހިންގަމުންދާ އަމަލުތައް" ކުށްވެރިކުރައްވައި މީކާއިލް ގޮވާލެއްވީ، އެ ހައްގު ނިގުޅައިގެންދާ ގޮތަށް ކުރިއަށްދާ ގުރުނެގުމުގެ އިންތިޒާމްތައް ހުއްޓުމަކަށް ގެނެސް، ދެފުށް ފެންނަ ހާމަކަން ބޮޑު ގޮތަކަށް އެކަން ކުރިއަށް ގެންދިޔުމަށެވެ. އަދި އިތުރު ލަސްތަކާކާ ނުލާ ގޯތީގެ ވެރިފަރާތްތަކަށް ގޯތި ހަވަލުކޮށްދިނުމަށެވެ.